Sáŋa 12
12
Malɛ́a a á sugúnénée Yésusu alabɛ́nda go bɛgɔ́ndɔ́
1Hɔ́ɔlɔ́, gibíné gá Pásɛ́ka ya Beyúdene gɛ́ báá go síene medúgú mátáanɔ na búmmue, Yésusu go ɛ́da naá hoóma hémmue háaha bá dɔ́ŋɔnɔ bá amɔ́ Beteníi, gɛdɔŋɔ gá Lasáalɛ. Lasáalɛ moánɛ mɔ́ɔ Yésusu a mbaá mo fúfúné naá kadɛ́gadɛ́ɛ ya begúe. 2Kɔ́ɔ bá mo gedinyemú gɛdágá hɔ́ɔ. Mááta mɔ́ɔ a mbaá lɛ a bó ala; Lasáalɛ a mba lɛ́ naá olɔŋɔ yá batɔ báaba bá mbaá lukúméné go manyáanya na Yésusu. 3Gɔ́ɔ Malɛ́a a gɔ́lɔmɔ́ gigísi gá idógódógó gá alabɛ́nda ba ntɔ́nɔ gedíelú na náalɛ moatɛ́ moatɛ, gɛ́hɛ́ go fúenene Yésusu go bɛgɔ́ndɔ́, a bɛ́ fúune na cóɛ sɛ́hɛ́. Alabɛ́nda go dómba go cákɛna na gɛfofa ncíbo iŋkimée. 4Uhúúní bɛ́hɛ́ ummue ufíno yɛ́hɛ́ Yódasɛ Ɛsɛkalɛ́ɔtɛ, mɔ́ɔ ba goŋaá a gaá dúé Yésusu, go oyɛda a amɔ́: 5«Bá báá lɔmɔ́ bá dɛ dúé alabɛ́nda mɔ́ɔnyɔ go muinyí mɔ́ɔmɔ bá lɔ́mɔ́ bá go soanɛna uyogóní ntɛ́mɛ́ go nnyómá mmue bá abana basógasoga muinyí moánɛ goakɛ́ o?» 6Aáŋa Yódasɛ a mba gálɛ́da nɔ́ɔnɔ, bó do mbáa lɛ goŋaá a béséegie basógasoga; bó lɔ́mɔ́ goŋaá a mba lɛ́ uŋgíbi. Aŋa a mbaá lɛ a bɛ́dɛgana muinyí mábɔ́ má biimée, a lɛ go ɛ́da go mó dúenene go mɔ́ɔ mokáa. 7Yésusu go gundie kanɛ́ a amɔ́: «Dɛ́ɛ́na nɔnɔ okɔ́dɔ mɔ́ɔnyɔ cacɔ́! Bɔ́ɔbɔ a yɔgɛdɛnɔmɔ́ go busío bá nnyɔ́dɔ yamɛ bó lɔ́mɔ́ go go gedegedie gimie gá yɛ́. 8No ŋga bɛ́ɛ́mbá na basógasoga bɛcamɛna biimée#12.8 O bana, go eninye na Bicele 15.11., kanɛ́ yɔmɔ́ɔ, cɛ ná bɛ́ɛmba gɔgɔ́ nɛnyɔ́ bɛcamɛna biimée.»
9Naá gɛcamɛna gɛ́ɛgɔ, batɔ go ɔ́bɔ goŋaá Yésusu a lɛ́ naá Beteníi. Gáábɔ́ go úlene go bitúu go bitúu, caá akɛ́ goana go busío bá Yésusu, kanɛ́ tɔ́nɔ go go nco go ɛ́na Lasáalɛ mɔ́ɔnyɔ Yésusu a mbaá mo fúfúné naá kadɛ́gadɛ́ɛ ya begúe. 10Gɔ́ɔ bagɔ́nɔ́ɔ bá bedúmbí bɛbáágá naá Asaŋa bá gediemú goŋaá bó óna tɔ́nɔ Lasáalɛ, 11goakɛ́ go busío bɛ́hɛ́ gɔ́ɔ gɛca gɛ́ mbaá ŋá gɛ́ ná lɛ́ go duyugene naá giimbó gábɔ́, gɛ́ ágana odɛ́má yábɔ́ naá Yésusu.
Yésusu a á bolá naá Yolósalɛmɛ
(Mot 21.1-11; Mél 11.1-11; Lók 19.28-40)
12Buisí bó á bálá, bitúu bá batɔ bɛ́ɛbɛ bɛ́ mbuú úlénée go gibíné go ɔ́bɔ goŋaá Yésusu u úlene naá Yolósalɛmɛ. 13Gáábɔ́ go gɔ́lɔnɔ bɛáŋɔ bá bɛdɛndɛ́ go húme naá tɛ́sɔnɔ go go ɛ́da lumene nɛhɛ́, bá mba lɛ́ bɛ́ ɛ́da bá ánca bá amɔ́: «Osána! Gɛfona gɛ́ bɛ́ɛmba na mɔ́ɔnyɔ u úlenemú go ufíno yá Daadáa, Ufuŋe yá Ɛ́sɛlahɛ́ɛlɛ!» 14Yésusu a á gídé moɔnɔ́ ba abaŋa bɛbɛa, gɛ́hɛ́ go bólɛga kɔ́ɔ, aŋa bó mbaá lɛ ɔ́ŋɔ́ɔlú goŋaá: 15«No do dííné boóma, ombóla ba Síyono! Ɛ́ná, Ufuŋe yáhɔ yó ná lɛ́ go úlene, yó lɛ́ bólɛ́gáalú naá moɔnɔ́ ba abaŋa bɛbɛa#12.15 Sakalɛ́a 9.9..» 16Hɔ́ɔ na hɔ́ɔ, behúúní bɛ́hɛ́ bá lɛ́ kanɛ go ɔ́bɔ ɛkádɛ gɛ́ɛgɛ gɛ́ mbaá lɛ gɛ́ bádómbana. Aŋa Asaŋa a mbaá ŋá a báá go búlugie Yésusu naá nigúmi nɛ́hɛ́, gáábɔ́ go béeniŋinye goŋaá bó mba lɛ́ ɔ́ŋɔ́ɔlú nɔ́ɔnɔ go busío bɛ́hɛ́ goŋaá bó gaá báŋaáa; gobáŋa gá boóma moatɛ́ go busío bɛ́hɛ́ gɔ́gɔ́ɔ.
17Batɔ biimée báaba bá mbaá lɛ olɔŋɔ na Yésusu gɛcamɛna gɛ́ɛgɛ a mbaá dɔ́ŋɛ́nɔ́ Lasáalɛ goŋaá a húme naá gɛbɛ́lá, a báá mo fúfúné naá kadɛ́gadɛ́ɛ ya begúe, bá mbo oyáa buimée bɔ́ɔbɔ bá mbɛɛ́ ɛ́ná. 18Boóma bá ndiemi bɔ́ɔ, gitúu gá batɔ gɛ́ mbuú úlé go go nco lumene nɛ́hɛ́, goakɛ́ bá mbɔ ɔ́bɔ́ bó oya gɛsɛɔ gɛ́ɛgɛ a mbaá ŋaáa. 19Kɔ́ɔ Befelisiéŋe bɛ́ ɛ́damɔ́ go bágálɛna galɛna bá amɔ́: «No ɛ́nana, no do báá bá go ŋa boóma nɛ́hɛ́; batɔ biimée bá lɛ́ go nnyimé yɛhɛ́ tútututu!»
Yésusu a gálagala go nigúe nɛ́hɛ́
20Nɛnamá ná Bágɛlɛ́gɛ nɛ́ mba lɛ́ naá olɔŋɔ yá batɔ báaba bá mbaá lɛ úléelú naá Yolósalɛmɛ go go búlugenye Asaŋa gɛcamɛna gá gibíné. 21Gáábɔ́ go báyɛkɛna Fílibi, mɔtɔ ba gɛdɔŋɔ gá Bɛcayɛ́da naá Gelilée go mo oyana bá amɔ́: «Paálɔmɔ, dɛ lɛ́galɛga go ɛ́na Yésusu.» 22Fílibi go manɛ go oyana Andɛlɛ́ɛ, kanɛ́ bɔ́ɔ biimée báandɛ́ go dúmbinye Yésusu. 23Yésusu go bó gundíe a amɔ́: «Gigúlí gɛ́ɛgɛ Asaŋa a lɛ́galɛgamɔ́ go gúmidie Moɔnɔ́ ba mɔtɔ gɛ́ á háá. 24Mammana, mammana, ŋgaá nyó oyáná caá, camɔ́ ya mbasa ɛ lɔbɔnɔ mokáa aáŋa ɛ dɛ obá go cí bá yɛ díndigene. Kanɛ́ bá amɔ́ bá yɛ díndigene, ɛ lubuge, yɛ úme gɛcɛcá gá camɔ́. 25Mɔtɔ mɔ́ɔnyɔ a maamanamɔ́ gɛɔyɔ gɛ́hɛ́ a gɛ́ yímenye, kanɛ́ mɔ́ɔnyɔ a ŋamɔ́ a dɛ gɛ́ bágódɛ́ná go moóma má cí háalá, a ŋga gɛ́ bɛ́dɛ́gɛ́ná go gɛɔyɔ gá kanɛ mesúge#12.25 O bana, go eninye na Mot 10.39; 16.25; Mél 8.35; Lók 9.24.. 26Aáŋa mɔtɔ a lɛ́galɛga go mbɔ́yɔgɔnɛnɔ, ŋgáa a mbiene, nɔ́ɔnɔ anáa ndɔ́mɔ́, uyogóní bamɛ a bɛ́ɛmba tɔ́nɔ. Aáŋa mɔtɔ a mbɔ́yɔgɔnɛnɔ, Baaba a mo búlugenye.
Nigúmi ná kolósi
27«Godɔ́ɔdɔ, giliíli gámɛ gɛ á béyuŋgúlídé, ŋgoyɛdamɔ́ kanɛ́ caá nɛɛ́nɛ o? “Baaba, códíomú go bɔ́ɔbɔ bó lɛ́galɛgamɔ́ go mbolɛna lí?” Kanɛ́ go bɔ́ɔ moatɛ́ gɔ́ɔ ncomɔ́ bola naá gigúlí gɛ́ɛgɛ. 28Baaba, gúmídíe ufíno yáhɔ.» Gɔ́ɔ ukelú yó ɛ́damɔ́ go úle naá mmoɛná yó a amɔ́: «Mbáá go yó gúmidie, nná gɔnɔ yó gúmidie.» 29Gitúu gá batɔ gɛ́ɛgɛ gɛ́ mbaá lɛ́ hɔ́ɔ gɛ́ ɔ́ ɔ́bɔ́ ukelú yɔ́ɔyɔ gɛ́ á amɔ́: «Bó lɔ́mɔ́ mbalámandáa.» Bóncodío bá amɔ́: «Ɛ́ŋgɛlɛsɛ ummue mɔ́ɔ a mo gálɛdamɔ́.» 30Yésusu go gɔnɔ gɔ́lɔ dogálɔ a amɔ́: «Bó dó báá go busío bámɛ gɔ́ɔ ukelú yɔ́ɔyɔ yó dɔ́nɔmɛdamɔ́, kanɛ́ bó lɔ́mɔ́ go busío bɛ́nyɔ́. 31Godɔ́ɔdɔ yɛ́ɛyɛ bó lɔ́mɔ́ gɛcamɛna gá go bide bɛsɛnɛ bá batɔ bá cí. Godɔ́ɔdɔ, Asaŋa a gaá nɔɔ́ɔ ohándá ba ufuŋe ba cí yɛ́ɛyɛ go hanyɔ́. 32Kɔ́ɔ yɔmɔ́ɔ, aŋa bá ŋgaá pedígínyée naá cí, ka ŋga bɔ́gɔ́gɛ́dɛ́nɔ́ batɔ biimée.» 33Dogálɔ dá Yésusu dɔ́ɔdɔ dó mbaá lɛ go go dúfie mbɔ́dɔ ya nigúe yɛ́ɛyɛ a mbaá lɛ ba go gúe. 34Gitúu gá batɔ go mo gundie gɛ́ amɔ́: «Dɛ mbɔ ɔ́bɔ́ naá kálata ya gicele goŋaá, Mesíi a ŋgɔ ɔyɔ́ɔ kanɛ mmanɛ́náa#12.34 Go ɛ́na naá Ɛsagɔ 110.4; Iseyíi 9.6; Déniele 7.14.. Nɛɛ́nɛ gɔ́ɔ maamɔ́ɔ o lɔ́mɔ́ go amɔ́, bá háanana go búlugie Moɔnɔ́ ba mɔtɔ. Moɔnɔ́ bá mɔtɔ moánɛ a lɔ́mɔ́ ánɛ́ɛ o?» 35Yésusu go bó oyana kanɛ́ a amɔ́: «Gise gɛ́ gá lɛ́ goana go moɔnɔ́ ba gɛcamɛna naá kadɛ́gadɛ́ɛ yɛnyɔ́. Ɛndáa nɔnɔ gɛcamɛna gɛ́ɛgɛ gise gɛ́ gá lɔ́mɔ́ nɛnyɔ́ goŋaá mbíno ɛ dɛ nyó gídígínyée go pɛ́. Kɔ́ɔ mɔ́ɔnyɔ ɛ ɛndamɔ́ naá mbíno a dɛ íyíménée anáa ɛ ɛ́danamɔ́. 36Gɛcamɛna giimée gɛ́ɛgɛ no gá lɔ́mɔ́ na gise, ágá nɔnɔ odɛ́má yɛ́nyɔ́ naá gɛ́ɛ, go goŋaá no ɛ́ya baaná bá gise.» Naá nnyimé ya dogálɔ dɔ́ɔdɔ, Yésusu go dómba halaháláa a báá bó bɔ́ɔ́sɛ́gɛ́nɔ́.
Beyúdene bí í ínyé go ága odɛ́má yábɔ́ naá Yésusu
37Akɛ́ aŋa Yésusu a mbaá ŋanánáa gɛcɛcá gá bieninye bá gobékúke naá busío bábɔ́, Beyúdene bá lɛ́ kanɛ go ága odɛ́má yábɔ́ naá mɔ́ɔ. 38Bó mba lɛ́ nɔ́ɔnɔ go goŋaá nogálɔ ná mbúsí ya Asaŋa Iseyíi nɔ́ɔnɔ nó bóhóogio: «Daadáa, ánɛ́ɛ a mboó olímínyóo cɔ́mɔ yɛ́ɛyɛ dɛ mbaá dúményée o? Naá ánɛ́ɛ gɔ́ɔ bogaaga báhɔ bó mbaá bédúfíe#12.38 Iseyíi 53.1 naá ŋgɔ́ŋɛ́ sá cóá cóá naá nogɛlɛ́gɛ. o?» 39Iseyíi ummue eé ummue a mba gɔnɔ́ dúfie mbɔ́dɔ yɛ́ɛyɛ bá mbaá lɔmɔ́ bá dɛ báá bá go mo oliminyo a amɔ́: 40«Asaŋa a mba bú ubíe bibúde, a báá lelíe ɛdɛ́má yábɔ́, go goŋaá oŋgíso yábɔ́ yá dɛ ɛ́ná boóma, odɛ́má yábɔ́ yó do dígímídé, bá dɛ kikílídíe gɛɔyɔ gábɔ́, gásɛ́ yɔmɔ́ɔ Asaŋa mbó éŋugie#12.40 Iseyíi 6.9-10 naá ŋgɔ́ŋɛ́ sá cóá cóá naá nogɛlɛ́gɛ..»
41Iseyíi a mba gálágáláa nɔ́ɔnɔ go goŋaá a mba lɛ́ ɛ́náalú nigúmi ná Yésusu, gɛ́hɛ́ gɔ́ɔ a mbaá lɛ a gálagala nɔ́ɔnɔ. 42Asáa gɔgɔ́, naá kadɛ́gadɛ́ɛ ya mefuŋe má Beyúdene, gɛca gɛ́ mba ágá odɛ́má yábɔ́ naá Yésusu. Kanɛ́ aŋa bá mbaá lɔmɔ́ bá díine Befelisiéŋe, gɔ́ɔ bá mbaá lɔmɔ́ bá dɛ dúfíe nɔ́ɔnɔ daŋɛ́daŋɛ, go bofoá bá goŋaá bá gaá bó gúnée naá nnyaŋá ya mbósógólí. 43Bá mba maamánáa mbúlugie ya batɔ gó dómba yɛ́ɛyɛ yɛ ɛ́damɔ́ go úlene naá Asaŋa.
Nogálɔ ná Yésusu no ná bide bɛsɛnɛ bá batɔ
44Yésusu go oyɛda ukelú naá mmoɛná a amɔ́: «Mɔtɔ mɔ́ɔnyɔ a ágamɔ́ odɛ́má yɛ́hɛ́ naá yɔmɔ́ɔ, bó do báá naá yɔmɔ́ɔ gɔ́ɔ a áganamɔ́ odɛ́má yɛ́hɛ́, kanɛ́ bó lɔ́mɔ́ naá mɔ́ɔnyɔ a lɔ́mɔ́ tómáalú. 45Mɔtɔ mɔ́ɔnyɔ a ŋgɛ́namɔ́, ɛ ɛ́nana tɔ́nɔ mɔ́ɔnyɔ a lɔ́mɔ́ tómáalú. 46Ndɔ́mɔ́ úléelú naá cí háalá goŋaá mbɛ́ɛmba gise; bó ŋa goŋaá mɔtɔ uŋkimée mɔ́ɔnyɔ a ágamɔ́ odɛ́má yɛ́hɛ́ naá yɔmɔ́ɔ a dɛ gɛ́gáa naá mbíno. 47Mɔtɔ a amɔ́ ɔ ɔ́bɔ dogálɔ dámɛ, a dɛ dó beŋé, bó do báá yɔmɔ́ɔ mɔ́ɔ ka ŋgaá bidée bɛsɛnɛ bɛ́hɛ́, goakɛ́ ndɛ́ kanɛ go úle naá cí gɔ́ɔgɔ go go nco bide bɛsɛnɛ bá batɔ, kanɛ́ ndɔ́mɔ́ úléelú go go nco bó fáŋa. 48Mɔtɔ mɔ́ɔnyɔ a ŋginyemú, a dɛ beŋé dogálɔ dámɛ, a báá go bɛa umbidí bɛsɛnɛ bɛhɛ́; umbidí bɛsɛnɛ bɛhɛ́ moánɛ a lɔ́mɔ́ nogálɔ nɔ́ɔnɔ ndɔ́mɔ́ gálɛ́dáalú; nó ná mo ubie na gɛsɛnɛ naá budúgú bá mesúgidinye. 49Ndɛ́ kanɛ go oyɛda boóma go go básaŋɛna gámɛ gá moatɛ́. Baaba, mɔ́ɔnyɔ a lɔ́mɔ́ tómáalú, mɔ́ɔ a lɔ́mɔ́ ŋgoyánáalú mɔ́ɔ moatɛ́ moatɛ boóma bɔ́ɔbɔ káananamɔ́ go gálagala, kunde kúunenye. 50Ŋgíyime kanɛ́ bese goŋaá nogálɔ nɛ́hɛ́ nɔ́ɔnɔ nó fáanana gɛɔyɔ gá kanɛ mesúge. Kɔ́ɔ bɔ́ɔbɔ ŋgoyamɔ́ bó lɔ́mɔ́ caŋa mmue na bɔ́ɔbɔ Baaba a mbaá ŋgoyáná.»
Одоогоор Сонгогдсон:
Sáŋa 12: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү