Sáŋa 1
1
Nogálɔ ná gɛɔyɔ
1Naá gobayɛga gá buimée, mɔ́ɔnyɔ bá dɔ́ŋɔnɔmɔ́ bá amɔ́ Nogálɔ, a mbaá ŋá a ná lɛ́ hɔ́ɔ; kɔ́ɔ Nogálɔ a mbaá lɛ na Asaŋa, gó gunde, Nogálɔ a mba lɛ́ Asaŋa. 2A mba lɛ́ go mabayɛga má buimée na Asaŋa#1.2 O bana, go eninye big. 1-2 tɔ́nɔ na Ncaba 8.22-26.. 3Gɛ́hɛ́, Asaŋa a mba ŋaáa boóma buimée, a lɛ́ kanɛ go ŋa boóma bá búmmue kanɛ mɔ́ɔ#1.3 O bana, go eninye na Mabayɛga 1.3; Ɛsagɔ 33.6,9; 1 Kɔl 8.6; Kol 1.16-17.. 4Gɛɔyɔ gɛ́ mbaá lɛ naá mɔ́ɔ, gó gunde, gɛɔyɔ gɛ́ mbaá lɛ gise go batɔ. 5Gise gɛ́ noma naá mbíno, mbíno ɛ bíí inyé go gɛ́ oliminyo#1.5 mbíno ɛ bíí inyé go gɛ́ oliminyo : gokikilidie gúncoó gó lɔ́mɔ́ mbíno ɛ báá lɔbɛ́nɔ́ kanɛ go gɛ́ mánɛgɛna..
6Asaŋa a mba dómá mɔtɔ ba bosɔ́mɔ, ufíno yɛ́hɛ́ Sáŋa#1.6 Bó lɔ́mɔ́ Sáŋa Begiyuminye. Go ɛ́na 1.19-36.. 7A mbu úlé aŋa ŋgominyo go go nco ŋa buŋgominyo go busío bá gise, goŋaá uŋkimée o oliminyo go busío bá ŋgoyáamɔ́ yɛhɛ́. 8Sáŋa a dɛ mbáa lɛ mɔ́ɔ moatɛ́ gise, kanɛ́ a mbuú úlé go go nco ŋa buŋgominyo go busío bá gise. 9Nogálɔ mɔ́ɔ a mbaá lɛ mammana ya gise; a búú úlé naá cí go go seemenye mɔtɔ uŋkimée. 10Nogálɔ a mba lɛ́ naá cí, Asaŋa a báá gedíe cí gɛ́hɛ́, kɔ́ɔ batɔ báaba naá cí bá mbaá lɔbɔ́ kanɛ go mo íyime. 11A mbu úlé naá boɛhɛ́ɛ#1.11 naá boɛhɛ́ɛ nɔ́ɔnɔ gó lɛ́ aá naá gɛdɔŋɔ gɛ́hɛ́ gá mbíényée., boɛhɛ́ɛ bá báá lɔbɔ́ kanɛ go mo gɛ́ndɛgɛna. 12Kanɛ́ go báaba bá mbaá mo gɛ́ndɛ́gɛ́ná, go báaba bá áganamɔ́ odɛ́má yabɔ́ naá mɔ́ɔ, a báá bó fáá bogaaga bá go ɛ́ya baaná bá Asaŋa#1.12 O bana, go eninye na Gal 3.26; 1 Sáŋ 3.1-2.. 13Bɔ́ɔbɔ moánɛ bá lɛ́ kanɛ go bébíene aŋa batɔ bá bébíenemú, akɛ́ go golɛ́ga gá nnyɔ́dɔ, ɛ́na gá mɔtɔ, kanɛ́ go golɛ́ga gá Asaŋa. 14Nogálɔ a mbɛɛ́ ɛ́yá mɔtɔ, a báá lɛ gó nco gɛ́ga nɛcɔ́. Dɛ mbɛ ɛ́ná nigúmi nɛ́hɛ́#1.14 O bana, go eninye na Iseyíi 60.1-2., nigúmi nɛ́ɛnɛ a bɛananamɔ́ naá Isée, mɔ́ɔ gimmuée gá Moɔnɔ́ na niibo niimée na mammana iŋkimée. 15Sáŋa a mo ŋanana buŋgominyo, o oya daŋɛ́daŋɛ go busío bɛ́hɛ́ a amɔ́: «Mɔ́ɔ mɔ́nyɔ́ɔ, mɔ́ɔnyɔ mmbaá gálɛ́dá caá, naá nnyimé yamɛ mɔtɔ u úlene mɔ́ɔnyɔ a mbaá tóánɛ́ná, goakɛ́ otóotoɛ yá goŋaá yɔmɔ́ɔ mbɛ́ɛmba, mɔ́ɔ a mbaá ŋá a ná lɛ́ hɔ́ɔ#1.15 Go ɛ́na 1.30..» 16Ɛɛ́ɛŋ, bɛɛcɔ́ɔ biimée dɛ mba dáŋábá naá niibo nɛ́hɛ́ niimée, bɛfona tútututu. 17Aáŋa gá Mɔ́sɛsɛ, Asaŋa a mba có fáá bicele#1.17 Go ɛ́na naá Gihúmie 31.18; 34.28., niibo na mammana mó lɔ́mɔ́ úléelú gá Yésu Kilítu. 18Mɔtɔ a gá báasa a dɛ ɛ́ná Asaŋa#1.18 O bana, go eninye na Gihúmie 33.20.; kanɛ́ Asaŋa, gimmuée gá Moɔnɔ́ mɔ́ɔnyɔ a lɔ́mɔ́ na Asaŋa, mɔ́ɔ a mbaá có mo íyímíe.
Ŋgominyo ya Sáŋa Begiyuminye
19Ɔ́bɔ́ nɔnɔ ŋgominyo yɛ́ɛyɛ Sáŋa a mbaá ŋaáa gɔ́ɔgɔ bagɔ́nɔ́ɔ bá Beyúdene naá Yolósalɛmɛ, bá mbaá fedígínyée bedúmbí bɛbáágá naá Asaŋa na batɔ bá Boya Léfi, go bó dóma naá Sáŋa go go mo úhune ŋgúhune yɛ́ɛyɛ: «O lɔ́mɔ́ ánɛ́ɛ o?» 20Kanɛ go ɛ́da halaháláa, Sáŋa go oyɛda daŋɛ́daŋɛ a amɔ́: «Cɛ bósó Mesíi.» 21Gáábɔ́ go mo úhune bá amɔ́: «O lɔ́mɔ́ ánɛ́ɛ o? O lɔ́mɔ́ Elíi lí?» Sáŋa a amɔ́: «Cɛ bósó mɔ́ɔ.» Bá amɔ́ gɛ́hɛ́ bá amɔ́: «O lɔ́mɔ́ mbúsí ya Asaŋa o?» A amɔ́: «Akɛ́ɛ#1.21 Go ɛ́na naá Melesíi 3.23; Bicele 18.15,18..»
22Gɔ́ɔ bá mo oyanamɔ́ bá amɔ́: «O lɔ́mɔ́ kanɛ́ ánɛ́ɛ o? Dɛ háanana go gundine na batɔ báaba bá báá ná có dómá na kundíemú. Maamɔ́ɔ moatɛ́ go oyamɔ́ ɛkádɛ go busío báhɔ o?» 23Sáŋa go bó gundie na dogálɔ dá mbúsí ya Asaŋa Iseyíi a amɔ́: «Ndɔ́mɔ́ ukelú yá mɔ́ɔnyɔ a dónogogonyomú naá giolóo gá bodɛ́agadɛ́ a amɔ́: “Yɛ́yáa nɔnɔ pɛ́ ya Daadáa bese#1.23 Iseyíi 40.3, bó lɔ́mɔ́ naá ŋgɔ́ŋɛ́ ya cóá cóá naá nogɛlɛ́gɛ..”» 24Naá olɔŋɔ yá batɔ bá bosɔ́mɔ báaba bá mbaá dómɛ́ná Sáŋa, batɔ bá giimbó gá Befelisiéŋe bá mba lɛ́ hɔ́ɔ#1.24 Gokikilidie gúncoó gó lɔ́mɔ́ Batɔ bá bosɔ́mɔ báaba bá mbaá dómɛ́ná Sáŋa bá mba lɛ́ Befelisiéŋe.. 25Bɔ́ɔbɔ kanɛ́ go ɛ́da go mo yiidenye na ŋgúhune bá amɔ́: «Aáŋa o do báá Mesíi, o do báá Elíi, o do báá mbúsí ya Asaŋa mmue, ɛkádɛ kanɛ́ o yumeninyemú o?» 26Sáŋa go bó gundie a amɔ́: «Yɔmɔ́ɔ nyumeninye naá miimpo. Mɔtɔ a lɛ́ hɔ́ɔ naá tɛ́mádɛ́má yɛnyɔ́ mɔ́ɔnyɔ no lɔ́mɔ́ no do mo íyíménée. 27U úlene naá nnyimé yamɛ, cɛ háánánáa akɛ́ naá odɛ́nɛ́ yá go fulune duelí dá nnaadɛna sɛ́hɛ́.» 28Buimée bɔ́ɔbɔ bó mba bádómbánáa naá Beteníi#1.28 Beteníi: ba dɛ íyi anáa gɛdɔŋɔ gɛ́ɛgɛ gɛ́ lɔ́mɔ́. Gɛ́ dɛ báá Beteníi mɔ́ɔnyɔ mekúígíi na Yolósalɛmɛ (go ɛ́na 11.1)., naá cɔ́lɔ ya boayá búunú bá Yɔlɔdɛ́ŋɛ, anáa Sáŋa a mbaá lɛ a yumeninye batɔ.
Moɔnɔ́ ba gɛdómbáa ba Asaŋa
29Gó bélenye, Sáŋa go ɛ́na Yésusu u úlene naá boayá bɛ́hɛ́, gɛ́hɛ́ go oyɛda a amɔ́: «Mɔ́ɔ mɔ́nyɔ́ɔ, Moɔnɔ́ ba gɛdómbáa ba Asaŋa, mɔ́ɔ u úlenyemú bɛlɔgɔ bá batɔ naá cí#1.29 O bana, go eninye na Iseyíi 53.6-7.. 30Gɛ́hɛ́ gɔ́ɔ mmbaá gálɛ́dá caá: “Naá nnyimé yamɛ, mɔtɔ u úlene mɔ́ɔnyɔ a mbaá tóánɛ́ná, goakɛ́ otóotoɛ yá goŋaá yɔmɔ́ɔ mbɛ́ɛmba, mɔ́ɔ a mbaá ŋá a ná lɛ́ hɔ́ɔ”. 31Yɔmɔ́ɔ ba moatɛ́ cɛ mbáa lɛ mmo íyimene, kanɛ́ ndɔ́mɔ́ úléelú, nyumeninye naá miimpo go goŋaá boɛ́nɔ bá Ɛ́sɛlahɛ́ɛlɛ bó mo íyime.» 32Sáŋa kanɛ́ go ŋa ŋgominyo yɛ́ɛyɛ a amɔ́: «Ŋgɛɛ́ ɛ́ná Giliíli ba Asaŋa, a fóanɛna aŋa mmɛŋá, a siisene naá mmoɛná, a báá ncó lukumene naá mɔ́ɔ#1.32 O bana, go eninye na Iseyíi 11.2; 61.1.. 33Kɔ́ɔ yɔmɔ́ɔ, cɛ á gá lɛ mmo íyimene, kanɛ́ mɔ́ɔnyɔ a lɔ́mɔ́ tómáalú go go nco yumeninye naá miimpo, mɔ́ɔ a lɔ́mɔ́ ŋgoyánáalú a amɔ́: “Mɔtɔ mɔ́ɔnyɔ o nɛ́ ɛ́namɔ́ Giliíli a siisene a nco lukumene naá mɔ́ɔ, bendiemi mɔ́ɔ a yumeninyemú naá Gimmúmpúu gá Giliíli.” 34Kɔ́ɔ yɔmɔ́ɔ, ŋgɛɛ́ ɛ́ná mbáá gundé mbáá ŋaáa ŋgominyo goŋaá mɔ́ɔ a lɔ́mɔ́ Moɔnɔ́ ba Asaŋa.»
Yésusu a dɔ́ŋɔnɔ behúúní bɛ́hɛ́ bá busío
35Gó bélenye, Sáŋa a mba lɛ́ gɔnɔ́ naá hoóma hémmue eé hémmue na behúúní bɛ́hɛ́ báandɛ́ naá olɔŋɔ yá behúúní bɛ́hɛ́. 36Ɛ ɛ́ ɛ́ná Yésusu a dómbana, go gálɛda a amɔ́: «Mɔ́ɔ mɔ́nyɔ́ɔ, Moɔnɔ́ ba gɛdómbáa ba Asaŋa#1.36 Go ɛ́na 1.29..» 37Behúúní báandɛ́ bɔ́ɔbɔ, bɔ́ ɔ́ ɔ́bɔ́ Sáŋa a gálagala nɔ́ɔnɔ, gáábɔ́ go biene Yésusu. 38A á bákoɛlɛ́dá, go bó ɛ́na bá ná lɛ́ go mo bienene. Gɔ́ɔ a bó úhunemú a amɔ́: «No fúumbemú ŋkádɛ o?» Bɔ́ɔ go mo gundie bá amɔ́: «Eléébi (naá cí goŋaá Iloodio), o gɛ́gamɔ́ áhanɛ́ɛ o?» 39Gɛ́hɛ́ go bó oyana a amɔ́: «Úlé nɔnɔ, no gɛɛ́ ɛ́ná.» Bá báá lɛ gó ɛ́da kanɛ́, go ɛ́na anáa a mbaá lɛ a gɛ́ga. Bá báá lɛ gó dúmbie buisí moánɛ olɔŋɔ nɛhɛ́; bó mba lɛ́ boóma bá bigúlí bínni naá nnyimé ya tólóbóo.
40Andɛlɛ́ɛ, ondimóní ba Símono Píele, a mba lɛ́ ummue mɔ́ɔnyɔ a mbɔɔ́ ɔ́bɔ́ dogálɔ dá Sáŋa, a báá biené Yésusu. 41Gɛ́hɛ́ go manɛ go ɛ́da huenye ondimóní Símono, a amɔ́ gɛ́hɛ́ a amɔ́: «Dɛ á sɔmɔ́ Mesíi!» nɔ́ɔnɔ gó lɛ́ aá Kilítusu. 42Gɛ́hɛ́ go ɛ́da na Símono naá boayá bá Yésusu. Yésusu a á mo ɛ́ná, go gálɛda a amɔ́: «Maamɔ́ɔ o lɔ́mɔ́ Símono moɔnɔ́ ba Sáŋa; bá nɛ́ ɛ́da go go dɔ́ŋɔnɔ bá amɔ́ Sɛ́fasɛ#1.42 Sɛ́fasɛ: gɛbana na noalamɛ́ɛ.», naá cí goŋaá Gɛdánɛ́dánɛ́.
43Gó bélenye, Yésusu go saŋa go ɛ́da naá Gelilée. Gɛ́hɛ́ go lumene na Fílibi, a báá mo oyáná a amɔ́: «Mbienéemú.» 44Fílibi a mba lɛ́ ba tɛ́sɔnɔ ya Bɛ́tɛ́sayɛ́da#1.44 Bɛ́tɛ́sayɛ́da hoóma mekúígíi na Kapɛlɛnahɔ́mɛ., tɛ́sɔnɔ mmue eé mmue yɛ́ɛyɛ Andɛlɛ́ɛ na Píele bá lɔ́mɔ́ mbíényée. 45Gɛ́hɛ́ go ɛ́da gíde Natanayɛ́lɛ a amɔ́ gɛ́hɛ́ a amɔ́: «Dɛ ná lɛ́ na mɔtɔ mɔ́ɔnyɔ Mɔ́sɛsɛ a mbaá gálágáláa naá kálata ya bicele, mbúsí sá Asaŋa sɛ́ báá gálágáláa tɔ́nɔ go busío bɛ́hɛ́#1.45 O bana, go eninye na Bicele 18.18; Iseyíi 9.5-6; Esekíele 34.23.. A lɔ́mɔ́ Yésusu ba Násalɛdɛ, ohaŋa ba Yósɛbɛ.» 46Natanayɛ́lɛ go mo úhune a amɔ́: «Ɛkádɛ gá besé gɛ́ lɔ́mɔ́ ba go húme naá Násalɛdɛ o?» Fílibi go mo gundie a amɔ́: «Úlé o bɛ́ɛ́nɛna.» 47Aŋa Yésusu a mbɛɛ́ ɛ́ná Natanayɛ́lɛ a ná lɛ́ go úlene, gɛ́hɛ́ go gálɛda go busío bɛ́hɛ́ a amɔ́: «Mammana ya moɔnɔ́ ba Bɛ́ɛ́sɛlahɛ́ɛlɛ yɛ́yɛ́ɛ, a lɛ́ kanɛ cigí.» 48Natanayɛ́lɛ go mo úhune a amɔ́: «O ŋgíyimenemú áhanɛ́ɛ o?» Gɛ́hɛ́ go mo gundie a amɔ́: «Mbáa go ɛ́na gɛcamɛna gɛ́ɛgɛ o báá lɔmɔ́ naá cí ya bufiigíe, otóotoɛ yá ŋaá Fílibi a go dɔ́ŋɛnɔ.» 49Natanayɛ́lɛ go gɔnɔ gɔ́lɔ dogálɔ a amɔ́: «Eléébi, o lɛ́ Moɔnɔ́ ba Asaŋa, o lɛ́ ufuŋe yá Ɛ́sɛlahɛ́ɛlɛ#1.49 O bana, go eninye na Ɛsagɔ 2.7; Sofoníi 3.15..» 50Yésusu go mo gundie a amɔ́: «Go ó olímínyóo goakɛ́ mbáa go oyana caá mbáa go ɛ́na naá cí ya bufiigíe; o nɛ́ ɛ́nana bɛantáanta bá moóma bɛ́ɛbɛ bɛ́ dómbanamɔ́ bɔ́ɔbɔ.» 51Gɛ́hɛ́ go gídene a amɔ́: «Mammana mammana, ŋgaá nyó oyáná caá, no nɛ́ ɛ́na mmoɛná buunéelú, bɛɛ́ŋgɛlɛsɛ bá Asaŋa bá bólɛga, bá gɔsɔ naá mmoɛná ya Moɔnɔ́ ba mɔtɔ#1.51 O bana, go eninye na Mabayɛga 28.12..»
Одоогоор Сонгогдсон:
Sáŋa 1: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү