Meŋiigíe 19
19
Póolo a á bolá naá Ɛ́fɛsɛ
1Naá gɛcamɛna gɛ́ɛgɛ Apolóso a mbaá lɔmɔ́ naá Kɔlɛ́ɛntɛ, Póolo go fadɛgɛna a báá fɛ́lɛ́dá gigísi gá bɛdɔŋɔ bá ɛgɔndɔ bá Esíi, go ɛ́da bola naá Ɛ́fɛsɛ. A báa lɛ gó gíde nɛnamá ná boolímínyí hɔ́ɔ, 2go bó úhune a amɔ́: «No lɛ́ bɛáalú Gimmúmpúu gá Giliíli aŋa gɔ́ɔgɔ no lɔ́mɔ́ ágáalú odɛ́má yɛ́nyɔ́ naá Daadáa o?» Boolímínyí bɔ́ɔbɔ go mo gundie bá amɔ́: «Dɛ lɛ́ akɛ́ kanɛ go ɔ́bɔ bá buŋe boóma aŋa bɔ́ɔbɔ nɔ́ɔnɔ.» 3Gɔ́ɔ Póolo a bó úhunemú a amɔ́: «No lɔ́mɔ́ bɛáalú mbɔ́dɔ ya giyuminye ɛhanɛ́ o?» Bá amɔ́: «Giyuminye gá Sáŋa.» 4Póolo go bó oyana a amɔ́: «Sáŋa a mba lɛ́ a yumeninye batɔ báaba bá mbaá lɔmɔ́ bá hɛmana go núgie gɛɔyɔ gábɔ́, a gunde o oyanɛna boɛ́nɔ bá Ɛ́sɛlahɛ́ɛlɛ a amɔ́ bá ága odɛ́má yábɔ́ naá mɔ́ɔnyɔ a mbaá lɛ ba go úle naá nnyimé, nɔ́ɔnɔ gó lɛ́ aá Yésusu#19.4 Go ɛ́na Mot 3.11; Mél 1.4,7-8..» 5Aŋa boolímínyí bá Ɛ́fɛsɛ bá mbɔɔ́ ɔ́bɔ́ dogálɔ dɔ́ɔdɔ, gáábɔ́ go béyuminye go ufíno yá Daadáa Yésusu. 6Póolo go bó dálana ɛmbɔ́gɔ, Gimmúmpúu gá Giliíli go bó siisene. Bá báá lɛ gó dúme go gálagala mbɔ́dɔ sá dogálɔ, bá dúmbenye cɔ́mɔ sá Asaŋa. 7Batɔ bɔ́ɔbɔ biimée bá mba lɛ́ aŋa bɔ́ɔ́dɔ́ na báandɛ́ náana.
8Ɛfɛ́ ɛdadɔ́ gidigidi, Póolo a mba lɛ́ ɛ ɛ́dana naá nnyaŋá ya mbósógólí ya Beyúdene, a gálagala hɔ́ɔ kanɛ bofoá. A mba lɛ́ o oya moóma mɔ́ɔmɔ mó mbaá lɔmɔ́ mó núune Bufuŋe bá Asaŋa, a fúmbe go ŋa goŋaá batɔ báaba bá mbaá lɛ bá mo bódólonyo bó oliminyo. 9Kanɛ́ aŋa batɔ bóncodío gɛca bá mbaá lɔmɔ́ bá lala odóɛ, bí inyene go oliminyo, bá fánɛnafanɛna pɛ́ ya Daadáa naá oŋgíso yá nɛbábánda. Go busío moánɛ gɔ́ɔ Póolo a bó úlukinyemú a báá gɔ́lɔ́ boolímínyí kóka. Go ɛ́da gáábɔ́ go húunenye miisí miimée naá nnyaŋá ya isekúle ya Tilénusu. 10Póolo a mba húúnényée nɔ́ɔnɔ nnyómá ɛ́handɛ́, gó báá ŋaáa goŋaá batɔ biimée báaba bá mbaá lɔmɔ́ bɔ́ ɔyɔ naá gigísi gá cí gá Esíi, Beyúdene na Bágɛlɛ́gɛ, bá bɔ́ɔ́ ɔ́bɔ́nɔ́ɔ nogálɔ ná Daadáa.
Bahaŋa bá Kɛ́fa
11Asaŋa a mba lɛ́ a fáanana Póolo bogaaga bá go ŋanana muune mbɔ́dɔ yɛ́ɛyɛ bó lɔ́mɔ́ bó do báŋanánáa bɛcamɛna biimée. 12Bó mba lɛ́ akɛ́ goana aŋa o báá ná béléfínyée bɔgɔnɔ́gɔnɔ boóma bɔ́ɔbɔ bó báá ná báláfɛ́ná nnyɔ́dɔ ya Póolo, gɛla ɛ́na gigísi gá gɛla; ɛgɔnɔ́ yabɔ́ ɛ dómba go mana, bɛgáda bá biliíli bɛ́ húme naá nnyɔ́dɔ sábɔ́. 13Beyúdene bóncodío bá mba lɛ́ bɛ́ ɛ́da bɛ́ ɛnɛnda, bá gúne bɛgáda bá biliíli naá nnyɔ́dɔ sá bɔgɔnɔ́gɔnɔ. Kɔ́ɔ batɔ bɔ́ɔbɔ bá magamɔ́ tɔ́nɔ go gúne bɛgáda bá biliíli na ufíno yá Daadáa Yésusu. Bá bɛ́ oyanɛna bá amɔ́: «Ŋgaá nyó oyáná go ufíno yá Yésusu mɔ́ɔnyɔ Póolo a gúmenyemú caá húmé nɔnɔ.» 14(Beyúdene báaba bá mbaá lɔmɔ́ bá yɔgɔnɔ buelí bá ndiemi bá mbaá lɔmɔ́ bahaŋa bátáanɔ na báandɛ́ bá Kɛ́fa, ogɔ́nɔ́ɔ ba bedúmbí bɛbáágá ummue ba Beyúdene.) 15Kanɛ́ gɛgáda gá giliíli go bó baga gɛ́ a amɔ́: «Ŋgíyimene Yésusu, kɔnɔ gunde ŋgíyimene ánɛ́ɛ a lɔ́mɔ́ Póolo, bɛɛnyɔ́ɔ kanɛ́ no lɔ́mɔ́ baánɛ́ɛ o?» 16Mɔtɔ mɔ́ɔnyɔ gɛgáda gá giliíli gɛ́ mbaá lɔmɔ́ nɛhɛ́ go dómba go bó bɔ́nɔ go osaŋɔ́, a báá bó mánɛ́gɛ́ná bɔ́ɔ biimée púmú: a ná lɛ́ go bó míneminie, gó bɛ́ɛ́ ɛ́dá húme aŋa bá mbaá pátɛ́gá na odɛ́dá naá mɔ́ nnyaŋá nnú gɔdɔɔ́, mpéŋé nnyɔ́dɔ iŋkimée. 17Batɔ biimée báaba bá mbaá lɔmɔ́ bá gɛ́ga naá Ɛ́fɛsɛ, Beyúdene na Bágɛlɛ́gɛ, go ɔ́bɔ boóma moánɛ, bá báá gɔ́lɔ́ bofoá. Batɔ go ɛ́da go gúmenye ufíno yá Daadáa Yésusu.
18Batɔ gɛca báaba bá mbɛɛ́ ɛ́yá boolímínyí go ɛ́da go úlene bó oya meŋiigíe mábɔ́ má gɛdɔ́ɔ. 19Gɛca gá báaba gɛ́ mbaá bííŋéné go gɛdɔ́ɔ gɛ́ búú úléné na bakálata bábɔ́ bá gɛdɔ́ɔ, bá báá sɛ́ dɔ́yɛ́gɔ́nɔ́ɔ naá busío bá mɔtɔ uŋkimée. Aŋa bá mbaá ŋaáa ombanɔ yá bakálata bɔ́ɔbɔ, bá báá lɛ gó ɛ́na goŋaá bá mba lɛ́ bá oŋona muinyí bɛkɔ́ŋɔ tɔ́sɛnɔ otíno áhandɛ́ na bɛ́ɔ́dɔ́. 20Nɔ́ɔnɔ gɔ́ɔ, go bogaaga bá Daadáa, nogálɔ ná Asaŋa nó mbaá lɔmɔ́ nó saanana, nó dúfenye bogaaga bá nɔ́ɔ, bó goma.
Ologodo naá Ɛ́fɛsɛ, godómba gá Póolo
21Naá nnyimé ya masɔ́mɔ mɔ́ɔmɔ miimée, Póolo go gedie goŋaá ɛ ɛ́da naá Yolósalɛmɛ, ɛ ɛndɛna ya Masɛdóanɛ na Ekeyíi. A mba lɛ́ o oya a amɔ́: «Kaá ŋá ndɛ́ hɔ́ɔ, ŋgɛ́da bola naá Olóma.» 22Kɔ́ɔ a dómamɔ́ boóhígínyí bɛ́hɛ́ báandɛ́ naá Masɛdóanɛ, bá mbaá lɔmɔ́: Timotée na Ɛláasɛ; mɔ́ɔ a báá gɔnɔ́ síene a dúmbie baaná bá medúgú naá gigísi gá cí gá Esíi.
23Naá gɛcamɛna moánɛ, ologodo a báa lɛ gó oba go masɔ́mɔ máama má núunemú pɛ́ ya Daadáa. 24Udúnedune ummue, ufíno yɛ́hɛ́ Demetíliusu, a mba lɛ́ a dúne na gɛkɔ́ŋɔ gá muinyí bieninye bá nnyaŋá ya asaŋa ba okɔ́dɔ mɔ́ɔnyɔ Etémisi, a ŋanana goŋaá boyogóní bá bóda gɛca. 25Kɔ́ɔ Demetúlusu a bándɛgɛnamɔ́ boyogóní bɔ́ɔbɔ, gɔnɔ́ na batɔ bóncodío báaba bá mbaá lɛ bá yɔgɔnɔ meelí aŋa mɔ́ɔmɔ, go bó oyana a amɔ́: «Begúle bámɛ, no íyimene no amɔ́ besé yɛcɔ́ yɛ úlenemú naá buelí bɔ́ɔbɔ. 26Kanɛ́ no ɛ́nana no gunde no ɔ́bɔnɔ boóma bɔ́ɔbɔ mɔtɔ mɔ́ɔnyɔ bá amɔ́ Póolo a ŋananamɔ́. O oya hoóma hiimée a amɔ́ baasaŋa báaba batɔ moatɛ́ bá bégedinye gedinyemú bá dɛ báá baasaŋa, a báá go mánɛgɛna gɛca gá batɔ na ŋgoyáamɔ́ moánɛ, caá akɛ́ goana naá Ɛ́fɛsɛ háalá, kanɛ́ a gaá gá lɛ́ go ladɛna gigísi gá cí gá Esíi giimée. 27Bó lɛ́ bá go ŋa goŋaá caá akɛ́ goana goŋaá bá fánɛna buelí bɛ́cɔ́, kanɛ́ tɔ́nɔ bó lɛ́ ba go yímie nigúmi ná nnyaŋá ya gɛantáanta gá asaŋa ba okɔ́dɔ mɔ́ɔnyɔ Etémisi; gɔnɔ́, mɔ́ɔnyɔ Esíi na cí iŋkimée bá búlugenyemú, a yímie ufíno yɛ́hɛ́.»
28Aŋa batɔ báaba bá mbaá lɔmɔ́ bá mo bódólonyo bá mbɔɔ́ ɔ́bɔ́ dogálɔ dɔ́ɔdɔ, gáábɔ́ go hóogo mpímí bá bɛ́ɛ́ ɛ́dá go ánca bá amɔ́: «A lɛ́ Gɛkɔ́nɔ́nɔ́ɔ, Etémisi ba Ɛ́fɛsɛ.» 29Gɛcooma gɛ́ɛgɔ go saa naá tɛ́sɔnɔ iŋkimée. Batɔ go gumbene batɔ báandɛ́ bá Masɛdóanɛ báaba bá mbaá lɛ bedílígíní bá Póolo: Géyusu na Alɛsɛtálakɛ, go úle bá díine go gitúu, go nco bádɛ́a naá nnyaáŋgadɛ́ ya nɛgósa. 30Kɔ́ɔ Póolo a ŋamɔ́ a amɔ́ ɛ ɛ́da bédúfie naá gitúu, kanɛ́ boolímínyí go mo lege. 31Bagɔ́nɔ́ɔ bóncoó bá Esíi, báaba bá mbaá lɛ begúle bá Póolo, bá báá mo dómɛ́ná cɔ́mɔ, bá báá mo bósógólídío goŋaá a dɛ ɛ́dá naá nnyaáŋgadɛ́ ya nɛgósa.
32Naá gɛcamɛna moánɛ, gitúu gá batɔ gɛ́ɛgɛ gɛ́ mbaá lɔmɔ́ bábándɛ́gɛ́náalú gɛ́ dɛ mbáa lɛ gɛ́ gɔnɔ go ɔ́bɔnɛnɔ. Bá mba lɛ́ bá ánca; báaba bá gálagala náana, báaba néení. Gɛca bá dɛ íyímé boóma bɔ́ɔbɔ bá mbaá lɔmɔ́ bábándɛ́gɛ́náalú go bɔ́. 33Batɔ naá gitúu go gɔ́lɔ Alɛgɛsándɛlɛ mɔ́ɔnyɔ Beyúdene bá mbaá dílímínyée naá busío, go mo oyanɛna bosɔ́mɔ buimée bɔ́ɔbɔ bó mbaá dómbánáa. Kɔ́ɔ a magamɔ́ go mémie gɛdɔŋɔ na ombɔ́gɔ go go bó gálagala. 34Kanɛ́ gitúu gɛ́ mbaá lɛncá goŋaá Alɛgɛsándɛlɛ mɔ́ɔnyɔ a lɛ́ moɔnɔ́ ba Beyúdene, gɔ́ɔ biimée bɛ́ ɛ́damɔ́ go ánca ukelú táŋɛ́ yúmmue bá amɔ́: «A lɛ́ Gɛkɔ́nɔ́nɔ́ɔ, Etémisi ba Ɛ́fɛsɛ.» Bá mba áncáa nɔ́ɔnɔ bá báá ŋaáa bigúlí bɛ́andɛ́. 35Naá go súgudinye, uŋgóŋí ummue naá tɛ́sɔnɔ go mémie giimbó na dogálɔ dɔ́ɔdɔ a amɔ́: «Bɛɛnyɔ́ɔ batɔ bá Ɛ́fɛsɛ báaba, ánɛ́ɛ naá cí a nananamɔ́ a amɔ́ tɛ́sɔnɔ ya Ɛ́fɛsɛ yɛ́ ɛ lɔ́mɔ́ umbeŋíbéŋí ba gɛkɔ́nɔ́nɔ́ɔ gá asaŋa ba okɔ́dɔ mɔ́ɔnyɔ Etémisi, gɔnɔ́ na hɛɔcɔ hɛ́hɛ́ hɛ́ɛhɛ hɛ́ mboó obá go mmoɛná o? 36Kanɛ mɔtɔ ba go sáŋona. Mámá nɔnɔ kanɛ́ pɔ́ɔ́, no do ŋaáa buegu. 37Batɔ báaba no báá nú úlé nabɔ́ báaba bá lɛ́ kanɛ go íbene bimmúmpúu bá moóma bɛ́ɛbɛ naá nnyaŋá ya Asaŋa bɛcɔ́ ba okɔ́dɔ, ɛ́na akɛ́ bá lɛ́ kanɛ go mo gálɛda go dobɛ́. 38Aáŋa Demetíliusu na boyogóní bɛ́hɛ́ bá bɛanana gɛsɛnɛ na mɔtɔ, medúgú má go gála bɛsɛnɛ má lɛ́ hɔ́ɔ, begélí tɔ́nɔ bá lɛ́ hɔ́ɔ; ŋgáa bɛ́ ɛ́da sɔ́mɛnɔ. 39Gɔnɔ́ aáŋa no bɛanana moóma móncodío má go gedie, mó ná bégedie naá nɛganda ná masɔ́mɔ moánɛ. 40Bá lɛ́ bá go lama bá có sɔ́mɔnɔ bá amɔ́ dɛ u ú ubíe ologodo mɔ́ɔnyɔ go nɛbábándɛgɛna nɛ́cɔ́ ná ínoni nɛ́ɛnɛ; goakɛ́ dɛ dɛ bósó go bɛanana boóma bɔ́ɔbɔ bó lɔ́mɔ́ ba go dúfie mbɔ́dɔ ya nɛbábándɛgɛna aŋa yɛ́ɛyɛ.» Naá nnyimé ya dogálɔ dɔ́ɔdɔ, gɛ́hɛ́ go oyana batɔ goŋaá ŋgáa bá gúlugene.
Одоогоор Сонгогдсон:
Meŋiigíe 19: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
