Sáŋa 21
21
Yésusu a á bóloodío behúúní bátáanɔ na báandɛ́
1Naá nnyimé hɔ́ɔlɔ́, Yésusu go gɔnɔ bóloodio go behúúní bɛ́hɛ́, naá cɔ́lɔ ya máŋɛ́ má Tɛbɛlɛyáadɛ. Náana gɔ́ɔ a mbaá bóloodío: 2Símono Píele na Tómasɛ mɔ́ɔnyɔ bá dɔ́ŋɔnɔmɔ́ bá amɔ́ «Ɛbáása», Natanayɛ́lɛ ba tɛ́sɔnɔ ya Kána naá gɛdɔŋɔ gá Gelilée, na bahaŋa bá Sebedée, na behúúní bóncodío báandɛ́ bá Yésusu bá mba lɛ́ olɔŋɔ yúmmue. 3Símono Píele go bo oyana a amɔ́: «Ŋgɛ́da go onɔ́bɔ.» Gáábɔ́ go mo gundie bá amɔ́: «Bɛɛcɔ́ɔ tɔ́nɔ dɛ gɛɛ́ ɛ́dá olɔŋɔ nahɔ.» Gáábɔ́ go ɛ́da, bá báá bólɛ́gá naá gilué, kanɛ́ na budúgú bɔ́ɔbɔ bá dɛ mbá gumbene boóma. 4Na gɛyɛ́nɛ́ túlúbú, Yésusu go nco dɛ́lɛmɛna naá cɔ́lɔ, behúúní bá dɛ mbá lɛnca goŋaá a lɔ́mɔ́ mɔ́ɔ. 5Gɔ́ɔ a bó úhunemú a amɔ́: «Baaná, no báá gumbene hɛɔbɔ́ o?» Gáábɔ́ go mo gundie bá amɔ́: «Akɛ́ɛ.» 6Gɛ́hɛ́ go bó oyana a amɔ́: «Nɔɔ́ɔ nɔnɔ mafɔ́ɔ́dɔ́ɔ naá boayá bá ombɔ́gɔ onɔ́mɛ yá gilué, no gaá mó gumbéné.» Gáábɔ́ go nɔɔ mafɔ́ɔ́dɔ́ɔ; bá dɛ mbáa lɛ na bogaaga bá go bó gɔ́gɔ, goakɛ́ moɔbɔ́ mó mba lɛ́ kɔ́ɔ dácɛ. 7Gɔ́ɔ uhúúní mɔ́ɔnyɔ Yésusu a mbaá lɛ a maamana o oyanamɔ́ Píele a amɔ́: «A lɔ́mɔ́ Daadáa.» Aŋa Símono Píele a mbɔɔ́ ɔ́bɔ́ goŋaá a lɔ́mɔ́ Daadáa, gɛ́hɛ́ go bégundie gɛla gá mmoɛná, goakɛ́ a mba lɛ́ gɛsasɔ gɔdɔɔ́, go bɔ́nɔ naá miimpo. 8Behúúní báaba bóncodío go nco gunde na gilué bú úle bá gɔ́gɔ mafɔ́ɔ́dɔ́ɔ dácɛ na moɔbɔ́. Bá dɛ mbáa lɛ halaháláa na cɔ́lɔ, ɛ mba lɛ́ ɛ báá go síene boóma bá mɛ́da ntɛdɛ go go bola hɔ́ɔ. 9Aŋa bá mbaá siisé naá gilué, gáábɔ́ go ɛ́na gɛgɔnyɛgɔnyɛ gá íyuke, hɛɔbɔ́ kɔ́ɔ dáláalú na gɛlɛ́dɛ go boayá. 10Yésusu go bó oyana a amɔ́: «Úlé nɔnɔ na nɛnamá ná moɔbɔ́ mɔ́ɔmɔ no gá lɔ́mɔ́ na go gumbene.»
11Símono Píele go gɔnɔ bólɛga naá gilué, a báá gɔ́gɛ́dɔ́ mafɔ́ɔ́dɔ́ɔ go cí; bɛantá bá moɔbɔ́ bɛ́ mba lɛ́ kɔ́ɔ ntɛdɛ na otíno áhandɛ́ na móɔ́dɔ́ na módadɔ́. Akɛ́ aŋa mó mbaá lɛ kɔ́ɔ nɔ́ɔnɔ, mafɔ́ɔ́dɔ́ɔ má dɛ mbá lafɛga. 12Yésusu go bó oyana a amɔ́: «Úlé ncó no bágása bɛábɔ.» Kanɛ́ akɛ́ uhúúní ba ummue a dɛ mbá bɛa kélemene ya go mo úhune a amɔ́: «O lɔ́mɔ́ ánɛ́ɛ o?» Bá mba lɛ́ bí íyimene goŋaá a mbaá lɛ Daadáa. 13Yésusu go bó báyɛkɛna, a báá gɔ́lɔ́ gɛlɛ́dɛ, a báá gɛ́ bó abánáa; a báá ŋaáa nɔ́ɔnɔ caŋa táŋɛ́ mmue na hɛɔbɔ́. 14Bó mbaá lɛ oŋɛndɔ yá gádadɔ́ɔ yɔ́ɔyɔ Yésusu a mbaá bóloodío behúúní bɛ́hɛ́ naá nnyimé ya go fúfuge naá begúe.
Yésusu a á dílímínyée Píele go buelí
15Naá nnyimé ya manyáanya, Yésusu go úhune Símono Píele a amɔ́: «Símono, ohaŋa ba Sáŋa, o mmaamana o dómba báaba lí?» Píele go mo gundie a amɔ́: «Ɛɛ́ɛŋ Daadáa, go íyimene goŋaá ko maamana.» Yésusu go mo oyana kanɛ́ a amɔ́: «Beŋébéŋée yɔmɔ́ baaná bá bɛdómbáa.» 16Oŋɛndɔ yá gáandɛ́ɛ, Yésusu go mo úhune a amɔ́: «Símono, ohaŋa ba Sáŋa, o maamana o?» Píele go mo gundie a amɔ́: «Ɛɛ́ɛŋ Daadáa, go íyimene goŋaá ko maamana.» Yésusu a amɔ́ gɛ́hɛ́ aá: «Beŋébéŋée yɔmɔ́ bɛdómbáa.» 17Oŋɛndɔ yá gádadɔ́, Yésusu go mo úhune a amɔ́: «Símono, ohaŋa ba Sáŋa, o mmaamana o?» Píele go súŋide busío go gɔ́ɔgɔ Yésusu a mbaá mo úhúné go oŋɛndɔ yá gádadɔ́ɔ a amɔ́: «O mmaamana o?» Kɔ́ɔ a mo gundiemú a amɔ́: «Daadáa, maamɔ́ɔ go íyimene boóma buimée, go íyimene bese bese goŋaá ko maamana.» Yésusu go mo oyana a amɔ́: «Beŋébéŋée yɔmɔ́ bɛdómbáa#21.17 O bana, go eninye na Meŋ 20.28; 1 Píe 5.2.. 18Mammana, mammana, gɛcamɛna gɛ́ɛgɛ o mbaá lɔmɔ́ ohaŋa, o mba lɛ́ o bágóda kandáa yahɔ maamɔ́ɔ moatɛ́ moatɛ, go ɛ́dana anáa o mbaá lɔmɔ́ o lɛ́galɛga. Kanɛ́ aŋa o ná lunemú, o ŋgaá ŋá o fedigenye ɛmbɔ́gɔ, mɔtɔ untió a go góda kandáa ɛ ɛ́dana nahɔ naá hoóma háaha o lɔ́mɔ́ o do lɛ́gálɛ́gáa go ɛ́da hɔ́ɔ.» 19Yésusu a mbaá lɛ a gálagala nɔ́ɔnɔ go go dúfie mbɔ́dɔ ya nigúe yɛ́ɛyɛ Píele a mbaá lɛ ba go gúe go go gúmidie Asaŋa. Naá nnyimé ya nogálɔ nɔ́ɔnɔ, Yésusu go oyana Píele a amɔ́: «Mbienéemú.»
Yésusu a gálagala go busío bá uhúúní mɔ́ɔnyɔ a maamanamɔ́
20Píele a á bákoɛlɛ́dá, go ɛ́na uhúúní mɔ́ɔnyɔ Yésusu a mbaá lɛ a maamana, a bó bienene. Bendiemi mɔ́ɔ a mbɛɛ́ ɛ́yɛ́mɛ́nɛ́ná Yésusu naá gɛsasɔ naá gɛcamɛna gá manyáanya, a báá mó uhúné a amɔ́: «Daadáa, ánɛ́ɛ mɔ́ɔ a gaá ná go dúé o?» 21Aŋa Píele a mbaá mo ɛ́ná, gɛ́hɛ́ go úhune Yésusu a amɔ́: «Daadáa, kanɛ́ mɔ́ɔ, ŋkádɛ gɛ́ ná mo bolɛnamɔ́ o?» 22Yésusu go mo gundie a amɔ́: «Aáŋa ndɛ́galɛga goŋaá ɔ ɔyɔ gó ɛ́da húme aŋa nná ncomɔ́ gunde, bó go núune goakɛ́ o? Maamɔ́ɔ, mbienéemú.» 23Gó bayɛga naá nogálɔ nɔ́ɔnɔ gɔ́ɔ bó mbaá saáa naá kadɛ́gadɛ́ɛ ya boolímínyí goŋaá uhúúní mɔ́ɔnyɔ a dɛ ŋgá gúe. Asáa gɔgɔ́ Yésusu a dɛ mbá mo oyana a amɔ́ a dɛ ná gúe, kanɛ́ a mbaá mo oyáná mammana a amɔ́: «Aáŋa ndɛ́galɛga goŋaá ɔ ɔyɔ goɛ́da húme aŋa nná ncomɔ́ gunde, bó go núune goakɛ́ o?»
24A lɔ́mɔ́ uhúúní bendiemi mɔ́ɔ o oyamɔ́ moóma mɔ́ɔmɔ, a báá gɔnɔ́ mó ɔ́ŋɔ. Kɔ́ɔ bɛɛcɔ́ɔ dɛ íyimene goŋaá ŋgoyáamɔ́ yɛhɛ́ ɛ lɛ́ mammana.
25Yésusu a mba ŋanánáa gɔnɔ́ gɛcɛcá gá moóma múntió; aáŋa bá mba lɛ́ bá go mó ɔ́ŋɔ búmmue go búmmue, mbéeniŋenye goŋaá gásɛ́ naá cí iŋkimée, pɛ́ ɛ dɛ mbáa lɛ ya go bɛ́ɛmba go go bɛ́dɛgana bakálata báaba bá mbaá lɛ bá go ɔ́ŋɔ.
Одоогоор Сонгогдсон:
Sáŋa 21: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү