Mbete Za̧h 7
7
1Bol falu Zezu ha̧rma ké tusiɓa Galile ɓayu ké-e sa ha̧rma tusiɓa Zude ya ɓay fe le, ŋgernzuk ziɓri ké Zude ƴah ful ɓay i ni. 2Nam ti̧hmbih-pɔr vulri#7.2 Ɓay ti̧hmbih-pɔr vulri na ɓil Mbete Lévitique 23.34-36, 39-43. Ɓayu na ɓil glossaire pi. toŋ ɗih mba dale, 3yi̧n Zezuri ɓah hi̧ ni ɓahri : « Mú tɔr si Zude ɓay hi̧ nzuk-dih fal wori kara ɓá ko fe laɓna wori ké ri pi. 4Nzuk ké taw ɓay hi̧ riŋ ye ɓá mgbe le, laɓ fe ké duh gel ya. Kandɔk ké mu ƴo laɓ fe wori, mú si sɔk mun wo ma gel daɓa hi̧ nzukri riw ɓá ko. »
5Yi̧n yeri ɓah kaŋ ɓayu ké ku kan law tul ye ya.
6Zezu ba, ɓah : « Nam bi ka̧h ya ɓáy. A woiri ba, namri riway ɓa nam woiri. 7Nzuk tukalari ta fu̧y wuri ya. A bi le ku fu̧y mi fu̧y ɓay fe le, mi ten tehɓay fe laɓna a pipiri-u woyri. 8Í tɔr wuri hil si gel ti̧hmbih-pɔr vulri ra. A bi ba, mi si gel ti̧hmbih-aw ya ɓay fe le, nam bi ka̧h ya ɓáy. »
9Ké-e ɓah kaŋaw bale, ke kaɓ sa Galile.
10Yi̧n Zezuri tɔr, ku hil si gel ti̧hmbih-pɔr vulri ra bale, Zezu ur hil si fá-fal woyri, mí ke sɔk mun ye ya. 11Ziɓ Zuderi ba, ƴo ƴah ni ké gel ti̧hmbih-aw ra ɓahri se, ke ƴo suŋ le ? 12Ɓay riŋ ye, ŋgi̧na nzukri fah ɓayu yi̧m yi̧m. Nzuk a haniri ɓahri, ke ɓa nzuk a suki. Nzuk a ɓoruri ba, ɓahri se, ke ɓa nzuk a suya-u. Ke ƴo rah nzukri ɓay vbol ful#7.12 Í mgba Mbete Deutéronome 13.1-5a tuh ke gel ki̧na-ay. Ɓayu sɔk ɓahri, gun nzak pihna ké rah nzukri dim záh a ɓoruri le, kú i ni. . 13Kusol ziɓ mbew ɓah ɓay Zezu ɓa teh-u ya ɓay hȩkme ŋgernzuk woyri se niri.
14Namri ké dimasi ti̧hmbih-pɔr vul ra kal ka̧h nam a haŋsekle-u bale, Zezu rih ɓil ila vul kani Ŋgerzah ƴo sɔk ziɓri ɓay Ŋgerzah. 15Sɔkɓay Ŋgerzah ye na niri yer. Ku ɓahri : « A ye-ay, ke firma fe ké ta̧w nzuk goso mbete Ŋgerzahri ya wa, fál suŋ mí ke tih ke fe vbehna bolkusol Ŋgerzah-uri le ? »
16Mí Zezu yih nzak woyri, ke ɓahri se : « Bolkusol ké mi ƴo ɓah hi̧ wuri-ay ta ɓa bolkusol bi ya, ɓa bolkusol nzuk-pih mi. 17Nzuk yih laɓ fe ké Ŋgerzah yih le, ke tú sa̧wɓay fe sɔkna biri. Ɓayuri ur ké ta̧w Ŋgerzah mini mi ɓah ke tul bi le ? 18Nzuk ɓah ɓay ke tul ye le, taw riŋ ɗina tul ye. Nzuk taw riŋ ɗina tul nzuk ké pih ni ye le, nzuku ɓah ketina, ke ƴo mbew ke nzuk-pih ni. 19Moyiz mí vbeh mbete bolkusol Ŋgerzah hi̧ wuri wa, ani mí nzuk mbew ké sakra woiri ƴo tul bolkusolu ya le ? Ɓay fe mí i ƴah ful ɓay i mi le ? »
20Bale daɓa nzukri fer ɓay ɓahri : « Eh mí ɗuk mu. A ge mí ƴah ful ɓay i mu le ? »
21Mí Zezu yih nzak woyri ɓahri se : « Mi laɓ fe a hani mbew ke nam ɔkna mí na wuri yer. 22Mí ɓay bolkusol-kuŋ ndi̧w ké Moyiz hi̧ ɓay í laɓ, mí i ƴo kuŋ ndi̧w gunri ke nam ɔkna. (Sa̧w bolkusol-kuŋ ndi̧w ur ké ta̧w Moyiz ya, sa̧wu ti ke tul zih ziɓri dara mí fe vbehna Moyiz ti̧h ɓáy.) 23I ƴo kuŋ ndi̧w gunri ke nam ɔkna ɓay laɓ bolkusol Moyiz wa, ani mí law woiri si̧h ké tul bi ɓay fe le, mi gah mun nzuk sena kew kew ke nam ɔkna le ? 24Í mbi kerɓay woiri kuŋ salɓay kan tul nzuk ya. Í kuŋ salɓay ké si ke bolkusol Ŋgerzah ma. »
25Ziɓ Zurusalem a hani-uri ƴo ɓahri : « Nzukay da ɓa a ye-ay ku ƴah ful ɓay i ni mi na-ay wa, ani le ? 26Í ko, ke ƴo ɓah ɓay ɓa teh-u hi̧ nzukri, mí nzuk-el ke ɓay hi̧ ni mbew ta-a. Ko ya le, ŋgernzukri tu ni, ke ɓa Ŋgermbay a ketina gaŋ wa, ani le ? 27Seh gina Ŋgermbay le, nzuk ɓay tu sa̧w ye ya. A ye-ay ba, nah tu sa̧w ye tu. »
28Zezu ba, ƴo sɔk niri ɓay Ŋgerzah ké ɓil ila vul kani Ŋgerzah, mí ke ɓah hi̧ niri ɓa mgbe-u ɓahri : « I tu mi, i tu sa̧w bi pi. Mi gi ke tul mun bi ya. Le nzuk ké pih mi gi ra ɓa nzuk a ketina, mí i tu ni ya. 29A bi ba, mi tu ni tu ɓay fe le, mi ti̧h ké ta̧w ye a ye ké-e pih mi gi. »
30Kandɔkaw mí ku ƴah ful ɓay mgba ni, mí ndɔk nzuk mbew za ni ya dih ɓay fe le, nam ye ka̧h ya ɓáy.
31Nzuk a haniri ɓa ŋgi̧-u ƴo kan law tul ye ɓahri : « Seh gina Ŋgermbay le ke láɓ fe saŋri ké ŋger kal tul fe saŋri ké nzukay laɓ ra ɓáy lo ? »
32Fariziri lah ɓay ké daɓa nzukri ƴo ɓah yi̧m yi̧m si tul Zezu kaŋ, mí ŋgernzuk fe puhna Ŋgerzah ke fariziri pih sozeri ké kɔr gel vul kani Ŋgerzah ɓá si mgba ni. 33Zezu ba, ɓahri : « Mi ƴó ziŋ wuri, zah dara mi él si ta̧w nzuk-pih mi ɓáy. 34I ƴáh mi, mí i ta ziŋ mi mba. I mah si gel ké mi sí ri ra ya pi. »
35Mí ŋgernzuk ziɓri ɓah ké sakra woyri ɓahri : « Ke tɔ́r ma suŋ mí nah ɓay ta ziŋ ni ya le ? Ke tɔ́r ma tusiɓa sa̧wnzuk a ɓoruri ɓay sɔk ɓay Ŋgerzah hi̧ ziɓri ké ƴo kala fál sa̧-aw le ? 36Ɓay ké-e ɓahri se, nah ƴáh ni, mí nah ɓay ziŋ ni ya. Nah mah si gel ké-e sí ri ya ra wa, ɓayu yih ɓah ani munu le ? »
37Nam a ɔh tɔru ɓil dimasi ti̧hmbih-pɔr vulri ra ɓa nam a luki. Nzuk fe puhnari ƴo aŋ mbih ké sɔk ɓay ɔkna ku̧ hoh fe ɓel gel fe puhna bale#7.37 Ɓay nzuk fe puhnari ƴo aŋ mbih ké sɔk ɓay ɔkna ku̧ hoh fe ɓel gel fe puhna ta ɓil sa̧w nzak ya. Mí ɓay hi̧ karaŋri ɓá lah ɓay fe mí Za̧h vbeh ɓahri, Nam a ɔh tɔru ɓil dimasi ti̧hmbih-pɔr vulri ra ɓa nam a luki le, nah ten kerɓay ɓay hi̧ karaŋri ɓá lah ɓil ɓay ɓahna Zezu ké-e ɓah ɓeleŋ ra., Zezu ur ƴo síɓa ké haŋsekle daɓa nzukri, mí ke ɓah ɓay ɓeleŋ ɓahri : « Kɔkmbih i nzuk a suŋ suŋ le, nzuku ɓá gi ta̧w bi, ké nzo. 38Nzuk kan law sa tul bi le, law nzuku ɓay ti̧h ɓa mbihlaw mí mbih ɔkna ɓay lu ké ri ɓuɗ ɓuɗ. »
39Ɓayaw ké Zezu ɓah ra ɓah ɓay tul Tempuki ké nzuk-kan law tul ye ɓay ya̧-u. Tempuki ra gi ya ɓáy ɓay fe le, riŋ ɗina Zezu mgbe ya ɓáy.
40Daɓa nzukri lah ɓay ké Zezu ɓah kaŋ bale, nzuk a haniri ƴo ɓahri : « Nzukay ɓa gun nzak pihna Ŋgerzah ké soh gel Moyiz ra ɓa ketina#7.40 Ɓay tu ɓay gun nzak pihna Ŋgerzah a mbewu-aw ké eŋ Moyiz ra ké ziɓri ƴo geŋu, í ki̧ Mbete Deutéronome 18.15-19.. »
41Nzuk a ɓoruri ɓah : « Ke ɓa Ŋgermbay. »
Nzuk a haniri ba, ɓahri : « Ŋgermbay ɓay ur ke tusiɓa Galile lo ? 42Mbete Ŋgerzah sɔk ɓahri se, sa̧w mi̧hri Ŋgermbay ɓa Daviɗ mbay a luki, mí sa̧w puh ye ɓa Beɗlehem sa̧w puh kaɓna Daviɗ mbay a luki wa, ani le ? »
43Kaŋ mí ziɓri kehr hani ɓay tul Zezu. 44Nzuk a haniri yih ɓay mgba ni, mí ndɔk nzuk mbew za ni ya dih.
45Soze-kɔr vul kaniri ra el si ta̧w ŋgernzuk fe puhna Ŋgerzah ke fariziri, mí ku vbi sozeri ɓahri : « Ɓay fe mí i mgba ni gi keni ya le ? »
46Soze-kɔr vul kaniri ra yih nzak woyri ɓahri : « Nzuk ké ɓah ɓay mah ke nzukaw mbew ta-a. »
47Fariziri ba, yih nzak woyri ɓahri : « A woiri kara i vbol mahful da pi le ? 48Í sɔk na ŋgernzuk mini farizi a suŋ mí kan law tul ye lo ? 49Daɓa nzuk a garuri-aw, ku tu mbete bolkusol Ŋgerzah ya, mí nazi-u ta tul woyri. »
50Dale Nikodem a ye ké-e si ta̧w Zezu ke suŋ ra ke ƴo sakra ŋgernzuk ziɓri, 51mí ke ɓah : « Bolkusol Ŋgerzah sɔk ɓahri, náh lah ɓay nzuk, náh fakla ɓay fe laɓna ye dara mí náh kuŋ salɓay kan tul nzuku ɓáy wa, ani le ? »
52Mí ku fer nzak ye kandɔkay : « A wo kara mu ɓa nzuk Galile pi lo ? Mú hekre ɓil mbete Ŋgerzah ɓa ɗih-u mú ko, gun nzak pihna Ŋgerzahri ur ke Galile ya. »
53Nzukri gbakra hani. A ge ge le tɔr si puh ye puh ye.
Одоогоор Сонгогдсон:
Mbete Za̧h 7: SIAFNK
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Wycliffe Bible Translators, Inc. All rights reserved.