Oyinyima 7
7
Ọhaara enyi ọbanyị ana kụ́ ẹhẹ
1Inowa mẹ̀ sị ẹpa ọnọọ mẹ, di Ẹnẹyịmavara kà a yị Inowa ka: ọnịrị avaba aza anị ẹ̀ na ngụ ịnị ẹpa ọnọọ. Ọ kà ini eyi anị, ẹnị ịnyara aa mẹ̀ ebira ana vọrọ ịnị avaba aza ene hi ẹhẹ aanị nị. 2Ọ kà ịnị avaba uye ana rụra mẹ̀ ịsọvọ, ọ sị wa ịhịmba-ịhịmba araka ọnịrị ọnẹẹ. Ini uye ẹnẹ ẹ̀ yị rụra mẹ̀ ịsọvọ, dị ọ kụ́ wa ẹvẹẹva araka ọnịrị ọnẹẹ. 3Dị ọ rẹ vavọọ kụ́ inomi nịnị ịhịmba-ịhịmba araka ọnịrị ọnẹẹ, dị asị irima ẹnịnị sú ta hụụnị ẹhẹ. 4Ọ kà ẹkụhị ịhịmba ọ̀ọ sị gụ, ọnị aa vaa mẹ ka orihi ọ̀ zụ̀ hi ịnị ẹhẹ ọọdụ ọnịrị ịrahụ pooro dị ọ̀ mẹ ẹkụhị ẹbẹẹva. Dị ọnị wụ̀ avaba ịsa ana nyị ụhwẹ ọnị ọnị mẹ tụ́ ịrẹsụ ẹtẹ. 5Ịzẹyịza di Inowa vavọọ mẹ avaba ịsa ẹnị Ẹnẹyịmavara mẹ ọda ka ọ̀ mẹ nị. 6Inowa ọ sị gụ ịrayị akata (600) dị ọhaara enyi vavọọ ve nyima. 7#Imt 24.38,39; Irk 17.27Di Inowa ọnịrị ose anị beri ezi anị ọnịrị ese ezi anị dudu ngụ ịnị ẹpa ọnọọ ka asị ọhaara enyi kụ́ ẹnị nị. 8Uye ana rụra mẹ̀ ịsọvọ ọnịrị ẹnẹ ẹ̀ yị rụra mẹ̀ ịsọvọ ẹvẹẹva ẹ vẹ ini ẹpa ọnọọ ve tù Inowa. Inomi nịnị ọnịrị avaba ịsị eē tura ini eteesu ẹvẹẹva e re ne tù ọ. 9Ẹvẹẹva ẹ va ngụ ịnị ẹpa ọnọọ nị, dị ẹ̀ vị ọnọrụ ọnịrị ọnẹẹ. Dị ẹnịrị Inowa na ngụ ẹpa anka Ohomorihi mẹ̀ yị mẹ ọda yị Inowa gẹdẹ-gẹdẹ nị.
10Ẹkụhị ịhịmba mẹ̀ sị gụ, dị ọhaara enyi chaka hi ẹhẹ nị. 11#2 Ipi 3.6Ịnị ịrayị oni Inowa gụ ịrayị akata ini ụhwẹ ọhụva ịrayị ọnọọ, ịnị ịhị ana tụ́ ọ ẹkụhị ẹwụrịhịmba ịnị ụhwẹ ọnọọ, ịhị ọnọọ gẹdẹ-gẹdẹ avaba ìrìkù enyi chaka hi ẹhẹ nị. Di avaba ozokete ihinẹba na, 12di orihi zụ̀ hi ẹtẹ mẹ ẹkụhị ẹbẹẹva pooro ọọdụ ọnịrị ịrahụ nị. 13Ịhị ọnọọ gẹdẹ-gẹdẹ di Inowa ọnịrị ose anị ne beri ezi anị Isemi, Ihami ọnịrị Ịjahwẹtị ne beri ese ẹnịnị ẹyịta ngụ ịnị ẹpa ọnọọ nị. 14Avaba uye ịnị avị irenyi-irenyi ọnịrị ịsụpa ịnị eehi irenyi-irenyi ẹnịrị Inowa nịnị ngụ ẹpa ọnọọ nị. Avọọ uye eneē tura ini eteesu irenyi-irenyi ọnịrị avaba inomi nịnị irenyi-irenyi ẹnị mẹ̀ rẹ ngụ ẹpa ọnọọ beri Inowa nịnị nị. 15Avaba ịsa ana nyị ụhwẹ ẹnị ẹvẹẹva ọnịrị Inowa ngụ ẹpa ọnọọ nị. 16Avaba ịsa ana ngụ ẹpa ọnọọ vị ọnọrụ ọnịrị ọnẹẹ. Óhomorihi mẹ̀ mẹ ọda ka ẹ̀ ngụ eehi ẹ ngụ eehi nị. Dị Ẹnẹyịmavara e gu oze hi Inowa nịnị tụ́ ịnị ẹpa ọnọọ nị. 17Di orihi ọnọọ vavọọ, zụ̀ pooro dị ọ mẹ ẹkụhị ẹbẹẹva nị. Di enyi ee chì ẹtẹ ẹngụ, dị ẹpa ọnị yà ịrẹsụ enyi di aa kà a hịrẹ nị. 18Ịjị enyi ee yii chi ẹtẹ ẹngụ hu avọọ, dị ẹpa ọnọọ kuku ee sì ịrẹsụ enyi nị.
19Ényi mẹ̀ ta chi ẹtẹ ẹngụ, dị ọ mụnẹ avaba ataba ẹbanyị-ẹbanyị ene hi ịnị ẹhẹ nị. 20Enyi ọ kụ́ ataba mụnẹ di aa yịị hịrẹẹ hu avọọ nị. Eni enyi si dà jịnẹ ataba nịnị vị ahụ ohurẹẹva rị ẹjịjị (22 ½). 21Avọọ avaba ịsa ana nyị ụhwẹ bemi ene hi ịnị ẹhẹ mẹ̀ sú và ha nị. Inomi nịnị, ịsụpa eehi, uye ịnị avị ọnịrị ịsị eē tura saka-saka ini eteesu beri aza vi ene sú. 22Avaba ịsị e hi ịrẹsụ ẹtẹ ana aa tụ́ ụhwẹ vi ene sú. 23Avọọ Óhomorihi mẹ̀ kụ́ avaba ịsị ẹ nyị ụhwẹ hụrẹ ịrẹsụ ẹtẹ nị. Ọza, uye, ịsị eē tura ọnịrị inomi nịnị ene hi ẹbẹẹba vị ọnị ọ kụ́ hụụnị ẹhẹ piti-piti. Inowa kẹnẹ ọnịrị aza ọnịrị uye ọnị ọ kụ́ hi ịnị ẹpa ọnọọ ọ vọ nị. 24Enyi ọnọọ ô chi ẹtẹ ẹngụ mẹ ẹkụhị ẹchịhịmba tụra ẹẹwụ (150) ịnị ẹhẹ.
Одоогоор Сонгогдсон:
Oyinyima 7: EBTP
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Ebira First Bible © Bible Society of Nigeria, 2014.
