Sáŋa 10
10
Ncaba ya gɛnɔ́gɔ́ gá umbeŋíbéŋí bidúgé
1«Mammana, mammana, ŋgaá nyó oyáná caá: Mɔtɔ mɔ́ɔnyɔ a ŋamɔ́ a dɛ dómbá naá gɛasɛ́ gá omɛndɛ́ yá bɛdómbáa, a gabogogana go boayá, a lɛ́ uŋgíbi, a lɛ́ gɛkándáa. 2Kanɛ́ mɔ́ɔnyɔ a dómbanamɔ́ naá gɛasɛ́ go go íŋene naá buufe, a lɛ́ umbeŋíbéŋí bɛdómbáa. 3Ufífí a mo buunene gɛasɛ́, bɛdómbáa bɛ́ ɔ́bɔnɔ ukelú yɛ́hɛ́. A dɔ́ŋɔnɔ go ufíno bɛdómbáa bɛ́hɛ́, gímmue go gímmue, ɛ ɛ́dana na bɛ́ naá hanyɔ́. 4Aŋa a manamɔ́ go bɛ́ húmenye, ɛ ɛnda a bɛ́ gɔ́gɔ naá busío; bɛ́ bɛ́ mo bienene, goakɛ́ bí íyimene ukelú yɛ́hɛ́. 5Bɛ́ dɛ ŋgá biene giinyíi giinyíi gá mɔtɔ, moatɛ́ bɛ́ ŋgaá mo díínée, goŋaá bɛ́ dɛ lɛncánáa ukelú yɛ́hɛ́.» 6Yésusu go bó oyana ncaba yɛ́ɛyɔ, kanɛ́ báaba bá mbaá lɔmɔ́ bá mo bódólonyo, bá lɛ́ kanɛ go yɛ ɔ́bɔ naá cí. 7Yésusu go gɔnɔ bayɛga a amɔ́: «Mammana, mammana, ŋgaá nyó oyáná caá: Ndɛ́ gɛasɛ́ gá omɛndɛ́ yá bɛdómbáa. 8Biimée púmú báaba bá mbaá dóáná go úle gámɛ, bá mba lɛ́ biíbi, bɔ́ɔ gɔnɔ́ bɛkándáa#10.8 Go ɛ́na naá Yelemíi 23.1-2; Esekíele 34.2-3., kanɛ́ bɛdómbáa bɛ́ lɛ́ kanɛ go bɔ́ ɔ́bɛnɔ. 9Yɔmɔ́ɔ ndɛ́ gɛasɛ́; mɔtɔ a amɔ́ a dómba naá yɔmɔ́ɔ go go íŋene, a ŋga sɔ́dɔ́; kɔ́ɔ a ŋgaá bɛ́ɛ́mbá, a gɔsɔ a bólɛga, a gídene manyáanya mɛ́hɛ́. 10Uŋgíbi mɔ́ɔ, u úlenemú goana go go íbe, go go óna na go fúugie. Yɔmɔ́ɔ mbu úlé goŋaá batɔ bá bɛa mammana ya gɛɔyɔ, bá gɔnɔ gɛ́ bɛa fundufundu.
11«Ndɛ́ gɛnɔ́gɔ́ gá umbeŋíbéŋí#10.11 O bana, go eninye na bɔ́ɔbɔ naá Ɛsagɔ 23.1; Iseyíi 40.11; Esekíele 34.15; 37.24.. Gɛnɔ́gɔ́ gá umbeŋíbéŋí gɛ́ íŋenene gɛɔyɔ gɛ́hɛ́ go bɛdómbáa bɛ́hɛ́. 12Mɔtɔ mɔ́ɔnyɔ bá mo soɛnanɛnamɔ́ go go beŋebeŋe bidúgé, mɔ́ɔ a dɛ bɛ́ɛ́mbá moatɛ́ ba bɛ́, aŋa u úlemú a bɛ́ɛ́ ɛ́ná gimóndó, a gúduge na odɛ́dá, a síe a báá cecúgíe bɛdómbáa, gimóndó gɛ́ síene gɛ́ bɛ́ dóda, gɛ́ bɛ́ sélemendie. 13A gúdugenemú na odɛ́dá, goakɛ́ a lɔ́mɔ́ hɔ́ɔ goana go muinyí, a dɛ gɔ́lɔ́nɔ́ɔ gɛdɔmbɔ go bɛdómbáa. 14Yɔmɔ́ɔ, ndɛ́ gɛnɔ́gɔ́ gá umbeŋíbéŋí. Ŋgíyimene bɛdómbáa bámɛ, bɛdómbáa bámɛ bɛ́ tɔ́nɔ bɛ́ ŋgíyimene. 15Aŋa Baaba a ŋgíyimenemú, yɔmɔ́ɔ ŋgíyimene Baaba, ŋgíŋenene gɛɔyɔ gámɛ go bɛdómbáa bamɛ. 16Ká bɛanana bɛdómbáa bíncodío bɛ́ɛbɛ bɛ́ lɔ́mɔ́ bɛ́ dɛ bɛ́ɛ́mbá naá buufe bɔ́ɔbɔ. Bɛ́ɛbɔ tɔ́nɔ, káanana go bɛ́ indenye; bɛ́ ŋgɔ ɔ́bɔ́nɔ́ɔ ukelú yámɛ, gitúu gɛ́ lɛ go bɛ́ɛmba táŋɛ́ gímmue na umbeŋíbéŋí táŋɛ́ ummue. 17Baaba a mmaamana, goakɛ́ ŋgíŋenene gɛɔyɔ gámɛ, naá nnyimé kɔnɔ bɛanana bogaaga bá go gɔnɔ gɛ́ bɛa.
18«Mɔtɔ a dɛ gɛ́ ŋgúlényée, kanɛ́ yɔmɔ́ɔ kɛ́ íŋenenemú go yɔmɔ́ɔ moatɛ́. Mbɛanana bogaaga bá go gɛ́ íŋene, kɔnɔ bɛanana bogaaga bá go gɔnɔ gɛ́ bɛa. Bɔ́ɔbɔ Baaba a mbaá ŋgoyáná a amɔ́ nco ŋa bɔ́bɔ́ɔ.»
19Dogálɔ dá Yésusu dɔ́ɔdɔ go gɔnɔ go úle na gobáadona naá kadɛ́gadɛ́ɛ ya Beyúdene. 20Gɛca naá olɔŋɔ yábɔ́ gɛ́ mba lɛ́ gɛ́ oya gɛ́ amɔ́: «A lɛ́ na gɛgáda gá giliíli! A á dabálɛ́dá! No mo bódólonyo goakɛ́ o?» 21Kanɛ́ bóncoó bá amɔ́: «Dogálɔ dɔ́ɔdɔ dó do bósó dogálɔ dá mɔtɔ mɔ́ɔnyɔ a lɔ́mɔ́ na gɛgáda gá giliíli. Moatɛ́, gɛgáda gá giliíli gɛ́ lɛ́ ba go fuune begélígeli oŋgíso o?»
Bagɔ́nɔ́ɔ bá Beyúdene bá á sɔ́mɛ́nɔ́ Yésusu
22Bá mba lɛ́ bá leebenye gibíné gá go gɔnɔ buune Nnyaŋá ya Asaŋa naá Yolósalɛmɛ#10.22 A lɔ́mɔ́ Yódasɛ Makabɛ́ɛ mɔ́ɔ a mbaá gɔnɔ́ buune gɛdálɛ́ná gɛ́ɛgɛ naá Nnyaŋá ya Asaŋa naá nnyómá ya 165, hɔ́ɔlɔ́ Yésusu a gá lɛ́ a dɛ bébíéné.. Bó mba lɛ́ gɛcamɛna gá isió. 23Yésusu a mba lɛ́ naá Nnyaŋá ya Asaŋa, ɛ ɛ́da a nco gunde, ɛ ɛnda naá Balánda ba Salomɔ́ŋɔ. 24Beyúdene go mo ágɛna gieŋí bá amɔ́ gɛ́hɛ́ aá: «O ná dɔ́bɔmɔ́ o có gígenye naá mbíno gó ɛ́da héme nikíi o? Aáŋa o lɛ́ Mesíi, có ádɛ́náamɔ́.» 25Yésusu go bó gundie a amɔ́: «Mbáa go nyó oyana nɔ́ɔ, no do olímónyóo. Meŋiigíe máama ŋŋananamɔ́ go ufíno yá Baaba má dúfenye boóma bɔ́ɔbɔ ndɔ́mɔ́.
26«Kanɛ́ bɛɛnyɔ́ɔ, no do ŋgolímónyóo, goakɛ́ no do báá naá olɔŋɔ yá bɛdómbáa bámɛ. 27Bɛdómbáa bámɛ bɛ́ ɔ́bɔnɔ ukelú yámɛ, mbí íyimene, bɛ́ bɛ́ mbienene. 28Kɔ́ɔ yɔmɔ́ɔ, mbɛ́ fáanana gɛɔyɔ gá kanɛ mesúge; bɛ́ dɛ ŋgá fúe akɛ́ go buisí, gó gɔnɔ gunde mɔtɔ a dɛ ŋgá bóso go bɛ́ bɔgɔ naá ombɔ́gɔ yámɛ. 29Baaba mɔ́ɔ a mbaá bɛ́ ncoóo, a lɛ́ gɛgaaga go buimée, kɔ́ɔ mɔtɔ a dɛ bɛanánáa bogaaga bá go bɔgɔ boóma naá ombɔ́gɔ yá Baaba. 30Namɛ na Baaba dɛ lɛ́ ummue.»
31Beyúdene go gɔnɔ báda adánɛ́ go go mo dóɛdana. 32Kanɛ́ Yésusu go gɔnɔ gɔ́lɔ dogálɔ a amɔ́: «Mbáa go nyó dúfenye gɛca gá bɛnɔ́gɔ́ bá meŋiigíe bá go ɛ́da go úle naá Baaba. No lɛ́galɛgamɔ́ go tóɛdana adánɛ́ kanɛ́ go gɛ́hanɛ́ o?»
33Beyúdene go mo gundie bá amɔ́: «Bó do bósó go gɛnɔ́gɔ́ gá meŋiigíe gímmue gɔ́ɔ dɛ lɛ́galɛgamɔ́ go go dóɛdana adánɛ́, kanɛ́ bó lɔ́mɔ́ goŋaá o sɛga Asaŋa, goakɛ́ maamɔ́ɔ mɔ́ɔnyɔ o lɔ́mɔ́ mɔtɔ, go amɔ́ o béeninenye na Asaŋa#10.33 Go ɛ́na naá Léfi 24.16..» 34Yésusu a amɔ́ gáábɔ́ a amɔ́: «Ábɔ, bó do báá ɔ́ŋɔ́ɔlú naá Kálata yɛnyɔ́ ya Gicele goŋaá: Yɔmɔ́ɔ Asaŋa ndɛ́ caá: no lɛ́ baasaŋa#10.34 Ɛsagɔ 82.6. o? 35Gicele gɛ́ bó dɔ́ŋɔnɔ baasaŋa, bɔ́ɔ báaba nogálɔ ná Asaŋa nó mbaá lɛ gálɛ́dáalú go busío bábɔ́. Asáa gɔgɔ́ mɔtɔ a dɛ bósó ba go fúgune bɔ́ɔbɔ Ŋgɔ́ŋɛ́ yɛ oyamɔ́. 36Gámɛ mɔ́ɔnyɔ Baaba a mbaá poná, a báá gɔnɔ́ tóma naá cí háalá, no gálagala no amɔ́: “O sɛga Asaŋa”, go busío bá goŋaá ndɛ́ oyɛ́dáalú caá ndɛ́ Moɔnɔ́ ba Asaŋa. 37Aáŋa cɛ ŋanánáa meŋiigíe má Baaba, no do ágá odɛ́má yɛ́nyɔ́ naá yɔmɔ́ɔ! 38Kanɛ́ aáŋa mmá ŋanana, gɔgɔ́ akɛ́ no do ágá odɛ́má yɛ́nyɔ́ naá yɔmɔ́ɔ, olímínyóo nɔnɔ meŋiigíe moánɛ, go goŋaá no lɛnca, no íyime bese bese go goŋaá Baaba a lɛ́ naá yɔmɔ́ɔ, yɔmɔ́ɔ naá Baaba.» 39Kɔ́ɔ bá gɔnɔmɔ́ fúmbe go mo gumbene, kanɛ́ gɛ́hɛ́ go bɔ́bɔgɔ naá ɛmbɔ́gɔ yabɔ́. 40Yésusu go gɔnɔ gunde naá cɔ́lɔ ya osaá yá Yɔlɔdɛ́ŋɛ boayá búunú anáa Sáŋa a mbaá bayɛ́gá go yumeninye batɔ, gɛ́hɛ́ go lukumene hɔ́ɔ. 41Gitúu gá batɔ go ɛ́da go mo úlenine hɔ́ɔ, bo oya bá amɔ́: «Mammana, Sáŋa a lɛ́ kanɛ go ŋa gieninye gá gobékúke akɛ́ gímmue, kanɛ́ buimée bɔ́ɔbɔ a mbaá gálágáláa go mɔtɔ mɔ́ɔnyɔ, bó mba lɛ́ mammana.» 42Hɔ́ɔlɔ́ gɔ́ɔ gitúu gá batɔ gɛ́ ágamɔ́ odɛ́má yábɔ́ naá Yésusu.
Одоогоор Сонгогдсон:
Sáŋa 10: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү