Motíosi 28
28
Yésusu a dɛ báá gɔnɔ́ naá gɛbɛ́lá
(Mél 16.1-8; Lók 24.1-11; Sáŋ 20.1,11-18)
1Aŋa buisí bá sábadɛ bó mbaá maná, na gɛyɛ́nɛ́ gá buisí bá busío bá gɛanyɛ, Malɛ́a ba Magadaláa na Malɛ́a mɔ́ɔnyɔ uncodío, bú úlemú go go nco go ɛ́na gɛbɛ́lá. 2Hɔ́ɔ na hɔ́ɔ, cí go dómba go yiŋkimide na bogaaga; ɛ́ŋgɛlɛsɛ ba Daadáa go ɛ́da go úle naá mmoɛná, a báá tíŋgílídíe gɛantá gá ɛdánɛ́, a báá lukúméné kɔ́ɔ. 3A mba lɛ́ begibegi, gɛla gɛ́hɛ́ gimmúmpúu makɔ́nɔ́ aŋa ndɛbɛ. 4Bebeŋíbéŋí gɛbɛ́lá go bɛa bofoá, bá bɛ́ɛ́ ɛ́dá go dagadana, bá báá gundé aŋa begúe. 5Kanɛ́ ɛ́ŋgɛlɛsɛ go gɔ́lɔ dogálɔ, go oyana bakɔ́dɔ a amɔ́: «Bɛɛnyɔ́ɔ, no do bɛáa bofoá, ŋgíyimene caá no fúmbemú Yésusu mɔ́ɔnyɔ bá mbaá giléné naá kolósi. 6A dɛ báá háalá. Mammana, a á fúfúgé aŋa a mboó oyɛ́dá. Úlé nɔnɔ, no nco go ɛ́na hoóma háaha bá mbaá mo bídígínyée. 7Ɛ́dá nɔnɔ fɛaŋɔ no oyana behúúní bɛ́hɛ́ no amɔ́: “A á fúfúgé naá kadɛ́gadɛ́ɛ ya begúe. Moatɛ́ a á dóánánáa go go ɛ́da nyó gɛ́gana naá Gelilée; hɔ́ɔ háa no ná mo ɛ́namɔ́.” Boóma bɔ́ɔbɔ mbáá ná lɔmɔ́ goŋaá nnyó oyana bɔ́bɔ́ɔ.» 8Bakɔ́dɔ go dómba go úlukie naá gɛbɛ́lá bɔ́ɔ na bofoá, bɔ́ɔ na bɛyaŋa dácɛ. Gáábɔ́ go ɛ́da go oyana behúúní bɛ́hɛ́ cɔ́mɔ yɛ́ɛyɔ. 9Hɔ́ɔ na hɔ́ɔ, Yésusu go úle giluméní nabɔ́, go bó oyana a amɔ́: «Ŋgaá nyó bédíígíe.» Bakɔ́dɔ go mo báyɛkɛna, bá báá gulé enúu go go gumbene bɛgɔ́ndɔ́ bɛ́hɛ́, gáábɔ́ go ɛ́da go mo búlugenye. 10Gɔ́ɔ Yésusu a bó oyanamɔ́ a amɔ́: «No do bɛáa bofoá; ɛ́dá nɔnɔ no oyana bolimóní bámɛ goŋaá, ŋgáa bɛ́ ɛ́da naá Gelilée, hɔ́ɔ háa bá gaá ná ŋgɛ́ná.» 11Bá gá lɛ́ go pɛ́, nɛnamá ná bebeŋíbéŋí gɛbɛ́lá go ɛ́da naá tɛ́sɔnɔ go go oyana bagɔ́nɔ́ɔ bá bedúmbí bɛbáágá naá Asaŋa, buimée bɔ́ɔbɔ bó mbaá bádómbánáa. 12Bɔ́ɔbɔ moánɛ, go lumene na bafɛanɔ́ɔ bá gɛdɔŋɔ go nɛganda, gáábɔ́ go íŋene bebeŋíbéŋí gɛbɛ́lá gɛca gá muinyí. 13Bá amɔ́ gáábɔ́ aá: «Oyɛ́da nɔnɔ no amɔ́: “Behúúní bɛ́hɛ́ bá báá nco mo íbe na budúgú, gɛcamɛna gɛ́ɛgɛ dɛ báá lɔmɔ́ go dɔnɔ́ɔ#28.13 O bana, go eninye na 27.64..” 14Gó gunde, gɛsɛnɛ moánɛ gɛ́ amɔ́ gɛ́ oba naá edúu yá ŋgɔ́mɔnɔ, bɛɛcɔ́ɔ báa dɛ gaá ná ŋaáa goŋaá a dɛ́ɛna gɛsɛnɛ, no do luméné na gɛdɔmbɔ.» 15Gáábɔ́ go gɔ́lɔ muinyí, bá báá ŋaáa aŋa bá mbaá bó lɔsɛ́nɔ́. Kɔ́ɔ ŋgoyáamɔ́ yɛ́ɛyɛ ɛ mbaá saáa naá Beyúdene, gó nco go éme ínoni.
Yésusu a á dómá behúúní bɛ́hɛ́ go bosɔ́mɔ
16Behúúní bɔ́ɔ́dɔ́ na ummue go ɛ́da naá Gelilée naá ogɔndɔ yɔ́ɔyɔ Yésusu a mbaá bó oyáná. 17Aŋa bá mbaá mo ɛ́ná, bá báá lɛ gó ɛ́da go mo búlugenye; kanɛ́ bóncodío bá mba lɛ́ na cuŋí. 18Yésusu go bó báyɛkɛna, go bó oyana a amɔ́: «Asaŋa a lɛ́ páalú nɛgaŋa niimée naá mmoɛná na naá cí. 19Ɛ́dá nɔnɔ kanɛ́, no íyenye batɔ behúúní bámɛ naá bɛdɔŋɔ biimée bɛ́ɛbɛ naá cí#28.19 O bana, go eninye na Meŋiigíe 1.8., no bó yumeninye go ufíno yá Isée, na yá Moɔnɔ́, na yá Gimmúmpúu gá Giliíli. 20No bó húunenye goŋaá bá beŋe buimée bɔ́ɔbɔ mmbaá nyó lɔsɛ́nɔ́. Gɔnɔ́ íyíme nɔnɔ goŋaá, ndɛ́ nɛnyɔ́ miisí miimée gó ɛ́da húme aŋa cí ɛ ŋgaá maná.»
Одоогоор Сонгогдсон:
Motíosi 28: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү