Motíosi 20
20
Ncaba ya bɛsoɛná bá boyogóní ntɛ́mɛ́
1«Bufuŋe bá mmoɛná bó fóanɛnana na ncaba yɛ́ɛyɛ: Mɔtɔ ba ntɛ́mɛ́ ummue a mba húmé na gɛyɛ́nɛ́ túlúbú go go paŋa boyogóní bá go yɔgɔnɔ naá mɔ́ ntɛ́mɛ́. 2Gɛ́hɛ́ go húme ukelú nabɔ́ goŋaá a gaá bó soanɛ́nánáa gɛkɔ́ŋɔ gá muinyí gímmue go buisí, go bó dóma naá mɔ́ ntɛ́mɛ́. 3Go bigúlí bɛ́nnámanyɛ́ na gímmue bá gɛyɛ́nɛ́, mɔtɔ ba ntɛ́mɛ́ go gɔnɔ húme, go gíde batɔ bóntió ndukíi ndukíi kanɛ buelí. 4Go bó oyana a amɔ́: “Bɛɛnyɔ́ɔ tɔ́nɔ ɛ́dá nɔnɔ go buelí naá yɔmɔ́ ntɛ́mɛ́, kaá nyó soɛná aŋa go háananamɔ́.” 5Bɔ́ɔbɔ go ɛ́da go buelí. A á gɔnɔ́ húme go tólóbóo, gɔnɔ́ go bigúlí bɛ́dadɔ́ bá hɛɔbɔ́bɔ́ɔ, a báá gɔnɔ́ gɔ́lɔ boyogóní bóncoó caŋa mmue. 6Kɔ́ɔ mɔtɔ ba ntɛ́mɛ́ a gɔnɔmɔ́ húme go bigúlí bɛ́táanɔ bá hɛɔbɔ́bɔ́ɔ, go gɔnɔ gíde batɔ bóncodío hɔ́ɔlɔ́. Gɛ́hɛ́ go bó oyana a amɔ́: “Goakɛ́ no dúmbiemú buisí buimée buimée hɔ́ɔlɔ́ kanɛ go yɔgɔnɔ o?” 7Bɔ́ɔ go mo gundie bá amɔ́: “Bó lɔ́mɔ́ go goŋaá mɔtɔ a lɛ́ kanɛ go có paŋa go buelí.” Gɛ́hɛ́ go bó oyana a amɔ́: “Ɛɛ́ɛŋ, bɛɛnyɔ́ɔ tɔ́nɔ ɛ́dá nɔnɔ go buelí naá yɔmɔ́ ntɛ́mɛ́.”
8«Hɛɔbɔ́bɔ́ɔ hɛ́ obá, mɔtɔ bá ntɛ́mɛ́ go dɔ́ŋɛnɔ ufífí boyogóní bɛhɛ́ a amɔ́: “Dɔ́ŋɔ́nɔ́ɔ boyogóní, o bó soɛna, o bayɛga go báaba bá báá ná súgúdínyée go díge, o lo go yibe go báaba bá báá ná dóáná.” 9Boyogóní báaba bá mbaá dígé go bigúlí bɛ́táanɔ bá hɛɔbɔ́bɔ́ɔ, go úle kanɛ́, bá báá bódáa gɛkɔ́ŋɔ gá muinyí gímmue, gímmue. 10Báaba bá mbaá dóáná, bá á ncó bola go yábɔ́ olɔŋɔ, bá béeniŋenye bá amɔ́ bɔ́ɔ tɔ́nɔ, bá gaá bódá bó dómba nɔ́ɔnɔ. Kanɛ́ bɔ́ɔ tɔ́nɔ go bóda onyɔ moánɛ, gɛkɔ́ŋɔ gá muinyí gímmue, gímmue. 11Naá go gɛ́ gɛ́ndɛgɛna, gáábɔ́ go ɛ́da go uŋguluŋgule, bá béséeginenye mɔtɔ ba ntɛ́mɛ́ bá amɔ́: 12“Báaba bá gá lɔ́mɔ́ na gosúgudinye go díge, bá báa yɔgɔnɔ gigúlí táŋɛ́ gímmue, o lo go bó soɛna caŋa mmue aŋa bɛɛcɔ́ɔ báaba dɛ báá ná kéléméné gɛdɔmbɔ gá buisí buimée na onɔmɔnɔmɔ yá gɛonyá.” 13Kanɛ́ mɔtɔ ba ntɛ́mɛ́ go baga ummue naá olɔŋɔ yábɔ́ a amɔ́: “Ugúle, cɛ go ŋanánáa gɛbɛ́; ábɔ dɛ dɛ báá húme ukelú go gɛkɔ́ŋɔ gá muinyí gímmue o? 14Gɔ́lɔ́ bɔ́ɔbɔ bó lɔ́mɔ́ báhɔ, o biene pɛ́. Yɔmɔ́ɔ ndɛ́galɛga go soɛna sɔ́gɔ́ɔ ba mesúgidinye mɔ́ɔnyɔ aŋa maamɔ́ɔ. 15Cɛ háánánáa go yɔgɔnɔ na bonɔ́mɛ bámɛ aŋa ndɛ́galɛgamɔ́ o? Ɛ́na lí, o ŋgágamɔ́ hɛagá goŋaá ndɛ́ usi o?” 16Náana, báaba bá lɔ́mɔ́ bá busío bá ŋga bɛ́ɛ́mbá bá nnyimé; tɔ́nɔ báaba bá lɔ́mɔ́ bá nnyimé, bá ŋga bɛ́ɛ́mbá bá busío.»
Yésusu a á dóógío nigúe nɛ́hɛ́ na púfuge yɛhɛ́ go oŋɛndɔ yá gádadɔ́ɔ
(Mél 10.32-34; Lók 18.31-34)
17Yésusu a bólɛgana naá Yolósalɛmɛ, gɛ́hɛ́ go gɔ́lɔ Bɛɔdɔ́ɔ na bɛ́andɛ́ a báá bɔ́gɔ́gɛ́dɔ́ nabɔ́, go bó oyana go pɛ́ a amɔ́: 18«Ɛ́nɔ, gɛ́cɔ́ go ɛ́da gɔ́gɔ́ɔ naá Yolósalɛmɛ, hɔ́ɔ gɔ́ɔ bá gaá ná íŋéné Moɔnɔ́ ba mɔtɔ go bagɔ́nɔ́ɔ bá bedúmbí bɛbáágá naá Asaŋa na muloodio má gicele. Bɔ́ɔbɔ bá gaá sómbá goŋaá a háanana na nigúe. 19Bá lɛ go mo íŋene go batɔ báaba bá lɔ́mɔ́ bá dɛ bɛ́ɛ́mbá Beyúdene. Béndiemi bá ná mo fánɛnafanɛna, bá mo sóala bɛságɔ, bá mo gilene naá kolósi. Kanɛ́ naá nnyimé ya medúgú mádadɔ́, a lɛ go fúfuge.»
Ŋgɔŋɛnɔ ya nnyeedíi ba Sáakɛ na Sáŋa
(Mél 10.35-45; Lók 22.25-27)
20Gɔ́ɔ nnyeedíi ba bahaŋa bá Sebedée a báyɛkɛnamɔ́ Yésusu olɔŋɔ na baaná bɛ́hɛ́, a báá mo guléné enúu go go mo úhune boóma. 21Yésusu go mo úhune a amɔ́: «O lɛ́galɛgamɔ́ ɛkádɛ?» Gɛ́hɛ́ go mo oyana a amɔ́: «Ŋaáa goŋaá bahaŋa bámɛ báaba bá bɛ́ɛmba ndukíi, ummue naá boayá báhɔ bá ombɔ́gɔ onɔ́mɛ, mɔ́ɔnyɔ untió, naá yɔ́ɔyɔ yá odádɛ́, gɛcamɛna gɛ́ɛgɛ o ná bɛ́ɛmbamɔ́ naá undukí yáhɔ yá Bufuŋe.» 22Yésusu go gundie a amɔ́: «No do bósó go íyimene boóma bɔ́ɔbɔ no ɔŋɔnɔmɔ́. No lɛ́ ba go nyóɛna ɛnnyóɛ́ná hɛ́ɛhɛ yɔmɔ́ɔ kaá ná nyóɛ́ná?» Bá amɔ́ gɛ́hɛ́ aá: «Dɛ lɛ́ ba go hɛ́ nyóɛna.» 23Gɛ́hɛ́ go bó oyana a amɔ́: «Ɛɛ́ɛŋ, no gaá nyóɛ́ná yɔmɔ́ ɛnnyóɛ́ná#20.23 O bana, go eninye na Meŋ 12.2., kanɛ́ naá gɛ́ɛgɛ gá go lukumene mɔ́ɔnyɔ naá boayá bámɛ bá ombɔ́gɔ onɔ́mɛ, mɔ́ɔnyɔ naá bɔ́ɔbɔ bá odádɛ́, a dɛ bósó yɔmɔ́ɔ mɔ́ɔ ndɔ́mɔ́ ba go sómba nɔ́ɔnɔ. Indukí moánɛ ɛ lɔ́mɔ́ go báaba Baaba a mbaá gedíe go busío bábɔ́.» 24Aŋa behúúní bɔ́ɔ́dɔ́ báaba bóncodío bá mbɔɔ́ ɔ́bɔ́ boóma bɔ́ɔbɔ, gáábɔ́ go ɔ́bɛnɔ bolimóní bá báandɛ́ bɔ́ɔbɔ mpímí. 25Gɔ́ɔ Yésusu a bó dɔ́ŋɛnɔmɔ́ bɔ́ɔ biimée go bó oyana a amɔ́: «No íyimene bɛɛnyɔ́ɔ moatɛ́ goŋaá báaba bá lɔ́mɔ́ aŋa mefuŋe má bɛdɔŋɔ, bí íligene batɔ bábɔ́ na masɔ́mɔ, bɛgaaga bɛ́ bó míneminie. 26Bó do háánánáa go bɛ́ɛmba nɔ́ɔnɔ naá kadɛ́gadɛ́ɛ yɛnyɔ́. Aáŋa mɔtɔ a lɛ́galɛga go bɛ́ɛmba ogɔ́nɔ́ɔ naá kadɛ́gadɛ́ɛ yɛnyɔ́, a háanana go bɛ́ɛmba mɔ́ɔnyɔ a yɔgɔnɔmɔ́ go busío bɛ́nyɔ́. 27Gó gɔnɔ gunde, aáŋa mɔtɔ a lɛ́galɛga go bɛ́ɛmba ba busío naá kadɛ́gadɛ́ɛ yɛnyɔ́, ŋgáa a bííyie gɛɔlɛ́ gá biimée. 28Nɔ́ɔnɔ gɔ́ɔ, Moɔnɔ́ ba mɔtɔ a mbuú úlé, caá akɛ́ goŋaá batɔ bá mo bɔ́yɔgɔnɛnɔ, kanɛ́ goŋaá, mɔ́ɔ a bɔ́yɔgɔnɛnɔ batɔ, a gunde i íŋene gɛɔyɔ gɛ́hɛ́ go go fáŋa gɛcɛcá gá batɔ#20.28 O bana, go eninye na 26.28; 1 Tim 2.6..»
Yésusu e é éŋúgíe begélígeli báandɛ́
(Mél 10.46-52; Lók 18.35-43)
29Gɛcamɛna gɛ́ɛgɛ bá mbaá ŋá bá ná lɛ́ go húmene naá tɛ́sɔnɔ ya Yelíko, gitúu gá batɔ go ɛ́da go bienene Yésusu. 30Begélígeli báandɛ́ bá mba lɛ́ ndukíi naá boayá bá pɛ́; go ɔ́bɔ goŋaá Yésusu mɔ́nyɔ́ɔ a dómbanamɔ́, gáábɔ́ go ɛ́da go ánca bá amɔ́: «Daadáa, Ohaŋa ba Défidi, có ɛ́náamɔ́ mahana!» 31Gitúu gá batɔ go ɛ́da go bó kóndiokondio goŋaá bá buige eŋgúdé. Kanɛ́ bɔ́ɔ, bɛ́ ɛ́dana naá busío bá ánca makɔ́nɔ́ bá amɔ́: «Daadáa, Ohaŋa ba Défidi, có ɛ́náamɔ́ mahana!» 32Yésusu go dɛ́lɛmɛna, a báá bó dɔ́ŋɛ́nɔ́, go bó oyana a amɔ́: «No lɛ́galɛgamɔ́ goŋaá ŋŋa ɛkádɛ go busío bɛ́nyɔ́ o?» 33Bɔ́ɔ go mo gundie bá amɔ́: «Daadáa, ŋgáa oŋgíso yɛ́cɔ́ yá fuunuge!» 34Mahana má á mo gɔ́lɔ́, gɛ́hɛ́ go bó báláfɛna go oŋgíso; hɔ́ɔ na hɔ́ɔ, gáábɔ́ go bayɛga go ɛ́nanɛna, bá báá mo biené.
Одоогоор Сонгогдсон:
Motíosi 20: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү