Motíosi 22
22
Ncaba ya gɛdágá gá gigiŋe
(Lók 14.15-24)
1Gɔ́ɔ Yésusu a gɔnɔmɔ́ bó ágɛna ncaba sɛ́ɛsɛ a amɔ́: 2«Bufuŋe bá mmoɛná bó lɔ́mɔ́ caŋa mmue aŋa ufuŋe yúmmue yɔ́ɔyɔ yó mbaá gedíe gɛdágá go gigiŋe gá ohaŋa bɛhɛ́. 3Gɔ́ɔ a dómamɔ́ boyogóní bɛ́hɛ́ goŋaá bɛ́ ɛ́da dɔ́ŋɔnɔ batɔ báaba bá mbaá lɛ dɔ́ŋɛ́nɔ́ɔlú naá gibíné. Kanɛ́ bɔ́ɔ, bá dɛ mbáa lɛ bá maamana go úle. 4Gɛ́hɛ́ go gɔnɔ dóma boyogóní bóncoó, a báá bó lɔsɛ́nɔ́ a amɔ́, bó oyana batɔ báaba bá lɔ́mɔ́ dɔ́ŋɛ́nɔ́ɔlú naá gibíné goŋaá: “Godɔ́ɔdɔ, mbáa go onda manyáanya. Mbáa go óna bɛnɔ́mɛ bámɛ bá gúlúge na bɛnɛmɛnaga bámɛ bá bidúgé, úlénée nɔnɔ naá gibíné.” 5Kanɛ́ batɔ bá dɔ́ŋɛ́nɔ́ɔlú naá gibíné bá lɛ́ kanɛ go ága boóma bɔ́ɔbɔ naá edúu; bá báa lɛ gó dómbana go masɔ́mɔ mábɔ́, mɔ́ɔnyɔ naá ntɛ́mɛ́ yɛhɛ́, mɔ́ɔnyɔ go nyonyí nɛ́hɛ́. 6Bóncodío go bɔ́yɔdɛgɛnɔ boyogóní, bá bó séesenye, bá bó óna. 7Ufuŋe go ɔ́bɔ́ mpímí, go dóma bitúu bɛ́hɛ́ bá bisimbi bá báá fúúgíe buúníní bɔ́ɔbɔ, bá báá ágɛ́ná tɛ́sɔnɔ yabɔ́ íyuke.»
8«Gɔ́ɔ ufuŋe o oyanamɔ́ boyogóní bɛ́hɛ́ a amɔ́: “Manyáanya má gigiŋe má ná lɛ́ mekúígíi, kanɛ́ batɔ báaba ŋgaá ná dɔ́ŋɔ́nɔ́ɔ bá dɛ á gá lɛ bá háanana na má. 9Ɛ́dánáa nɔnɔ kanɛ́ naá maádoga má pɛ́ miimée, no dɔ́ŋɔnɔ mɔtɔ uŋkimée mɔ́ɔnyɔ no gaá ná mo gídé hɔ́ɔ goŋaá u úle naá gibíné.” 10Boyogóní bɔ́ɔbɔ go biene pɛ́, go bándɛna batɔ biimée báaba bá mbaá gídénée, besi na bahándá. Batɔ go hóogo ncíbo ya gigiŋe dácɛ. 11Ufuŋe go íŋene go go núune batɔ báaba bá mbaá lɔmɔ́ naá ncíbo, gɛ́hɛ́ go lieŋe mɔtɔ mɔ́ɔnyɔ a mbaá lɔmɔ́ kanɛ gɛla gá gibíné kɔ́ɔ. 12Gɛ́hɛ́ go mo oyana a amɔ́: “Paá, maamɔ́ɔ o báá ní íŋéné háalá nɛɛ́nɛ kanɛ gɛla gá bese go gibíné o?” Mɔtɔ go oba gɛmámɔ́. 13Gɔ́ɔ ufuŋe o oyanamɔ́ boyogóní bɛ́hɛ́ a amɔ́: “Mo gumbénéemú nɔnɔ, no mo góda iŋgolí, bɛgɔ́ndɔ́ na ɛmbɔ́gɔ kɛ́, no mo nɔɔ naá mbíno gadɛ́ɛ; a baŋa hɔ́ɔ, a banda bigélédé.”» 14Yésusu go gídene a amɔ́: «Bá dɔ́ŋɔnɔ degédegé, kanɛ́ bí iyide sɔŋɛ!»
Tásɛ ya Sɛsáalɛ
(Mél 12.13-17; Lók 20.20-26)
15Gɔ́ɔ Befelisiéŋe bɛ́ ɛ́damɔ́ kɛsɛda naá nɛganda go go dámbɛna Yésusu na ŋgúhune, bá mo gumbene naá dogálɔ dɛ́hɛ́ dá moatɛ́. 16Bá báa lɛ gó mo dómɛna beebieni bábɔ́ olɔŋɔ na batɔ bá giimbó gá Elóode, go go nco mo úhune bá amɔ́: «Iloodio dɛ íyimene goŋaá go oya tɛ́nɛ́ɛ, o gunde o húunenye pɛ́ sá Asaŋa na mammana iŋkimée. O do bɛanánáa bofoá na mbééníŋínyí sá batɔ, goakɛ́ o do díínée mɔtɔ go odɛ́nɛ́ yɛ́hɛ́. 17Có oyánáamɔ́ kanɛ́ gɛ́ɛgɛ: Dɛ háanana go soanana muinyí má tásɛ ya ufuŋe ogɔ́nɔ́ Sɛsáalɛ lí, ɛɛ́ɛŋ ɛ́na lí akɛ́ɛ?» 18Kanɛ́ Yésusu a lɛncana moliolio mábɔ́, go bó gundie a amɔ́: «Bekuilí báaba! No támbana goakɛ́ o? 19Túfíemú nɔnɔ gɛkɔ́ŋɔ gá muinyí gɛ́ɛgɛ no soananamɔ́ tásɛ kɔ́ɔ.» Bá báá lɛ gó mo úlene na gɛ́. 20Gɛ́hɛ́ go bó úhune a amɔ́: «Busío bɔ́ɔbɔ bó lɔ́mɔ́ enínyéelú kɔ́ɔ na ufíno yɔ́ɔyɔ yó lɔ́mɔ́ dɛlɛ́dáalú kɔ́ɔ mó lɔ́mɔ́ má ánɛ́ɛ o?» 21Bɔ́ɔ go mo gundie bá amɔ́: «Mó lɔ́mɔ́ má ufuŋe ogɔ́nɔ́ Sɛsáalɛ.» Gɛ́hɛ́ go bó oyana a amɔ́: «Gundínyée nɔnɔ kanɛ́ Sɛsáalɛ bɔ́ɔbɔ bó lɔ́mɔ́ bá Sɛsáalɛ, no gundinye Asaŋa bɔ́ɔbɔ bó lɔ́mɔ́ bá Asaŋa.» 22Naá dogálɔ dɔ́ɔdɔ, gáábɔ́ go békúke makɔ́nɔ́, bá báá mo dɛ́ɛ́ná, bá báá dómbánáa.
Cuŋí go gɛsɛnɛ gá púfuge ya begúe
(Mél 12.18-27; Lók 20.27-38)
23Buisí moánɛ bɔ́ɔbɔ, batɔ bá giimbó gá Beseduseyéŋe go úle naá boayá bá Yésusu. Beseduseyéŋe bá lɛ́ batɔ báaba bó oyamɔ́ bá amɔ́ bɛlɔ́ŋɔ́ bɛ́ dɛ fúfúgénée#22.23 O bana, go eninye na Meŋ 23.8.. Kɔ́ɔ bá mo úhunemú bá amɔ́: 24«Iloodio, Mɔ́sɛsɛ a mbo oyɛ́dá a amɔ́: “Mɔtɔ a amɔ́ a gúe kanɛ go bɛa baaná, ondimóní a gada gisí, a bíene naá ɛgoná há ondimóní mɔ́ɔnyɔ a mbaá gúé#22.24 Go ɛ́na naá Bicele 25.5-6..” 25Kanɛ́ naá bɛɛcɔ́ɔ, bolimóní banɔ́mɔtɔ́ bá mba lɛ́ batáanɔ na báandɛ́. Ba busío mɔ́ɔnyɔ a mbaá lɛ giŋénéelú, a báá gúé; aŋa a mbaá lɛ kanɛ go bíene, a báá dɛ́fɛ́ná ondimóní ogɛ́. 26Gɔ́ɔ gó bɛ́ɛmbamɔ́ nɔ́ɔnɔ caŋa mmue na ba gáandɛ́ɛ, na ba gádadɔ́ɔ, gó bɛ́ ɛ́dá súgudinye naá ba gátáanɔ na gáandɛ́ɛ. 27Naá nnyimé ya bɔ́ɔ biimée, okɔ́dɔ go gúe tɔ́nɔ. 28Ɛɛ́ɛŋ kɔ́ɔ! Naá púfuge ya begúe, a ŋgaá bɛ́ɛ́mbá ogánɛ́ ánɛ́ɛ o? Mammana, a mba lɛ́ okɔ́dɔ ba biimée bátáanɔ na báandɛ́.» 29Yésusu go bó gundie a amɔ́: «No bébelebele, goakɛ́ no do íyíménée Ŋgɔ́ŋɛ́, akɛ́ bogaaga bá Asaŋa. 30Mammana, naá púfuge ya begúe, banɔ́mɔtɔ́ na bakɔ́dɔ bá dɛ ŋgá giŋenine, bá ŋgɔ ɔyɔ́ɔ aŋa bɛɛ́ŋgɛlɛsɛ naá mmoɛná. 31Aŋa ŋgúhune ɛ núunemú púfuge ya begúe, no gá báasa no do baná nogálɔ nɔ́ɔnɔ Asaŋa a mbaá nyó oyáná a amɔ́: 32“Ndɛ́ Asaŋa ba Ábalaháma, Asaŋa ba Ɛ́saga, Asaŋa ba Yɔ́kɔbɔ#22.32 O bana naá Gihúmie 3.6. o?” A dɛ báá Asaŋa ba begúe, a lɔ́mɔ́ Asaŋa ba bɔgɔ́sɔ.» 33Aŋa Bitúu ba batɔ bɛ́ mbɔɔ́ ɔ́bɔ́ gooya gá Yésusu gɔ́ɔgɔ, gáábɔ́ go békúke makɔ́nɔ́ mbɔ́dɔ yɛhɛ́ ya go húunenye.
Gɛkɔ́nɔ́nɔ́ɔ gá gɛlɔsɛnɔ
(Mél 12.28-34; Lók 10.25-28)
34Aŋa Befelisiéŋe bá mbɔɔ́ ɔ́bɔ goŋaá Yésusu a á buigé Beseduseyéŋe nyuudé, gáábɔ́ go bábándɛgɛna. 35Iloodio há bɛlɔsɛnɔ hímmue naá olɔŋɔ yábɔ́ go mo dámbɛna na ŋgúhune yɛ́ɛyɛ a amɔ́: 36«Iloodio, naá Gicele, gɛlɔsɛnɔ gá bogaaga gɛ́hanɛ́ gɛ́ lɔ́mɔ́ kɔ́ɔ, gɛ́ dómbana bɛ́ɛbɛ bíncodío?» 37Gɛ́hɛ́ go mo gundie a amɔ́: «O háanana go maamana Daadáa Asaŋa bahɔ na odɛ́má yáhɔ uŋkimée, na gɛɔyɔ gáhɔ giimée, na mbééníŋínyí yahɔ iŋkimée#22.37 O bana naá Bicele 6.5.. 38Gɛlɔsɛnɔ gá bogaaga gɛ́ dómba gɛ́gɔ́ɔ, gɛ́ lɛ́ gá busío. 39Gá gáandɛ́ɛ gɛ́ lɛ́ tɔ́nɔ na ndénégé makɔ́nɔ́, gɛ́ lɔ́mɔ́: O háanana go maamana sɔ́gɔ́ɔ aŋa maamɔ́ɔ moatɛ́#22.39 O bana naá Léfi 19.18.. 40Bɛlɔsɛnɔ bá bɛ́andɛ́ bɛ́ɛbɛ bɛ́ bɛ́ lɔ́mɔ́ mbɔ́gɔ́ ya Gicele giimée akɛ́ tɔ́nɔ na bakálata báaba mbúsí sá Asaŋa sɛ́ mbɔɔ́ ɔ́ŋɔ́ɔ.»
Cuŋí naá bɔ́ɔbɔ bó núunemú Mesíi
(Mél 12.35-37; Lók 20.41-44)
41Aŋa Befelisiéŋe bá mbaá lɔ́mɔ́ bábándɛ́gɛ́náalú, Yésusu go bó nɔɔ ŋgúhune yɛ́ɛyɛ a amɔ́: 42«Bɛɛnyɔ́ɔ, no oyamɔ́ no amɔ́ nɛɛ́nɛ go busío bá Mesíi o? U úlenemú naá nogɔgɔ́ ná ánɛ́ɛ o?» Gáábɔ́ go mo gundie bá amɔ́: «Naá nogɔgɔ́ ná Défidi.» 43Yésusu go bó oyana a amɔ́: «Nɛɛ́nɛ kanɛ́ Défidi a mo dɔ́ŋɔnɔmɔ́ aŋa Gimmúmpúu gá Giliíli a mbaá lɛ a mo oyanɛna, a amɔ́ Daadáa, o oya a amɔ́:
44“Daadáa a mbo oyáná Daadáa bamɛ a amɔ́:
Lukúméne naá boayá bá ombɔ́gɔ onɔ́mɛ yámɛ
gó ɛ́da húme aŋa nná ŋamɔ́ goŋaá o níŋiside babɛlɔ́bɛlɔ báhɔ kɔndɔ́ go cí#22.44 O bana naá Ɛsagɔ 110.1. o?”
45Kanɛ́ aáŋa Défidi a mo dɔ́ŋɔnɔ Daadáa, nɛɛ́nɛ a lɔ́mɔ́ tɔ́nɔ ba go úle naá nogɔgɔ́ nɛ́hɛ́ o?» 46Batɔ go gúdumide kanɛ ba go mo gundie nogálɔ. Gó bayɛga buisí moánɛ, mɔtɔ a lɛ́ kanɛ go gɔnɔ mo nɔɔ ŋgúhune.
Одоогоор Сонгогдсон:
Motíosi 22: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү