Sáŋa 16
16
1«Nnyó oyanɛna moóma muimée mɔ́ɔmɔ goŋaá no do sɛmbɛ́lɛ́dá bɛnamá, no dɛ́ɛna gioliminyo. 2Bá ná nyó gúne naá nnyaŋá sá mbósógólí. Moatɛ́, gɛcamɛna gɛ́ nú úle gɛ́ɛgɛ báaba bá nyó ónamɔ́ bá ŋgaá bééníŋényée goŋaá bá yɔgɔnɛnɔ Asaŋa na go ŋanana gábɔ́ gɔ́ɔgɔ. 3Bá ŋga ŋanánáa nɔ́ɔnɔ goakɛ́ bá lɛ́ kanɛ go íyime Baaba, namɛ kɛ́. 4Kanɛ́ nnyó oyanɛnamɔ́ moóma mɔ́ɔmɔ goŋaá aŋa gɛcamɛna gá mɔ́ gɛ́ ná bolamɔ́, no béeniŋinye goŋaá mmba nyó oyáná boóma moánɛ.
Buelí bá Gimmúmpúu gá Giliíli
«Ndɛ́ kanɛ go nyó oyana boóma moánɛ naá mabayɛga, goakɛ́ mmba lɛ́ olɔŋɔ nɛnyɔ́. 5Godɔ́ɔdɔ, ŋgɛ́dana naá mɔ́ɔnyɔ a mbaá tómá, ummue naá bɛɛnyɔ́ɔ a dɛ ŋgúhúné kanɛ́ a amɔ́: “Go ɛ́danamɔ́ áhanɛ́ɛ o?” 6Kanɛ́ mecíkílí má á dómbá go nyó hóogo naá odɛ́má, goŋaá ŋgaá nnyó oyáná boóma moánɛ. 7Asáa gɔgɔ́, ŋgaá nyó oyáná mammana. Bó lɛ́ go besé yɛnyɔ́ goŋaá ŋgɛ́da, goakɛ́ aáŋa cɛ ɛ́dá, Ufuugí ɛdɛ́má a dɛ ná bóso go úle naá bɛɛnyɔ́ɔ; kanɛ́ caá ŋgɛ́da, nná nyó mo dómɛna. 8Mɔ́ɔ, aŋa ŋguú úlé, a ŋga dúfíe batɔ bá cí yɛ́ɛyɛ giédie gábɔ́ go busío bá bɔ́ɔbɔ bó lɔ́mɔ́ gɛlɔgɔ, bɔ́ɔbɔ bó lɔ́mɔ́ botɛ́nɛ́ɛ na bɔ́ɔbɔ bó lɔ́mɔ́ gobide bɛsɛnɛ gá Asaŋa#16.8 O bana, go eninye na Meŋ 24.25.. 9Go bɔ́ɔbɔ bó lɔ́mɔ́ gɛlɔgɔ, bó lɔ́mɔ́ goŋaá: batɔ bá dɛ ágánáa odɛ́má yábɔ́ naá yɔmɔ́ɔ#16.9 Go ɛ́na naá 8.21-24; 9.41; 15.22-24.; 10go bɔ́ɔbɔ bó lɔ́mɔ́ botɛ́nɛ́ɛ, bó lɔ́mɔ́ goŋaá: ŋgɛ́dana naá Baaba, no do ná gɔnɔ ŋgɛ́na. 11Go bɔ́ɔbɔ bó lɔ́mɔ́ gobide bɛsɛnɛ gá Asaŋa bó lɔ́mɔ́ goŋaá: a báá go bide gɛsɛnɛ gá Ufuŋe yá cí yɛ́ɛyɛ.»
Mecíkílí má á núgíe go bɛyaŋa
12«Ká bɛanana moóma gɛca má goŋaá nnyó oyana, kanɛ́ no do bósó ba go mó hóda godɔ́ɔdɔ. 13Aŋa Giliíli ba mammana a ŋguú úlé, a ŋga nyó indényée naá mammana iŋkimée. A dɛ ŋgá gálagala go ufíno yɛ́hɛ́ yá moatɛ́, kanɛ́ a ŋgoó oyáa buimée bɔ́ɔbɔ a ŋgɔɔ́ ɔ́bɔ́, a nyó dóoginyo bɔ́ɔbɔ bó háananamɔ́ go bola. 14A ŋga kúmídíe, goakɛ́ a ŋga bɛáa bɔ́ɔbɔ bó ɔ́bɛnɔnɔmɔ́ namɛ, a nyó bó dóoginyo. 15Buimée bɔ́ɔbɔ Baaba a bɛananamɔ́ bó ɔ́bɛnɔnɔ namɛ, boóma moánɛ bɔ́ mmbaá gálɛ́dá caá, a ŋga nyó dóógínyóo bɔ́ɔbɔ a ŋgaá bɛáa naá yɔmɔ́ɔ.
16«Gɔnɔ́ moɔnɔ́ ba gɛcamɛna, no do ná gɔnɔ ŋgɛ́na, moɔnɔ́ ba gɛcamɛna naá nnyimé, no lɔ go gɔnɔ ŋgɛ́na.» 17Behúúní bɛ́hɛ́ bóncodío go ɛ́da go gálagala bɔ́ɔ na bɔ́ɔ bá amɔ́: «A lɛ́galɛgamɔ́ go có oyana ɛkádɛ o? “Gɔnɔ́ moɔnɔ́ ba gɛcamɛna, no do ná gɔnɔ ŋgɛ́na, moɔnɔ́ ba gɛcamɛna naá nnyimé, no lɔ go gɔnɔ ŋgɛ́na”, ɛ́na lí: “Ŋgɛ́da naá Baaba” o? 18“Moɔnɔ́ ba gɛcamɛna” mɔ́ɔnyɔ a lɔ́mɔ́ nɛɛ́nɛ naá cí o? Dɛ dɛ ɔ́bɔ́nɔ́ɔ boóma bɔ́ɔbɔ a lɛ́galɛgamɔ́ go oyɛda.» 19Yésusu a á lɛncá goŋaá bá lɛ́galɛga go mo nɔɔ ŋgúhune, gɛ́hɛ́ kanɛ́ go bó oyana amɔ́: «Nogálɔ námɛ nɔ́ɔnɔ nó lɔ́mɔ́: “Gɔnɔ́ moɔnɔ́ ba gɛcamɛna, no do ná gɔnɔ ŋgɛ́na, moɔnɔ́ ba gɛcamɛna naá nnyimé, no lɔ go gɔnɔ ŋgɛ́na”, nɔ́ɔ no fúmbemú go íyime aŋa nó lɔ́mɔ́ naá cí o?» 20Mammana, mammana, ŋgaá nyó oyáná caá, no ŋga hímée no baŋa mbií ya nigúe, batɔ bá cí yɛ́ɛyɛ bɔ́ɔ bá yaŋa. No ŋga bɛ́ɛ́mbá naá mecíkílí, kanɛ́ mecíkílí mɛ́nyɔ́ má ŋga bénúgíe na bɛyaŋa. 21Gɛcamɛna gɛ́ɛgɛ okɔ́dɔ a nómanamɔ́ go bíene a lɛ́ naá mecíkílí, goakɛ́ gɛcamɛna gɛ́hɛ́ gɛ́ á bolá; kanɛ́ aŋa a ŋamɔ́ a báá go bíene, a dɛ gɔnɔ́ béeniŋenye gɛdɔmbɔ gɛ́hɛ́ gá go nómana, a ná lɛ́ na bɛyaŋa bá goŋaá a á bíéné mɔtɔ naá cí. 22Caŋa mmue nɛnyɔ́, no lɛ́ godɔ́ɔdɔ naá mecíkílí, kanɛ́ nná gɔnɔ nyó ɛ́na, gɔ́ɔ odɛ́má yɛ́nyɔ́ yó nɔ́ ɔ́bɔmɔ́ bɛyaŋa, mbɔ́dɔ ya bɛyaŋa ya goŋaá mɔtɔ a dɛ bósó ba go bɔgɔ.
23Aŋa buisí moánɛ bó ná bolamɔ́, no do ná ŋa no gɔnɔ ŋgúhene boóma. Mammana, mammana, ŋgaá nyó oyáná caá, no amɔ́ no ɔŋɛnɔ Baaba boóma go ufíno yámɛ, a gaá nyó fáá. 24Kanɛ́ gó nco go éme godɔ́ɔdɔ, no gá lɛ́ no do ɔŋɛ́nɔ́ boóma go ufíno yámɛ: ɔŋɛ́nɔ nɔnɔ, no gaá bɛa, hɔ́ɔlɔ́ gɔ́ɔ bɛyaŋa bɛ́nyɔ́ bɛ́ gaá ná bɛ́ɛ́mbá dácɛ.
Yésusu a á mánɛ́gɛ́ná bobɛ́ bá cí yɛ́ɛyɛ
25«Ŋgaá nyó oyánɛ́náa buimée bɔ́ɔbɔ go ncaba. Kanɛ́ gɛcamɛna gɛ́ úlene gɛ́ɛgɛ nná ŋamɔ́ cɛ gɔnɔ́ nyó gálagala mbɔ́dɔ moánɛ, nná nyó dóogoninyo daŋɛ́daŋɛ bɔ́ɔbɔ bó núunemú Baaba. 26Buisí moánɛ, no ŋgɔ ɔŋɛ́nɔ́ go ufíno yámɛ, kanɛ́ cɛ gaá nyó oyáná caá nná bósógolonyo Baaba go busío bɛ́nyɔ́. 27Ɛɛ́ɛŋ, Baaba mɔ́ɔ moatɛ́ moatɛ a nyó maamana go busío bá goŋaá bɛɛnyɔ́ɔ no mba mmaamánáa, no bóó olímínyóo goŋaá yɔmɔ́ɔ ŋgɛ́damɔ́ go úlene naá Asaŋa. 28Mmbɛ ɛ́dá go úle naá Baaba, mbúú úlé naá cí. Kɔ́ɔ godɔ́ɔdɔ, ŋguú úlúkíe naá cí, kunde naá Baaba.» 29Behúúní bɛ́hɛ́ go mo oyana kanɛ́ bá amɔ́: «Go ɛ́ ɛ́ná, godɔ́ɔdɔ, o ná lɛ́ go gálagala daŋɛ́daŋɛ, o do gɔnɔ́ go ágana ncaba. 30Godɔ́ɔdɔ, dɛ á lɛncá goŋaá maamɔ́ɔ go íyimene boóma buimée, o do bɛanánáa ncaná ya goŋaá mɔtɔ a go úhune boóma. Boóma moánɛ bɔ́ dɛ olimonyomú goŋaá go ɛ́damɔ́ go úlene naá Asaŋa.» 31Yésusu go bó gundie a amɔ́: «No ó olímínyóo godɔ́ɔdɔ o? 32Ɛ́ná nɔnɔ goŋaá gɛcamɛna gɛ́ úlene, moatɛ́ gɛ́ báá go háa, gɛ́ɛgɛ no gaá ná sálámándá, onyɔ moánɛ a biene yɛhɛ́ pɛ́, no tɛ́ɛna mokáa. Kanɛ́ cɛ báá mokáa, goakɛ́ Baaba a lɛ́ namɛ. 33Ŋgaá nyó oyánɛ́náa buimée bɔ́ɔbɔ go goŋaá no bɛa buumbénú naá gobálada gɔ́ɔgɔ namɛ. Naá cí yɛ́ɛyɛ no gɔɔ́ ɔ́bɛ́gɔ́nɔ́ɔ, kanɛ́ bɛáa nɔnɔ nigégé! Ŋgaá mánɛ́gɛ́ná bobɛ́ bá cí!»
Одоогоор Сонгогдсон:
Sáŋa 16: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү