Yaahaya 1
1
Nttakhuzi la Nluku lajiretta opinaatamu
1Omwanzo laari Nttakhuzi.
Nttakhuzi laari vamote na Nluku
na Nttakhuzi laari Nluku.
2Ye laari vamote na Nluku omwanzo.
3Vitthu zooshi zarettiwa khwa ye;
eriwaka khaari ye khayariwiiyavo moote yaari weettelaaye orettiwa.
4Ohaayi waari nkatthi mwawe,
ohaayi opo waari nuuru ya anaatamu.
5Nuuru enaara n'yiiza,
na yiiza khuhikhitiri oshintta.
6Aarivo nlume mmote aperekhiweeyo ti Nluku aari wiitthiwaaye Yaahaya. 7Ye aatiiye nkhama shaahiti yoori alawele oshaahiti monkoni wa nuuru, yoori atthu ooshi apatthe osiila hapari na akhupali khwa ye. 8Ye khaari nuuru, ila aatiiye nkhama shaahiti wa nuuru. 9Nuuru yeekhweele, eniwaamwasikhelaaye anaatamu ooshi, yata voolumwenku.
10Nttakhuzi laari voolumwenku na olumwenku wompiwa ti ye, ila olumwenku khuhinjuwi. 11Awaateliye apale eeyiyeeyo awe, yo khuhimpwekhereli. 12Ila apale ampwekhereliyeeyo na akhupaliyeeyo nzina lawe, awenkha ruhusa yooretteya wiiya aana a Nluku. 13Atthaapo ahivokoliweeni khwa ephattu, wala khwa matakhelo a onaatamu wala ohiiyi khwa makhaamu a nlume, ila avokoliwa khwa matakhelo a Nluku.
14Nttakhuzi khujiretta ontthu na khwiikhala vakatthi veetthu. Fweeyo noona siifwa yawe, siifwa nkhama mwaana mmote paasi wa Paapa wawiitaala rehema na khweele.
15Yaahaya alaza oshaahiti awe araka: “Otu ti otule kaari onlupaaye, aari otaaye paata ya miiyo na nwulu zayita miiyo, maana ye aarivo miiyo kihineeyevo.” 16Maana fooshi napwekherela phantte ya zooshi ariina na rehema khwa rehema. 17Maana kano zatiisiwa khwa vakatthi wa Munsa; rehema na haakhi yata khwa Yinsa Al-Masiihu. 18Khina anamoone Nluku, ila Nluku mmote paasi, othuuto ariiye mpavu wa Paapa, ti anithoonyeziyeeyo.
Oshaahiti wa Yaahaya Namoosa
19Opu oshaahiti wa Yaahaya, wakathi mayaahuuti a Yeruzaleemu awaaperekhiyeevo anamalokozela a tiini na aleevi#1:19 Aleevi awaziri a mahaakhimu a tiini. amuuzele yoori: “O paani weeyo aya.” 20Ye khutukhuru na khuhikatthali, khulupa woosileyavo yoori: “Aki Al-Masiihu!”
21Khumuuzela yoori: “Aphano, weeyo o paani? Ti weeyo Aliyaasi?”
Khuri: “Aki!”
“Ti weeyo Napiyu aari weettelaaye ota?”
Khujipu yoori: “Wala!”
22Khumuuzela yoori: “Khi o paani? Onijipu yoori nawooze apale anirumiyeeyo. Nanna eti onjilupezaaye omweenyewe?”
23Yaahaya khujipu na mattakhuzi a napiyu Ezaaya araka: “Miiyo ki huula enkhuwaaye n'yaara eraka: ‘Mookolele tarikhi ya Mbwana.’ ”
24Apale aarumiweeyo aari a khuntti ya mafwarizeewu, 25khumuuzela yoori: “Khi oniwooselani atthu ohi Al-Masiihu wala Aliyaasi ama Napiyu?”
26Yaahaya khuwaajipu yoori: “Miiyo kinoosa na maati, ila vakatthi venu mweeyo owaapho ntthu mwihininjuwaaye, 27anttelaaye ota paata ya miiyo na wala akinsuhi ofukula mikhoyi za jampali zawe.”
28Vitthu epo zarettikhana nti wa Betaaniya phantte ya okhu lintupweelaawo njuwa ya muuttho Yorotaani, ottuukho Yaahaya aari orettaawo njampo la woosa.
Pwittipwitthi ya Nluku
29Mmeesho mwaya Yaahaya khumoona Yinsa eettaka ota khuri: “Mwimoone! Oto antaaye apho, pwittipwitthi ya Nluku enlazaaye twampi voolumwenku! 30Otu ti otule kaari onlupaaye, wakathi opule kaari oraaye: ‘Onta nyumani waka nwulu zayita miiyo maana ye aarivo miiyo kihineeyevo.’ 31Miiyo akaari onjuwa paani yaya, kateela omoosa na maati yoori athoonyeziwe Ezirayiilu.”
32Aphano Yaahaya khulawela oshaahiti alupaka theenya yoori: “Miiyo koona Rooho Ttakatthiifu yiishukhaka pinkuuni nkhama jiwa khummorela ye. 33Miiyo akaari onjuwa paani yaya, ila otule akirumiyeeyo omoosa na maati, khukuuza yoori: ‘Weeyo onteela woona Rooho Ttakatthiifu yiishukhaka na emmorelaka, ntthu aya oto ti anoosanaaye Rooho Ttakatthiifu.’ 34Miiyo koona vitthu epo, tiito kinlawelaaye oshaahiti yoori ye Mwaana wa Nluku.”
Anakhiyoni a Yinsa a mwanzo
35Mmeesho mwaya Yaahaya aari attaaphale opheya na anakhiyoni awe awiri. 36Noomoona Yinsa aviraka, khuri: “Mwimoone! Oto antaaye apho Pwittipwitthi ya Nluku!”
37Anakhiyoni apale awiri a Yaahaya noosiila mattakhuzi apale khusala anlotta Yinsa. 38Aphano Yinsa khuzukuluwa khweekesa nyuma, khuwoona anakhiyoni apale awiri eettaka onlotta khuwoozela yoori: “Mweeyo mwineekesani?”
Khujipu araka: “Rabi” (liriina maana a mwaaliimu), “wamaka vayi?”
39Khuwaajipu yoori: “Olawa moonewo.”
Khulawa khoonawo ohali Yinsa amakiyeewo na khwiiya vamote na ye siikhu yaya etile yooshi. Epo zaarettikhaniye payina ya saa-khuumi ya njuwa-looveva.
40Antere, ttwiiye Simawu Pheeturu, aari mmote wa mamwinyi apale awiri ansiliyeeyo Yaahaya attakhulaka monkoni wa Yinsa, tiito anlottiyeeyo. 41Mwanzo wonsikana aari ttwiiye Simawu, na khumuuza yoori: “Nansikana Al-Masiihu” (enlupaaye yoori Namathawaziwa). 42Antere khunthuula ttwiiye khunlawana wa Yinsa. Yinsa khumweekesa Simawu khuri: “Weeyo o Simawu, mwaana wa Yaahaya, ila waaza nasaapi nzina lawo eriwaka Seefwa.” Seefwa enlupa yoori Pheeturu#1:42 Nzina ntthi la Pheeturu lina maana a liwe..
Yinsa oninkhuwela Filiipe na Natanayeele
43Mmeesho mwaya Yinsa khulankha khusala alawa Kalileya na khunsikana Filiipe, khumuuza yoori: “Okilotte!”
44Filiipe aari wa sitati ya Betezayiita ottuukho waari owawe Pheeturu na Antere. 45Filiipe khunsikana Natanayeele khumuuza yoori: “Nansikana otule Munsa aatikhiyeeyo nkithaapu ya kano monkoni wa ye na manapiyu. Yinsa wa Nazareeti, mwaana wa Yuusufu!”
46Natanayeele khuuzela yoori: “Nazareeti, enlankhawo etthu yooshapweya?”
Filiipe khunjipu yoori: “Ote woone!”
47Yinsa amooniyeevo Natanayeele amwaattamaka khuri: “Oto mwiizirayiilu weekhweele, ntthu woohiina ottettekha va rooho vawe.”
48Aphano Natanayeele khumuuzela Yinsa yoori: “Mwaari okijuwa vayi?”
Yinsa khunjipu yoori: “Filiipe ahinookhuwele miiyo kaawooniye wiikhaliye nshini wa mfikeera opule.”
49Attaaphale Natanayeele khushanka khuri: “Rabi, weeyo o Mwaana wa Nluku. Weeyo O Mfwalume wa Ezirayiilu!”
50Yinsa khunjipu yoori: “Weeyo wakikhupali mwaasa wa olupa yoori kaawooniye nshini wa mfikeera? Toowo onttela woona vitthu khulukhulu zayita epi.” 51Khuvira alupaka yoori: “Miiyo kiniwuuzani khweele yoori, mwinoona pinku eri yoofukuwa na malayikha a Nluku awelaka na wiishukha amwiishukhelaka Mwaana wa Pinaatamu.”
Одоогоор Сонгогдсон:
Yaahaya 1: eko
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2020, Wycliffe Bible Translators, Inc. All rights reserved.