Meŋiigíe 5
5
Mbele ya Ananɛ́asɛ nɛhɛ́ na ogɛ́ Safɛláa
1Kanɛ́ kɔ́ɔ mɔtɔ ummue, ufíno yɛ́hɛ́ Ananɛ́asɛ, na ogɛ́ Safɛláa, bá dúemú gigísi gábɔ́ gá cí. 2Ananɛ́asɛ go gɛ́sa gigísi gá muinyí, a bɛ́ɛ ɛ́dá síe gigísi naá baapótɛlɛ. Ogɛ́ Safɛláa a mba lɛ́ i íyimene. 3Kɔ́ɔ Píele a mo gálɛdamɔ́ a amɔ́: «Ananɛ́asɛ, ɛkádɛ́ ohándá a go íŋeninemú naá odɛ́má goŋaá ó ba belé Gimmúmpúu gá Giliíli, o báá lɔbɛ́nɔ́ na gigísi gá muinyí go cí yɛ́ɛyɛ go á ná dúe o? 4Naá busío bá goŋaá u dúe cí moánɛ, caá yɛ á ná lɔmɔ́ yɛ ɔ́bɛnɔnɔ nahɔ o? Kanɛ́ aŋa go á ná dúé, ábɔ caá gɔgɔ́ muinyí mó á ná lɔmɔ́ mó ɔ́bɛnɔnɔ nahɔ o? Goakɛ́ kanɛ́ go á ná bɛáa gɛgáda gá mbééníŋínyí gá go ŋa gɛbɛ́ gá boóma aŋa gɛ́ɛgɛ náana o? Caákɛ́ batɔ báa o belebelemú, Asaŋa mɔ́ɔ o belebelemú.» 5Ananɛ́asɛ ɔ ɔ́ ɔ́bɔ́ dogálɔ dɔ́ɔdɔ, go fóncoga go oba go cí tisi, a báá dómbá go gúe. Gɛantá gá bofoá go gumbene batɔ biimée báaba bá mbɔɔ́ ɔ́bɔ́nɔ́ɔ boóma bɔ́ɔbɔ. 6Bɛtɔmbɔ́ɔ bá batɔ go úle, bɛ́ báá máŋáná gigúe nnɔ́mbɔ́ ya gɛla, go ɛ́da na gɛ́ bá báá miée.
7Boóma aŋa bigúlí bɛ́dadɔ́ bɛ́ á dómbá, ogánɛ́ Ananɛ́asɛ go íŋene, a dɛ íyímé boóma bɔ́ɔbɔ bó báá ná bádómbánáa. 8Píele go mo úhune a amɔ́: «Go muinyí mɔ́ɔmɔ gɔ́ɔ no á ná dúé ntɛ́mɛ́ yɛnyɔ́ o? Ŋgoyánáamɔ́ kanɛ́.» Okɔ́dɔ go gundie a amɔ́: «Ɛɛ́ɛŋ, bó lɔ́mɔ́ go muinyí mɔ́ɔmɔ.» 9Kɔ́ɔ Píele a mo oyanamɔ́ a amɔ́: «Nɛɛ́nɛ kanɛ́ no á ná húmé ukelú goŋaá no sɔgɛdɔ Giliíli ba Daadáa o? Ɛ́ná kanɛ́, batɔ báaba bá báá ná miée onɔ́mɛ bahɔ béení bá ná lɔ́mɔ́ naá gɛasɛ́ béení, bɔ́ɔ bá gaá nɛ́ ɛ́dá nahɔ bá go mie tɔ́nɔ.» 10Hɔ́ɔ na hɔ́ɔ, okɔ́dɔ go fóncoga, go oba naá bɛgɔ́ndɔ́ bá Píele go cí tisi, a báá gúé. Bɛtɔmbɔ́ɔ bá batɔ bí íŋenene, go gíde okɔ́dɔ a báa go gúe; bá á dúmbíe go mo bádóɛgɛna bá bɛ́ɛ ɛ́dá mo mie mekúígíi na onɔ́mɛ. 11Gɛantáanta gá bofoá go gumbene nnyaŋá ya Asaŋa iŋkimée na batɔ biimée báaba bá mbɔɔ́ ɔ́bɔ́nɔ́ɔ moóma muimée mɔ́ɔmɔ.
Gɛca gá bɛsɛɔ
12Gɔ́ɔ baapótɛlɛ bɛ́ ɛ́damɔ́ naá busío, bá ŋanana gɛca gá bɛsɛɔ na muune naá kadɛ́gadɛ́ɛ ya batɔ. Boolímínyí bá mba lɛ́ odɛ́má yúmmue, bɔ́ɔ biimée púmú lukúmé lukúmé naá balánda ba Salomɔ́ŋɔ. 13Mɔtɔ untió a dɛ mbáa lɛ a bɛanana kélemene ya go bó bégídene akɛ́ aŋa batɔ bá mbaá lɔmɔ́ bá bó maamana makɔ́nɔ́. 14Batɔ degédegé, banɔ́mɔtɔ́ na bakɔ́dɔ, bá mba lɛ́ bá ágana odɛ́má yábɔ́ naá Daadáa, bá bégídenine naá olɔŋɔ yábɔ́. 15Go muune na bɛsɛɔ bɛ́ɛbɔ, gɔ́ɔ batɔ bɛ́ ɛ́damɔ́ go émenye bɔgɔnɔ́gɔnɔ naá dokandá ɛ́na naá mokala naá maayá má pɛ́, goŋaá naá go nco dómba gá Píele, gófɛnaá gifií gɛ́hɛ́ gɛ́ báláfɛna akɛ́ ummue mɔ́ɔnyɔ naá bɔ́ɔ e éŋuge. 16Gɛca gá batɔ gíncoó gɛ́ mba lɛ́ gɛ́ ɛ́da kúlugugene tɔ́nɔ naá tɛ́sɔnɔ sɛ́ɛsɛ sɛ́ mbaá lɛ ombálá na Yolósalɛmɛ, bú úlene na bɔgɔnɔ́gɔnɔ, na batɔ báaba bá mbaá lɔmɔ́ na bɛgáda bá biliíli, biimée bɔ́ɔbɔ púmú bá bée éŋúgénée.
Ogɔ́nɔ́ɔ ba bedúmbí bɛbáágá na batɔ bɛ́hɛ́ bá séesenye Baapótɛlɛ go hɛagá
17Gɔ́ɔ Ogɔ́nɔ́ɔ ba bedúmbí bɛbáágá naá Asaŋa na batɔ biimée báaba bá mbaá lɔmɔ́ bá olɔŋɔ yɛ́hɛ́, nɔ́ɔnɔ gó lɛ́ aá batɔ bá giimbó gá Beseduseyéŋe, bá ágamɔ́ baapótɛlɛ hɛagá, bá báá saŋá boóma bɔ́ɔbɔ bá lɔ́mɔ́ ba go bó ŋa. 18Gáábɔ́ go gumbene baapótɛlɛ bá báá bó nɔɔ́ɔ naá ncíbo ya gɛaŋɔ́. 19Kanɛ́ na budúgú, ɛ́ŋgɛlɛsɛ ba Daadáa go nco buune bɛasɛ́ bá ncíbo ya gɛaŋɔ́, a báá húmíe baapótɛlɛ a báá bó oyáná a amɔ́: 20«Ɛ́dá nɔnɔ naá Nnyaŋá ya Asaŋa, no oyana batɔ kanɛ bofoá buimée bɔ́ɔbɔ bó báláfamɔ́ gɛpáa gá gɛɔyɔ gɛ́ɛgɛ.» 21Baapótɛlɛ go ŋa ŋgɔ́bɛnɔ, gáábɔ́ go yáfa na gɛyɛ́nɛ́ túlúbú naá Nnyaŋá ya Asaŋa, go ɛ́da go húunenye. Naá gɛcamɛna gɛ́ɛgɔ, Ufuŋe yá bedúmbí bɛbáágá na batɔ bɛ́hɛ́ go bándɛgɛna bafɛanɔ́ɔ biimée bá gɛdɔŋɔ gá Beyúdene naá Nɛgála Nɛgɔ́nɔ́. Gɔ́ɔ bá dómamɔ́ bisimbi goŋaá bɛ́ ɛ́da gɔ́lɔ baapótɛlɛ naá ncíbo ya gɛaŋɔ́. 22Bisimbi bɛ́ ɛ́ ɛ́dá, go gíde goŋaá baapótɛlɛ bá dɛ báá gɔnɔ́ hɔ́ɔ. Kɔ́ɔ bɛ́ ncomɔ́ gunde na nnyimé na ŋgoyáamɔ́ ya goŋaá: 23«Dɛ á gídé ncíbo ya gɛaŋɔ́ buigéelú bese bese, befífí tɛ́nɛ́ɛ naá bɛasɛ́. Kanɛ́ aŋa dɛ buunemú gɛasɛ́, dɛ dɛ ɛ́ná mɔtɔ naá gadɛ́ɛ.» 24Aŋa ogɔ́nɔ́ɔ ba bebeŋíbéŋí Nnyaŋá ya Asaŋa na bagɔ́nɔ́ɔ bá bedúmbí bɛbáágá naá Asaŋa bá mbɔɔ́ ɔ́bɔ́ ŋgoyáamɔ́ moánɛ, nciŋí go bó yímene naá goságɛna gá baapótɛlɛ, bá búúhene ɛkádɛ gɛ́ báá ná báŋaáa. 25Mɔtɔ ummue go úle a báá bolá, go bó oyana a amɔ́: «Ɔ́bɔ́ nɔnɔ. Batɔ báaba no á ná ágá naá ncíbo ya gɛaŋɔ́ bɔ́ɔ béení naá Nnyaŋá ya Asaŋa bá húunenye batɔ hɔ́ɔ.» 26Gɔ́ɔ ogɔ́nɔ́ɔ ba bebeŋíbéŋí Nnyaŋá ya Asaŋa a dómbamɔ́ go ɛ́da na batɔ bɛ́hɛ́, bá bɛ́ɛ ɛ́dá gɔ́lɔ baapótɛlɛ kanɛ go bó séesenye; goakɛ́ bá mba lɛ́ bá díine goŋaá gɛdɔŋɔ gɛ́ gaá yibé go bó dóɛdana adánɛ́.
27Aŋa bá mbaá ncó gunde nabɔ́, gáábɔ́ go bó díliminye naá Nɛgála Nɛgɔ́nɔ́. Ufuŋe yá bedúmbí bɛbáágá naá Asaŋa go ɛ́da go úhene ŋgúhune 28a amɔ́: «Dɛ mba nyó legé busío buimée goŋaá no do gɔnɔ́ húunenye go ufíno yá mɔtɔ mɔ́ɔnyɔ. Kanɛ́ ɛkádɛ no báá ná ŋaáa o? No báa go sénigie gohúunenye gɛ́nyɔ́ naá tɛ́sɔnɔ ya Yolósalɛmɛ iŋkimée. No lɛ́galɛga go oyɛda goŋaá nigúe nɛ́hɛ́ nɛ́ có obanɛna#5.28 O bana, go eninye na Mot 27.25. o?» 29Píele na baapótɛlɛ báaba bóncoó go gundie bá amɔ́: «Dɛ háananamɔ́ go ɔ́bɛnɔ Asaŋa, bó dómba batɔ. 30Asaŋa ba biisée bɛ́cɔ́ a mba fúfúné Yésusu mɔ́ɔnyɔ no mbaá giléné naá kolósi, a báá gúé. 31Mɔ́ɔ Asaŋa a mbaá mo búlúgíe naá ombɔ́gɔ onɔ́mɛ yɛ́hɛ́, a báá gundé a báá mo dílímínyée Ufuŋe na Usódí go go fáa boɛ́nɔ bá Ɛ́sɛlahɛ́ɛlɛ pɛ́ ya go núgie gɛɔyɔ gábɔ́, bá gɔnɔ bɛa ihéehinye há bɛlɔgɔ. 32Dɛ lɛ́ ŋgominyo sá moóma mɔ́ɔmɔ muimée, bɛɛcɔ́ɔ na Gimmúmpúu gá Giliíli mɔ́ɔnyɔ Asaŋa a mbaá fáá biimée báaba bá mo ŋananamɔ́ ŋgɔ́bɛnɔ.»
33Batɔ bá Nɛgála Nɛgɔ́nɔ́ aŋa bá mbɔɔ́ ɔ́bɔ́ nɔ́ɔnɔ, ɛdɛ́má yabɔ́ go dɛ́aŋa, bá bɛ́ɛ́ ɛ́dá go fúmbe pɛ́ ya go óna baapótɛlɛ. 34Kanɛ́ mɔtɔ ummue ba giimbó gá Befelisiéŋe a mba lɛ́ naá olɔŋɔ yábɔ́, ufíno yɛ́hɛ́ Geméliele, iloodio há bicele hɛ́ɛhɛ gɛdɔŋɔ giimée gɛ́ mbaá lɛ gɛ́ mo hálamanana. Gɛ́hɛ́ go fadɛgɛna, go úhune goŋaá bá húmie baapótɛlɛ go moɔnɔ́ ba gɛcamɛna. 35Gɛ́hɛ́ go oyana batɔ bá Nɛgála a amɔ́: «Bɛɛnyɔ́ɔ batɔ bá Ɛ́sɛlahɛ́ɛlɛ báaba, lukúméné nɔnɔ bese go boóma bɔ́ɔbɔ no lɛ́galɛgamɔ́ go ŋa batɔ báaba. 36Medúgú má gá lɛ́ má dɛ dómbá gɛca gɔ́ɔ, Tɛ́dasɛ a mbaá bológá na go bóoya goŋaá a lɛ́ gɛantá gá mɔtɔ; batɔ makana mantɛdɛ ménni bá mba lɛ́ mo fídéelú. Kanɛ́ bá mba mo óná, batɔ biimée báaba bá mbaá mo biené bá báá sálámándá, olɔŋɔ yɛ́hɛ́ yó báá fúé. 37Naá nnyimé yɛhɛ́, naá gɛcamɛna gá ombanɔ, kɔ́ɔ Yódasɛ, mɔtɔ ba Bégelilée, a gɔnɔmɔ́ bologa, a báá gɔ́gɛ́dɔ́ gitúu gá batɔ. Kanɛ́ bá mba mo óná tɔ́nɔ, biimée báaba bá mbaá mo biené bá báá sálámándá. 38Godɔ́ɔdɔ kanɛ́, ŋgaá nyó oyáná caá, dɔmbɔ́ nɔnɔ go bienene batɔ báaba, no bó dɛ́ɛna bá dómba. Aáŋa dogálɔ dábɔ́ na buelí bábɔ́ mó ɛ́damɔ́ go úlene naá batɔ, mó gaá béfúíné mɔ́ moatɛ́. 39Kanɛ́ ɛ́na naá mammana mó ɛ́damɔ́ go úlene naá Asaŋa, no do bósó ba go mó gada. Bébeŋéemú nɔnɔ, no do ɛ́dá go nuugenye Asaŋa.»
Gɔ́ɔ batɔ bá Nɛgála Nɛgɔ́nɔ́ bɔ́ ɔ́bɛnɔmɔ́ Geméliele. 40Gáábɔ́ go gɔnɔ go íŋenye baapótɛlɛ, bá báá dómá batɔ bá báá bó gidée, bá báá gɔnɔ́ bó lɔsɛnɔ goŋaá bá dɛ gɔnɔ́ buŋene mɔtɔ ufíno yá Yésusu. Gáábɔ́ go bó dɛ́ɛna. 41Gɔ́ɔ baapótɛlɛ bú úlukiemú hɔ́ɔlɔ́ naá Nɛgála Nɛgɔ́nɔ́, go dómba bá bɛ́ɛ́ ɛ́dá bɔ́ ɔ́bɔnɔ bese goŋaá Asaŋa a á bó búlúgíe a báá hɛmá goŋaá bá bó fánɛnafanɛna go ufíno yá Yésusu. 42Medúgú miimée, naá Nnyaŋá ya Asaŋa na naá nnyaŋá sábɔ́, baapótɛlɛ bá dɛ mbá dɔmbɔ go húunenye na go dúmeninye Gɛnɔ́gɔ́ gá Cɔ́mɔ goŋaá Mesíi a lɔ́mɔ́ Yésusu.
Одоогоор Сонгогдсон:
Meŋiigíe 5: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
