Meŋiigíe 11
11
Gooya gá bugélí bá Píele naá Yolósalɛmɛ
1Gɔ́ɔ baapótɛlɛ na basɔ́gɔ́ɔ báaba bá mbaá lɔmɔ́ naá Yudée bɔ́ ɔ́bɔmɔ́ goŋaá batɔ báaba bá lɔ́mɔ́ bá dɛ bɛ́ɛ́mbá Beyúdene bó olímínyóo tɔ́nɔ nogálɔ ná Asaŋa. 2Píele a á ncó gunde naá Yolósalɛmɛ, basɔ́gɔ́ɔ báaba bá mbaá lɔmɔ́ ancábáalú gáábɔ́ go mo bádóɛda na ŋgúhune bá amɔ́: 3«O báá nɛ́ ɛ́dá go íŋene naá batɔ báaba bá lɔ́mɔ́ kanɛ go ancaba o báá nyáányáa nabɔ́ goakɛ́ o?» 4Gɔ́ɔ Píele a bó oyanamɔ́ boóma bɔ́ɔbɔ bó mbaá dómbáná gondɛ́ŋɛ́ gondɛ́ŋɛ́ a amɔ́ gáábɔ́ a amɔ́:
5«Mmba lɛ́ naá tɛ́sɔnɔ ya Yopée mbósógolonyo, gámɛ go bɛa giínigie: gámɛ go ɛ́na boóma aŋa gɛantá gá sanda na mokásá naá edúu énni, bó ɛ́da go úlene naá mmoɛná, bó gɔsɔnɔ, bó ŋgúlenine. 6Aŋa mmbaá bédíbídínyée, gámɛ go ɛ́na nnyama sá bɛgɔ́ndɔ́ bínni: nnyama sá bɛsɔgɔ, na sɛ́ɛsɛ sá go bónóŋosonyo go cí na munoní. 7Gámɛ go ɔ́bɔ tɔ́nɔ ukelú yó ŋgoyanɛna yó amɔ́: “Píele, fadɛ́gɛ́na! Óná, o nyáa.” 8Gámɛ go gundie caá: “Akɛ́ɛ, Daadáa. Mammana, mbébíényée yamɛ boóma bá gɛlɔkɔ na bá biílo bó gá báasa bó do íŋéné naá yɔmɔ́ nyuudé.” 9Kanɛ́ ukelú go gɔnɔ fitie naá mmoɛná yó amɔ́: “Bɔ́ɔbɔ Asaŋa a báá ná manɛ́ go gedie, maamɔ́ɔ o do bó ɛ́ná go amɔ́ bó lɛ́ na biílo.” 10Bó mba báŋánánáa nɔ́ɔnɔ ɛŋɛndɔ ɛdadɔ́. Kanɛ́ gá bɔ́ go gunde buimée púmú naá mmoɛná. 11Naá gɛcamɛna moánɛ, batɔ bádadɔ́ báaba bá mbɛɛ́ ɛ́dá tómɛna naá Sɛsalɛ́ɛ go dómba go úle bá báá bolá, bá bíí íŋéné naá nnyaŋá yɛ́ɛyɛ dɛ mbaá lɔmɔ́ dɛ gɛ́ga hɔ́ɔ. 12Gimmúmpúu gá Giliíli go ŋgoyana a amɔ́ dɛ gundinye nabɔ́, cɛ ágá mpálɔ́. Boɔmɛ bátáanɔ na mmue báaba bá mba lɛ́ ɛ́dá tílígénéelú naá Sɛsalɛ́ɛ, dɛ bíí íŋéné naá nnyaŋá ya Kɔlɔnɛ́yɛ. 13Mɔ́ɔnyɔ gɛ́hɛ́ go có oyana aŋa a mbɛɛ́ ɛ́ná ɛ́ŋgɛlɛsɛ a búú úlé naá mɔ́ nnyaŋá go go mo oyana a amɔ́: “Dómá batɔ naá Yopée bɛ́ ɛ́da dɔ́ŋɛnɔ Símono mɔ́ɔnyɔ bá gɔnɔmɔ́ mo dɔ́ŋɔnɔ bá amɔ́ Píele; 14a nco go oyana dogálɔ dá goŋaá go ɛ́na gɛɔyɔ, maamɔ́ɔ na ncíbo yahɔ ya batɔ iŋkimée.” 15Aŋa mmbaá dúmé go bó gálagala, Gimmúmpúu gá Giliíli go bó siisene aŋa a mbaá lɔmɔ́ ŋaáalú nɛcɔ́ naá mabayɛga. 16Hɔ́ɔlɔ́ gámɛ go dómba go béeniŋinye nogálɔ ná Daadáa nɔ́ɔnɔ a mbaá gálɛ́dá a amɔ́: “Sáŋa a á yuménínyée na miimpo, kanɛ́ bɛɛnyɔ́ɔ, no ná béyumeninye na Gimmúmpúu gá Giliíli.” 17Kanɛ́ aŋa bó lɔ́mɔ́ goŋaá Asaŋa a lɛ́ bó ŋaáalú pááná mmue nɛcɔ́ báaba dɛ lɔ́mɔ́ ágáalú odɛ́má yɛ́cɔ́ naá Daadáa Yésu Kilítu, yɔmɔ́ɔ ŋgaá lɛ ba go bɛ́ɛmba ánɛ́ɛ goŋaá pánɛna Asaŋa o.» 18Aŋa bá mbɔɔ́ ɔ́bɔ́ nɔ́ɔnɔ, gáábɔ́ go fuuge ɛdɛ́má, bá bɛ́ɛ́ ɛ́dá go leebenye Asaŋa, bó oya bá amɔ́: «Gó lɛ́ mammana goŋaá Asaŋa a á fáá batɔ báaba bá lɔ́mɔ́ bá dɛ bɛ́ɛ́mbá Beyúdene pɛ́ ya goŋaá bó hɛma bobɛ́ bábɔ́, bá békikilidie ɛdɛ́má goŋaá bɛ́ ɛ́na gɛɔyɔ.»
Gobébíene gá nnyaŋá ya Asaŋa naá Óntiosi, ufíno yá bokɛlɛ́tɛnɛ
19Noséésényée nɔ́ɔnɔ nó mbuú úlé naá nnyimé ya goóna Ítiene nó mba séléméndíe batɔ, gáábɔ́ go dómbana: báaba naá Fenisíi, báaba naá Sípele, báaba naá Óntiosi; bá mba lɛ́ bɛ́ ɛ́da bó oyanɛna goana Beyúdene nogálɔ ná Asaŋa. 20Kanɛ́ akɛ́ nɔ́ɔnɔ gɔ́ɔ batɔ bóncodío bá Sípele na bá Siléene bá bolamɔ́ naá Óntiosi, gáábɔ́ go ɛ́da go oyanɛna Bágɛlɛ́gɛ Gɛnɔ́gɔ́ gá Cɔ́mɔ gá Yésusu. 21Bogaaga bá Daadáa bó mba lɛ́ nabɔ́, batɔ gɛca bá báá békikílídíe ɛdɛ́má, bá báá ágá odɛ́má yábɔ́ naá Daadáa. 22Gɔ́ɔ cɔ́mɔ yɛ́ɛyɔ yɛ ɛ́damɔ́ bola naá edúu yá boolímínyí báaba naá Yolósalɛmɛ. Gáábɔ́ go fediginye Banábasɛ bá báá mo dómá naá Óntiosi. 23Aŋa a mbɛɛ́ ɛ́dá bola a bɛ́ɛ ɛ́ná aŋa niibo ná Asaŋa nɛ́ mbaá lɛ hɔ́ɔ, gɛ́hɛ́ go ɛ́da go békelenye, a gíndenye boolímínyí goŋaá ɛdɛ́má yabɔ́ ɛ́ ba bɛ́ɛ́mbá ágáalú iŋkimée iŋkimée naá Daadáa. 24Banábasɛ a mba lɛ́ usi ba mɔtɔ, dácɛ na Gimmúmpúu gá Giliíli, a ágana odɛ́má yɛ́hɛ́ naá Daadáa; gɛcɛcá gá batɔ gɛ́ báá ágá odɛ́má yábɔ́ naá Daadáa. 25Banábasɛ go dómba kanɛ́ naá Tálasɛ go go ɛ́da fúmbe Sóole. 26Aŋa a mbaá mo ɛ́ná, a báa lɛ gó gunde nɛhɛ́ naá Óntiosi. Bá mba lɛ́ bɛ́ ɛnda aganda yá boolímínyí, bá húunenye gɛcɛcá gá batɔ masɔ́mɔ má gioliminyo; nnyómá iŋkimée iŋkimée ɛ báá bó dómbɛ́ná hɔ́ɔ. Hɔ́ɔlɔ́ naá Óntiosi moánɛ, gɔ́ɔ bá mbaá dɔ́ŋɛ́nɔ́ behúúní go oŋɛndɔ yá busío bá amɔ́ bakɛlɛ́tɛnɛ.
27Naá medúgú moánɛ mbúsí gá sɛ́ go bola naá Óntiosi sɛ́ ɛ́da go úlene naá Yolósalɛmɛ. 28Ummue naá olɔŋɔ yábɔ́, ufíno yɛ́hɛ́ Egébusu, go dúfie naá nciŋí yɛ́ɛyɛ Gimmúmpúu gá Giliíli a mbaá mo fáá goŋaá gɛantá gá uncíli gɛ́ ní íŋene naá gɛdɔŋɔ giimée. Gɔ́ɔ mammana, uncíli moánɛ yó mbaá lɛ boláalú naá gɛcamɛna gá bufuŋe bá Kolóode. 29Behúúní gáábɔ́ go ága ukelú yúmmue goŋaá bá gaá dómɛ́ná basɔ́gɔ́ɔ báaba naá Yudée gioyo, mɔtɔ uŋkimée aŋa bogaaga bɛ́hɛ́ bó mo fáananamɔ́. 30Gɔ́ɔ bá mbaá ŋaáa nɔ́ɔnɔ; bá báá bó dómɛ́ná gioyo moánɛ go bafɛanɔ́ɔ báaba Banábasɛ na Sóole.
Одоогоор Сонгогдсон:
Meŋiigíe 11: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
