Sáŋa 5
5
Yésusu e é éŋúgíe onɛ́mɔnɛmɔ
1Naá nnyimé hɔ́ɔlɔ́, gibíné gá Beyúdene go bɛ́ɛmba, Yésusu go ɛ́da naá Yolósalɛmɛ. 2Naá Yolósalɛmɛ moánɛ, gɛsɔmbɔsɔ́mbɔ́ɔ gɛ́ mba lɛ́ hɔ́ɔ mekúígíi na ŋgíŋéníné ya Bɛdómbáa, gɛ́ɛgɛ bá dɔ́ŋɔnɔmɔ́ na nohébelée bá amɔ́ Bɛ́tɛsáta; gɛ́ mba lɛ́ gɛ́ bɛanana bɛtála bɛ́táanɔ. 3Naá bɛtála bɛ́ɛbɔ, gitúu gá bɛgɔnɔ́gɔnɔ gɛ́ mba lɛ́ hɔ́ɔ mbɛ́dɛ́ mbɛ́dɛ́ɛ: begélígeli, banɛ́mɔnɛmɔ, bicúgulu. [Bá mba lɛ́ bá gɛ́gana goŋaá miimpo má béduŋide, 4goakɛ́ ɛ́ŋgɛlɛsɛ ummue ba Daadáa a mba lɛ́ a siisene go bɛcamɛna naá gɛsɔmbɔsɔ́mbɔ́ɔ gɛ́ɛgɔ, a gélegelie miimpo. Gɛgɔnɔ́gɔnɔ gá busío gɛ́ɛgɛ gɛ́ mbaá lɛ gɛ́ íŋene naá miimpo aŋa má béduŋidemú gɛ́ mba lɛ́ gɛ́ éŋugene, akɛ́ a nóma kasɛ́á ogɔnɔ́.] 5Onɛ́mɔnɛmɔ ummue a mba lɛ́ hɔ́ɔ mɔ́ɔnyɔ a mbaá lɔmɔ́ a báa go ŋa nnyómá nitíno na buinyo na ɛ́dadɔ́ na ogɔnɔ́ yɛ́hɛ́. 6Aŋa Yésusu a mbaá mo ɛ́na, hɔ́ɔlɔ́ mbɛ́dɛ́ɛ, a báá lɛncá goŋaá mɔtɔ mɔ́ɔnyɔ a nóma gó ná lɛ́ fueké, gɛ́hɛ́ go mo úhune a amɔ́: «O lɛ́galɛga go éŋuge o?» 7Ogɔnɔ́gɔnɔ go mo gundie a amɔ́: «Ogɔ́nɔ́ɔ, cɛ báá na mɔtɔ ba go nnɔɔ naá osɔmbɔ gɛcamɛna gɛ́ɛgɛ miimpo má bayɛgamɔ́ go béduŋe; ká bégénegenye goŋaá ŋgɛ́da bɔ́nɔɔ, mɔtɔ uncodío a dóana go ɛ́da.» 8Yésusu go mo oyana a amɔ́: «Fadɛ́gɛ́na, o gɔ́lɔ dokandá dáhɔ, o bayɛga go ɛnda.» 9Hɔ́ɔ na hɔ́ɔ, mɔtɔ go éŋuge, a báá gɔ́lɔ́ dokandá dɛ́hɛ́, a báá bayɛ́gá go ɛnda.
Bosɔ́mɔ bɔ́ɔbɔ bó mba bádómbánáa buisí bá sábadɛ. 10Kɔ́ɔ bagɔ́nɔ́ɔ bá Beyúdene bá dɔ́ŋɛnɔmɔ́ mɔtɔ mɔ́ɔnyɔ a mbaá lɔmɔ́ a gá lɛ́ na go éŋuge, bá amɔ́ gɛ́hɛ́ bá amɔ́: «Buisí bá sábadɛ bɔ́bɔ́ɔ, o do bɛanánáa bogaaga bá go ɛ́da o tɛ́taba na dokandá dáhɔ#5.10 O bana, go eninye na Selemíi 17.21; Nehemíi 13.19..» 11Mɔtɔ go bó gundie a amɔ́: «Déénée mɔ́ɔnyɔ a ŋgéŋugiemú, mɔ́ɔ a ŋgoyanamɔ́ a amɔ́: “gɔ́lɔ́ dokandá dáhɔ, go ɛ́da.”» 12Batɔ go mo úhune kanɛ́ bá amɔ́: «Ánɛ́ɛ moánɛ a báá ná go oyáná a amɔ́: “Gɔ́lɔ́ dokandá dáhɔ, o bayɛga go ɛnda” o?» 13Kanɛ́ mɔtɔ a dɛ mbaá lɛ i íyimene Yésusu, goakɛ́ a mba sólá naá kadɛ́gadɛ́ɛ ya gitúu gá batɔ gɛ́ɛgɛ gɛ́ mbaá lɛ hɔ́ɔ. 14Naá nnyimé hɔ́ɔlɔ́, Yésusu go lumene nɛhɛ́ naá Nnyaŋá ya Asaŋa, go mo oyana a amɔ́: «Maamɔ́ɔ mɔ́nyɔ́ɔ o báá ná manɛ́ go éŋuge, o do gɔnɔ́ lɔgɔ, kanɛ nɔ́ɔ bó lɛ́ ba go go bolɛna bó dómba bɔ́ɔbɔ!» 15Mɔtɔ a á biené pɛ́, go ɛ́da go oyana bagɔ́nɔ́ɔ bá Beyúdene a amɔ́, Yésusu mɔ́ɔ a báá ná mo éŋúgíe. 16Gó bayɛga hɔ́ɔlɔ́, bagɔ́nɔ́ɔ bá Beyúdene go ɛ́da go nuugenye Yésusu goŋaá a mba ŋaáa bosɔ́mɔ bɔ́ɔbɔ buisí bá sábadɛ. 17Yésusu go bó gundie kanɛ́ a amɔ́: «Gó nco go éme godɔ́ɔdɔ Baaba a yɔgɔnɔ, yɔmɔ́ɔ tɔ́nɔ nnyɔgɔnɔ.» 18Dogálɔ dá Yésusu dɔ́ɔdɔ go fáa bagɔ́nɔ́ɔ bá Beyúdene gɔnɔ́ gɛlabɛ́ná gá goŋaá bá fúmbe go mo óna, goakɛ́ a dɛ gá súge goana go go fánɛna gicele gá sábadɛ, ɛ ɛ́da naá busío na go dɔ́ŋɔnɔ Asaŋa a amɔ́ Isée bɛhɛ́ ba moatɛ́, a bííyienye nɔ́ɔnɔ cɔ́bɛcɔ́bɛ na Asaŋa.
Bogaaga bá Moɔnɔ́ ba Asaŋa
19Gɔ́ɔ Yésusu a bó gundiemú a amɔ́: «Mammana, mammana, ŋgaá nyó oyáná caá, Moɔnɔ́ a dɛ bɛanánáa bogaaga bá go ŋa boóma go mɔ́ɔ moatɛ́; kanɛ́ a ŋananamɔ́ bɔ́ɔbɔ ɛ ɛ́nanamɔ́ Isée a ŋanana, goakɛ́ bɔ́ɔbɔ Isée a ŋananamɔ́, Moɔnɔ́ a bó ŋanana caŋa mmue. 20Isée a maamana Moɔnɔ́, a mo dúfenye buimée bɔ́ɔbɔ a ŋananamɔ́. Nɔ́ɔnɔ a ŋga mo dúfényée meŋiigíe má magɔ́nɔ́ má dómba, bɛɛnyɔ́ɔ no ɛ́da goana go békúke. 21Caŋa mmue aŋa Isée a fúfunemú begúe, a bó fáanana gɛɔyɔ, nɔ́ɔ gɔ́ɔ caŋa mmue Moɔnɔ́ a fáananamɔ́ tɔ́nɔ gɛɔyɔ go mɔ́ɔnyɔ a lɛ́galɛgamɔ́ go mo fáa. 22Baaba a dɛ sómbánáa mɔtɔ gɛsɛnɛ, kanɛ́ a mba fáá Moɔnɔ́ bogaaga buimée bá go sómbana batɔ bɛsɛnɛ. 23Bó báá ŋaáa goŋaá mɔtɔ uŋkimée a hálamana Moɔnɔ́ aŋa a hálamananamɔ́ Isée. Mɔ́ɔnyɔ a lɔ́mɔ́ a dɛ hálámánánáa Moɔnɔ́, a dɛ hálámánánáa tɔ́nɔ Isée mɔ́ɔnyɔ a lɔ́mɔ́ mo dómáalú. 24Mammana, mammana, ŋgaá nyó oyáná caá, mɔ́ɔnyɔ ɔ ɔ́bɔnɔmɔ́ dogálɔ dámɛ a gɔnɔ go ága odɛ́má yɛ́hɛ́ naá mɔ́ɔnyɔ a mbaá tómá, a bɛanana gɛɔyɔ gá kanɛ mesúge. Mɔ́ɔnyɔ moánɛ a dɛ dómbánáa naá gosómba bɛsɛnɛ, kanɛ́ a á dómbá naá nigúe go gɛɔyɔ.» 25Mammana, mammana, ŋgaá nyó oyáná caá, gɛcamɛna gɛ́ úlene, moatɛ́ gɛ́ ná lɛ́ hɔ́ɔ, gɛ́ɛgɛ begúe bá ŋgɔɔ́ ɔ́bɔ́nɔ́ɔ ukelú yá Moɔnɔ́ ba Asaŋa, gɔnɔ́, báaba bá ŋgaá yó ɔ́bɔ́nɔ́ɔ, bá ŋgɔ ɔyɔ́ɔ. 26Mammana, aŋa Baaba a lɔ́mɔ́ na gɛɔyɔ naá mɔ́ɔ moatɛ́, caŋa mmue a lɛ́ fáalú Moɔnɔ́ bogaaga bá go bɛ́ɛmba na gɛɔyɔ naá mɔ́ɔ moatɛ́. 27A lɛ́ fáalú Moɔnɔ́ bogaaga bá go sómbana batɔ bɛsɛnɛ, goakɛ́ a lɛ́ Moɔnɔ́ ba mɔtɔ. 28No do ɛ́dá go békúke moóma mɔ́ɔmɔ, goakɛ́ gɛcamɛna gɛ́ úlene gɛ́ɛgɛ biimée báaba bá mbaá gúénénée, bá ŋgɔ ɔ́bɔ́nɔ́ɔ ukelú yɛ́hɛ́. 29Kɔ́ɔ biimée báaba bá mbaá ŋanánáa besé, bá ŋga fúfúgénée go gɛɔyɔ; báaba bá mbaá ŋanánáa gɛbɛ́, bá fúfugene go go dómba naá gosómba gá bɛsɛnɛ#5.29 Go ɛ́na naá Déniele 12.2.. 30Yɔmɔ́ɔ cɛ báŋɛnánɛ́náa boóma, cómba bɛsɛnɛ go goɔ́bɔnɔ gɔ́ɔgɔ ŋgɔ́bɔnɔmɔ́, gó gunde gosómba gámɛ gá bɛsɛnɛ gó lɛ́ tɛ́nɛ́ɛ, goakɛ́ cɛ báá nnyimé kɔ́ɔ, kanɛ́ ŋananamɔ́ ndɛ́ga yá Mɔ́ɔnyɔ a mbaá tómá.
Ŋgoyáamɔ́ go busío bá Yésusu
31«Aáŋa ŋgoya boóma go yɔmɔ́ɔ moatɛ́ moatɛ, bɔ́ɔbɔ ŋgoyamɔ́ bó do báá kɔ́ɔ. 32Mɔtɔ uncodío mɔ́ɔ o oyamɔ́ go busío bámɛ, kunde ŋgíyimene caá bɔ́ɔbɔ o oyamɔ́ go busío bámɛ bó lɛ́ mammana. 33No mba dómɛ́ná Sáŋa batɔ, a bóó oyáa mammana#5.33 Sáŋa Begiyuminye mɔ́ɔ moánɛ. Go ɛ́na 1.19-27; 3.22-30.. 34Go busío bámɛ, cɛ báá ncaná na dogálɔ dá mɔtɔ, kanɛ́ kálagalamɔ́ nɔ́ɔnɔ goŋaá no bɛa gɛɔyɔ. 35Sáŋa a mba lɛ́ aŋa lámba yɛ́ɛyɛ bá nébigenyemú go go bonya; no mba lɛ́gá go békelenye go moɔnɔ́ ba gɛcamɛna naá gise gɛ́hɛ́. 36Kanɛ́ yɔmɔ́ɔ mbɛanana go busío bámɛ ŋgoyáamɔ́ yɛ́ɛyɛ ɛ dómbanamɔ́ ya Sáŋa; ŋgoyáamɔ́ moánɛ ɛ bédúfenyemú naá meŋiigíe máama Baaba a mbaá páá go go ŋanana. Mammana, meŋiigíe máama ŋŋananamɔ́ má dúfenye daŋɛ́daŋɛ go goŋaá Baaba mɔ́ɔ a lɔ́mɔ́ tómáalú. 37Baaba moatɛ́ moatɛ ba go tómá a mba gálágáláa go busío bámɛ. Kanɛ́ bɛɛnyɔ́ɔ no gá báasa no do ɔ́bɔ́ ukelú yɛ́hɛ́, akɛ́ no do ɛ́ná busío bɛ́hɛ́. 38Dogálɔ dá Baaba dó do gɛ́gáa naá bɛnyɔ́ ɛdɛ́má goŋaá no do ágánáa odɛ́má naá mɔ́ɔnyɔ a mbaá mo dómá. 39No díme Ŋgɔ́ŋɛ́, goakɛ́ no béeniŋenye no amɔ́ go sɛ́ gɔ́ɔ no gaá ná bɛáa gɛɔyɔ gá kanɛ mesúge, no do íyímé no amɔ́ kanɛ́ sɛ́ sɛ́ gálagalamɔ́ go busío bámɛ; 40no do lɛ́gálɛ́gáa go úle naá yɔmɔ́ɔ go go bɛa gɛɔyɔ gá kanɛ mesúge. 41Yɔmɔ́ɔ cɛ fúmbée mbúlugie ya batɔ. 42Kanɛ́ nnyó íyimene, kunde ŋgíyimene go goŋaá no do maamánáa Asaŋa. 43Mmbu úlé go ufíno yá Baaba, no bíí inyé go kɛ́ndɛgɛna. Kanɛ́ ŋgáa mɔtɔ ba bédugúnú u úle go ufíno yɛ́hɛ́ yá moatɛ́ moatɛ, no gaá mo gɛ́ndɛ́gɛ́ná. 44No fúmbe goŋaá gásɛ́ basɔ́gɔ́ɔ batɔ bá nyó búlugenye, no do fúmbée go bɛa mbúlugie yɛ́ɛyɛ yɛ ɛ́damɔ́ go úlene naá Asaŋa mokáa. Nɛɛ́nɛ kanɛ́ no gaá ná ágá odɛ́má o? 45No do bééníŋínyée no amɔ́ yɔmɔ́ɔ mɔ́ɔ nná dɛ́lɛmɛnamɔ́ na gɛsɛnɛ gɛ́nyɔ́ naá busío bá Baaba; Mɔ́sɛsɛ mɔ́ɔnyɔ no mbaá ágá mbémineminie yɛnyɔ́ naá mɔ́ɔ, mɔ́ɔ a ŋgaá dɛ́lɛ́mɛ́ná na gɛ́#5.45 Go ɛ́na naá Bicele 31.26-27.. 46Aáŋa no mbo olímínyóo dogálɔ dá Mɔ́sɛsɛ, gásɛ́ no olimonyo dámɛ. Mammana, bó lɔ́mɔ́ go busío bámɛ gɔ́ɔ a mbaá gálágáláa naá bakálata bɛ́hɛ́.#5.46 O bana, go eninye na bɔ́ɔbɔ naá Bicele 18.15. 47Kanɛ́ aŋa no lɔ́mɔ́ kanɛ go oliminyo dogálɔ dá Mɔ́sɛsɛ, nɛɛ́nɛ no gaá ná olímínyóo dámɛ o?»
Одоогоор Сонгогдсон:
Sáŋa 5: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү