Mbete Luk 19
19
1Zezu rih ɓil Zeriko. Ke sak sina kparak ke ful ɓil ka̧w puh. 2Nzuk a hani mbew ƴo ri. Riŋ ye ɓa Zase. Ke ɓa ŋgernzuk nzuk-mbu̧h lampohri. Fe ziŋna ye ƴo ri. 3Ke taw ɓay ko a ge mí ɓa Zezu ra le ? Ɓay daɓa nzukri mí kó Zezu mba ni ɓay fe le, ke ɓa gɔzi. 4Dale ke ɗuk kal pol si hil sam kpuh nzu̧y ké ɓa sikomor kaɓ ri geŋ ɓay ko ni. Ke ɓahri se, Zezu ɓay kal ke fulay. 5Zezu ɓá ka̧h bɔk kpuh ra le, ke ɔr nun ye ko ni síɓa, mí ke ɓahri : « Zase, mú ɗer ɓa gah-u. Guri gaŋ, mi na puh wo na-na. »
6Zase ɗer ɓa gah-u gaŋ ba. Ke mgba Zezu gahru ndɔk seɗe ke law rihna. 7Nzukri ko. Mí gbam woyri ku ŋgu̧hru ɓay ɓahri se : « Ké puh suya nzuk mí ke lu ta̧hma ye le ? »
8Mí Zase ur síɓa ƴo nzak fe su̧na, ke el ɓah hi̧ Gaŋ tul feri riw ɓahri : « Ŋgernzuk, í ko. Fe ziŋna biri mi kéhr gel seɗe. Kehrna gel a mbewu mi hí̧ ko̧hkori. Mi gɔɓrɔ ra fe nzuk le, mi él keni hi̧ ni soh ri gel niŋ. »
9Zezu ba, ɓah hi̧ ni ɓahri : « Guri gaŋ, nzuk kerpuh-ayri ti̧h ke ndɔk hul. Ɓay fe le a ye-ay kara ke ɓa gun zih Abaraham pi. 10Sa̧wu mí gun nzuk pirmatul gi. Ke ƴo ƴah nzukri ké zi-zi ɓay ya̧ niri ke ndɔk hul. »
11-12Nzukri ƴo lah ɓayri ké Zezu ɓah, mí ke el ɓah ɓay a ɓoru ke lawɓay ɓay fe le, ke ɗih ya ɓay ka̧h Zurusalem, mí nzukri-aw ker ɓahri, zah le, puh lakna Ŋgerzah ɓay ti̧h wara. A ye bale ke ɓahri : « Nzuk a hani mbew, sa̧w ye ɓa sa̧w mbay. Ke ti̧h si puh a ɗih-u ɓay ndoh gay mbay dara ké el gi puh ɓáy. 13Tɔrna ye dale, ke ɗi gun-laɓ pihna yeri ɓa boh. Ke wal niri lari ké mah ke lari pihna few niŋ niŋ#19.13 Sa̧w nzak gerek vbeh ɓahri, ke wal niri mina boh. Mina mbew mah ke lari pihna few say ye le, few niŋ. . Ke ɓahri : “Í ya̧ wuri lari-ay, í sɔɓ nunu geŋ elna bi.”
14Nzuk sa̧w puh yeri fu̧y ni fu̧y, mí ku pih ŋgernzukri fal ye si ɓah, a woyri-aw, ku sa ɓay ké lak mbay tul woyri ya.
15Bol fal ndóh gay mbay ye bale, ke el gi puh, mí ke ɗi gun-laɓ pihna yeri ké-e ndoh lari ndɔk woyri mbew mbew gbam kú gi, kú ki̧ mbihlari-u, ké ko. 16Mí gun-laɓ pihna a titilu ɓah : “Mbay, lari ké i hi̧ mi ra, mi ziŋ a mbaŋu ɓa boh dɔm tulu mí na-ay.”
17Mbay pir ni ɓahri : “Su-su, mu ɓa gun-laɓ pihna a suki ɓay fe le, mu mgba sa̧w fe bi a ndi̧ ɓa suki. Mú ya̧ puhri boh, mú lak mbay tulu.”
18Gun-laɓ pihna a seɗe-u gi ɓahri : “Mbay, lari ké i hi̧ mi ra, mi ɗam ziŋ a mbaŋu ɓa ndiɓi dɔm tulu mí na-ay.”
19Mbay ba, pir ni ɓahri : “A wo bale mú lak mbay tul puhri ndiɓi.”
20Mí gun-laɓ pihna a ɓoru gi ɓahri : “Mbay, í ko lari woiri mí na-ay. Mi ŋga̧h na nzak garay mí-i mbek. 21Mi ɗuk hȩkme woiri ɓahri se, mbayay da kpuh mbamba. Gel ké-e laɓ fe hani ya kara ke ziŋ fe ké ri. Waka ké-e ruh fe ya kara ke ziŋ fe pay.”
22Mbay ɓah hi̧ ni ɓahri : “A wo-ay, ke nzak wo gaŋ mí mi ko mu ɓa gun-laɓ pihna law a pipiri-u. Mu tu mi ɓa nzuk ké kpuh mbamba. Gel ké mi laɓ fe hani ya kara mi ziŋ ri fe. Waka ké mi ruh ya kara mi ziŋ ri fe pay ra wa, 23ɓay fe mú-u poŋ lari bi-ay hi̧ nzuk-ɗa̧m lari sɔɓ nunu ya le wo ? Mu poŋ ra lari hi̧ nzukaw le, elna bi-ay, mi zíŋ mbihlari dɔm tulu ɓáy.”
24Ke el ɓah hi̧ gun-laɓ pihnari ké ƴo ɓel ye ɓahri se : “Í nah wuri lari ra ke ndɔk ye, í el hi̧ nzuk a a̧y ké ƴo ke lari ɓa boh-aw.”
25Mí ku vbi ni ɓahri : “Gaŋ wah, nzukay ƴo ke lari ɓa boh wa, ani le ?”
26Kandɔkaw mí Zezu ɓah keni ɓay : “Mi ƴo ɓah hi̧ wuri ɓahri se, nzuk a suŋ suŋ gbam ké ko fal fe ké mbay ndoh ndɔk ye ɓa suki le, mbay ɓay hi̧ ni a ɓoru dɔm ri ɓáy. Mí nzuk a a̧y ké hi̧ fe mbay ti̧h suk ya le, fe a ndi̧ ké na ndɔk ye ra ku ɓay nah kpɔɗ. 27Aŋay wara mí ɓay nzukbaa biri ké sa ɓay mí lak mbay tul woyri ya-aw, í si mgba niri gi keni, í i niri ké pol bi-ay.” »
28Ɓay ké Zezu ɓah-aw ke ƴo tul sina ƴo hil ma Zurusalem.
29Zezu ka̧h Beɗfaze ke Beɗtani. Puh-uri na fál kasaw kú-u ɗi ɓa kasaw Oliveh. Dale ke pih nzuk-dih fal yeri seɗe si pol. 30Ke ɓahri se : « Í si puh ké na pol woiri sa̧-aw. Ka̧hna woiri le, i ɓay ko gun bamnde kú-u ŋga̧h ƴo. Nzuk kaɓ tulu bɔk mbew ya ɓáy. Í sel gi keni hi̧ mi. 31Nzuk vbi wuri ɓay fe mí i sel gun bamnde le, í ɓahri, gaŋ bamnde-u mí yih ɓayu. »
32Kandɔkaw mí gun nzak pihnari tɔr. Ku ka̧h, ku ko gun bamnde-u kandɔk ké-e ɓah ra. 33Ku sel ba, mí nzuk bamnde-u vbi ɓahri : « Ɓay fe mí i sel bamnde-ay le ? »
34Ku ɓahri, gaŋ bamnde-u mí yih ɓayu.
35Mí ku el keni gi ta̧w Zezu. Ku mbala gar woyri ku̧ tul bamnde ra, mí ku mbi Zezu kaɓ ri#19.35 Zezu rih ɓil Zurusalem ké tul bamnde. Ké ta̧w ziɓri, mbay rih puh ké tul ɗeŋe le, ke gi ke ŋgermu. Mbay rih puh ké tul bamnde bale, ke gi ke ɗeŋ. Í mgba Mbete Zacharie 9.9 tuh ke gel ki̧na-ay.. 36-37Ku si ma Zurusalem dale, nzuk-dih fal yeri fih gar woyri ku̧ ke ful ful#19.36-37 Í mgba Mbete 2 Rois 9.13 tuh ke gel ki̧na-ay.. Ke ka̧h tul ful ké ɗer ke kasaw Oliveh ɓay si ma Zurusalem ba, daɓa nzuk-dih fal yeri ɓa ŋgi̧-u laɓ mun rihna. Ku ƴo loŋ riŋ Ŋgerzah ke kusol a mgbe-u ɓay fe saŋri gbam kú-u ko. 38Ku ɓahri : Mgbɔkɔ Gaŋ tul feri riw ku̧ tul Ŋgermbay ké gi ke riŋ ɗina Gaŋ tul feri riw. Ɗeŋ na nunmbam. Riŋ ɗina ye mgbe si ka̧h nunmbam a síɓa sa̧#19.38 Gel ki̧na-u na ɓil Mbete Siŋ (Psaumes) 118.26..
39Farizi a haniri ƴo sakra daɓa nzukri-aw, mí ku ɓah hi̧ Zezu ɓahri : « Metere, mú hah gun likɔl wori ra. »
40Zezu fer nzak woyri ɓahri : « Mi ƴo ɓah ɓayay hi̧ wuri, ku ɔk ra nzak woyri le, kasawri-ay ɓay vba̧ nzak soh bol woyri. »
41Zezu ɓá duh tul ko tul puh-u bale, ke vuh rew tulu ɓahri : 42« Zurusalem, Zurusalem wo, mu tu ra namay tu-tu le, a wo mú-u tú fe a a̧yri ké ƴo hi̧ ɗeŋ gi ta̧w wo, mí fe-uri mu̧h nun wo wara. 43Nam wori ka̧h, mí nzukbaa wori ɓay laɓ ŋgalaŋ ɗoŋ tul wo gbuk. Ku nzú̧h gun wori. 44Ku ndíh mu ke gun wori ké kaɓ puh wo. Kasawri ké ka̧y tul hani ké vul fe puhna Ŋgerzah, nzukri ɓay haw kasawuri riw ku̧ siɓa ɓay fe le, mu sa tu nam ké nzuk-ko tul wo gi ra ya. »
45Zezu ka̧h Zurusalem, ke si rih ɓil ila vul kani Ŋgerzah, wara mí ke ni̧h nzuk-yeh fe puhnari. 46Ke ɓahri se : « Ŋgerzah ɓah ɓil mbete ye ɓahri, vul ye ɓa vul-ɓah ɓay ziŋ ni#19.46 Gel ki̧na-u na ɓil Mbete Esaïe 56.7.. A woiri ba, i sɔɓ gelu ɓa hoh nam riɓari. »
47Ke namuri-aw, Zezu ƴo ɓil ila vul kani Ŋgerzah ƴo firma ɓay lák mbay Ŋgerzah hi̧ gun Izarayelri lah. Ŋgernzuk woyri ke ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ba, ƴah ful ɓay i ni. 48Mí ku ziŋ ful ya, ɓayu ké gun Izarayelri gbam ƴo ɗekeke te suk woyri ƴo lah ɓay ye.
Одоогоор Сонгогдсон:
Mbete Luk 19: SIAFNK
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Wycliffe Bible Translators, Inc. All rights reserved.
