Хьунухь 7

Яд акьалтун

1Реббиди Нуьгьаз лагьана: «Гимидиз акьах ва жувахъ галаз хизанни къачу. Заз аквазва хьи, исятда чан алайбурун арада Зи вилик михьиди са вун я. 2Жувахъ галаз михьи гьайванрин ирид жуьт, эркекбурни дишибур, ва са жуьтни, диши ва эркек, михьи тушир вири гьайванрикай 3ва ирид жуьт, эркек ва диши, цавун ничхиррин вири жуьрейрикай къачу. Чилел абурун тум амукьрай.

4Ирид йикъалай за чилел марф къурда – ам яхцӀур юкъузни яхцӀур йифиз къвада – ва За чилин винелай За халкь авур вири затӀар тергда». 5Нуьгьа вичиз Реббиди лагьайвал вири кьилиз акъудна.

6Нуьгьан яш ругуд виш йис тир чӀавуз яд акьалтун гатӀунна. 7Нуьгь вичин рухвайрихъ, папахъ ва рухвайрин сусарихъ галаз юргъадикай гимида чуьнуьх хьана, 8гьайванрин вири жуьрейрикай, михьибурукай ва чиркинбурукай, ничхиррикай ва хур галчӀурдай вири гьайванрикай, 9дишини эркек, адан гимида атана акьахна – адаз Аллагьди эмир гайивал.

10Ирид югъ алатна, ва дуьньядал яд акьалтун гатӀунна. 11Нуьгьан уьмуьрдин ругуд виш лагьай йисуз, йисан кьвед лагьай вацра, вацран цӀерид лагьай юкъуз ахъа хьана чӀехи деринрин сивер, кьве патахъди ахъа хьана цаварин кӀан хкатна – 12къвана чилел марф яхцӀур юкъузни яхцӀур йифиз.

13И юкъуз Нуьгь вичин рухвайрихъ – Шамахъ, Хамахъ ва Яфетахъ – папахъ ва рухвайрин папарихъ галаз гимида акьахна, 14ва абурухъ галаз, жинс жинсинин гуьгъуьналлаз, вири вагьши гьайванар, малар ва чилел алай юзазвай вири чан алай шейэр, гьакӀни вири ничхирар – цӀакулар алайбур ва лув гудайбур. 15-16Вири абур, нин бедендик уьмуьрдин нефес кватӀа, гьардакай са жуьт, гьар жинсиникай эркекди ва дишиди – Аллагьди Нуьгьаз эмир авурвал – атана ам авай гимида акьахна.

Реббиди Нуьгьан гуьгъуьнлай гимидин рак агална.

17ЯхцӀур юкъуз дуьньядал яд акьалтун давам хьана. Цин кьадар артух хьайила, ада гими хкажна, ва гими целай фена. 18Яд датӀана артух жезвай ва ци чил кӀевзавай. Гими целай физвай, 19яд мадни виниз хкаж жезвай, цавун кӀаник квай виридалайни кьакьан дагълар кӀевдалди. 20Яд абурун винел цӀувад кьуьнтуьн хкаж хьана, ва дагълар цин кӀаник акатна.

21Идакди чилин винел уьмуьр тухузвай вири шейэр терг хьана: гьам ничхирар, гьам малар, гьам вагьшияр, гьам чилел булдалди алай чан алай гьар са затӀ, гьамни вири инсанар. 22Къураматдал алай нефес чӀугвазвай кьван шейэр – вири терг хьана. 23Чилин винел алаз хьайи вири шейэр – гьам инсанар, гьам гьайванар, гьам чан алай вири маса затӀар, гьам цавун къушар – вири чилин винелай терг хьана. Сагъ-саламатдиз амукьайбур анжах Нуьгьни адахъ галаз санал гимида авайбур хьана.

24Яд акьалтун вишни яхцӀурни цӀуд юкъуз давам хьана.

Одоогоор Сонгогдсон:

Хьунухь 7: ЛезПК

Тодруулга

Хуваалцах

Хувилах

Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү

Пак Калам-ийн талаар илүү ихийг мэдэж авах