Lókasɛ 9
9
Yésusu a á dómá behúúní bɛ́hɛ́ bɔ́ɔ́dɔ́ na báandɛ́ go bosɔ́mɔ
(Mot 10.1-9,11-14; Mél 6.6-13)
1Gɔ́ɔ Yésusu a bándɛgɛnamɔ́ behúúní bɛ́hɛ́ bɔ́ɔ́dɔ́ na báandɛ́ go bó fáa bogaaga na nɛgaŋa go bɛgáda bá biliíli biimée, bé éŋugenye ɛgɔnɔ́. 2Gɛ́hɛ́ go bó dóma goŋaá bɛ́ ɛ́da dúmenye Gɛnɔ́gɔ́ gá Cɔ́mɔ gá Bufuŋe bá Asaŋa, bé éŋugenye bɔgɔnɔ́gɔnɔ; 3kɔ́ɔ a bó oyanamɔ́ a amɔ́: «No do hóámá no do gɔ́lɔ́ boóma bá oŋɛndɔ: akɛ́ gidímbo, akɛ́ gɛgada, akɛ́ boóma bá go nyáa, akɛ́ muinyí, mɔtɔ a dɛ bɛáa bɛla bɛ́andɛ́. 4Nnyaŋá iŋkimée yɛ́ɛyɛ no íŋenemú hɔ́ɔ, gɛ́gáa nɔnɔ hɔ́ɔ gó ɛ́da go éme naá buisí bɛ́nyɔ́ bá go dómba. 5Bá amɔ́ bí inye go nyó gɔ́lɔ bese, úlúkíe nɔnɔ hɔ́ɔ, no bégidide bibúu bá bɛgɔ́ndɔ́ bɛ́nyɔ́#9.5 O bana naá Mél 6.11.: bá gaá bɛáa gɛlɔsɛnɔ hɔ́ɔlɔ́.» 6Kɔ́ɔ behúúní bá bienemú pɛ́, bɛ́ ɛ́da bá dómbana naá bɛdɔŋɔ biimée, bó oya Gɛnɔ́gɔ́ gá Cɔ́mɔ, bé éŋugenye bɔgɔnɔ́gɔnɔ hoóma hiimée.
Ufíno yá Yésusu yó bueŋenye ufuŋe Elóode
(Mot 14.1-2; Mél 6.14-16)
7Gɔ́ɔ kanɛ́ ufuŋe Elóode ɔ ɔ́bɔmɔ́ bó oya boóma buimée bɔ́ɔbɔ bó mbaá lɔ́mɔ́ bó bádómbana. Nciŋí ya boóma moánɛ go mo yímene, goakɛ́ batɔ bóncodío bá mba lɛ́ bó oya bá amɔ́: «Sáŋa Begiyuminye a á fúfúgé.» 8Batɔ bóncoó bá amɔ́: «A lɔ́mɔ́ Elíi mɔ́ɔ a á nɛ́ ɛ́nɛ́gá.» Báaba gɔnɔ́ bá a amɔ́: «Mbúsí ya Asaŋa mmue ya cóá yɛ á fúfúgé.» 9Kanɛ́ Elóode go oyɛda a amɔ́: «Yɔmɔ́ɔ ba moatɛ́ mmbaá dómá batɔ bá báá sómbá Sáŋa odóɛ. Ánɛ́ɛ kanɛ́ mɔ́nyɔ́ɔ ŋgɔ́bɔnɔmɔ́ bó oya moóma mɔ́ɔmɔ muimée gɛ́hɛ́ o?» Gɛ́hɛ́ go ɛ́da go fúmbe goŋaá ɛ ɛ́na Yésusu.
Yésusu a á nyéényényée gitúu gá batɔ
(Mot 14.13-21; Mél 6.30-44)
10Aŋa baapótɛlɛ bá mbaá ncó gunde; gáábɔ́ go oyanɛna Yésusu boóma buimée bɔ́ɔbɔ bá mbaá ŋaáa. Gɛ́hɛ́ go bó gɔ́lɔ, a bɛ́ɛ́ ɛ́dá nabɔ́ gɛyáŋɛ́ gɛayá gá tɛ́sɔnɔ ya Bɛcayɛ́da. 11Kɔ́ɔ aŋa bitúu bá batɔ bɛ́ mbɔɔ́ ɔ́bɔ́ nɔ́ɔnɔ, gá bɛ́ go mo fídene. Yésusu go bó gɔ́lɔ bese, a bó oyanɛna ɛkádɛ́ bó lɔ́mɔ́ Bufuŋe bá Asaŋa, e éŋugenye báaba bá mbaá lɔmɔ́ bá mbaŋɔ́.
12Buisí bó ná lɛ́ go gúlugene, Bɛɔdɔ́ɔ na bɛ́andɛ́ bá behúúní go báyɛkɛna Yésusu, bá amɔ́: «Gúlúgíe gitúu gá batɔ gɛ́ɛgɛ, bɛ́ ɛ́da naá bɛdɔŋɔ na naá motɔtɔ́ŋɔ má maayá bá fúmbe manyáanya na mbɛ́dɛ́mɛ́nɛ́ná, goakɛ́ anáa dɛ lɔ́mɔ́ háalá, há lɛ́ gɛcɔ́lɔ́kɔ́ gá hoóma.» 13Gɛ́hɛ́ go bó gundie a amɔ́: «Bó fáamɔ́ nɔnɔ bɛɛnyɔ́ɔ moatɛ́ manyáanya.» Bɔ́ɔ go mo gundie bá amɔ́: «Dɛ lɛ́ goana na bɛlɛ́dɛ bɛ́táanɔ na moɔbɔ́ móandɛ́. O lɛ́galɛga goŋaá dɛ ɛ́ ɛ́dá go ɔ́ndɔ manyáanya bɛɛcɔ́ɔ moatɛ́ go batɔ báaba biimée o?» 14Báaba bá mbaá lɔmɔ́ hɔ́ɔ bá mba lɛ́ ombanɔ yá batɔ banɔ́mɔtɔ́ bá go húme tɔ́sɛnɔ ɛ́táanɔ.
Kɔ́ɔ Yésusu o oyanamɔ́ behúúní bɛ́hɛ́ a amɔ́: «Bó lukúménényéemú nɔnɔ go bɛɛca: gɛɛca gímmue batɔ aŋa otíno áhandɛ́ na bɔ́ɔ́dɔ́.» 15Gɔ́ɔ bá mo ɔ́bɛnɔmɔ́, bá báá lukúménényée batɔ. 16Yésusu go gɔ́lɔ bɛlɛ́dɛ bá bɛ́táanɔ na moɔbɔ́ móandɛ́ mɔ́ɔmɔ, a báá búlúgíe oŋgíso go mmoɛná, a báá béhiigí Asaŋa go moóma má go nyáa mɔ́ɔmɔ. Gɛ́hɛ́ go mó gɛ́sa, i íŋenene behúúní goŋaá bá abana gitúu. 17Batɔ biimée bá báá nyáányáa bá báá hóógío, bá báá gɔ́lɔ́ bigísi bá bɛlɛ́dɛ bɛ́ɛbɛ bɛ́ mbaá síéné, bɛ́ mba lɛ́ ncada sɛ́ɔ́dɔ́ na ɛ́handɛ́#9.17 O bana, go eninye na bɔ́ɔbɔ naá 2 Mefuŋe 4.42-44.dácɛ dácɛ.
Píele o ó oyɛ́dá goŋaá Yésusu a lɛ́ Mesíi
(Mot 16.13-21; Mél 8.27-31)
18Aŋa Yésusu a mbaá lɔmɔ́ bɔ́gɔ́gɛ́dɔ́ɔlú go mbósógólí, behúúní olɔŋɔ nɛhɛ́, gɛ́hɛ́ go bó úhune a amɔ́: «Bitúu bá batɔ bɛ́ oya bɛ́ amɔ́ ndɔ́mɔ́ ánɛ́ɛ o?» 19Gáábɔ́ go gundie bá amɔ́: «Batɔ bó oya bá amɔ́ o lɔ́mɔ́ Sáŋa Begiyuminye, bóncodío bá amɔ́ o lɔ́mɔ́ Elíi, bóncodío gɔnɔ́ bá amɔ́ o lɔ́mɔ́ mbúsí sá Asaŋa mmue ya cóá yɛ́ yɛ á ná fúfúgé.»
20Yésusu go bó úhunemú a amɔ́: «Kanɛ́ bɛɛnyɔ́ɔ no oyamɔ́ no amɔ́ ndɔ́mɔ́ ánɛ́ɛ o?» Píele a á gɔ́lɔ́ dogálɔ, go gundie a amɔ́: «O lɔ́mɔ́ Mesíi ba Asaŋa.» 21Kanɛ́ Yésusu go bó bébégidine goŋaá bá dɛ hóámá bá dɛ oyáná mɔtɔ ánɛ́ɛ a lɔ́mɔ́, 22gɛ́hɛ́ go ɛ́da naá busío a bó oyanɛna a amɔ́: «Gó háanana goŋaá Moɔnɔ́ ba mɔtɔ a lumene na gɛɔ́bɛgɔ makɔ́nɔ́; bafɛanɔ́ɔ bá gɛdɔŋɔ, bagɔ́nɔ́ɔ bá bedúmbí bɛbáágá naá Asaŋa na muloodio má gicele bá mo umbe, batɔ bá mo óna, kanɛ́ naá nnyimé ya medúgú mádadɔ́, a lɛ go fúfuge.»
Nɛɛ́nɛ o lɔ́mɔ́ ba go biene Yésusu
(Mot 16.24-28; Mél 8.34—9.1)
23Kɔ́ɔ a bó oyanamɔ́ bɔ́ɔ biimée a amɔ́: «Aáŋa mɔtɔ a lɛ́galɛga go mbiene, ŋgáa a dɔmbɔ go ɔyɔ go gɛ́hɛ́ moatɛ́, a kélemene bɛdɔmbɔ miisí miimée, a lɛ go mbiene. 24Goŋaá mɔtɔ mɔ́ɔnyɔ a lɛ́galɛgamɔ́ go beŋe gɛɔyɔ gɛ́hɛ́ a ná gɛ́ yímie. Kanɛ́ mɔ́ɔnyɔ a ná yímiemú gɛɔyɔ gɛ́hɛ́ go busío bámɛ, a ná gɔnɔ bɛa gɛ́. 25Mɔtɔ a amɔ́ a bóda cí iŋkimée, a amɔ́ a yímie gɛɔyɔ gɛ́hɛ́ ɛ́na a amɔ́ a bésulie mɔ́ɔ moatɛ́, kasɛ́á besé a lɔ́mɔ́ ba go dáŋaba o? 26Mammana, mɔtɔ a amɔ́ a nóanana odóɛ namɛ gɔnɔ́ na dogálɔ dámɛ naá tɛ́mádɛ́má ya batɔ bá ínoni báaba bá fíidenyemú Asaŋa nnyimé bá gɔnɔ lɔgɔ makɔ́nɔ́, Moɔnɔ́ ba mɔtɔ a ŋga mo nóɛ́ná tɔ́nɔ odóɛ gɔ́ɔgɔ a ŋguú úlé naá nigúmi nɛ́hɛ́, na naá nɛ́ɛnɛ ná Isée na bimmúmpúu bá bɛɛ́ŋgɛlɛsɛ. 27Mammana, ŋgaá nyó oyáná caá, batɔ bóntió naá báaba bá lɔ́mɔ́ háalá, bá dɛ ŋgá gúenene kanɛ goŋaá bɛ́ ɛ́ ɛ́ná Bufuŋe bá Asaŋa.»
Nigúmi ná Moɔnɔ́ ba Asaŋa
(Mot 17.1-8; Mél 9.2-8)
28Naá nnyimé ya medúgú aŋa mánnámanyɛ́ go dómba aŋa a mbaá gálágáláa nɔ́ɔnɔ, Yésusu go gɔ́lɔ Píele Sáŋa na Sáakɛ; go ɛ́da naá ogɔndɔ mmoɛná go go bósógolonyo. 29A lɛ́ naá go bósógolonyo, busío bɛ́hɛ́ go bénúgie, gɛla gɛ́hɛ́ gɛ́ báá púméné genyi genyi. 30-31Gɔ́ɔ bá ncomɔ́ go ɛ́na goŋaá batɔ báandɛ́ bó oya ŋkanɔ́ nɛhɛ́; Mɔ́sɛsɛ na Elíi. Bá mba lɛ́ naá kadɛ́gadɛ́ɛ ya nigúmi ná mmoɛná. Bá gálagala nɛhɛ́ mbɔ́dɔ yɛ́ɛyɛ a mbaá lɛ bá go hóogio bosɔ́mɔ bɛ́hɛ́ bá go ɛ́da gúe naá Yolósalɛmɛ. 32Píele na boɛhɛ́ɛ bá mba lɛ́ golá golá na dɔnɔ́ɔ. Kɔ́ɔ bá foyogamɔ́ go ɛ́na nigúmi ná Yésusu na báandɛ́ báaba bá mbaá lɔmɔ́ tɛ́nɛ́ɛ nɛhɛ́#9.32 O bana, go eninye na bɔ́ɔbɔ na 2 Píe 1.16-18.. 33Aŋa gɔ́ɔgɔ bɔ́ɔbɔ bá mbaá ŋá bá ná lɛ́ go ádoganana na Yésusu, Píele go mo oyana a amɔ́: «Iloodio, bó lɛ́ bese goŋaá dɛ bɛ́ɛmba háalá; ŋgáa dɛ dábɛga bincumu bɛ́dadɔ́: gáhɔ gímmue, gá Mɔ́sɛsɛ gímmue, gá Elíi gímmue.» A dɛ mbáa lɛ i íyimene boóma bɔ́ɔbɔ a mbaá lɔmɔ́ a gálagala.
34Aŋa a mbaá lɔmɔ́ a gálagala nɔ́ɔnɔ, nogálámbá go úle nó báá bó boɛgɛ́ná. Behúúní go bɛa bofoá aŋa bá mbɛɛ́ ɛ́ná nogálámbá nɔ́ɔnɔ nó bó boɛgana. 35Ukelú kanɛ́ go dónogoga naá nogálámbá yó amɔ́: «Mɔ́ɔnyɔ a lɔ́mɔ́ Moɔnɔ́ bamɛ, mɔ́ɔ mbií iyídé, mo bódólónyóomú nɔnɔ#9.35 Iseyíi 42.1; Lók 3.22.!» 36Aŋa ukelú yɔ́ɔyɔ yó mbaá lɛ yó dónogogana, gáábɔ́ go nco teme Yésusu mokáa. Behúúní go bɛ́dɛgɛna boóma bɔ́ɔbɔ bá mbɛɛ́ ɛ́ná pɔ́ɔ́, bá dɛ oyáná mɔtɔ naá gɛcamɛna moánɛ.
Yésusu e é éŋúgíe moádɔmbɔ́ ba gɛgáda gá giliíli
(Mot 17.14-18; Mél 9.14-27)
37Gó á bélíe, aŋa Yésusu a mbaá siisé ogɔndɔ olɔŋɔ na behúúní bɛ́hɛ́ bɔ́ɔbɔ, gɛlɔŋɔlɔ́ŋɔ́ gá gitúu go úle go go lumene nɛhɛ́. 38Gɔ́ɔ mɔtɔ ummue naá gitúu ɛ ɛ́damɔ́ go ánca a amɔ́: «Iloodio, sɔ́kɔlɛ, núúníde moɔnɔ́ bamɛ mɔ́ɔnyɔ, a lɛ́ gimmuée gámɛ gá moɔnɔ́. 39A lɛ́ aŋa gɛgáda gá giliíli gɛ́ mo gumbenemú, a dómba go ɛ́da go ánca, a canagagana, a húmenye mbúcú; gɛ́ lɛ go ɛ́da go mo séesenye nɔ́ɔnɔ, gɛ́ nco mo dɛ́ɛna tɔkɔ, a báá go gunde yɛkɛ́ɛ. 40Mbáa baŋana behúúní báhɔ goŋaá bá gɛ́ gúne, kanɛ́ gɛ́ báá bó yágɛgɛna.» 41Yésusu go gɔ́lɔ dogálɔ a amɔ́: «Ogɛlɛ yá edúu bɛlɔ́kɔ́ gɔnɔ́ na monóŋgólí, nná bɛ́ɛmba nɛnyɔ́ gó ɛ́da héme nikíníi o? Nná nyó bénúmitenye gó ɛ́da héme nikíníi o? Úlé na moɔnɔ́ bahɔ háalá.» 42Moádɔmbɔ́ a á báyɛkɛ́ná Yésusu, gɛgáda gá giliíli go mo góba go cí, a báá canágágá. Kɔ́ɔ Yésusu áncɛdɛnamɔ́ gɛgáda gá giliíli, a béé éŋúgíe moádɔmbɔ́, a báá gundínyée isée. 43Batɔ biimée go ɛ́da go békúke bogɔ́nɔ́ɔ bá Asaŋa.
Yésusu a á dóógío nigúe nɛ́hɛ́ go oŋɛndɔ yá gáandɛ́ɛ
(Mot 17.22-23; Mél 9.30-32)
Aŋa batɔ bá mbaá lɔmɔ́ bá békúke buimée bɔ́ɔbɔ Yésusu a mbaá lɔmɔ́ a ŋanana, gɛ́hɛ́ go oyana behúúní bɛ́hɛ́ a amɔ́: 44«Bódólígínyóomú nɔnɔ bese bɔ́ɔbɔ ndɔ́mɔ́ goŋaá nyó oyana: bá ná dúe Moɔnɔ́ ba mɔtɔ go ɛmbɔ́gɔ ya batɔ.» 45Kanɛ́ behúúní bá dɛ mbɔ́ ɔ́bɔ nogálɔ nɔ́ɔnɔ naá cí; bá mba nó ɔsɛ́gɔ́ goŋaá bá dɛ nó ɔ́bɔ́ naá cí; bá báá dííné go mo úhune nogálɔ moánɛ aŋa mó lɔ́mɔ́ naá cí.
Ánɛ́ɛ a lɔ́mɔ́ ogɔ́nɔ́ɔ
(Mot 18.1-5; Mél 9.33-37)
46Gɔ́ɔ behúúní bú ubiemú mpálɔ́ bɔ́ɔ na bɔ́ɔ go go íyime ánɛ́ɛ a lɔ́mɔ́ gɛkɔ́nɔ́nɔ́ɔ a dómba basɔ́gɔ́ɔ naá olɔŋɔ yábɔ́. 47Yésusu a mba lɛ́ i íyimene aŋa bá mbaá lɔmɔ́ bá béeniŋenye naá ɛdɛ́má yabɔ́, gɔ́ɔ a gɔ́lɔmɔ́ moádɔmbɔ́ ummue, a báá mo ágá go mɔ́ boayá, 48Gɛ́hɛ́ go bó oyana a amɔ́: «Mɔ́ɔnyɔ a gɛ́ndɛgɛnamɔ́ moádɔmbɔ́ mɔ́ɔnyɔ go busío bámɛ, a kɛ́ndɛgɛnamɔ́ yɔmɔ́ɔ moatɛ́; gɔnɔ́ mɔ́ɔnyɔ a kɛ́ndɛgɛnamɔ́, a gɛ́ndɛgɛnamɔ́ mɔ́ɔnyɔ a lɔ́mɔ́ tómáalú. Mammana, mɔ́ɔnyɔ a lɔ́mɔ́ sɔŋkɛdɛgɛdɛ naá bɛɛnyɔ́ɔ biimée, mɔ́ɔ a lɔ́mɔ́ gɛkɔ́nɔ́nɔ́ɔ.»
Mɔ́ɔnyɔ a lɔ́mɔ́ a dɛ nyó bábɛndábɛ́ndáa a lɛ́ gɛ́nyɔ́
(Mél 9.38-41)
49Sáŋa go gɔ́lɔ dogálɔ a amɔ́: «Iloodio dɛ bɛ́ɛ́ ɛ́na mɔtɔ mɔ́ɔnyɔ a lɔ́mɔ́ a dɛ go bienénée nɛcɔ́ a gúne bɛgáda bá biliíli a buŋe ufíno yáhɔ. Dɛ báá ná ŋá dɛ amɔ́ dɛ mo lege.» 50Yésusu go oyɛda a amɔ́: «No do mo legé, mammana, mɔ́ɔnyɔ a lɔ́mɔ́ a dɛ nyó bábɛndábɛ́ndáa a lɛ́ nnyimé yɛnyɔ́.»
Batɔ bá Samalɛ́ɛ bá dɛ á gá gɛ́ndɛ́gɛ́ná Yésusu
51Aŋa medúgú máama Yésusu a mbaá háánánáa go bólɛga naá mmoɛná má mbaá lɛ má úle má úlene, gɛ́hɛ́ go saŋa naá odɛ́má goŋaá ɛ ɛ́da naá Yolósalɛmɛ. 52Gɔ́ɔ a dúenyemú batɔ bá bosɔ́mɔ. Gáábɔ́ go biene pɛ́ bá bɛ́ɛ́ ɛ́dá bola naá gɛdɔŋɔ gímmue gá Samalɛ́ɛ go go mo gedinye boóma buimée bɔ́ɔbɔ bó mbaá lɔmɔ́ bó háanana. 53Kanɛ́ bá mbi inyé go mo gɛ́ndɛgɛna hɔ́ɔ goŋaá a mbaá lɔmɔ́ ɛ ɛ́dana naá Yolósalɛmɛ. 54Aŋa behúúní bá Yésusu, Sáakɛ na Sáŋa bá mbɔɔ́ ɔ́bɔ́ nɔ́ɔnɔ, gáábɔ́ go gálɛda bá amɔ́: «Daadáa, o lɛ́galɛga goŋaá dɛ́ ba dɔ́ŋɛ́nɔ́ íyuke naá mmoɛná, hɛ́ gɔsɔ, hɛ́ bó fúugie#9.54 O bana, go eninye na 2 Mefuŋe 1.10-12, ŋgɔ́ŋɛ́ síncodío sɛ́ gídenine naá nnyimé ya hɛ́ bó fúugie sɛ́ amɔ́ aŋa Elíi a mbaá ŋaáa. o?» 55Yésusu go bó bábondona a báá bó coomɛ́dɛ́ná. 56Kɔ́ɔ bá dómbamɔ́ naá gɛdɔŋɔ gíncodío.
Moɔnɔ́ ba mɔtɔ a dɛ bɛanánáa mbɛ́dɛ́mɛ́nɛ́ná
(Mot 8.19-22)
57Aŋa bá mbaá ŋá bá ná lɛ́ go pɛ́, mɔtɔ ummue go gálɛda Yésusu a amɔ́: «Nná go bienene hoóma hiimée háaha o nɛ́ ɛ́damɔ́.» 58Yésusu go mo gundie a amɔ́: «Pága sɛ́ bɛanana mabɛ́lá, munoní má mmoɛná mó bɛanana aŋaanɔ; kanɛ́ Moɔnɔ́ ba mɔtɔ, mɔ́ɔ, a dɛ báá na hoóma há go dála odóɛ hɔ́ɔ a dúugide.»
59Yésusu go oyana mɔtɔ uncodío a amɔ́: «Mbienéemú.» Kanɛ́ mɔtɔ mɔ́ɔnyɔ go oyɛda a amɔ́: «Manɛ́ tɛ́ɛna ŋgɛ́da mie baaba.» 60Yésusu go mo gundie a amɔ́: «Dɛ́ɛ́na begúe bá mienene bɛlɔ́ŋɔ́ bábɔ́. Maamɔ́ɔ, ɛ́dá dúményée Gɛnɔ́gɔ́ gá Cɔ́mɔ gɛ́ɛgɛ gɛ́ núunemú Bufuŋe bá Asaŋa.»
61Mɔtɔ uncodío go gɔnɔ go oyana Yésusu a amɔ́: «Iloodio, kaá go biené, manɛ́ tɛ́ɛna kanɛ́ ŋgɛ́da bédíigie batɔ bámɛ bá nnyaŋá, dɛ ádogana nabɔ́.» 62Kanɛ́ Yésusu go mo gundie a amɔ́: «Mɔtɔ mɔ́ɔnyɔ a ágamɔ́ ombɔ́gɔ naá gɛkáládá gá buelí, a báá gɔnɔ́ go ɛ́da go núune naá nnyimé, a dɛ báá bá goŋaá a yɔgɔnɔ go Bufuŋe bá Asaŋa.»
Одоогоор Сонгогдсон:
Lókasɛ 9: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
