Mélékusu 13
13
Yésusu a á dóógío gogada gá Nnyaŋá ya Asaŋa naá Yolósalɛmɛ
(Mot 24.1-3; Lók 21.5-7)
1Aŋa Yésusu a mbaá lɛ a húmene naá Nnyaŋá ya Asaŋa, uhúúní ummue naá behúúní bɛ́hɛ́ go mo gálɛda a amɔ́: «Iloodio, núúníde: kasɛ́á bɛnɔ́gɔ́ bá adánɛ́ gɔnɔ́ na mbɔ́dɔ sá bɛantáanta bá bɛfóaga!» 2Yésusu go mo gundie a amɔ́: «Go ɛ́nana bɛantáanta bá bɛfóaga bɛ́ɛbɛ o? Aŋa o bɛ́ núunemú náana, akɛ́ ɛdánɛ́ ná nímmue nɛ́ dɛ ŋgá lɔbɔ dáláalú naá sɔ́gɔ́ɔ ɛdánɛ́ mmoɛná; bá ŋga buhée buimée bɔ́ɔbɔ púmú.»
Mabayɛga má duséésényée na ŋgónana
3Gɔ́ɔ Yésusu a lukumenemú naá ogɔndɔ yá magónɛ́dá má Boolifíe, cɛŋɛ na Nnyaŋá ya Asaŋa, Píele, Sáakɛ, Sáŋa na Andɛlɛ́ɛ, bɔ́ɔ bákáa nɛhɛ́, go mo úhune bá amɔ́: 4«Có oyánáamɔ́ gɛcamɛna gɛ́ɛgɛ boóma moánɛ bó ŋgaá báŋaáa na gilincie gɛ́ɛgɛ gɛ́ ŋgaá dúfíe goŋaá moóma moánɛ mó ŋgɛ ɛ́nánɛ́náa.»
Gobayɛga gá manómana aŋa má okɔ́dɔ ba go bíene
(Mot 10.17-22; 24.4-14; Lók 12.11-12; 21.8-19)
5Gɔ́ɔ Yésusu a bayɛgamɔ́ go bó oyanɛna a amɔ́: «Bébeŋéemú nɔnɔ goŋaá mɔtɔ a dɛ nyó nenúgíe. 6Batɔ degédegé bá ŋgu úlénée bá béfínenye go ufíno yámɛ, bó oya bá amɔ́: “Yɔmɔ́ɔ ndɔ́mɔ́ Kilítusu”. Bá ŋga ŋaáa goŋaá gɛca gá batɔ gɛ́ nana mammana ya pɛ́. 7Aŋa no ŋgɔɔ́ ɔ́bɔ́nɔ́ɔ bó oya cɔ́mɔ sá bidé, na biuŋgúlú bá bidé, no do bɛáa bofoá, moóma moánɛ mó háanana go bola, kanɛ́ bó do ŋgá bɛ́ɛmba gomana gá cí. 8Mammana, boɛ́nɔ búmmue bó ŋga nɔɔ́ɔ sɔ́gɔ́ɔ boɛ́nɔ bidé, bufuŋe bó ŋa nɔ́ɔ caŋa mmue na sɔ́gɔ́ɔ bufuŋe. Goyiŋkime gá cí na incíli mó ŋga bɛ́ɛ́mbá naá bigísi bá cí gɛca. Bó ŋga bɛ́ɛ́mbá aŋa mabayɛga má gɛɔ́bɛgɔ gá manómana má okɔ́dɔ go bíene. 9Kanɛ́ bɛɛnyɔ́ɔ, bébeŋéemú nɔnɔ. Batɔ bá nɛ́ ɛ́dana nɛnyɔ́ naá nnyaŋá sá mógála na naá nnyaŋá sá mbósógólí, bá nyó sóala mobágɔ. Bá ŋga nyó dílíményée go cáágá naá busío bá baŋgɔ́mɔnɔ na naá mefuŋe go busío bámɛ, kɔ́ɔ no ŋga bɛ́ɛ́mbá ŋgominyo sámɛ naá busío bábɔ́. 10Bó úhene goŋaá Gɛnɔ́gɔ́ gá Cɔ́mɔ gɛ́ manɛ bó oya naá mɛɛ́nɔ miimée. 11Gɛcamɛna gɛ́ɛgɛ bá nɛ́ ɛ́damɔ́ nɛnyɔ́ go cáágá, no do gá lɛ́ go yóbimido bo bɔ́ɔbɔ no ŋgoó oyáa. Kanɛ́ oyáa nɔnɔ dogálɔ dɔ́ɔdɔ bá ŋgaá nyó fáá naá gɛcamɛna moánɛ; mammana, caá bɛɛnyɔ́ɔ báa no ná gálagalamɔ́, a lɔ́mɔ́ Gimmúmpúu gá Giliíli. 12Ondimóní a ŋga dúé ondimóní goŋaá bá mo óna, caŋa mmue isée a ŋa nɔ́ɔ go moɔnɔ́, baábayɔ́ bá ná békikilidinye bebíéní bábɔ́, bá ŋa goŋaá bá bó óna#13.12 O bana, go eninye na bɔ́ɔbɔ naá Misée 7.6.. 13Batɔ biimée bá ŋga nyó bɛlábɛ́láa go busío bámɛ, kanɛ́ mɔ́ɔnyɔ a ŋgaá simbímídé, gó ɛ́da húme naá mamáná, Asaŋa a ŋga mo sódío.
Mɔtɔ ba gikume
(Mot 24.15-25; Lók 21.20-24; 17.23; 21.8)
14«Aŋa no ŋgɛɛ́ ɛ́ná mɔ́ɔnyɔ bá dɔ́ŋɔnɔmɔ́ bá amɔ́: “Mɔtɔ ba Gikume” dɛ́lɛ́mɛ́náalú naá hoóma háaha a lɔ́mɔ́ a dɛ sɛmɛ́gánánáa hɔ́ɔ#13.14 Go ɛ́na naá Déniele 9.27; 11.31; 12.11. — ŋgáa umbení kálata ɔ ɔ́bɔ! — gɔ́ɔ batɔ báaba bá ŋgaá bɛ́ɛ́mbá naá gɛdɔŋɔ gá Yudée bá salana naá ɛgɔndɔ. 15Mɔ́ɔnyɔ a ŋgaá bɛ́ɛ́mbá naá balánda ba nnyaŋá mmoɛná, a dɛ siisé, a dɛ íŋéné naá mɔ́ ncíbo go go gɔ́lɔ boóma kɔ́ɔ; 16mɔ́ɔnyɔ a ŋgaá bɛ́ɛ́mbá naá ntɛ́mɛ́, a dɛ gundé na nnyimé go go gɔ́lɔ gɛla gɛ́hɛ́ gá isió. 17Bakɔ́dɔ bá embume na báaba bá go yúuŋenye baaná bá ŋga bɛ́ɛ́mbá mahana makɔ́nɔ́ naá medúgú moánɛ. 18Bósógólónyóomú nɔnɔ goŋaá moóma moánɛ mó do bolá naá gɛcamɛna gá gɛantá gá isió. 19Mammana, medúgú moánɛ má ŋga bɛ́ɛ́mbá na gɛɔ́bɛgɔ aŋa bó gá báasamɔ́ bó do báŋaáa ɛ ɛ́da sɛŋɛda aŋa Asaŋa a mbaá gedíe cí na moóma muimée, gó gunde bó do ŋgá gɔnɔ báŋa akɛ́ go buisí#13.19 O bana, go eninye na bɔ́ɔbɔ naá Déniele 12.1.. 20Aáŋa gɔnɔ́ Daadáa Asaŋa a dɛ mbá sómba go une medúgú má ndiemi, gásɛ́ mɔtɔ a dɛ mbáa lɛ ba go sódio gɛɔyɔ gɛ́hɛ́. Kanɛ́ go busío bá batɔ báaba a mbií iyídé go go ɔyɔ nɛhɛ́, a mbu uné medúgú mɔ́ɔmɔ. 21Gɔ́ɔ gó lɔ́mɔ́, mɔtɔ a amɔ́ a nyó oyana a amɔ́: “Yíkéne, Mesíi a lɛ́ háalá”, ɛ́na lí, o oyɛda a amɔ́ “a lɛ́ héení”, no do olímínyóo boóma bɔ́ɔbɔ a nyó oyanɛnamɔ́. 22Mammana, bemesíi bá mbele na mbúsí sá mbele bá ŋga bológánáa. Bá ŋga ŋanánáa bieninye bá gobékúke na bɛsɛɔ go go fúmbe go nenugie akɛ́ báaba Asaŋa a mbií iyídé. 23Kanɛ́ bɛɛnyɔ́ɔ, bébeŋéemú nɔnɔ, ŋgaá nyó dóógínyóo boóma buimée go ofalɔ.
Mencogunde má Moɔnɔ́ ba mɔtɔ
(Mot 24.29-31; Lók 21.25-28)
24«Kanɛ́ naá medúgú mɔ́ɔmɔ, naá nnyimé ya makánya go dómba, buisí bó ŋga fúé, ofɛ́ yó do gɔnɔ́ nomɛda, 25muotóti mó káfakafa go mmoɛná mó obana; gɔnɔ́ magaaga máama naá mmoɛná má dɛ gɔnɔ́ bɛa ndukúménínée#13.25 Go big. 24-25, o bana, go eninye na bɔ́ɔbɔ bó lɔ́mɔ́ naá Iseyíi 13.10; 34.4; Esekíele 32.7; Soɛ́lɛ 2.10; 3.4.. 26Gɔ́ɔ bá ŋgɛɛ́ ɛ́ná Moɔnɔ́ ba mɔtɔ ɛ ɛ́da go úlene, géŋgélídíelú na bidu bá mmoɛná na bogaaga gɔnɔ́ na nigúmi dácɛ#13.26 Go ɛ́na tɔ́nɔ naá Déniele 7.3.. 27Gɔ́ɔ a ŋgaá dómá bɛɛ́ŋgɛlɛsɛ naá maayá má cí miimée go go bándɛgɛna batɔ báaba Asaŋa a mbií iyídé, gó bayɛga naá ombálá yá cí yɔ́ɔyɔ gó ɛ́da súge naá yɔ́ɔyɔ yúntió#13.27 O bana, go eninye na Bicele 30.4; Sakalɛ́a 2.10; Nehemíi 1.9..
Kúunye ya bufiigíe
(Mot 24.32-36; Lók 21.29-33)
28«Ɔ́bɔ́ nɔnɔ gieninye gɛ́ɛgɛ bá gɔ́lɔnɔmɔ́ go bogónɛ́dá bá bufiigíe: “Gɛcamɛna gɛ́ɛgɛ bɛtáfɛ bá bɔ́ bɛ́ gundemú bɛdɔmbɔ́, gɔnɔ́ bɛáncɛ bá bɔ́ bɛ́ báá bayɛ́gá go tɔsɔ, no íyimene no amɔ́ gɛnɔ́gɔ́ gá gɛcamɛna gɛ́ ná lɛ́ mekúígíi”. 29Caŋa mmue, bɛɛnyɔ́ɔ tɔ́nɔ, aŋa no ŋgɛɛ́ ɛ́ná moóma mɔ́ɔmɔ, íyíme nɔnɔ goŋaá Moɔnɔ́ ba mɔtɔ a nco gundene godɔ́ɔdɔ godɔ́ɔdɔ#13.29 Moɔnɔ́ ba mɔtɔ… godɔ́ɔdɔ Gokikilidie gúncoó gó lɔ́mɔ́ bosɔ́mɔ moánɛ bó ná lɛ́ mekúígíi, bó gaá báŋaáa., a lɛ́ naá bɛasɛ́ bɛ́nyɔ́. 30Ŋgaá nyó oyáná mammana caá, batɔ bá ogɛlɛ yɔ́ɔyɔ bá dɛ ŋgá fúe biimée, kanɛ goŋaá moóma muimée mɔ́ɔmɔ mó á bolá. 31Mmoɛná na cí mó ŋga maná, kanɛ́ dogálɔ dámɛ dó do ŋgá mana. 32Mɔtɔ a dɛ íyíménée akɛ́ buisí ɛ́na lí gigúlí gá moóma moánɛ go bola, akɛ́ bɛɛ́ŋgɛlɛsɛ báaba naá mmoɛná, akɛ́ Moɔnɔ́, Baaba mokáa mɔ́ɔ i íyimenemú.
No do ɛ́dánáa dɔnɔ́ɔ
(Mot 24.42; 25.13-15; Lók 12.36-38; 19.12-13)
33«Bébeŋéemú nɔnɔ bese, gɛ́gáa nɔnɔ pɔnyɛ́ɛ, goakɛ́ no do íyíménée gɛcamɛna aŋa gɛ́ ná bolamɔ́. 34Bó ŋga bɛ́ɛ́mbá caŋa táŋɛ́ mmue aŋa mɔtɔ mɔ́ɔnyɔ ɛ ɛ́danamɔ́ go oŋɛndɔ, a síe a báá dɛ́ɛ́ná nnyaŋá yɛhɛ́ go gibeŋe go boyogóní bɛ́hɛ́, a fáa na onyɔ moánɛ buelí bá go ŋanana, a gunde a lɔsɛnɔ mɔtɔ ba go fɛ́fa gɛasɛ́ goŋaá a gɛ́ga pɔnyɛ́ɛ. 35Gɛ́gáa nɔnɔ kanɛ́ pɔnyɛ́ɛ, goakɛ́ no do íyíménée gɛcamɛna gɛ́ɛgɛ mɔtɔ ba nnyaŋá a ŋgaá ncó gunde, bó lɛ́ ba go bɛ́ɛmba na hɛɔbɔ́bɔ́ɔ, akɛ́ na odɛ́má yá budúgú, akɛ́ naá godádɛda gá gɛnɔ́mɛ gá ŋgɔɔ́, ɛ́na lí na gɛyɛ́nɛ́. 36Bébeŋéemú nɔnɔ goŋaá cɛ nyó sulúŋényée cɛ nyó gídé go dɔnɔ́ɔ. 37Boóma bɔ́ɔbɔ nnyó oyanamɔ́ bɔ́ɔbɔ, ŋgaá bó oyɛ́dá go busío bá mɔtɔ uŋkimée caá: gɛ́gáa nɔnɔ pɔnyɛ́ɛ.»
Одоогоор Сонгогдсон:
Mélékusu 13: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү