GÉNESIS 7
7
Ninandapacha tamiashcatami villajun
1Chai jipami Mandaj Diosca, Noé runataca cashna nirca:
“Cambash, tucui cambaj huasi ucu purapash, huambuna jatun huasiman yaicuichi. Cai miraicunapica, candallami ñuca ñaupajpi imatapash cashcatapacha rurashpa causajta ricushcani. 2Micuna tucui animalcunamandaca, canchis jari, canchis huarmi japingui. Ashtahuangarin na micuna animalcunamandaca, shuj jari, shuj huarmilla japingui. 3Shinallata jahuata rij alasyu animalcunamandapash, canchis jari, canchis huarmi japingui. Ima animalcuna cajpipash, pai puralla mirashpa cai pachapi causanajuchun, chashna japingui. 4Ña canchis punlla yalishca jipami, chuscu chunga punllata, chuscu chunga tutata, cai pachaman tamiachimusha. Chashna tamiachishpami, ñuca rurashca causaita tucui charijcunataca, cai pachamanda chingachisha” nircami. 5Shina nijpimi Noé runaca, Mandaj Dios imashna mandashcashnallata, tucuita rurarca.
6Ninandapacha tamiashpa cai pachaman yacu jundamui callarijujpica, Noé runaca, sucta patsaj huatatami charirca. 7Ninandapacha tamiashpa yacu jundamuna cajpimi Noé runaca, paipaj churicunandi, paipaj huarmindi, paipaj churicunapaj huarmicunandi, huambuna jatun huasiman yaicurca. 8Micuna tucui animalcunapash, na micuna animalcunapash, alasyu animalcunapash, alpata llucashpa purij tucui animalcunapashmi, 9huambuna jatun huasiman Noé runahuan ishcai ishcai yaicunajurca. Taita Dios, Noé runata mandashcashnallatami shuj jari, shuj huarmi yaicunajurca.
10Chai jipami, cashna tucurca: Ña canchis punlla jipa, ninandapacha tamiai callarijpimi yacuca, cai pachaman jundamui callarirca. 11Noé runaca, sucta patsaj huatata charijpi, chai huatapaj callari ishcai quilla chunga canchis punllapimi, cashna tucurca: Chai punllapimi, jatun manllanayai ucu ucu yacu pugyucunapash, jahua pacha fajcha yacucunapash pascarirca. 12Shinamandami cai pachapica, chuscu chunga punlla, chuscu chunga tutata tamiajurca. 13Tamia callarijui chai punllallatami Noé runaca, Sem, Cam, Jafet shuti churicunandi, paipaj huarmindi, paipaj churicunapaj quimsandi huarmicunandi, huambuna jatun huasiman yaicurca. 14Paicunapash, tucui sacha animalcunapash, ima animalcuna cashpapash pai puralla, charina tucui animalcunapash, ima animalcuna cashpapash pai puralla, alpata llucashpa purij tucui animalcunapash, ima animalcuna cashpapash pai puralla, alasyu tucui animalcunapash, ima animalcuna cashpapash pai puralla, alasyu uchilla tucui animalcunapash, ima animalcuna cashpapash pai purallami yaicunajurca. 15Chaicunaca, huambuna jatun huasimanmi Noé runahuan shamunajurca. Causaita tucui charijcunaca, causaita cuj espirituta tucui charijcunami, ishcai ishcai shamunajurca. 16Chai shamujcunaca, Taita Dios mandashcashnallatami, causaita charijcunaca jaripash, huarmipash yaicunajurca. Chai jipami, Mandaj Diosca punguta vicharca.
17Cai pachapica, chuscu chunga punllacunatami ninandapacha tamiajurca. Shina tamiashpami, yacucunaca ashtahuan jundashpa, huambuna jatun huasitaca vichai huandushpa, cai alpamanda huambuchi callarirca. 18Yacucunaca ashtahuan vichai mirashpami, cai pachapi ashtahuan ashtahuan ninanda jundajurca. Shinamandami huambuna jatun huasica, yacu jahuacunapi huambujurca. 19Yacucunaca, cai pachapi ashtahuan vichai mirashpa jundajpimi, cai pachapi tucui tiashca jatun urcucunapash tucuilla pambarirca. 20Urcucunata quilpashca jipapash, yacucunaca canchis metrota yalishpami, ashtahuan jundajurca. 21Chashnami, cai pachapi causaita charishpa tucui cuyurijcunaca, alasyu animalcuna, charina animalcuna, sacha animalcuna, alpata llucashpa purij tucui animalcunapash, tucui runacunapash huañurca. 22Cai pachapica, causaita cuj espirituta singahuan aisashpa tucui causajcunapash, ima tiashcacunapash tucuillami huañurca. 23Chashnami tucui cai pachapi causaita charijcunaca, runamanda callarishpa animalcunacaman, llucashpa purij animalcunapash, jahuata rij alasyu animalcunapash tucuilla tucurirca. Shinami cai alpamandaca, tucuilla tucuchi tucurca. Huambuna jatun huasipi, Noé runahuan tiajcunallami quedarca. 24Cai pachapi yacucuna jundashcapash, patsaj picha chunga punllacaman na tucurircachu.
Одоогоор Сонгогдсон:
GÉNESIS 7: QUII
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Quichua Imbabura Bible © United Bible Societies, 1994.
