Mbete Luk 21
21
1Zezu ƴo ko gel ɓil ila vul kani Ŋgerzah. Ke ko nzuk fe ziŋnari ƴo ɓu fe hi̧na woyri ku̧ ɓil ŋgoro fe hi̧na. 2Dale ke ko wu̧y seh mbew ɓa ko̧hko-u gi ɓu gun lari mbew mbew seɗe ku̧ ri. 3Mí ke ɓahri se : « Ketina, mi ƴo ɓah hi̧ wuri ɓahri, fe hi̧na wu̧y seh-ay ŋgi̧ kal tul fe hi̧na nzuk a a̧wri gbam, 4ɓayu ké nzuk fe ziŋnari-aw, ku kehr nzak fe ziŋna woyri mí gi ku̧. A ye wu̧y seh-ay ba, ɔh tɔr fe ké-e ƴo keni ɓay so mun ye gaŋ mí ke hi̧-aw. »
5Mí nzuk a haniri el ɓah ɓay ndu̧yna kasaw a feluri kú-u mboh vul kani Ŋgerzah ke ɓay gama fe hi̧nari kú-u mbar keni ndɔh kona mbamba#21.5 Ku mboh vul kani Ŋgerzah ke vul nzuk kani a ɓoruri ɓil ila vul kani Ŋgerzah ke kasaw kú-u fel. Kasawri-aw pu puki, ndu̧y pi. Kasaw a haniri hu̧h mah hu̧hna mota pi.. Mí Zezu ɓahri : 6« Kasawuri ké i ko ka̧y tul hani, ka̧y tul hani-aw, nam ƴo gina ké nzukri ɓay haw kasawuri riw ku̧ siɓa. Kasaw mbew ké ɓay toŋ síɓa ta-a. »
7Mí ku vbi ni ɓay ɓahri : « Metere, ɓeɓna a kaŋaw wa, seh suŋ mí ɓay laɓu le ? Fe sɔkna fe mí ɓay sɔk na nam ké ɓeɓna-aw ɓay ti̧h-u le ? »
8Bale Zezu ɓahri : « Í ko-ko rɔkɔ nzuk ɓá hi̧ wuri í reh ful ɓayu ké nzukri ɓa ŋgi̧-u ɓay mbi riŋ ɗina bi ɓahri, a woyri ku ɓa Ŋgermbay. Ku ɓay ɓah kandɔkay : “Sewu ka̧h da.” Dale í si fal woyri ya.
9Gelke i lah ɓay ŋgermuri mini ɓay tusiɓa ké nzukri ur ziŋ haniri le, tem mun woiri ɓá ti̧h ya ɓayu ké na ani ani gaŋ kara ŋgermu-uri ɓay laɓ pol dara. Keni-aw kara sew a ɔh tɔr sewri ta ka̧h ke seh-u ya. »
10Zezu el ɓah ra ɓáy ɓahri : « Sa̧wnzukri ɓay ur ruh ŋgermu ke sa̧wnzuk a ɓoruri. Puh laknari ɓay ruh ŋgermu ke puh lakna a ɓoruri pi. 11Kandɔkaw mí tusiɓa ɓay laŋ yik yik ke gelri ɓoɗ ɓoɗ. Ɗaka bahpihya ɓay lih puh ke gelri ɓoɗ ɓoɗ. Sena a kal haniri ɓay duh nzukri. Fe-se hȩkmeri ke fe saŋ a lukiri ɓay ti̧h ké nunmbam.
12Dara fe-uri ɓá ti̧h le, nzukri ɓay mgba wuri. Ku ɓay laɓ wuri koseh. Ku ndóh wuri ndɔk ŋgernzuk vul misoŋri hi̧ ku laɓ ɓay kan tul woiri, ku mbíh wuri ku̧ vul mgbal, ku kɔ́klɔ wuri si pol mbay tusiɓari ke guvener-ri pi ɓayu ké i ƴo tul riŋ bi. 13Fe-u ɓay mgbur ful hi̧ wuri, í te-teh ɓay bi hi̧ nzukuri ɓá lah. 14Kaŋaw le, í mgba tul woiri. Í nzah lakna ɓay ké i ɓah-u ké pol nzukri ra ya. 15Ɓayu ké a bi mí-i ɓay ndoh ɓay ké i ɓah-u ké nzak woiri, mi hí̧ wuri ru̧na. Nzukbaa woiri ɓay ta mba tul woiri ke ɓay ya, ku ta ma̧y nzak woiri ya pi. 16Bah woiri ke mah woiri, yi̧n woiri, nzuk in woiri, ya̧h woiri, a woyri ku ɓay te wuri. Ku ɓay i nzuk a haniri ké sakra woiri. 17Nzukri gbam ɓay fu̧y wuri ɓayu ké i ƴo tul riŋ bi. 18Mí pirmatul woiri mbew ta zi ya. 19Kandɔkaw mí su̧hlaw woiri hi̧ wuri i ziŋ fe woiri.
20Gelke i ko nzuk ŋgermuri gi ɗoŋ Zurusalem gbuk dale, í tu ɓahri se, dirna Zurusalem toŋ ɗih ya. 21Wara mí nzukri ké puh gun Izarayelri, a woyri ku-u ƴo tusiɓa Zude le, kú ɗuk ma tul kasawri, a woyri ku-u ƴo Zurusalem ɓá ɗuk ma ɓil suy, a woyri ku-u ƴo ɓil suy ɓá rih gi Zurusalem ya. 22Ɓay fe le namri-aw ɓa nam-kuŋ salɓay. Ɓayuri kú-u vbeh ɓil mbete Ŋgerzah ƴo laɓ ɔh ke gelu. 23Kúy. Namaw ra mah ɓilri ke mah gun nzak pamri ɓay ko seh mbamba ɓayu ké koseh a luki ɓil namri-aw ɓay toh tusiɓa-ay, vba̧na ɓay toh tul gun Izarayelri ké tusiɓa-ay. 24Ku líh hul ke mahwu̧y. Nzukri ɓay mgba niri, mí ku zikri ké tusiɓa sa̧wnzuk a ɓoruri gbam ɓa mgbal. Zurusalem ba, ɓay na ɓa gel ké sa̧wnzuk a ɓoruri ndakla kpu̧ru si ka̧h sew ké lák mbay sa̧wnzuk a ɓoruri-aw ɓá tuŋ gbu̧h-u.
25Kandɔkaw mí fe saŋri ɓay laɓ ké gunwu̧y nunmbamri pi, ké few pi, ké seh pi. Ké tusiɓa gbam sa̧wnzukri ɓay nuŋ nzak rim woyri ɓay tul mahmbihri ké mgbe girim girim el laŋ baŋlaŋ baŋlaŋ. 26Hȩkme fe saŋri-aw ke kerɓay feri ké ƴo ti̧h tul woyri ɓay ha̧m niri kpɔrsɔ ɓayu ké ŋgerna fe nunmbamri mí laŋ yik yik.
27Wara mí gun nzuk pirmatul ɓay ti̧h nun nzukri, ke ƴo gina ɓil ɗikmambam ke ŋgerna mbay ye ɓil riŋ ɗina a luki. 28Tul fe-uri ti̧h yol dale, í ƴo wuri síɓa kparak, í ɔr tul woiri ɓay fe le, nam selna woiri ké ndɔk tukala ka̧h da. »
29Zezu el ɓah lawɓay ɓahri : « Í hekre kpuh nzu̧y ke kpuh a ɓoruri, í ko. 30Gelke kpuhri tuŋ mí el loŋ gay le, i tu ɓahri, nzak mbam ka̧h da. 31Kaŋ pi mí gelke i ko feri-aw ti̧h le, í tu ɓahri se, puh lakna Ŋgerzah ka̧h da. 32Ɓa ketina, mi ƴo ɓah hi̧ wuri ɓahri, gun tukala-ayri ta kal ya, feri-aw gbam ɓay ti̧h dara ɓáy. 33Nunmbam ke tusiɓa ɓay ka-kal, mí ɓay biri ba, ɓay na kpatara.
34-35Í mgba mun woiri rɔkɔ law woiri ɓá ker ɓay nday yim mini ɓay nzo yim mini ɓay su̧ fe tukalari, namu-aw gi ti̧h tul woiri gbus le, ɓay mgba wuri kandɔk ndaw. Namu-aw ra ɓay toh tul nzukri riw ɔh ké tusiɓa gbam. 36Í kaɓ ke nzakbɔk, í goŋ Ŋgerzah mgbiŋriŋ ɓay huhrumun woiri ɓá kpuh hi̧ í ti̧h ke ɓil fe-awri ké ɓay la-laɓ, í goŋ ni huhrumun ɓay hi̧ í ƴo pol gun nzuk pirmatul ra pi. »
37Kandɔkaw mí Zezu ƴo firma nzukri ke namri-aw ɓil ila vul kani Ŋgerzah. Suŋ ba, ke ƴo ti̧h si na tul kasaw kú-u ɗi ɓa kasaw Oliveh. 38Tipele teh le nzukri gbam mbu̧h ma ta̧w ye ɓil ila vul kani Ŋgerzah ƴo lah ɓay ye.
Одоогоор Сонгогдсон:
Mbete Luk 21: SIAFNK
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Wycliffe Bible Translators, Inc. All rights reserved.
