Buraambi 5
5
Ananiya ni Safira
1Ne aabawo umusaani mutweela, lisiina lyeewe Ananiya, n'umukhasi weewe Safira, baakulisa liiswa lyaabwe. 2Waabukulakho tsinusu tsindala waatsibiikha, n'umukhasi weewe nga waashimanyilekho, ne tsitsiramile waatsiyila isi baarume. 3Petero waamuloma ari, “Ananiya, shiina kila Sitaani akhwitsuulemo mu mwoyo kwoowo woola ni khuwoombesa Umwoyo Umukhosefu nga uramisakho shisiintsa she tsinusu tsitsamile mu liiswa? 4Abe nga liiswa ni lishiili khukulisibwa ta, shilyaba nga lilyoowo? Abe akhaba nga ni lyaakulisibwile, sishabeele khuusi iwe khukhola sheesi abe ukana? Ne lwashiina kila waambaasile shishiindu nga shino mu mwoyo kwoowo? Iwe siwawoombesele babaandu ta, ne wawoombesele Wele.” 5Aryo Ananiya nga n'awulila bilomo bino, welima aasi kumubwi, wasumbukha. Ni khuurya khukali khwawaamba ibo boosi babashiwulilakho. 6Basooleli benyukha bamubowa mu ngubo, bamurusa ibulafu baatsya bamusiikha.
7Lwanyuma lwe khuubirawo tsisaawa nga tsitaru, umukhasi weewe naye woola, n'enga siwaamanyile bibibeelewo ta. 8Kila Petero waamureeba naye ari, “Imboolele khubone, tsinusu tsino tsonyene nitso tsitsaamile mu khukulisa liiswa?”
Umukhasi uyo naye welamo ari, “E e, ni tsinyene itso.”
9Ne Petero wamuloma ari, “Shiina kila iwe n'umuseetsa woowo mufukiilisaane khukhakilisa Umwoyo w'Omukasya? Khekhuboolele, bikyele byaabo babaama khusiikha umuseetsa woowo byoolile amulyaango, ni nawe banakhusuta bakhuruse.” 10Khaangukho, naye welima aasi kumubwi mu bikyele bya Petero, wasumbukha. Basooleli baatsya khwinjila mu ntsu banyoola nga wasumbukhile khaale, bamusuta bamurusa ibulafu, baatsya bamusiikha andulo isi umuseetsa weewe. 11Khuurya khukali khwakwawo mu bafukiilisi mu Kristo boosi, ni khuusi ibo boosi babaawulila bibiindu bino.
Bye kamakaanga ni bibiyaangisa bikali
12Ari bibiyaangisa ni bye kamakaanga bikali, byakholebwatsaka mu baandu, nga bibirira mu makhono ke baarume. Abe bafukiilisi boosi babusaanile mwitikiiyi lililaangibwa lya Solomoni. 13Khu baandu babaramile, mbaawo na mutweela uwe sungula khubetubaasakho ta. Ne babaandu boosi bakanikhatsaka khu baarume bibiindu bilayi byonyene. 14Wanamuundu we bafukiilisi nga mulimo basaani ni bakhasi, beloosela khukhwitubaasatsaka khu Mukasya, khuminyisakho tsifuunda tsindaayi. 15Bano boosi boola ni khusuta batsiina baabwe khubara khu ntsila, nga babaalisa khu bulili ni khu masisinwe, bari nio uri Petero abira, shishiniini sheewe sholekho khu balala. 16Kamatuuli ke babaandu kabuusana khukhwaama mu biriimba bibibotokhelele Yerusalemu, nga bareera batsiina ni naabo abe babataambisibwa ni kimisaambwa kimibi. Abo boosi bawonesebwa.
Baarume bakubyeengebwa
17Lwanyuma Umusaayi ufuura bukhulu wenyukha, nga ali atweela ni be mwituuli lye Basadukaayo boosi, nga betsuule likoko, 18baryo bawaamba baarume baabekalila mwipuusu lye babaandu baabusheele. 19Ne mu shilo malayika w'Omukasya waabekulilawo lulwiitsi lwe lipuusu waabarusa antsye, kila abaloma ari, 20“Ni mutsye mwiimikhe mu Lisaayilo Likhulu, muboolele babaandu bilomo byoosi bye buulamu buno.” 21Baarume ni baawulila shino, baatsya benjila mu Lisaayilo Likhulu kumutikhinyi, baarakikha khuuleekela.
Ne Umusaayi ufuura bukhulu n'ola, atweela ni naabo babaaba ni naye, wekhasa lukhobo nga lulimo baraangilisi ba Isiraeli boosi. Kila barumanisa mwipuusu bari babareerere babowe tsana. 22Ne basilikhale babaatsya ni boolayo, baalekha khunyoola babowe tsana nga bali mwipuusu ta. Kila belayo baboolela bakhulu bari, 23“Khunyoolele nga lipuusu likhomekhe bulayi bubweene, ni babaaliinda nga beemile khu mulyaango, ne ni khulomile khuri khwikulawo, khwalekha khunyoola umuundu yeesi mukari ta.”
24Aryo umusilikhale umukhulu uwe Lisaayilo Likhulu ni basaayi bakhulu ni baawulila bilomo bino, byabeyangisa naabi, nga bekanakana byeesi bibiindu bino sheesi bimanyisa. 25Abweenewo, umuundu mutweela weetsa waababoolela ari, “Bona babaandu beesi mwareere mwipuusu anaari bali mu Lisaayilo Likhulu balikho baleekela babaandu.” 26Khaangukho umusilikhale umukhulu we Lisaayilo Likhulu, ni basilikhale beewe baatsya babareera, nga sibaraambisa kamaani ta, lwekhuuba abe bariire bari babaandu banyala khubakhupa kamabaale.
27Ne ni baamala khubareera, baabeemisa akari mu lukhobo. Umusaayi ufuura bukhulu wabareeba, 28#Mat 27.25nga aloma ari, “Ifwe khwabakhoonyakilile khuulekha khuleekela mu Lisiina lino ta. Ne bona inywe mwetsusile Yerusalemu ni khuleekela khweenywe, naluundi mukana khukhubowa khuusi ifwe khuufwa khw'omusaani yuno.”
29Kila Petero ni baarume belamo bari, “Khwandyakhiile khuuwulila Wele, ne shiili babaandu ta. 30Wele uwe bakuuka beefwe uwalamusa Yesu khukhwaama mu bafu, isi inywe mweera nga mumutsaangilila khu musalaba kwe kusaala. 31Wele waamuniinisa khuuba khu mukhono kweewe kumulayi nga umuraangilisi naluundi Umuwonesi, ari nio babaandu be mu Isiraeli bafune khukhwibiiyisa ni khukhwiyakhilwa bibyoonako byaabwe. 32Ni nafwe khuli bajulisi be bibiindu bino, ne shiili ifwe fwenyene ta, ne n'Umwoyo Umukhosefu isi Wele amalile khuuwa ibo babamuwulila niye.”
33Ne be mu lukhobo ni bawulila bino, byabatsiina naabi bakana beere baarume. 34Ne Umufarisaayo mutweela, uwaba abe mutweela khube mu lukhobo lweene, uwalaangiwa Gamalieli, naye uwaba umuleekeli we kamakaambila ka Musa, naluundi abe isi babaandu besamo naabi shiriifwa, weema khu ngaaki, walakila ari baarume barusiwe ibulafu khakyeekhe. 35Kila Gamalieli tsana alomela be mu lukhobo ari, “Inywe babaandu ba Isiraeli, muli ni khukhwitsililisa naabi isaambo yeesi mubirisamo babaandu bano. 36Lwekhuuba mu mbuka ibirire ifwiiti iri, Tewudasi enyukha aasi, weyila nga niye umuundu we angaaki naabi. Ni babaandu baboola nga bitoondo bine bamwitubaasakho. Ne ni eribwa, ibo boosi abe babamuloondelela, basalanisibwa, byaweela awo biryo. 37Lwanyuma lwooyo aabawo Yuda uwama i Galilaaya, naye uwenyukha aasi mu bifukhu bye khuubala babaandu naye wabakho ni babaandu babamuloondelela. Naye aryo wahela, ni naabo abe babamuloondelela boosi basalanila. 38Nashiryo, ni nebyo bibiiliwo aluno ari ise imbaloma ndi, ni murure khu baandu bano mubalekhe babe. Lwekhuuba noola inengekharengekha yino, namwe kimilimo kyaabwe kino kili kye babaandu busa, kane kikhaasikhane. 39Ne noola byeesi bakhola bya Wele, singene munyalise khubaakamisa ta. Lukana mwinyoola muri mulikho musoolanisa Wele.”
40Baryo baayila kamakyesi keewe keesi aabawa. Balaanga baarume baakobola mukari, baabakhupa tsiinga, naluundi baabareewula khuulekha khukanikha mu Lisiina lya Yesu luundi ta. Baabalekhuula baatsya. 41Baarume baarura mu lukhobo, nga bekhoya lwekhuuba baabona nga she lisuno khuubirisibwa buubi khulwe Lisiina lya Yesu. 42Na buli shifukhu Baarume baaba mu Lisaayilo Likhulu ni muungo tsaabwe nga beloosela khukhwilwatsa Kamakhuuwa Kamalayi kakawaamba khu Yesu nga niye Kristo.
Одоогоор Сонгогдсон:
Buraambi 5: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.
