SAN JUAN 18
18
Jesús apmomap
(Mt 26.47-56; Mr 14.43-50; Lc 22.47-53)
1Aptekkek axta Jesús yetlo apkeltámeséyak yakwayam elmahagkok neyp wátsam aktog ekwesey axta Cedrón natámen apteme appeywa xa. Yetneyk axta anhan aksok kélcheneykekxexa m'a, cham'a apwánxa axta Jesús yetlo apkeltámeséyak. 2Apya'ásegkok axta anhan Judas ma'a, cham'a apmáheyo axta etlakkasesek yának emakpok Jesús, hakte hágkaxwe axta yanchásekxak Jesús apkeltámeséyak ma'a. 3Apwokmek axta Judas yetlo apkelxegexma'a sẽlpextétamo m'a, axta anhan nápakha m'a ektaha nak aptakmelcheso tegma appagkanamap, ektaha axta apkeláphaso m'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák fariseos. Yetlo apkelmeykha axta apkelwokmok ma'a, chálewaso axta anhan apkelmeykha, tén han ma'a yámet eyálewomol'a naw'a. 4Apya'ásegkok axta Jesús yakwánxa katnehek, apkelanyexagkek axta, aptahak axta apkelmaxneyeyncha'a s'e:
—¿Yaksak kélchetama?
5Aptahak axta apkelátegmowágko s'e:
—Jesús apkeñama nak Nazaret.
Aptahak axta apchátegmowágko Jesús se'e:
—Ko'o neykhe s'e.
Judas axta anhan apkelxegexma'a xa énxet'ák nak, cham'a ektaha axta apmáheyo etlakkasesek yának emakpok Jesús. 6Xama axta aptaha apkeláneya Jesús se'e: “Ko'o neykhe s'e”, apkelakxegágkakxek axta, keñe axta apkelyaknenágko náxop. 7Aptahak axta makham apkelmaxneyeyncha'a Jesús se'e:
—¿Yaksak kélchetama?
Aptahak axta makham apkelátegmowágko énxet'ák se'e:
—Jesús apkeñama nak Nazaret.
8Aptahak axta makham apchátegmowágko Jesús se'e:
—Eltennásek xeyk, ko'o neykhe m'a. Ko'o agkok elchetámak, kólho eltakhekxak se'e seltámeséyak nak.
9Cháxa ektahakxa axta xa, yakwayam enxoho katnehek ma'a aptémakxa axta appeywa Jesús se'e: “Táta, mexyenakmok xama enxoho m'a énxet'ák segkéso axta exchep.” 10Yetneyk axta sókwenakte apagkok Simón Pedro, aplekkek axta, apyakténchesek axta apeykok ekpayhókxa apkelya'asamakxa m'a apwesey axta Malco, aptaha axta apchásenneykha m'a apkemha apmonye nak appasmo apkelmaxnéseso Dios énxet'ák apagkok. 11Aptahak axta Jesús apcháneya Pedro s'e:
—Yakxegkásekxa axagkok sókwenakte apagkok. Egkések agkok ko'o Táta yakwayam añegkohok ekyetchesamaxkoho nak aksok égmenek negya ekmáskel'a,#Mt 26.39; Mr 14.36; Lc 22.42. ¿meynheya sat ko'o xa?
Jesús kélchenegkeseyam nápakto' Anás
(Mt 26.57-58; Mr 14.53-54; Lc 22.54)
12Apmeyk axta sẽlpextétamo apnaktetchesa apmék Jesús, axta anhan ma'a sẽlpextétamo aptaha nak apkemha apmonye, axta anhan ma'a judíos ektaha nak aptakmelcheso tegma appagkanamap. 13Anás apxagkok axta sekxo' kélyentamákxak, hakte Caifás axta apepyáta m'a Anás, cham'a Caifás aptaha axta apkemha apmonye appasmo apkelmaxnéseso Dios énxet'ák apagkok ma'a yeyam axta. 14Cháxa Caifás aptéma nak apkelanagkama énxet'ák judíos ektakmela yetsapok xama énxet ekyanmaga m'a apyókxoho énxet'ák nak.#Jn 11.49-50.
Pedro mexeyenma aptaha apyekpelchémo Jesús
(Mt 26.69-70; Mr 14.66-68; Lc 22.55-57)
15Apyetlókek axta Simón Pedro Jesús, axta nahan ma'a pók apkeltámeséyak axta Jesús. Nano' axta apweteykxa apkemha apmonye apkelmaxnéseso Dios énxet'ák apagkok ma'a pók Jesús apkeltámeséyak axta, ékeso eñamakxa aptaxnegwokmoho axta xamo' Jesús ma'a kañe' tegma; 16keñe axta Pedro apkenmeyncha'a yókxexma nekha átog. Ekeso eñamakxa aptepa axta m'a pók Jesús apkeltámeséyak ektaha axta nano' apweteykxa m'a ektaha nak apkemha apmonye appasmo apkelmaxnéseso Dios énxet'ák apagkok, appakhetchesek axta m'a ektaha axta ektakmelcheso átog, keñe axta anhan aptaxnésa Pedro m'a kañe'. 17Entahak axta elmaxneyeyncha'a Pedro kelán'a ektaha axta ektakmelcheso átog se'e:
—¿Háweya exchep apkeltámeséyak ma'a énxet nak?
Aptahak axta apchátegmowágko Pedro s'e:
—Ma', háwe ko'o.
18Samágek axta m'a, apkelwatneyk axta táxa énxet'ák ektaha axta kélásenneykha, axta anhan ma'a énxet'ák ektaha axta aptakmelcheso tegma appagkanamap. Apháha axta apkelaxtégko táxa m'a. Pedro axta anhan apkelxegexma'a xa, apkextawo' axta xamo' táxa xa énxet'ák nak.
Apkemha apmonye appasmo apkelmaxnéseso Dios énxet'ák apagkok apkelmaxneyeykekxoho makham Jesús
(Mt 26.59-66; Mr 14.55-64; Lc 22.66-71)
19Apkelmaxneyáha axta apkemha apmonye appasmo apkelmaxnéseso Dios énxet'ák apagkok Jesús apkeltamho ey'asagkohok ma'a apkeltámeséyak, tén han ma'a ektémakxa nak apkelxekmóso. 20Aptahak axta apchátegmowágko Jesús se'e:
—Eltenneykha axta cha'a ko'o nápakta'awo' énxet'ák; Alxekmóshok axta anhan cha'a énxet'ák ma'a kañe' apchakneykekxexa nak énxet'ák judíos, tén han ma'a kañe' tegma appagkanamap, cham'a apchakneykekxexa nak cha'a apkelánamákpoho judíos; meyxamaxkohok cha'a ko'o sektémakxa nak cha'a sekpeywa. 21¿Yaksak ektaha selmaxneyeyncha'a nak ko'o? Elmaxneyha m'a ektaha axta apkellegé sekpeywa ko'o, eltennaksek sat énxet'ák sektémakxa axta cha'a ko'o selanagkama. Apkelya'ásegkok énxet'ák sektémakxa axta cha'a sekpeywa ko'o.
22Xama axta aptaha appeywa Jesús xa, xama aptakmelcheso tegma appagkanamap axta aptekpagkásak nápát, aptahak axta apcháneya s'e:
—¿Keya aptahak apchátegmoweyak xép énxet ektaha nak apkemha apmonye appasmo apkelmaxnéseso Dios énxet'ák apagkok xa ektaha nak?
23Aptahak axta apchátegmowágko Jesús se'e:
—Sagkek agkok sektahakxa sekpeywa, héltennés ma'a eyesagkexa enxoho sektahakxa sekpeywa; tásek agkok nahan sektahakxa sekpeywa ¿yaksak ektaha setekpaga nak?
24Keñe axta Anás apcháphasa Jesús yetlo kélnakteté apmék ma'a aphakxa axta Caifás, aptaha axta apkemha apmonye appasmo apkelmaxnéseso Dios énxet'ák apagkok.
Pedro mexeyenma makham apwesey Jesús
(Mt 26.71-75; Mr 14.69-72; Lc 22.58-62)
25Apheyk axta makham Pedro nekha táxa m'a, entahak axta makham amya'a apcháneyákpo Pedro s'e:
—¿Háweya exchep apkeltámeséyak ma'a énxet nak? Axta exénak makham Pedro, aptahak axta s'e:
—Ma', háwe ko'o.
26Keñe axta apkelmaxneyeyncha'a makham xama apkemha apmonye appasmo apkelmaxnéseso Dios énxet'ák apagkok apkeláneykha, ektaha axta apnámokkok ma'a apyaktenchesa axta apeykok Pedro:
—¿Ya axta ót'ak xép nelwokmo axta negko'o m'a kélcheneykekxexa nak aksok?
27Axta eyke exénak makham Pedro, keñe axta ekpáwá tat'a kennawók.
Jesús kélyentama nápakto' Pilato
(Mt 27.1-2,11-14; Mr 15.1-5; Lc 23.1-5)
28Kéltekkesek axta Jesús Caifás apxagkok kélyentamákxo m'a wese' romano apchásenneykha apxagkok. Peyk axta kalseyk ma'a, axta elántaxnak judíos kañe' wese' apxagkok, apkelátaxneyk axta agkok ma'a, mopwanchek axta etáswók ma'a nento ektámáxche nak ekhem melwagkayam axta énxet'ák judíos kéltéma nak Pascua, hakte melyahakxók axta m'a ektémakxa nak segánamakxa negaxñáseykekxa nentémakxa. 29Ekeso eñamakxa aptepa axta Pilato yakwayam elpakhetchesek xa énxet'ák nak. Aptahak axta apkeláneya s'e:
—¿Yaksak aksok kélxéna kéxegke ektaha eksexnenagko xa énxet nak?
30—Háwe axta agkok ekmaso aptémakxa, magyentementék axta negko'o aphakxa exchep, —axta aptahak apkelátegmowágko xa énxet'ák nak.
31Aptahak axta Pilato apkeláneya énxet'ák se'e:
—Kólyentemekxa kéxegke, kólyekpelkoho kélagko' ekhawo m'a ektémakxa nak segánamakxa kélagkok kéxegke.
Aptahak axta apkelátegmowágko énxet'ák judíos se'e:
—Akke kapayhawok negko'o agának emátog xama énxet nenteme nak judíos.
32Cháxa ektahakxa axta ektaha m'a aptémakxa axta appeywa Jesús apxeyenma yakwánxa katnehek apketsapma.#Jn 3.14; 12.32. 33Aptaxneykxeyk axta makham Pilato kañe' apxagkok, apwóneyha axta Jesús, keñe axta aptaha apkelmaxneyeyncha'a s'e:
—¿Xépya judíos Wese' apwányam apagkok?
34Aptahak axta apchátegmowágko Jesús se'e:
—¿Selmaxneyeykha apagkoya xa aptahakxa nak seyáneya? ¿Kéltennaso enxeykel'a sekxénamaxko ko'o?
35Aptahak axta apchátegmowágko Pilato s'e:
—¿Judío enxeykel'a ko'o? Apkelenyémeyo xamo' xeyk apyentameykenta exchep sekhakxa ko'o, tén han ma'a apkelámha apmonye'e nak appasmo apkelmaxnéseso Dios énxet'ák apagkok. ¿Yaksak axta aksok apkeláneya?
36Aptahak axta apchátegmowágko Jesús se'e:
—Háwe ko'o wese' apwányam keso náxop. Ektemék axta agkok ko'o wese' apwányam keso náxop, yetneyk axta katnehek seláneykha yakwayam ennapakpok yakwayam enxoho ko'o mehelmések ma'a énxet'ák judíos. Háwe eyke ko'o wese' apwányam keso náxop.
37Aptahak axta apkelmaxneyeyncha'a Pilato s'e:
—¿Wese' apwányam neyke exchep?
Aptahak axta apchátegmowágko Jesús se'e:
—Cháxa aptahakxa nak appeywa: ko'o sekteme Wese' apwányam. Ekteyekmek axta ko'o, ekwayak axta anhan keso náxop, yakwayam axének ma'a amya'a ektaha nak ekmámnaksoho agko'. Yeyxhok cha'a sekpeywa ko'o m'a apyókxoho énxet'ák ektaha nak apkelyaheykekxoho amya'a ekmámnaksoho.
38—¿Yaksa m'a amya'a ekmámnaksoho nak? —axta aptahak apchátegmowágko Pilato.
Jesús apxénamap yakwayam emátog
(Mt 27.15-31; Mr 15.6-20; Lc 23.13-25)
Aptekkek axta makham Pilato apkelpakhetchesákxo judíos natámen axta apteme apkelmaxneyeykha xa. Aptahak axta apkeláneya s'e:
—Mót'ak ko'o aksok ekmaso apkelané s'e énxet nak. 39Yetneyk eyke kéltémakxal'a cha'a kéxegke, kólának cha'a eynyekxak énxet apmomap ma'a elánéxko enxoho ekhem melwagkayam nak judíos: ¿kéltamhoya ayenyekxak judíos Wese' apwányam apagkok?
40Apsawhekpók axta makham aptaha apkelyennaktésawo apkelpeywa s'e:
—¡Ná ényekxa' xa! ¡Enyekxa' Barrabás!
Ekmaso aptémakxa axta Barrabás.
Одоогоор Сонгогдсон:
SAN JUAN 18: LEGN
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Lengua Sur (Enxet) New Testament © United Bible Societies, 1992.