Israelfɔ Ɩlʋ 35
35
Nana Bulu Ɔma A, Ɔhaa Má Ɩnʋ
Dawid ɩlʋ.
1Nana Bulu, ɔhagyiɔha ánɩ́ ɔdɛkʋsʋ lɩɩ mɩsʋ, kʋsʋ lɩɩ mʋsʋ.
Ɔhagyiɔha ánɩ́ ɔdɛ mɩ kɔ, kɔ mʋ!
2Kʋsʋ tsu fʋ akɔtɔ,
afʋtin amʋ́ ɔkpa!
3Tsu ɩkpan afʋfia aha amʋʋ bʋgya mɩ amʋ.
Bla mɩ ɔkla fɛɛ, “Mɩgyi fʋ nkpa Ɔhɔpʋ.”
4Sʋpa aha ánɩ́ bʋdekleá bɔ́mɔ mɩ,
pɛlɩ ɩkɩta aha ánɩ́ bʋdɛ mɩ lalahɛ dunka, abʋyinki ɔma.
5Bʋbwɛ fɛ ntɛtɛá afu dɛ mʋ́ tsʋn,
Nana Bulu-ɔbɔpʋ ogya amʋ́.
6Ɔkpatɔ iklun wa amʋ́.
Mʋ́sʋ ɩwa ɔplɩ, Nana Bulu-ɔbɔpʋ ɔsrɩ gya amʋ́.
7Tsufɛ kʋkʋ kpalɩ bakwi ɔbɔ tswɩ mɩ,
fɩnɩ ɔtsatsii#35:7 Ɔtsatsii igyi yibi ɩkʋ. wa mʋ́tɔ.
8Ɩkplan ɩtʋ amʋ́, abʋkpa wie amʋ́ onuto ɔbɔ kwihɛ amʋtɔ,
abʋda yibi amʋtɔ.
9Nana Bulu sʋ ansɩ bégyi mɩ.
Ɩwɩ bɛ́sankɩ mɩ, tsufɛ alahɔ mɩ nkpa.
10Nɛ́lɛ mɩ klʋntɔ blɩ mbɛɛ,
“Oo Nana Bulu, fʋ ɔma ɔhaa má ɩnʋ.
Fʋtɛlɛ ɔpɔnpʋ lɛ ɔwʋnlɩnpʋ ɩbɩ,
lɛ ɔpɔnpʋ pʋ́ ohiani lɛ amʋ́ asisipʋ ɩbɩ.”
11Adansɩfɔ afunupʋ bakʋsʋ.
Ɩtɔá mmeyin mʋ́ ɩwɩ bʋdɛ mɩ fɩtɛ.
12Bapʋ lalahɛ ka mɩ yile ɩkɔ,
baha nawa nwɛ.
13Tamɛ nɩ amʋ́ mʋ́ bʋdɛlɔ a, ntɛdɩda tatida,
klɩ ɔnɔ, ko nwuntɔ wa bɔ mpaɩ ha amʋ́.
14Ntɔbwɛ fɛ mɩ pio, ntɛ mɩ nyawie ndɛ mpaɩ bɔ ha.
Ntɔwa nwɛ fɛ ɔha ánɩ́ ɔdɛ mʋ yin su.
15Tamɛ brɛá nowie ɩkplantɔ a, ɩlɔwa amʋ́ fɛ́ɛ́ ɔdwɛ.
Bɛtsa bomli, bʋdɛ mɩ ɔblɔla bwɛ.
Aha ánɩ́ mmeyin amʋ́ dɛ mɩ ɔblɔla bwɛ,
bʋdɛ mɩ kpɔɩ kotoo.
16Aha aplɔɩpʋ bɔbwɛ mɩ ɔblɔla,
pɩɛɩ ayin suna mɩ.
17Oo anɩ Wie, mási tsia kɩ amʋ́.
Hɔ mɩ lɛ amʋ́ ɩbɩ,
afʋhɔ mɩ nkpa anfɩ ntamatsula mʋ́sʋ anfɩ lɛ agyata anfɩ ɩbɩ!
18Fówun nɛ́da fʋ ɩpan fʋ aha tsɔtsɔɔtsɔ ansɩtɔ,
kanfʋ fʋ aha tsɔtsɔɔtsɔ ansɩtɔ anɩ ɔpasuatɔ.
19Máha ansɩ igyi afunupʋá bʋdɛ mɩ lu kʋkʋ kpalɩ.
Máha mɩ alupʋ abʋkɩ mɩ atin brɛá ndesu.
20Tsufɛ bʋtamablɩ iwilwii asʋn.
Bʋtɛha aba ɔnɔ, ka asʋn dɩnka ɔsʋlʋ anfɩsʋ aha lwiihɛsʋ.
21Batɛɩ amʋ́ ɔnɔtɔ gblauun, bʋdɛblɩ bɛɛ,
“Ɛhɛɛn, anɩ onuto anɩlapʋ ansibi wun mʋ́!”
22Oo Nana Bulu, yɛ fʋdewun.
Mása ntsu wa ɔnɔ.
Mɩ Wie, máwa ɩfɔ mɩ wa.
23Mɩ Bulu pʋ́ mɩ Wie, kʋsʋ.
Kʋsʋ lɩɩ mɩ ɔma, mɛnɩ négyi asʋ.
24Nana Bulu, mɩ Bulu, ɔnɔkwalɩpʋ fʋgyi.
Gyi mɩ asʋn ha mɩ.
Fówun ansɩ méegyi mɩ anyaba.
25Máha amʋ́ abʋblɩ wa ɩklʋntɔ bɛɛ,
“Ɛhɛɛn. Ɩnɩ anɩdedunka nɩ. Anɩlatu mʋ asɩ.”
26Pɛlɩ ɩkɩta aha ánɩ́ mɩ ɩkplan bʋ amʋ́ ansigyi.
Ha amʋ abʋgyigya,
pɛlɩ mʋ́a nsʋpa ɩtʋ ɩwɩ atsupʋ anfɩ bʋdɛ ɩwɩ tsu suna mɩ anfɩ.
27Ansɩ igyi aha amʋʋ mɩ ɩsʋgyi bʋ amʋ́ ɔdwɛ amʋ.
Bʋkplʋn blɩ lablɩ bɛɛ, “Nana Bulu lomoni.
Mʋ osumbi yile tegyi mʋ ansɩ.”
28Nɛ́da fʋ yilebwɛ ɔkan,
kanfʋ fʋ ɔyɩkɛhɛtɔ fɛ́ɛ́.
Одоогоор Сонгогдсон:
Israelfɔ Ɩlʋ 35: nko
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation