San Juan 12
12
Si Jesus, ẃaray engiro‐jag ni emanseng‐ew wa dana shi sedi to
1Waray enem ma akew pay nin asan kesabi sota piyasta ni Hodiyos ja kowan sha ey Paskowa, jet dimaw si Jesus shi Bitania ja nanbaljan nen Lazaro ja istay etey nem inpanbiyag nen Jesus. 2Jet si Jesus, ekipengan shiman ni mama‐shem tep inpalti‐an sha. Si Marta, timolong nga nankamakam, jet si Lazaro, si‐katoy sakey ya ekilikob son Jesus. 3Jet nontan, si Maria, engala ni poron danen emanseng‐ew ja kowan sha ey naldo, jet to insho‐jag shi sedi nen Jesus asan toka ponasi ni bowek to shorog, jet sota baley ya kawad‐an sha, enapno ni seng‐ew nonta dana. Sajay ya insho‐jag nen Maria shi sedi nen Jesus, epalit jet ẃara emoy midjen kilo ja insho‐jag to.
4Jet si Judas Iskariote ja sakey so nonta ira too nen Jesus, ja mengibaag ali so nen Jesus so nonta ira makakontra son si‐kato, kowan to ey, 5“Kimawas iman na dana! Apay nga eg to et indako, say sota dako to, may‐ekan na tolong so nonta ira nankebiteg? Say banol nontan na kalasin dana, no maydeko, tedon dasos.” Kowan nen Judas Iskariote. 6Nem kekaskasin ẃaray kepengisekit nen Judas; nem enshi kari i toka pengisekit ni nankebiteg. Si‐katoy para egshi ni pilak nonta totoo nen Jesus, jet sota eshom ma pilak ja ẃara nodta ijanan, toka pankibota.
7Jet si Jesus, simongbat ja kowan to ey, “Baybay‐im si Maria, ta satan na danen intalo to, para so niya bakdang kon maybebka ali. 8Sota ira nankebiteg, ẃara ni olay son si‐kayo, isonga mebedin na todongan jo ira; nem si‐kak, eg mebedjag i pekikadẃak son si‐kayo.” Kowan nen Jesus.
9Jet nontan met laeng, shinemag ira nonta eshakel la Hodiyos ey ẃara si Jesus shi Bitania, isonga dimaw ired man. Aliẃen si Jesus bengat i piyan shen on‐an, no diket piyan sha pay ja asen ngo si Lazaro ja inpanbiyag nen Jesus. 10Isonga sota ira apo ni papashi, ẃaray pangkep sha pay ya bono‐en si Lazaro, 11ta eshakel iray Hodiyos ja emati son Jesus nonta inon‐an sha ja inpanbiyag to si Lazaro, jet eshakel malay eg memati so nonta ira papashi.
Edadsak i totoo nonta mimotok si Jesus shi Jerusalem
12Nonta maykadẃen akew, sota eshakel la toon dimaw nodta piyasta shi Jerusalem, shinemag sha ey ondaw alis Jesus nodtan na piyasta. 13Jet engala ira ni bolong nonta niyog, jet sha inaspol si Jesus ja ireka onkaneljaw ni iyaman sha son Apo Shiyos, ja kowan sha ey, “Salamat son Apo Shiyos! Bindisiyonan to koma iya toon inbetkag to di, ja ari tayon i‐Israel!”
14Si Jesus, ẃaray simbi ton kilaw ni kowan sha ey donkey, jet si‐katoy nankabajo‐an to. Sajay i kaytoshongan nonta padto ja naysolat nonta bayag da ja kowan to ey, 15“Si‐kayon i‐Jerusalem, karekayo ontakot, ta sota ari jo, ondaw da son si‐kayo ja mengi‐kan ni talna; isonga mankebayo shi kilaw ni donkey.”
16Sajay ya padto, eg nin ineẃatan nonta iratoo nen Jesus i olog to nonta pilmiro. Nem idi etey si Jesus et nanbiyag mowan asan ka‐oli mowan da shi dangit, ninemnem sha ma ey sajay ya padto ket si‐kato gayam i naytorongan nonta padto et etongpal.
17,18Sota ira eshakel la too ja engasas ni inpanbiyag son Jesus so nen Lazaro nodta diyang, si‐karay engikowan so ni eshom ma totoo; isonga eshakel aliy dimaw ja en nay‐aspol so nen Jesus. 19Isonga sota ira Parisiyo, kowan sha ni tabtabal sha ey, “Asas jo kari, enshi may pesing tayo, ta emin malen too ket imonod ira son si‐kato!”
Inkowan nen Jesus i maypangkep ni ketey to ali
20Angken sota ira aliẃen Hodiyos, ẃaray eshom ma dimaw shi Jerusalem ja en manshedjaw son Apo Shiyos nonta timpo ni piyasta ni Hodiyos ja Paskowa. 21Jet sajay iren totoo, dimaw ira so nen Felipe ja i‐Bitsaida ja sakop ni Galilia, jet kowan sha ey, “Apo, piyan min asen si Jesus.”
22Jet si Felipe, to inkowan so nen Andres, jet nan‐olop ira ja sha inkowan so nen Jesus ey, “Wara iray toon makapiyan ja mengesas son si‐kam.”
23Jet si Jesus, simongbat ja kowan to ey, “Sota timpon i‐olik shi dangit, simabi ma, ta si‐kak sota Anak ni Too. 24Kinapodpodno iya ikowan ko son si‐kayo. Say kay‐eshigan ko, sota ilik ni pagey. Sota ilik ni pagey, no mebaybay‐an ja eg may‐a‐sek shi bo‐day, eg ma onshakel. Nem no sotan na ilik ket maymoda shi bo‐day, onshakel ma. 25Sota toon toka kaẃani i biyag to, mepokaw et ngo mowan; nem sota toon eg to kaẃanan i biyag to shiya dobong pangkep son si‐kak, meẃad‐an ni biyag ja enshiy to engintegan. 26Sota toon makapiyan ja mansilbi son si‐kak, mesepol la si‐kak i onoren to. No toway kad‐an ko, si‐kato ngoy kawad‐an to, jet sota ira toon emati ja emansilbi son si‐kak, i‐aknan nen Amak ni shayaw sotan na too.”
27“Niman, simabi ja naka emankaikelkel‐eẃi, jet nganto emoy ishawat ko son Amak? Ikowan ko ngata son Amak ey idisi towak niya digat ja emansessesked son si‐kak? Nem enshi, ta sajay i kabol la dinaẃan ko did jay. Isonga enosan koy digat.” 28Jet si Jesus, nanshawat son Apo Shiyos ja kowan to ey, “Ama, si‐kam i mengipa‐sas met laeng ni kayshedjawan mo.”
Idi enaksheng iya shawat nen Jesus, ẃara aliy esel ja edapod dangit, ja kowan to ey, “Inpa‐sas koy kayshedjawan ko, pangkep nonta kaskasshaaw ja dingkam, nem pinshowa‐en kon ipa‐sas pay i kayshedjawan ko, pangkep nita dag‐en mo di.”
29Jet sota eshom ma totoon nay‐esop son Jesus, kowan sha ey kimirol, nem sota eshom, kowan sha ey, “Waray inkowan ni anghil son Jesus.”
30Nem si Jesus, say kowan to so nonta totoo, kowan to ey, “Sota esel ja intenengan jo nonta ekay da, aliẃen panmaptengan ko, nem eg panmaptengan jo, tep kabol nontan na esel ket memati kayo koma. 31Niman ma i panshoki ni keshosa ni tood ja dobong, tan niman i keshagshag nonta emengitoshay niya dobong ja si Satanas. 32No meksheng nga maykedjangak ja maydansa, si‐kak met laeng i mengeẃis ni toon ondaw ali son si‐kak ja memati.”
33Sajay i inkowan nen Jesus ta piyan ton say eẃatan koma ira nonta totoo i itsora ni ketey to. 34Nem sota ira totoo, simongbat ira ja kowan sha ey, “Say intenengan mi met ja kowan ira ni dinteg ket sota naypadton mengisedakan ja ibetkag ali nen Apo Shiyos ket eg kono metmetey ingkatod ingka. Ngantoy pesing nita kowan mo ey maykedjang ka ja maydansa? Kowan mi nem si‐kam sota naypadton Anak ni Too! No aliẃen si‐kam, sipa ngarod ngay i kaytoshongan nonta naypadton ibetkag ali nen Apo Shiyos?”
35Simongbat si Jesus, ja kowan to son si‐kara ey, “Sota may‐eshig ey silew ja ondawag ni nemnem jo, entikey ya timpoy kawasha to son si‐kayo. Isonga niman ta ẃara pay laeng son si‐kayo, iringan jon man‐ekad; ta no medebi‐an kayo, eg jo amtay toshongen jo. 36Isonga niman ta ẃara pay laeng son si‐kayo sota silew wa ondawag so ni nemnem jo, pamati kayo ma son si‐kato, say ẃaray kay‐ingesan jo son si‐kato.” Kowan nen Jesus.
Idi naksheng nga inkowan nen Jesus iyay, indekjas to ira, jet dimaw nodta dogad ja eg onoran so ira niyay ya totoo.
Angken nankemapteng i intoro nen Jesus, eg ngoreshan emati iray karakdan na Hodiyos
37Eshakel i kaskasshaaw wa dingka nen Jesus, nem eg patpati‐en ira nonta totoo. 38Sajay i kaytoshongan nonta naysolat ja kowan nen Isaias ja para padto nonta bayag da ey, “Apo, enshiy ememati nonta mika pan‐ikowan son si‐kara, jet enshi emo may engipa‐sasan nen Apo Shiyos ni panakabalin to.”
39-41Isonga eg mebedin na memati ira. Si Isaias, inon‐an toy kina‐Shiyos nen Cristo tep mismon inpa‐sas nen Apo Shiyos son si‐kato. Isonga ẃaray inpadto to ja kowan to ey, “Si Apo Shiyos, si‐kato met laeng i singa kimorab son si‐kara, tan inpatangken so ni nemnem sha, say eg asen ni matesha tan eg sha eẃatan, say eg ira di ondaw son si‐kak ja manpa‐ekas.”
42Nem eshakel met laeng iray toray ja emati son Jesus, nem sajay iren emati, eg sha ipa‐sas ey emati ira, ta entakot sha iray Parisiyo ey a‐kalen sha ira shima sa‐nopan ni Hodiyos, ja eg ma ira mebedin na mekisa‐sa‐nop. 43Eg sha ipa‐sas ey ireka memati tep say pipiyan sha, sota kosto‐an so ni too son si‐kara, ey aliẃa et ta sota kosto‐an so nen Apo Shiyos son si‐kara.
44Iyay iray epangdon inkowan nen Jesus pangkep niyay: kowan tod karakdan ni too ey, “Sota ira memati son si‐kak, aliẃen si‐kak bengat i pinatira, no diket emati ngo ira so nen Amak ja engibetkag ali son si‐kak. 45Tan sota ira engasas son si‐kak, amtara may itsora nen Amak ja engibetkag son si‐kak. 46Dimawak alid jay ya may‐eshig ey silew ni tood ja dobong, say medeẃagan i nemnem sha. Jet sota ira memati son si‐kak, may‐eshig ey enshi ma ira shi embolinget. 47Sota ira toon mengitneng ni ikowan ko, nem eg sha pati‐en, aliẃen si‐kak i mengigsheng ni keshosara, ta aliẃen sotan i dinaẃan ko did jay, ta say podnon dinaẃan ko did jay, nak koma isalakan ira ja tood ja dobong. 48Sota ira eg memati son si‐kak, ono eg mengeẃat nonta ikowan ko, meshosa ira ali, jet say kaybetayan ali ni keshosa‐an sha shi ka‐onoran na akew, sota intorok ja intenengan sha. 49Ta sotan na inkowan ko, aliẃen si‐kak i makanemnem, no diket sotan i inkowan nen Amak ja engibetkag alid jay son si‐kak. 50Jet amtak ey sota inkowan nen Amak ja itorok so ni totoo, sotan i mengi‐kan ni biyag ja enshiy to engintegan; isonga emin sotan na inkowan nen Amak son si‐kak, si‐kato ngoy naka itoro ni olay son si‐kara.”
Одоогоор Сонгогдсон:
San Juan 12: DMP
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 1978, Wycliffe Bible Translators, Inc. All rights reserved.