Mose I, 3
3
Nɔmlɔ gbo tue
1 #
Kpoj 12.9; 20.2 Nga mi lohwehi tsuo nɛ Yawɛ Mawu pee ɔ, sinɔ ji gatsɛ pe mɛ tsuo. Sinɔ bi yo ɔ ke, “Anɛ Mawu de nyɛ niinɛ ke tso ɔmɛ nɛ ngɛ ngmɔ ɔ mi ɔ, nyɛ ko ye ekoeko nɔ yiblii lo?”
2Yo ɔ he nɔ ke, “Wa ma nyɛ maa ye tso yiblii tsuaa tso yiblii, 3ja tso ɔ nɛ ngɛ ngmɔ ɔ kpɛti tutuutu ɔ pɛ. Mawu ke wa ko ye jamɛ a tso ɔ yiblii, nɛ wa ko ta he hulɔ; ke wa pee ja a, wa ma gbo.”
4Sinɔ ɔ de lɛ ke, “Oo, nyɛ be gboe! 5Mawu de ja, ejakaa e le kaa ke nyɛ ye jamɛ a tso ɔ yiblii ɔ, nyɛ hɛngmɛ ma bli, nɛ nyɛ maa hi kaa lɛ Mawu ɔ nitsɛ; nyɛ maa le kpakpa kɛ yayami.”
6Yo ɔ na kaa tso ɔ ngɛ fɛu; e na kaa tso ɔ yiblii ɔ maa ngɔ, nɛ e ma ha nɛ nɔ maa le ní. Lɔ ɔ he ɔ, e tsɔ eko nɛ e ye, nɛ e ha e huno ɔ hu eko nɛ e ye. 7Benɛ a ye tso yiblii ɔ pɛ nɛ mɛ ni enyɔ ɔmɛ tsuo a na anɔkuale ɔ; a na kaa a hɛɛ a he gu, nɛ a kpɛ ba kɛ pee bo nɛ a kɛ ha a mlɛ mi.
8Jamɛ a gbɔkuɛ ɔ, benɛ kɔɔhiɔ yluduu ko ngɛ fiae ɔ, nyumu ɔ kɛ e yo ɔ nu Yawɛ Mawu he nɛ e ngɛ nyɛɛe ngɛ ngmɔ ɔ mi, nɛ a ya laa a he ngɛ tso ɔmɛ a kpɛti. 9Yawɛ Mawu tsɛ nyumu ɔ nɛ e bi lɛ ke, “Jije o ngɛ?”
10E he nɔ ke, “I nu o he ngɛ ngmɔ ɔ mi; ye tsui po, nɛ i ya laa ye he, ejakaa i hɛɛ ye he gu.”
11Mawu bi lɛ ke, “Mɛnɔ lɛ de mo ke o hɛɛ o he gu ɔ? Tso yiblii ɔ nɛ i de nyɛ ke nyɛ ko ye ɔ, tse o ya ye eko?”
12Nyumu ɔ he nɔ ke, “Yo ɔ nɛ o ngɔ ba piɛ ye he ɔ, lɛ nɛ ha mi tso ɔ yiblii ɔ eko nɛ i ye.”
13 #
Kor II, 11.3; Tim I, 2.14 Yawɛ Mawu bi yo ɔ ke, “Mɛni ha nɛ o pee nɔ́ nɛ ɔ?”
Yo ɔ he nɔ ke, “Sinɔ ɔ lɛ mlɔɔ mi; enɛ ɔ he je nɛ i ye ɔ nɛ.”
Mawu gbla a tue
14Yawɛ Mawu de sinɔ ɔ ke, “Nɔ́ nɛ o pee nɛ ɔ he je ɔ, a gbiɛ mo pe je mi lohwe ɔmɛ tsuo. Kɛ je mwɔnɛ ɔ kɛ yaa a, o maa sã si ngɛ o muklii mi nɔ; nɛ o maa ye zu o wami ligbi ɔmɛ tsuo. 15#Kpoj 12.17 Ma pee o kɛ yo ɔ he nyɛli; o nina kɛ lɛ hu e nina maa pee he nyɛli. A maa fia o yi nɔ́, nɛ mo hu o maa kɔ a nane se ja.”
16Jehanɛ, e de yo ɔ ke, “Ma ha nɛ o maa na nɔ́ ngɛ o hɔ ngɔmi kɛ o bi fɔmi mi. Se kɛ̃ ɔ, o maa suɔ o huno ɔ, nɛ lɛ nɛ e maa ye o nɔ.”
17-19 #
Heb 6.8
Nyumu ɔ lɛɛ Yawɛ Mawu de lɛ ke, “O ya bu o yo ɔ tue nɛ o ye tso ɔ yiblii ɔ nɛ i de nyɛ ke nyɛ ko ye ɔ. Nɔ́ nɛ o pee nɛ ɔ he je ɔ, i gbiɛ zugba zu ɔ; nga kɛ mio maa puɛ ngɛ nɔ, nɛ nga nɔ tsohi ji nɔ́ nɛ o maa ye. O ma tsu ní kpakpataa nɛ o maa nyla o hɛ mi latsa loko zugba a maa ba ní bɔ nɛ sa ha mo nɛ o ye. O maa pee enɛ ɔ daa kɛ yaa si a maa pu mo ngɛ zu ɔ nɛ i tĩ kɛ puɛ mo ɔ mi. Zu ji mo, nɛ o maa kpale kɛ ya zu mi ekohu.”
20Adam#3.20 Adam: Ngɛ Hebri gbi mi ɔ, biɛ nɛ ɔ sisi ji “nɔmlɔ.” wo e yo ɔ biɛ ke Hawa, nɛ e de ke, “I wo mo kikɛmɛ a biɛ nɛ ɔ, ejakaa nimli adesahi tsuo a nyɛ ji mo.” 21Nɛ Yawɛ Mawu ngɔ lohwehi a he womi kɛ kpɛ tade ngɔ wo Adam kɛ e yo ɔ.
A fie Adam kɛ Hawa kɛ je ngmɔ ɔ mi
22 #
Kpoj 22.14
Enɛ ɔ se ɔ, Yawɛ Mawu de ke, “Jehanɛ lɛɛ nyumu ɔ ngɛ kaa wa ti nɔ kake pɛ, nɛ e le kpakpa kɛ yayami. Ma hyɛ nɛ e ko ya tsɔ tso ɔ nɛ haa nɔ wami ɔ e yiblii nɛ e ye, nɛ e ba hi je mi kɛ ya neneene.” 23Lɔ ɔ he ɔ, Yawɛ Mawu je Adam we; e fie lɛ kɛ je Eden ngmɔ ɔ mi, konɛ e ya hu zugba zu ɔ nɛ a kɛ puɛ lɛ ɔ. 24E fie nyumu ɔ kɛ je lejɛ ɔ, nɛ e ngɔ kerubhi kɛ klaate ya to Eden ngmɔ ɔ beleku je, konɛ a bu blɔ ɔ nɛ a guu nɔ kɛ yaa tso nɛ haa nɔ wami ɔ he. Klaate ɔ ngɛ tsoe plamplam kaa la, nɛ e ngɛ e he poe.
Одоогоор Сонгогдсон:
Mose I, 3: Dangme
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Bible in Dangme © Bible Society of Ghana, 2018.
