Akisiakinet 1
1
Eger lo asubere akwap
1Kolong anakisiakinet, asubuni Akuj adis ka akwap.#1:1 Kolong ... adis ka akwap; kori Na esiakinea Akuj akisub adis ka akwap. 2Amam ibore ekwaanatar akwap, peapedorio atamar erai akwap nyo. Aribokinit ngakipi na aburuchiarito ibore daang. Alosi Etau a Akuj#1:2 Etau a Akuj; kori agogongu a Akuj, kori ekuwam a Akuj. alokidiama ngakipi. 3#2 Kor 4:6 Sodi tolim Akuj tama, “Ejoikinit akicha emini.” Min akicha. 4Sodi kingolik Akuj atamar ejok akicha. Totiak Akuj akicha ka aribu. 5Tanyara Akuj akicha Apaaran, ani aribu tanyara Akwaar. Toliwor ibore atabong ka ataparach, a akolongit ana a ekingaren.
6Sodi tolim Akuj tama, “Ejoikinit emini atorite kiding ngakipi na etiaki ngakipi ngatiaket ngaarei.” 7Tosubak Akuj atorite ngina sodi totiak ngakipi na ayakasi kidiama atorite ka ngakipi na ayakasi kwap keng. Tosubakin nguna loger ngolo. 8#2 Pet 3:5 Sodi tanyara Akuj atorite ngina Adis. Toliwor ibore atabong ka ataparach, a akolongit ana a ngaarei.
9Sodi tolim Akuj tama, “Ejoikinit ngakipi na eyakasi kwap adis echunakinosi wapei tatakanu akwap nakoonon.” Sodi tosubakin nguna loger ngolo. 10Tanyara Akuj nikoonon Akwap, ani ngakipi na achunakina wapei tanyara Anam. Kingolik Akuj nguna atamar ejokak. 11Sodi tolim Akuj tama, “Ejoikinit akwap elibuni, toruput ngikito lu eyakasi ngichok, nabo toruput ngikito lua ageor ka luche. Toruput ngikito lugelagelae anakwap a eger kech.” Sodi tosubakin nguna loger ngolo. 12Tolibu akwap ngaukea ngagelagelae a ngikito. Toruput ngikinyam lu itao namanat ka ngikito a ageor, ta ngikito luche lua ngichok. Sodi kingolik Akuj nguna atamar ejokak. 13Toliwor ibore atabong ka ataparach, a akolongit ana a ngauni.
14Sodi tolim Akuj tama, “Ejoikinit epete ngiborei lu echayete natorite a adis totiaka apaaran ka akwaar. Toliworos kesi eyenere ngirwa ka ngikaru. 15Echayete kesi anatorite a adis minio akicha nakwap.” Sodi tosubakin nguna loger ngolo. 16Tosubak Akuj ngiborei lu echayete luapolok ngiarei, topolok akolong apaaran, topolok elap akwaar. Tosubak tani ngikanyer. 17Kiwaak Akuj ngiborei lu echayete ngulu natorite a adis, sodi kinwakut akwap 18ka apolokin apaaran ka akwaar nabo totiaka akicha ka aribu. Sodi kingolik Akuj nguna atamar ejokak. 19Toliwor ibore atabong ka ataparach a akolongit ana a ngoomwon.
20Sodi tolim Akuj tama, “Ejoikinit ngiborei lu eyarete ilelebun nakipi, nabo ejoikinit ngikieny eporito anatorite a adis ana eyei kidiama akwap.” 21Sodi tosubak Akuj ngitieng luapolok a anam ka ngiborei daang lu eyarete lu eyakasi nakipi, ta ngikieny daang. Sodi kingolik Akuj nguna atamar ejokak. 22Topia Akuj kesi tama, “Ngiborei daang lu iyakasi nakipi, toureta kileleba anam.” Tolimok ngikieny atamar talalakearos anakwap. 23Toliwor ibore atabong ka ataparach, a akolongit ana a ngakan.
24Tolim Akuj tama, “Ejoikinit akwap ilelebun ngitieng lu eyarete lugelagelae lu ikote ngibaren ka ngiborei lu eliato ta ngitieng lu alomoding.” Sodi tosubakin nguna loger ngolo. 25Tosubak Akuj etiengit a moding a eger keng, ani ibarasit tosubak a eger keng, ani ibore daang ni eliat tosubak a eger keng. Sodi kingolik Akuj nguna atamar ejokak.
26 #
1 Kor 11:7 Sodi tolim Akuj tama, “Atosubakisi itwaan kikwaanikin ka ngoni, sodi topolok ngikolia, ka ngikieny, ka ngitieng, ka akwap daang, ta ibore cha daang ni eliat alokwap.”#1:26 ngikolia, ka ngikieny, ka ngitieng, ka akwap daang, ta ibore cha daang ni eliat alokwap; Igiritae nakitab ache nangorot ngitieng lu eraakasi ngibaren ka lua alomoding. Ani a Ngaeburaniae, eraakasi ngibaren ka akwap daang. 27#Mat 19:4; Mar 10:6 Sodi tosubak Akuj itwaan ikwaan ka ngesi. Tosubak Akuj ekile ka aberu. 28#Siak 5:1-2 Topia Akuj kesi, sodi tolimok tama, “Toureta, talalaketa nabo topetakinos wadaang, toreut ibore daang. Topolokisi ngikolia, ka ngikieny, ta ngiborei daang lu eliato analup.” 29Tolim Akuj tama, “Kingolik a, kainak ayong iyong ekitoe daang lo eyei nakwap lo ekoniununi echokit, ta ekitoe daang a ageor lo eyei echokit. Eliworosi akimuj kus. 30Ani etiengit daang lo eyei nakwap, ka ikeny daang, ta ibore daang ni eliat nabo tarai ni eyari, nginyia kesi eliworosi akimuj kech.” Tosubakin nguna loger ngolo. 31Taanyunga Akuj ibore daang ni asubi ngesi kingolik atamar ejok noi. Toliwor ibore atabong ka ataparach a akolongit ana ngakan-kapei.
Одоогоор Сонгогдсон:
Akisiakinet 1: ABIBILIA
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
BIBLE SOCIETY OF KENYA (c) 1999
