Buraambi 3
3
Khuwonesebwa khw'omusaani umuleme
1Shifukhu shitweela, Petero ni Yokana baaba baniina khuutsya mu Lisaayilo Likhulu mu saawa ye khuloombelamo, saawa nga syeenda tse kumuusi. 2Ne aabawo umusaani uwaba umuleme khukhwaama khu khusaalikhana khweewe, nga asutibwatsaka busa n'areebwa aambi ni kumulyaango kwe Lisaayilo Likhulu kukulaangiwa KUMUMILIWU, nio bari asabilise tsinusu khukhwaama khu baandu babaaba benjila mu Lisaayilo Likhulu. 3Aryo umusaani yuno n'abona Petero ni Yokana nga benjila mu Lisaayilo Likhulu, wabaloomba ari bamuwekho tsinusu. 4Ne Petero ni Yokana bashuusa tsimoni tsaabwe baamulola. Lwanyuma Petero waamulomela ari, “Iwe n'ukhuloleelele ifwe.” 5Aryo umusaani waabomiisilakho tsimoni tseewe nga ambaasa khuufunakho khakhaandu khukhwaama isi bali.
6Ne Petero waamulomela ari, “Ifeeza ni zaabu ise s'indi nabyo ta, ne sheesi ndi nasho sheesi ikhuwa: Mu lisiina lya Yesu Kristo uwe Nazareesi, yinyukha ukyeende.” 7Aryo Petero wamuwaamba kumukhono kumulayi, wamuyeeta khukhwinyukha. Lubaluba, bikyele by'omusaani ni tsiselenjele tseewe byelamo kamaani. 8Naye wesuta weema, warakikha khukyenda, wenjila ni nabo mu Lisaayilo Likhulu, nga akyeenda, nga esutaka, nga abuyila Wele. 9Ne babaandu boosi ni bamubona nga akyeenda, nga abuyila Wele, 10bamwofwasa bulayi bamanya nga niye umusaani uwekhalatsaka aambi ni kumulyaango kukulaangiwa KUMUMILIWU, nga asabilisa, baryo basamilila busa, beyaanga naabi, lw'esho shishakholekha khu musaani.
Petero akanikha isi babaandu babaaba mu Lisaayilo Likhulu
11Ne umusaani n'aba nga ashomela khu baarume Petero ni Yokana, babaandu boosi beetsa isi bali, nga beyaanga, babuusanila mwitikiiyi lililaangibwa lya Solomoni. 12Petero n'abona babaandu waabaloma ari, “Babaandu ba Isiraeli, lwashiina shino shibeyaangisa? Namwe lwashiina mukhwoomisilakho ifwe tsimoni? Mwaambaasa muri umuundu uyu akyeendile lwe kamaani keefwe, namwe lwe bukhosefu bweefwe? 13#Luky 3.15Wele wa Iburayimu, ni Isaaka, ni Yakobo, luundi Wele we bakuuka beefwe, waweele Umwakaanisi weewe Yesu shiriifwa, uyo isi inywe mwawaanayo isi be bunyala khukhwiiribwa, mwamwikaanila mu moni tsa Pilato, akhaba nga abe Pilato niye wakhalilewo khumulekhuula. 14#Mat 27.15-23; Mako 15.6-14; Luka 23.13-23; Yok 19.12-15Ne inywe mwekaana uyo umukhosefu luundi umukwalaafu, muryo mwaloomba Pilato abalekhuulile umwiiri. 15Muryo mweera umukhulu ureera buulamu, ne Wele wamulamusa khukhwaama mu bafu. Ni nafwe khuli bajulisi be shishiindu isho. 16Ne shino shibeele lwe khufukiilila mu lisiina lyeewe, kila umusaani isi mubona yuno luundi isi mumanyile, elilemo kamaani. Lili lisiina lya Yesu, ni khufukiilila, bibireere umusaani yuno khuwona khwelala.
17“Aso, ari be buulebe, namanyile ndi sheesi inywe ni bawuli beenywe mwakhola, mwashikholela mu khulekha khumanya ta. 18Ne Wele sheesi aboola khaale khuubirira mu baŋoosi boosi ari Kristo weewe akhila khutaambisibwa, aryo wabyoolelesa. 19Nashiryo, ari ni mwibiiyise mushuukhe mwiile isi Wele nio manya abeyakhile bibyoonako byeenywe, 20nio manya bifukhu bye khusangaala byaama isi Umukasya. Naluundi nio manya arumane Kristo uwareebwawo khulweenywe, niye Yesu. 21Niye uwakhila khurama mwikulu khukhwoolesa imbuka ni lyoola isi Wele alikoboselamo bibiindu byoosi bushaakha, nga Wele n'asuubisa khuubirira mu baŋoosi beewe bakhosefu khaalekho. 22#Maka 18.15,18Lwekhuuba Musa aloma ari, ‘Umukasya Wele alibasindikhila inywe Umuŋoosi nga n'aasindikha ise, naluundi alyaama mu bandaayeenwe babeene. Muli ni khulondelelaatsaka ibyo byoosi byeesi niye alibaboolatsakila inywe. 23#Maka 18.19Na buli umuundu yeesi ukhalirekeeresa byeesi Umuŋoosi uyo aliloma ta, alirusibwa mu baandu ahesebwe.’
24“Ilala ni baŋoosi boosi babaakanikha khukhwamila ilala khu Samweli, ni babamwiilakho boosi balomatsaka, baakanikhatsaka khu bifukhu bino. 25#Rak 22.18Inywe muli basikha be baŋoosi naluundi be ndakaano isi Wele akhola ni bakuuka beenywe. Wele alomela Iburayimu ari, ‘Khuubirira mu betsukhulu boowo, indiiwa babaandu boosi be mu shiibala ikhabi.’ 26Aryo Wele nga n'aarobola Umwakaanisi weewe, amwakaanisa khunyoowa isi inywe, abawe tsikhabi, nga ashuusa buli mutweela khurura mu ntsila tseewe tse bumoyaani.”
Одоогоор Сонгогдсон:
Buraambi 3: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.
