Sáŋa 18
18
Bá nco gumbene Yésusu
(Mot 26.47-56; Mél 14.43-50; Lók 22.47-53)
1Naá nnyimé ya mbósógólí yɛ́ɛyɔ, Yésusu na behúúní bɛ́hɛ́ go húme, bá báá bácaá nofámbálá ná Sɛ́dɛlɔŋɔ, kɔ́ɔ bí íŋenemú naá ntɛ́mɛ́ mmue yɛ́ɛyɛ ɛ mbaá lɛ hɔ́ɔ. 2Yódasɛ ba go mo dúe a mba lɛ́ tɔ́nɔ i íyimene hoóma hɔ́ɔhɔ, goakɛ́ Yésusu a mba lɛ́ gátáanɔ ɛ ɛ́da bábándɛgɛna na behúúní bɛ́hɛ́ hɔ́ɔ#18.2 Go ɛ́na Lók 21.37; 22.39.. 3Gɔ́ɔ Yódasɛ a gɔ́lɔmɔ́ gitúu gá bisimbi na bebeŋíbéŋí bá Nnyaŋá ya Asaŋa báaba bagɔ́nɔ́ɔ bá bedúmbí bɛbáágá naá Asaŋa na Befelisiéŋe bá mbaá dómá. Bá mba lɛ́ na balámba, na dobɔ́dɛ dó úle dó lola, na bɛlɛŋɔ bá bidé. 4Aŋa Yésusu a mbaá lɔmɔ́ i íyimene buimée bɔ́ɔbɔ bó gaá ná mo bolɛ́ná, gɛ́hɛ́ go bó báyɛkɛna a amɔ́: «No fúmbemú ánɛ́ɛ o?» 5Bɔ́ɔ go mo gundie bá amɔ́: «Yésusu ba Násalɛdɛ.» Gɛ́hɛ́ go bó oyana a amɔ́: «A lɔ́mɔ́ yɔmɔ́ɔ.» Yódasɛ ba go mo dúe a mba lɛ́ naá tɛ́mádɛ́má yabɔ́. 6Aŋa Yésusu a mbaá bó gundíe a amɔ́: «A lɔ́mɔ́ yɔmɔ́ɔ», gáábɔ́ go ɛ́da bá gundene na nnyimé diídidiídi bó obana go cí. 7Gɛ́hɛ́ go gɔnɔ bó úhune a amɔ́: «No fúmbemú ánɛ́ɛ o?» Bá amɔ́ gɛ́hɛ́ aá: «Yésusu ba Násalɛdɛ.» 8Yésusu tɔ́nɔ gáábɔ́ a amɔ́: «Mbáa nyó oyana caá, a lɔ́mɔ́ yɔmɔ́ɔ. Kanɛ́ aáŋa yɔmɔ́ɔ mɔ́ɔ no fúmbemú, dɛ́ɛ́na nɔnɔ béení bá dómba.» 9Nɔ́ɔnɔ gɔ́ɔ nogálɔ nɔ́ɔnɔ a mbaá gálɛ́dá a amɔ́: «Ndɛ́ kanɛ go yímie ummue naá báaba o mbaá páá» nó mbɛɛ́ ɛ́nánɛ́náa. 10Símono Píele a mba lɛ́ na kalafɔ, gɔ́ɔ a yɛ somonamɔ́ naá cágá, a báá canɛ́dá uyogóní ba Ufuŋe yá bedúmbí bɛbáágá naá Asaŋa, a báá mo sólóná udúu yá ombɔ́gɔ onɔ́mɛ. Uyogóní mɔ́ɔnyɔ ufíno yɛ́hɛ́ yó mbaá lɛ Melekúsu. 11Kanɛ́ Yésusu go oyana Píele a amɔ́: «Gundíe kalafɔ yahɔ naá cágá; ndɛ́ ba go inye go nyóɛna ɛnnyóɛ́ná há makánya hɛ́ɛhɛ Baaba a lɔ́mɔ́ páalú lí?»
Bisimbi bɛ́ ɛ́ ɛ́dá na Yésusu naá Háanɛ
(Mot 26.57-58; Mél 14.53-54; Lók 22.54)
12Gɔ́ɔ gitúu gá bisimbi na ogɔ́nɔ́ɔ babɔ́ na bebeŋíbéŋí bá Beyúdene bá yɔkɛnɔmɔ́ Yésusu bá báá mo gódáa iŋgolí. 13Gáábɔ́ go manɛ go ɛ́da nɛhɛ́ naá Háanɛ. Háanɛ moánɛ a mba lɛ́ uŋinó ba Keyífe, ufuŋe yá bedúmbí bɛbáágá naá Asaŋa yá nnyómá moánɛ yɛ́ɛyɔ. 14Keyífe mɔ́ɔnyɔ mɔ́ɔ a mbaá lɔmɔ́ oyánáalú Beyúdene a amɔ́: «Bó lɛ́ bese goŋaá mɔtɔ táŋɛ́ ummue a gúe go boɛ́nɔ.»
(Mot 26.69-70; Mél 14.66-68; Lók 22.55-57)
15Símono Píele na uhúúní untió bá mba lɛ́ bá bienene Yésusu. Aŋa uhúúní mɔ́ɔnyɔ a mbaá lɛ miíyíméníné na Ufuŋe yá bedúmbí bɛbáágá naá Asaŋa, gɔ́ɔ a mbií íŋéné na Yésusu naá nnyaáŋgadɛ́ɛ ya ogɔ́nɔ́ɔ mɔ́ɔnyɔ. 16Píele mɔ́ɔ a báá síéné go hanyɔ́ mekúígíi na gɛasɛ́. Kɔ́ɔ uhúúní moánɛ mɔ́ɔnyɔ a mbaá lɛ miíyíméníné na Ufuŋe yá bedúmbí bɛbáágá naá Asaŋa a húmemú, go gálɛda okɔ́dɔ mɔ́ɔnyɔ a mbaá lɔmɔ́ a fɛ́fa gɛasɛ́, a bíí íŋényée Píele. 17Kɔ́ɔ ufífí gɛasɛ́ ba okɔ́dɔ mɔ́ɔnyɔ a gálɛdamɔ́ Píele a amɔ́: «Maamɔ́ɔ tɔ́nɔ o do báá uhúúní ummue ba mɔtɔ múunyú o?» Gɛ́hɛ́ go gundie a amɔ́: «Cɛ báá uhúúní bɛhɛ́.» 18Aŋa isió hɛ́ mbaá lɛ́ kɔ́ɔ, boyogóní na bebeŋíbéŋí bá mba fóáná íyuke go go ɔ́sɔbɔ. Píele nabɔ́, ɔ ɔ́sɔbɔ tɔ́nɔ.
(Mot 26.59-66; Mél 14.55-64; Lók 22.66-71)
19Kanɛ́ Ufuŋe yá bedúmbí bɛbáágá naá Asaŋa go ɛ́da go úhene Yésusu moóma go behúúní bɛ́hɛ́ gɔnɔ́ na gohúunenye gɛ́hɛ́. 20Yésusu go mo gundie a amɔ́: «Ŋgaá lɛ ŋgoyanɛna batɔ biimée moóma daŋɛ́daŋɛ. Kúunenye bɛcamɛna biimée naá nnyaŋá sá mbósógólí na naá Nnyaŋá ya Asaŋa, anáa Beyúdene biimée bá bábándamɔ́, ndɛ́ kanɛ go gálagala naá nɛɔsɛgɔ. 21O ŋgúhenemú goakɛ́ o? Bɔ́ɔbɔ ndɔ́mɔ́ oyɛ́dáalú, úhénée batɔ báaba bá á ná lɔmɔ́ bá nco mbódólonyo. Bɔ́ɔ bí íyimenemú bɔ́ɔbɔ ŋgaá lɔmɔ́ ŋgoya.» 22Aŋa a mbaá gundíe nɔ́ɔnɔ, gisimbi gɛ́ɛgɛ gɛ́ mbaá lɛ naá boayá bɛ́hɛ́ go mo dɔ́yɛgɔ ombɔ́lɛ́ a amɔ́: «Nɔ́ɔnɔ gɔ́ɔ o gundenyemú Ufuŋe yá bedúmbí bɛbáágá naá Asaŋa o?» 23Yésusu go mo gundie a amɔ́: «Aáŋa mbáa gálɛda gɛbɛ́, dúfíe aŋa mbáá ná gálɛ́dá gɛbɛ́, kanɛ́ aáŋa mbáa gálɛda bese, o kóbamɔ́ goakɛ́ o?» 24Háanɛ go mo dóma na iŋgolí kɛ́ naá Ufuŋe yá bedúmbí bɛbáágá Keyífe.
Píele a á gɔnɔ́ básáŋona Yésusu
(Mot 26.71-75; Mél 14.69-72; Lók 22.58-62)
25Naá gɛcamɛna moánɛ, Símono Píele a mba lɛ́ hɔ́ɔlɔ́, ɔ ɔ́sɔbɔ. Bá báá lɛ gó mo úhune bá amɔ́: «Maamɔ́ɔ tɔ́nɔ o do báá ummue naá behúúní bɛ́hɛ́ o?» Píele go gundie a amɔ́: «Akɛ́ɛ, cɛ báá uhúúní bɛhɛ́.»
26Ummue naá boyogóní bá Ufuŋe yá bedúmbí bɛbáágá, moɔnɔ́ biisée ba mɔ́ɔnyɔ Píele a mbaá sólóná udúu, go mo yidinye a amɔ́: «Ábɔ, cɛ báá go ɛ́na olɔŋɔ nɛhɛ́ naá ntɛ́mɛ́ o?» 27Gɔ́ɔ Píele a gɔnɔmɔ́ sáŋona. Hɔ́ɔ na hɔ́ɔ, gɛnɔ́mɛ gá ŋgɔɔ́ go dómba go dádɛda.
Bɛ́ ɛ́ ɛ́dá na Yésusu naá Pɛlátɛ
(Mot 27.1-2,11-14; Mél 15.1-5; Lók 23.1-5)
28Gɔ́ɔ bú úlukiemú naá nnyaŋá ya Keyífe na Yésusu, go ɛ́da nɛhɛ́ naá ndáŋɛ ya ŋgɔ́mɔnɔ. Bó mba lɛ́ na gɛyɛ́nɛ́ túlúbú, kanɛ́ Beyúdene moatɛ́ moatɛ bá dɛ mbí íŋene naá ndáŋɛ, goakɛ́ bá mba lɛ́ bá díine go báága biílo. Biílo moánɛ bɛ́ mba lɛ́ ba go bó lege go nyáa manyáanya má gibíné gá Pásɛ́ka ya Beyúdene. 29Go busío moánɛ gɔ́ɔ Pɛlátɛ a húmemú naá hanyɔ́ a amɔ́ gáábɔ́ a amɔ́: «No sɔ́mɔnɔ mɔtɔ mɔ́ɔnyɔ goakɛ́ o?» 30Bɔ́ɔ go mo gundie bá amɔ́: «Aáŋa a dɛ báá opalapálá, gásɛ́ dɛ dɛ á gá go úléné nɛhɛ́.» 31Pɛlátɛ a amɔ́ gáábɔ́ a amɔ́: «Mo gɔ́lɔ́ɔmɔ́ nɔnɔ, bɛɛnyɔ́ɔ moatɛ́ no sómba gɛsɛnɛ gɛ́hɛ́ aŋa bɛlɔsɛnɔ bɛ́nyɔ́ bɛ́ oyamɔ́.» Beyúdene go mo gundie bá amɔ́: «Dɛ dɛ bɛanánáa bogaaga bá go óna mɔtɔ.» 32Náana gɔ́ɔ nogálɔ nó mbɛɛ́ ɛ́nánɛ́náa nɔ́ɔnɔ Yésusu a mbaá gálɛda go go lincie mbɔ́dɔ ya nigúe yɛ́ɛyɛ a mbaá lɛ ba go gúe.
33Gɔ́ɔ Pɛlátɛ a gundemú naá ndáŋɛ go mo dɔ́ŋɛnɔ a amɔ́ gɛ́hɛ́ aá: «O lɛ́ ufuŋe yá Beyúdene lí?» 34Yésusu go mo gundie a amɔ́: «O gálagalamɔ́ nɔ́ɔnɔ go maamɔ́ɔ moatɛ́ lí, bó lɔ́mɔ́ goŋaá batɔ bóntió bá á ná go oyáná nɔ́ɔnɔ go busío bámɛ o?» 35Pɛlátɛ go mo gundie a amɔ́: «Yɔmɔ́ɔ, ndɛ́ ba Beyúdene lí? Gɛdɔŋɔ gáhɔ gá moatɛ́ na bagɔ́nɔ́ɔ bá bedúmbí bɛbáágá naá Asaŋa bɔ́ɔ bá á nú úlé nahɔ naá yɔmɔ́ɔ. Go á ŋaáa ŋkádɛ moatɛ́ o?» 36Yésusu go gundie a amɔ́: «Bufuŋe bámɛ bó dó báá bá cí yɛ́ɛyɛ; aáŋa gɔ́ɔ bufuŋe bámɛ bó lɔ́mɔ́ bá cí yɛ́ɛyɛ, gásɛ́ báaba bɔ́ ɔ́bɛnɔnɔmɔ́ namɛ bá á noáa osaŋɔ́ go goŋaá bá dɛ túé naá ɛmbɔ́gɔ ya bagɔ́nɔ́ɔ bá Beyúdene. Akɛ́ɛ, bufuŋe bámɛ bó dó báá bá cí yɛ́ɛyɛ.» 37Gɔ́ɔ Pɛlátɛ a mo úhunemú a amɔ́: «O lɛ́ kanɛ́ ufuŋe o?» Yésusu go mo gundie a amɔ́: «Go ó oyɛ́dá: ndɛ́ ufuŋe. Ndɛ́ bébíénéelú, mbúú úlé naá cí go go nco dúfenye maamana. Mɔtɔ uŋkimée mɔ́ɔnyɔ a lɔ́mɔ́ naá maamana ɔ ɔ́bɔnɔ ukelú yámɛ.» 38Pɛlátɛ go mo gundie a amɔ́: «Ɛkádɛ gɛ́ lɔ́mɔ́ mammana o?»
(Mot 27.15-31; Mél 15.6-20; Lók 23.13-25)
Naá nnyimé ya dogálɔ dɔ́ɔdɔ, gɛ́hɛ́ go gɔnɔ húme, go nco gíde Beyúdene a amɔ́ gáábɔ́ a amɔ́: «Yɔmɔ́ɔ cɛ ɛ́nánáa boóma go nnyɔ́dɔ yɛhɛ́ bá go mo ubie na gɛsɛnɛ. 39Kanɛ́ bó lɛ́ bofɛ́lánɔ́ naá bɛɛnyɔ́ɔ goŋaá kúmie mɔtɔ ummue bɛnyɔ́ naá ncíbo ya gɛaŋɔ́ gɛcamɛna gá gibíné gá Pásɛ́ka ya Beyúdene. No lɛ́galɛga kanɛ́ goŋaá nnyó húminye ufuŋe yá Beyúdene lí?» 40Kɔ́ɔ bá dómbamɔ́ go ɛ́da go ánca bá amɔ́: «Caá akɛ́ mɔ́ɔ, Balábasɛ mɔ́ɔ dɛ lɛ́galɛgamɔ́.» Asáa gɔgɔ́ Balábasɛ mɔ́ɔnyɔ a mba lɛ́ gɛkándáa gá mɔtɔ#18.40 O bana, go eninye na Meŋ 3.14..
Одоогоор Сонгогдсон:
Sáŋa 18: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү