Sáŋa 14
14
Yésusu a lɛ́ pɛ́ yɛ́ɛyɛ yɛ ɛ́danamɔ́ naá Isée
1Gɔ́ɔ Yésusu o oyamɔ́ behúúní bɛ́hɛ́ a amɔ́: «No do sómbá sómbáa ɛdɛ́má. No ágana odɛ́má yɛ́nyɔ́ naá Asaŋa, yó ágánáamɔ́ nɔnɔ tɔ́nɔ naá yɔmɔ́ɔ. 2Naá nnyaŋá ya Baaba, gɛca gá indukí gɛ́ lɛ́ hɔ́ɔ, aáŋa caá nɔ́ɔ, gásɛ́ ndɛ́ kanɛ go nyó oyana caá mmanɛ go ɛ́da nyó gedinye undukí. 3Aŋa nná ŋamɔ́ mbáa go ɛ́da nyó gedinye undukí, ndɛ go nco gunde nnco nyó gɔ́lɔ, goŋaá anáa ndɔ́mɔ́, bɛɛnyɔ́ɔ tɔ́nɔ no bɛ́ɛmba hɔ́ɔ. 4Go bɔ́ɔbɔ bó núunemú anáa ŋgɛ́danamɔ́, no íyimene pɛ́.» 5Tómasɛ a amɔ́ gɛ́hɛ́ aá «Daadáa, dɛ dɛ manɛ́ go íyimene akɛ́ anáa go ɛ́danamɔ́; dɛ gaá ná ncó go íyime pɛ́ nɛ́ɛnɛ o?»
6Yésusu go mo gundie a amɔ́: «Yɔmɔ́ɔ mɔ́ɔ ndɔ́mɔ́ pɛ́, yɔmɔ́ɔ mammana, yɔmɔ́ɔ gɔnɔ́ gɛɔyɔ. Mɔtɔ a dɛ ɛ́dánáa naá Baaba kanɛ go dómba naá yɔmɔ́ɔ.
7«Aáŋa no ŋgíyimene, no íyimene tɔ́nɔ Baaba. Gó dúme godɔ́ɔdɔ, no mo íyimene, no báá gundé no báá mo ɛ́ná.» 8Fílibi a amɔ́ gɛ́hɛ́ aá: «Daadáa, có dúfíemú Baaba, nɔ́ɔnɔ gó có háanana.» 9Yésusu go mo gundie a amɔ́: «Fílibi, fueké aŋa ndɔ́mɔ́ nɛnyɔ́, gɔ́ɔ o lɔ́mɔ́ o do ŋgíyíménée o? Mɔ́ɔnyɔ a ŋgɛ́namɔ́ ɛ ɛ́ ɛ́ná Baaba; nɛɛ́nɛ o lɔ́mɔ́ go amɔ́: “Có dúfíemú Baaba o?” 10O do olímónyóo go goŋaá ndɛ́ naá Baaba, Baaba a lɛ́ tɔ́nɔ naá yɔmɔ́ɔ o? Dogálɔ dɔ́ɔdɔ nyó oyanɛnamɔ́ bɛɛnyɔ́ biimée, dó do báá dámɛ dá go básaŋɛna! Kanɛ́ aŋa Baaba a lɔ́mɔ́ naá yɔmɔ́ɔ, a hóogonyo meŋiigíe mɛ́hɛ́ má moatɛ́. 11Olímínyóo nɔnɔ dogálɔ dámɛ dɔ́ɔdɔ: ndɛ́ naá Baaba, Baaba a lɛ́ tɔ́nɔ naá yɔmɔ́ɔ; kanɛ́ aáŋa no do olímónyóo nogálɔ námɛ, olímínyóo nɔnɔ akɛ́ go meŋiigíe mámɛ. 12Mammana, mammana, ŋgaá nyó oyáná caá: mɔ́ɔnyɔ a áganamɔ́ odɛ́má yɛ́hɛ́ naá yɔmɔ́ɔ, mɔ́ɔ tɔ́nɔ a ŋga ŋanánáa meŋiigíe máama yɔmɔ́ɔ ŋŋananamɔ́. A ŋga ŋanánáa akɛ́ má bɛantáa makɔ́nɔ́, goakɛ́ ŋgɛ́dana naá Baaba. 13Buimée bɔ́ɔbɔ no ŋgɔɔ́ ɔŋɛ́nɔ́ go ufíno yámɛ, nná bó ŋa, go goŋaá nigúmi ná Isée nɛ́ bédúfie naá Moɔnɔ́. 14No amɔ́ no ŋgɔŋɛnɔ boóma go ufíno yámɛ, nná bó ŋa.»
Yésusu a á dáná go dómá Gimmúmpúu gá Giliíli
15«Aáŋa no mmaamana, no háanana go gumbene bɛlɔsɛnɔ bámɛ. 16Yɔmɔ́ɔ kaá bósógólónyóo Baaba goŋaá a nyó dómɛna Ufuugí ɛdɛ́má uncodío goŋaá a bɛ́ɛmba nɛnyɔ́ bɛcamɛna biimée. 17Mɔ́ɔ a lɔ́mɔ́ Giliíli ba mammana, batɔ bá cí bá dɛ báá naá odɛ́nɛ́ yá go mo gɛ́ndɛgɛna, goakɛ́ bá dɛ mo ɛ́nánáa, bá dɛ mo íyíménée. Kanɛ́ bɛɛnyɔ́ɔ no mo íyimene, goakɛ́ a gɛ́ga naá boayá bɛ́nyɔ́, a lɛ́ naá bɛɛnyɔ́ɔ. 18Cɛ ná nyó síe cíinini, nco gundene naá boayá bɛ́nyɔ́. 19Gɔnɔ́ moɔnɔ́ ba gɛcamɛna, batɔ bá cí bá dɛ ná gɔnɔ ŋgɛ́na, kanɛ́ bɛɛnyɔ́ɔ, no ná ŋgɛ́na, goakɛ́ ŋgɔyɔ, bɛɛnyɔ́ɔ tɔ́nɔ no nɔ́ ɔyɔ. 20Naá budúgú moánɛ, no ná lɛnca goŋaá ndɛ́ naá Baaba, bɛɛnyɔ́ɔ naá yɔmɔ́ɔ, yɔmɔ́ɔ naá bɛɛnyɔ́ɔ. 21Mɔ́ɔnyɔ a lɔ́mɔ́ na bɛlɔsɛnɔ bámɛ a báá bɛ́ gumbéné, ba ndiemi a mmaamana. Kɔ́ɔ mɔ́ɔnyɔ a mmaamanamɔ́, Baaba a ŋga mo maamánáa, yɔmɔ́ɔ tɔ́nɔ mmo maamana, kɔnɔ mmo bédúfenye.» 22Yúude, kanɛ́ caá akɛ́ Yódasɛ Ɛsɛkalɛ́ɔtɛ, go mo oyana a amɔ́: «Daadáa, nɛɛ́nɛ bó lɔ́mɔ́ goŋaá o có bédúfenye goana bɛɛcɔ́ɔ caá akɛ́ go batɔ bá cí o?» 23Yésusu go mo gundie a amɔ́: «Aáŋa mɔtɔ a mmaamana, a gumbene nogálɔ námɛ. Baaba a ná mo maamana, dɛ úle naá mɔ́ɔ, dɛ nco dága kɛ́gɛ́ná yɛcɔ́ naá mɔ́ɔ. 24Mɔ́ɔnyɔ a lɔ́mɔ́ a dɛ mmaamánáa a dɛ gumbénénée dogálɔ dámɛ. Nogálɔ nɔ́ɔnɔ no ɔ́bɔnɔmɔ́ nó do báá námɛ ná go básaŋɛna, kanɛ́ nó lɔ́mɔ́ ná Baaba mɔ́ɔnyɔ a lɔ́mɔ́ tómáalú.
25«Ŋgaá nyó oyánɛ́náa moóma mɔ́ɔmɔ hɔ́ɔlɔ́ ká gɛ́ga naá boayá bɛ́nyɔ́. 26Kanɛ́ Ufuugí ɛdɛ́má, a lɔ́mɔ́ Gimmúmpúu gá Giliíli mɔ́ɔnyɔ Baaba a ŋgaá mo dómá go ufíno yámɛ, mɔ́ɔ a ŋgaá nyó húúnényée moóma muimée, a nyó úncugenye buimée bɔ́ɔbɔ mbaá nyó oyánɛ́náa. 27Buumbénú bɔ́ nnyó síenemú, buumbénú bámɛ bɔ́ nnyó fáamɔ́#14.27 O bana, go eninye na Iseyíi 9.5.. Cɛ á gá nyó fáá naá mbɔ́dɔ yɛ́ɛyɛ batɔ bá cí bá fáananamɔ́. Ŋgáa odɛ́má yɛ́nyɔ́ yó do sómbá sómbáa, no do bɛáa bofoá. 28No bɔ́ɔ ɔ́bɔ goŋaá mbáa nyó oyana caá ŋgɛ́dana, kanɛ́ nco gundene naá bɛɛnyɔ́ɔ. Aáŋa gɔ́ɔ no mmaamanamɔ́, gásɛ́ no békelenye go gɔ́ɔgɔ ŋgɛ́danamɔ́ naá Baaba, goakɛ́ Baaba a lɛ́ gɛkɔ́nɔ́nɔ́ɔ a tómbana. 29Ŋgaá nyó oyánɛ́náa moóma mɔ́ɔmɔ godɔ́ɔdɔ, otóotoɛ yá mɔ́ go bola, goŋaá nembeli, aŋa mo gaá ná bolá, no oliminyo. 30Cɛ ná gɔnɔ go oya ŋkanɔ́ nɛnyɔ́ makɔ́nɔ́, goakɛ́ ufuŋe yá batɔ bá cí yɛ́ɛyɛ yó úlene. A dɛ bɛanánáa nɛgaŋa namɛ. 31Kanɛ́ bó háanana goŋaá batɔ bá cí bí íyime goŋaá mmaamana Baaba, ŋŋanana aŋa a mbaá ndɔsɛ́nɔ́. Fadɛ́gɛ́na nɔnɔ, dɛ dómba naá hoóma háaha.»
Одоогоор Сонгогдсон:
Sáŋa 14: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү