Baroma KHUKHWAANTSULA
KHUKHWAANTSULA
Paulo aarona ibaluwa yino nga nikwo kumukhoosi kwe khuŋoonaŋoona khukyeniya khweewe isi babafukiilila mu Kristo, abe babaali i Roma. Inengekharengekha yeewe abe yaba ndi anyoowe khuraambakho buraambi mu bafukiilisi abo, nio ndi lwanyuma nga baamuweele buyeeti, abe atsye mu Sipeyini. Paulo arona khusontsoola isaambo isi niye abe nga n'amanya khufukiilila mu Kristo nga ni khuli, ni sheesi khumanyisa nga ni khuli khubonekhela mu bulamu bwe babafukiilila mu Kristo. Ibaluwa yino ilimo buurume bwa Paulo bwoosi mu bwitsufu.
Mu baluwa yino Paulo anyoowa ni khuusheesa bafukiilisi babaali i Roma, ni khuubaboolela ari mu khuloomba khweewe aabaloombatsakilakho. Lwanyuma lw'ebyo, Paulo arumbula kumurwe kwe baluwa yeewe, nga nikwo kukuuloma kuri, “Khuubirira mu Makhuwa Kamalayi kano, bukwalaafu bubwaama isi Wele bwokesanisibwila mu khufukiilila khwonyene.” (1.17)
Aryo Paulo waatsya nga ebaluusa khu murwe kw'elomo kuno, nga aloma ari, babaandu boosi, oba Bayudaaya namwe Banaambo, shaakhiile baweentse bukhosefu, khulwekhuuba boosi baakhola bibyoonako. Babaandu banyoola bukhosefu buno mu Wele khuubirira mu Yesu Kristo.
Shishiilakho, Paulo asontsoola isaambo isi bulamu bushaakha buno bwe khukholakana ni Wele, buli ni khubamo nga umuundu wekyelile ufukiilila mu Kristo. Umufukiilisi uyo aaba afuukilisana ni Wele, naluundi iba ndi Umwoyo uwa Wele waamukangulula khurura mu maani ke bibyoonako ni khuufwa.
Khukhwaama khu suula iye kharaano (5) khukhwoolisila ilala khu ye shinaane (8), asontsoola shitsilililwa she Kamakaambila ka Wele ni saambo isi kamaani k'Omwoyo uwa Wele kabonekhela mu bulamu bw'omufukiilisi.
Shishiilakho, Paulo wakhakakho naabi khubalaayisa khu biindu bibiwaamba khu saambo isi Bayudaaya ni Banaambo boosi atweela, nga ni bali mu nengekharengekha iya Wele.
Khukhwakamisayo aloma ari, shishiindu she Bayudaaya khulekha khufukiilila mu Kristo ta, yaba nga inengekharengekha iya Wele abe yeesi akhola, nga akana areere babaandu boosi isi bubweela bweewe, khuubirira mu Yesu Kristo. Naluundi Paulo ashihandalasa ari imbuka ilyoola Bayudaaya bafukiilile mu Yesu.
Shishakamisayo, Paulo arona khu bibiwaamba khu bulamu bw'oyo ufukiilila mu Kristo nga ni bwandyakhiile khuuba, ni khufuurisila ilala isaambo yeesi khwakhiile khukanamo babaandu basheefwe. Arona khu biindu bibiwaamba khu saambo iye khuuba umwakaanisi umulayi uwa Wele, ni byeesi bafukiilisi bali ni khukholela babaali bawuli ni isi babaandu bashaawe, ni bibiwaamba khu byeesi kumwoyo kukhuboolela.
Paulo akamisayo burone buno, nga asheesa naluundi ni bilomo bye khuruuya Wele.
Inoondekhana iye bibiilimo
Khukhwaantsula ni kumurwe kwe lomo (1.1-17)
Shishiikila buuwonesi bwaakanibwa (1.18—3.20)
Isaambo isi Wele awonesamo babaandu (3.21—4.25)
Buulamu bushaakha by'oyo ufukiilila mu Kristo (5.1—8.39)
Ba Isiraeli bali mu nengekharengekha iya Wele (9.1—11.36)
Khukhwibirisa khw'oyo ufukiilila mu Kristo (12.1—15.13)
Khuusheesa ni khukhwaakamisayo (15.14—16.27)
Одоогоор Сонгогдсон:
Baroma KHUKHWAANTSULA: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.