Luuka 24
24
Osisimuwa wa Yinsa
1Jumwa-phiili supuyeene, aakha apale khusala alawa okhapuri athuuliye mafuttha oonukhela apale aattaliyeeyo. 2Yo noofiya khoona liwe ntthile laafukaniweeyo nlako wa khapuri liri loolaziwavo. 3Nooviramo, mwiili wa Mbwana Yinsa khuhisikanimo. 4Khwiiya oozinkuwa venkivene, attaaphale khuwaapuwelela atthu awiri awaliye kuwo zawaara. 5Aakha apale khuwaapattha woova khukokhora khufiyisa ajihi zaya vathi, atthu apale khusala awoozela yoori: “Mwinimweekesela ni ntthu wawoona vakatthi wa ananfwa? 6Ye khaamo mphu, asisimuwa. Muupuwele mattakhuzi apale awuuziyeenini ari nti wa Kalileya! 7Aalupiye yoori: ‘Mwaana wa Pinaatamu ona ya winkheleliwa mmakhono wa anatwampi, akhomeliwe vansalapa, siikhu ya ttaatthu asisimuwe.’ ” 8Aphano aakha apale khuupuwela mattakhuzi apale aalupiyeeyo Yinsa.
9Nooruti okhapuri okhule, khuwooza vitthu epile zooshi anakhiyoni apale khumi na mmote na atthu apale akinoko aariivo. 10Aakha aari Mariyamu Mataleena, Zhuwaana na Mariyamu mamaawe Tiyaaku na aakha akinoko aalawaniyeeyo ottuukhu. Yo khuwooza maaswihaapa vitthu epile. 11Ila maaswihaapa khuhisala akhupali mattakhuzi a aakha apale, oonaka yoori aari oololo. 12Aphano Pheeturu khulankha khusala atthira alawaka okhapuri, noofiya khuthurumelamo khusikanamo joora, khusala aruti ari wootikinisiwa khwa epile zaarettikhaniyeezo.
Anakhiyoni eettaka Emawu
13Siikhu ethiitile, anakhiyoni awiri a Yinsa khulankha khusala alawa nti waari wiitthiwaaye Emawu, woolepelana Yeruzaleemu kiyasi ya phiima alufu khumi na moote. 14Yo aari olawa attakhulaka monkoni wa vitthu epile zaarettikhaniyeezo. 15Eettaka olawa etthiipile apiyaka mwaasa na akheetisanaka, Yinsa mweenyeweene khuwaattama khusala alawa vamote na yo. 16Ila yo khumpuwa nkhama oowaariipa omaasho, khuhisala anjuwa yoori Yinsa aya tuthuutule.
17Ye khuwoozela yoori: “Mwinnyakulisana monkoni wa niini ntarikhi mphu mweettaka weettetta?”
Yo khweemela ari oohuzunikha. 18Mmote wa yo aari wiitthiwaaye Keleyoopa, khumuuzela Yinsa yoori: “Niri weeyo o nletto mmote paasi wa Yeruzaleemu ohinjuwaaye vitthu zirettikhaniyeezo siikhu epi?”
19Yinsa khuwoozela yoori: “Niini erettikhaniyeeyo?”
Yo khunjipu yoori: “Epile zinrettikhaneliyeeyo Yinsa wa Nazareeti. Ye aari napiyu wa owahi khwa zooretta na mattakhuzi awe vakatthi wa Nluku mpakha wa atthu ooshi. 20Ila mahaakhimu a tiini na afwalume a mmuti mweetthu khuruma ohukhumweliwa ofwa, khulawa khukhomeliwa vansalapa. 21Fweeyo naari onwejela yoori aari ye aari weettelaaye otana okaphuliwa wa Ezirayiilu. Thanku zirettikhane vitthu epo leelo siikhu ya ttaatthu. 22Neeya wooshanka mwaasa yoori aakha akina a nkhuntti mweetthu, aalawiye okhapuri leelo lifwajiri, 23khuhisikani mwiili awe, khuta khunuuza yoori ooniye malayikha, atthaapo pi alupiyeeyo yoori ye asisimuwa ori haayi. 24Khulawa ashirikha etthu akina okhapuri, khusikana etthiipile aalupiyeezo aakha apale, ila yo khuhimooni.”
25Aphano Yinsa khuwooza yoori: “Atthu oorupaza weeleyiwa na oolipa waamini epile alupiyeezo manapiyu! 26Al-Masiihu khaarina yoohoowa etthiipo yoori eette nnuuru mwawe?” 27Khusala aweeleza mattakhuzi ooshi aatikhiweeyo nkithaapu aari onlupaaye ye, waaza kithaapu ya napiyu Munsa mpakha za manapiyu akinoko.
28Asaleelaka ofiya nti opule aari weettaaye, Yinsa khusala opuwa nkhama aari otakhaaye ovikana. 29Ila yo khunkhanyarela araka: “Wiiye attaapha na fweeyo, njuwa linttela otupweela waripa.” Apho Yinsa khuvira nnyupa khwiiya vamote na yo.
30Wakathi eekhaliyeevo vameeza vamote na atthaapale awiri, khuthuula phaawu khuparikhiya, khumeya khuwenkha. 31Attaaphale, oowiiri maasho aya khufunuwa khunjuwa yoori ti Yinsa, ila ye khwaashikha. 32Khusala oozelana araka: “Wakathi opule naari ottakhulanaavo ntarikhi aneelezaka mattakhuzi a nkithaapu, rooho zeetthu khazeetta onikaphula?”
33Yo khulankha nasaapiru khusala arutela Yeruzaleemu, khuwaasikana maaswihaapa apale khumi na mmote na anakhiyoni akina a Yinsa akusanyeyiye vahali vamote, 34alupaka yoori: “Khweele Mbwana asisimuwa, ampuwelela Simawu.” 35Nayo apale awiri khusala alupa epile ooniyeezo ntarikhi na nanna anjuwiyeezo Mbwana wakathi ameyiyeevo phaawu.
Yinsa oniwaapuwelela anakhiyoni awe
36Anakhiyoni apale nalelo eettaka ottakhula etthiipile, Yinsa khuta vakatthi vaya, khulupa yoori: “Heeri yiiye vamote na mweeyo.”
37Yo khwiiya oosuthuwa na woova amoonaka nkhama nshitapehe. 38Yinsa khuwoozela yoori: “Mwasuthuwa ni? Wala mishikili ziriiye nroho mweenu pi za niini? 39Moone makhono aka na moolu aka mwintta ojuwa yoori ti miiyo! Mwikikhole moone, maana nshitapehe khuna nyama wala makhonkolo nkhama etthiipo mweeyo mwinikoonaazo.”
40Alupiyeevo vitthu epile, khuwaathoonyeza makhono awe na moolu awe. 41Mwaasa wa furaha khuluyeene na oshanka, yo khuhisala aamini nalelo, aphano Yinsa khuwoozela yoori: “Mwinaaye etthu yoojiwa mwikinkhe kije?” 42Yo khumwinkha pattaasu ya swi ya woochiwa. 43Khuthuula khusala arafuna attaapho yo amoonaka.
44Nawiisha khulupa yoori: “Pi etthiipi kaawuuziyeenini wakathi opule kaari vamote na mweeyo, yoori zaarina yoorettikhana zooshi epile zaatikhiweeyo khwa miiyo nkithaapu ya kano ya napiyu Munsa na kithaapu za manapiyu akina na Zaapuura.”
45Aphano Yinsa khuwaapatthisa fwahamu yoori ziweeleye Zawaatikhiwa Ttakatthiifu za nkithaapu. 46Khuwooza araka: “Yaatikhiwa yoori Al-Masiihu aarina yoohoowa na siikhu ya ttaatthu osisimuwa vakatthi wa ananfwa, 47na khwa nzina lawe onlawa walaleyiwe othupwiya yoori ziswaamihiwe twampi, waaza Yeruzaleemu mpakha khapila zooshi za va olumwenku. 48Mweeyo mwa mashaahiti wa vitthu zaya epi. 49Miiyo kinlawa kooperekhezeni etile Paapa ahitiyeeyo. Ila mweeye Yeruzaleemu ottuukho mpakha mwiitaazaniwe owahi wa pinkuuni.”
Owela wa Yinsa pinkuuni
50Aphano Yinsa khuwaathuula anakhiyoni awe khulawana Betaaniya, noofiya khulansa makhono awe khuwaaparikhiya. 51Awaaparikhiyaka etthiipile, khuwaasusa khuweziwa pinkuuni. 52Yo khumwaaputu, khurutela Yeruzaleemu na furaha khuluyeene. 53Wakhula siikhu aari othukumana vaje wa Nyuupa Yoosifwiwamo ansifwaka Nluku.
Одоогоор Сонгогдсон:
Luuka 24: eko
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2020, Wycliffe Bible Translators, Inc. All rights reserved.
