Baroma 2
2
Khuukhalawo khwa Wele
1 #
Mat 7.1; Luka 6.37 Ne iwe n'ukhalila uwashoowo kumusaango, iwe s'uli n'ilomo yoosi iye khuuwotsa ta? Khulwekhuuba n'ukhalila uwashoowo kumusaango, nawe uba wekhaliile wamweene. Shishikila shili ndi iwe ukhala kumusaango nawe wamweene ukhola bibiindu byeene ibyo. 2Ne khwaamanya khuri khuukhalawo khwa Wele khuba khwa ŋali, n'aba waakhaliile babaandu babaakhola baryo kumusaango. 3Ne iwe waambaasa uri n'ukhalila abo babaakhola bibiindu nga ibyo kumusaango, ate nga nawe wamweene ubikhola, nawe Wele s'alikhukhalila kumusaango ta? 4Namwe ulekelesa bukali bwe shiisa sha Wele, ni khukhwikhaliilikha khweewe, ni bulayi bweewe? S'umanya uri shitsilililwa sha Wele shili ndi iwe wibiiyise bibyoonako byoowo ta?
5Ne khulwe bumiinyi ni shikili bye kumwoyo kwoowo, ulikho wibiikhila wamweene shitaambiso khu shifukhu sheesi Wele alyokesanisilakho lirima lyeewe, ni khuukhala kimisaango khweewe khwa ŋali. 6#Zab 62.12; Nikh 24.12Khulwekhuuba Wele aliiwa buli mutweela kumukheemba kweewe, khuulondekhana ni bikholwa byeewe. 7Abo babaaba baarabila khuukhola buulayi, nga baweentsa shiriifwa ni lukoosi, Wele alibawa buulamu bubukhawawo ta. 8Ne abo babaali baatakha nga sibaloondelela bya ŋali ta, ne khurusakho ndi baloondelela bye bubwoonaki, Wele s'alibawaambilakho shiisa nakhari ta. 9Umuundu yeesi ukhola bye bubwoonaki, alifuna khutaambisibwa ni butsiina, khurakikha ni Bayudaaya, ne akhaba ni isi Banaambo nabo. 10Ne Wele aliiwa shiriifwa, n'imbuyila, ni lukoosi abo boosi babaakhola buulayi, nga anyoowela khu Bayudaaya, nio elekho ni Banaambo nabo. 11#Maka 10.17Khulwekhuuba Wele nga akhala kumusaango, s'aromboosa mu baandu ta.
12Ni naabo boosi babaakhola bibyoonako nga sibamanya bari likaambila lya Musa liliwo ta, Wele alibakhalila kumusaango bahele nga s'araambisa likaambila lya Musa ta. Ne abo boosi babaakhola bibyoonako ate nga bawulibwa ni likaambila lya Musa, Wele alibakhalila kumusaango nga ema khu likaambila. 13Khulwekhuuba abo babarekeeresa busa likaambila ne baalekha khulitsiilakho nga ni liloma, sibali nibo bakwalaafu mu moni tsya Wele ta. Ne akhali abo babaakhola nga likaambila ni liloma nibo babaabalibwa khuuba bakwalaafu.
14Banaambo sibali ni likaambila ta. Ne singa mu busaalikhana bwaabwe bakhola nga likaambila ni likana, babeene baba bali likaambila, akhaba nga sibali ni likaambila lilyaronebwa ta. 15Baba bokesanisile bari sheesi likaambila liloma sharonebwa mu myoyo kyaabwe. Ni bibyambaaso byaabwe lukana byokesana biri shino shili sha ŋali. Khulwekhuuba bibyambaaso byaabwe lukana bibawabila, ne lukana byaabayeeta. 16Nashiryo khuulondekhana ni kamakhuuwa kamalayi keesi ise inaangilila, Wele khu shifukhu shimaliilisi khuubirira mu Yesu Kristo, alikhala kimisaango kye bibiindu bibyebisa.
Bayudaaya ni Likaambila
17Ne iwe wilaanga khuuba shiina? Wilaanga uri uli Umuyudaaya nga wiyikina likaambila naluundi wiruuya uri iwe uli umulayi isi Wele? 18Naluundi iwe waambaasa uri waamanya byeesi Wele akana ukhole nga waafukiilila ibyo bibifuura buulayi, khulwekhuuba bakhuleekela kamakaambila? 19Iwe ushiŋaŋasa uri uli umuundu uwokesa baabofu intsila, naluundi uli buwaanga ni she khubonelakho isi abo boosi babaali mu shilima? 20Wiyila nga iwe niye uleekela baasilu, umuleekeli uwe babaana, nga iwe niye uwawaamba kamakaambila naluundi iwe niye uli ni khumanya ni bwa ŋali?
21Noola iwe niye uleekela babaandi, khulwashiina kila iwe ukheleekela wamweene? Shiina kila iwe wiiba, ate iwe uleekela uri mukheeba ta? 22Shiina kila iwe ukhola buyeyani, ate iwe uleekela uri umuundu yeesi s'akhiile waakhola bye buyeyani ta? Iwe unyala uryeena waalekelesa bifwaani byeesi babaandu babaandi besaaya, ate nga iwe wamweene unuula bifwaani bino khukhwaama mu masaayilo kaabyo? 23Iwe uwiruuya uri wawaamba kamakaambila ka Wele, shiina kila umuwaambisa kamaŋaanyu khulwe khufuniaaka kamakaambila keewe? 24#Isay 52.5Khulwekhuuba bibyaronebwa biloma biri, “Bafwotsola lisiina lya Wele mu Banaambo khulweenywe.”
25Ni nashiryo khukhwinjila imbalu khubamo itsamu nga mwalondeleele kamakaambila. Ne ni mufuniaaka kamakaambila, ni khukhwinjila imbalu khweesi mwenjila, khuba khuli busa nga babaakhenjila imbalu ta. 26Nashiryo umukulwa ukhenjila imbalu ta, n'atsiila khu biindu bibiili mu makaambila, waambaasa uri Wele singane amubale nga uwenjila imbalu ta? 27Nashiryo abo mu mubili babaakhenjila imbalu ta, ne nga baloondelela kamakaambila, nibo babaalibakhalila inywe kumusaango, inywe babaali ni likaambila lilyaronebwa. Naluundi mwayingila imbalu, ne shitweela busa mufuniaaka kamakaambila.
28Khulwekhuuba khuuba Umuyudaaya sishiba ndi shili shishiindu she kumubili busa ta. Namwe khukhwinjila imbalu inyene seshili shishiindu shishibonekhela busa khungaaki ta. 29#Maka 30.6Umuyudaaya umweene aba uyo uuli Umuyudaaya mu mwoyo mukari. Ni imbalu iyaŋali isi enjila iba yoolela ilala khu mwoyo kweewe. Iba iye khu mwoyo, ne shiili iye khu ngaaki busa ta. Umuundu uba aryo, abuyilibwa ni Wele, ne s'abuyilibwa ni babaandu ta.
Одоогоор Сонгогдсон:
Baroma 2: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.