Baroma 10
10
1Bebuulebe, ise khuukana khwe kumwoyo kwase ni khuuloomba khwase isi Wele khu lwe ba Isiraeli bili biri, khali Wele abawonesele. 2Ise ishiwandalasa ndi mu bulamu bwaabwe, Wele bamukana naabi. Ne khuukana khwaabwe khutaambamo khuumanya khukhuumala. 3Khulwekhuuba mu saambo yeesi balekha khubamo ni bibiwaamba khu bukwalaafu bubwama isi Wele bibiimala ta, baalekha khulondelela bya Wele ta, ne akhali baweentsa khurawo bukwalaafu bubwaabwe. 4Khulwekhuuba ari Kristo wakila kamakaambila kayakama khuraamba, nio buli muundu yeesi umufukiililamo abe umukwalaafu isi Wele.
Buuwonesi buli bwa Boosi
5 #
Lev 18.5
Nga Musa arona khu bibiwaamba khu bukwalaafu bubunyolikhana khuubirira mu makaambila aaloma ari, “Umuundu yeesi ukhola nga kamakaambila ni kaloma, alifuna buulamu khulwe kamakaambila.” 6#Maka 30.12-14Ne bukwalaafu bubwiimile khu khufukiilila khw'omuundu buloma buri, “Ukhereeba mu mwoyo kwoowo uri, ‘Ne naanu ukane aniine mwikulu akhureerere Kristo asi khu shiibala?’ 7Namwe ukhereeba uri, ‘Naanu ukane eekhe aasi imakoombe khukhureera Kristo khungaaki, khukhwaama mu bafu?’ ” 8Shisharonebwa shiloma shiryeena? Sishiloma shiri, buurume bwa Wele, nga nibwo buli shilomo she khuufukiilila sheesi ifwe khukuukuula, shili aambi ni nawe. Shili khu minwa kyoowo, naluundi shili mu mwoyo kwoowo? 9Khulwekhuuba iwe n'ufukiilisa ni kumunwa kwoowo uri Yesu niye Umukasya, naluundi wafukiilila mu mwoyo kwoowo uri Wele amulamusa khukhwaama mu bafu, uliwonesebwa. 10N'ufukiilila ni kumwoyo kwoowo, wikyela umukwalaafu; ne n'ubuula ni kumunwa kwoowo, uwonesebwa. 11#Isay 28.16Nga bibyaronebwa bikhosefu ni biloma biri, “Mbaawo umuundu namutweela ufukiilila mu Yesu, uliwaambisibwa kamaŋaanyu ta.” 12Khulwekhuuba mbaawo khuromboosa akari w'Omuyudaaya n'Umunaambo ta. Umukasya mutweela uyo, niye Umukasya uwa boosi. Naluundi niye ukabila boosi babamwiitsayo buyiindifu bweewe. 13#Yow 2.32Nga ni sharonebwa shiri, “Buli muundu yeesi uwisaaya Umukasya, aliwonesebwa.”
Mbaawo khukhwihaambilisa ta
14Ne babaandu banyala baryeena besaaya Umukasya nga bashiili khumufukiililamo ta? Naluundi banyala baryeena bamufukiililamo, nga bashiili khuwulila buurume bubwaama isi Umukasya ta? Naluundi banyala baryeena baawulila bibiwaamba khu Mukasya, nga imbaawo ubakhupiile kumulaanga ta? 15#Isay 52.7Naluundi babaandu banyala baryeena bakhupa kumulaanga kwe buurume, nga imbaawo ubarumanile ta? Ne nga bibyaronebwa bikhosefu ni biloma biri, “Babareera kamakhuuwa kamalayi nga bali ni bikele bilayi!” 16#Isay 53.1Ne seshili bari boosi bakaanila kamakhuuwa kamalayi kano ta. Nga Yisaaya n'aloma ari, “Umukasya, babaandu beenga babafukiilila kamakhuuwa keesi ifwe khwakuukuula?” 17Nashiryo, khufukiilila khwaama mu khurekeeresa buurume, naluundi buurume bwiitsa khukhwaama mu khulaangila khweesi Kristo akhola.
18 #
Zab 19.4
Lekha ise indeebe shireebo: Shinyala shaba shiri bashiili khuwulila buurume ta? Ilala bawulila buurume, nga bibyaronebwa bikhosefu ni biloma biri,
“Likono lye babaandu babakuukuula buurume lyayola mu shiibala shoosi.
Naluundi buurume bwaabwe bwayola isi shiibala shakama.”
19 #
Maka 32.21
Khayo indeebe shireebo shishikhola khabili: Shinyala shaba shiri babaandu be mu Isiraeli sibamanya buurume ta? Musa anyoowa khukhwiilamo shireebo shino khaale busa nga aloma ari,
“Ise indiraambisa linaambo lilishiili khukhwikyela linaambo ta,
indikila liwaambise babaandu baase libuba,
ni lwe linaambo lye babaandu babaali basilu indikyelisa babaandu khuuba be lirima.”
20 #
Isay 65.1
Ni Yisaaya ashilomakho ni kamaani nga n'aloma ari,
“Babaandu babaakhameentsa ta, nibo babanyoola ise;
naluundi ari samweene neyokesanile isi abo babaakhaamentsa ta.”
21 #
Isay 65.2
Ne nga Yisaaya akanikha khu ba Isiraeli aloma ari, “Buli shifukhu ise indi umwirekefu khukhwakaanila babaandu babaakhakana khuwulila ta, naluundi babaali ni bituluungu.”
Одоогоор Сонгогдсон:
Baroma 10: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.