Buraambi 15
15
Lukhobo lulwaba i Yerusalemu
1 #
Lev 12.3
Aabawo babaandu babaandi babeekha khukhwaama i Yuda, nga baleekela be buulebe bari, “Akhali khukhwinjila imbalu, khulondekhana ni saambo iya Musa nga n'ili, simunyala khuwonesebwa ta.” 2Shino shareera khukhaandisana akari abwe ni Paulo ni Balunaba imbuka ndeeyi. Nashiryo lwanyuma lwayo shakhalibwawo shiri Paulo ni Balunaba tsana ni babaandu babaandi khukhwaama i Antiyoki batsye i Yerusalemu isi baarume ni bakhulu khulwe lomo yino.
3Baryo bafukiilisi baabarumana khuutsya nga babirira i Foyinisiya ni Samariya nga baboolela bibiwaamba khu khushuukha khwe Banaambo khukhwikyela babafukiilila mu Wele. 4Ne ni boola i Yerusalemu, bafukiilisi ni baarume ni bakhulu babaandi babakaanila. Baryo bababoolela ibyo byoosi byeesi Wele akhola khuubirira mu nibo. 5Ne batweela khu bafukiilisi, babaaba batweela khu be mwituuli lye Bafarisaayo, benyukha baloma bari, “Shakhiile Banaambo benjile imbalu, naluundi bali ni khulondelela ibyo byoosi byeesi kamakaambila ka Musa kaloma.”
6Baarume ni bakhulu babaandi babuusana atweela khuubona nga ilomo yino n'ili. 7#Bur 10.1-43Lwanyuma lwe tsinganikha tsingali, Petero weema khu ngaaki waaloma ari, “Bebuulebe, inywe mwamanya nga khukhwaama khaale, Wele andobola ise khukhwaama mwiinywe ari imboolele Banaambo shilomo she kamakhuuwa kamalayi nio akile bafukiilile. 8#Bur 10.44; 2.4Ne Wele umanyile kimyoyo kye babaandu okesana bujulisi nga awa Banaambo Umwoyo Umukhosefu, musaambo ndweela nga n'akhuwa ifwe. 9Niye s'arawo lulwakha akari efwe ni nabo ta, ne njeeba khulwe khufukiilila khwaabwe, niye abasiingakho bibyoonako khu myoyo kyaabwe. 10Ari shiina shisheene shishikila mwakhakilisa Wele nga mwityukhisa baleekelwa bano babashuukha shisutwa sheesi bakuuka beefwe namwe ifwe fwabeene khukhanyala khusuta ta. 11Lwekhuuba ifwe khufukiilila khuri, nafwe nga nibo ni bali, khuliwonesebwa khuubirira mu bweela bw'Omukasya Yesu.”
12Lituuli lye babaandu baasila busa nga barekeeresa Paulo ni Balunaba nga babasontsoola bubonelo ni bye kamakaanga byeesi Wele akhola mu Banaambo khuubirira mu nibo.
13Ne ni baamala khuukanikha, Yakobo welamo ari, “Bebuulebe ni mundekeerese. 14Simoni wasontsoolile isaambo yeesi Wele akyeniyilamo Banaambo, ari nio arobolemo ibo babeewe. 15Shino shiwaambakana ni bilomo bye baŋoosi nga bibyaronebwa ni biloma biri,
16 #
Amos 9.11,12 ‘Lwanyuma lwa bino indikobola,
khukhwombekha bushaakha
intsu ya Dawudi iyakwa.
Indyombekha bibyaanyi bye intsu iyo,
injimise luundi.
17Nio akile babaandu babaramilewo boosi
baweentse Umukasya,
ni Banaambo boosi babalaangibwa
lisiina lyase,
18babaasuubizibwa kimiboolo kye khaalekho.’
19“Nashiryo, ise khuukhalawo khwase khuli ndi, khukhashikhola shaaba shihangafu isi Banaambo babekyelile bafukiilisi mu Wele ta. 20#Luky 34.15-17; Lev 18.6-23; Lev 17.10-16Ne akhali ndi kane khubaronele khuri bakhehambatsakila mu biindu bye mbikho nga khukhwisaaya bibuumbe ta, namwe mu bye buyeyani ta, namwe balekhe khulya inyama iye shishaayo shishikokibwile busa ta, ni khulekha khulya kamalasile ta. 21Lwekhuuba khukhwaama mu miboolo kimikhale, iliwo babaleekela kamakaambila ka Musa mu buli shiriimba. Naluundi kamakaambila kano kasomebwa mu ntsu tsye khukhwisaayilamo khu buli shifukhu sha Sabato.”
Lukhobo luronela Banaambo babaafukiilila
22Lwanyuma baarume ni bakhulu, atweela ni babaafukiilila boosi baashibona nga shili shilayi khuurobola babaandu khukhwaama mu beene, babarumane khuutsya i Antiyoki, atweela ni Paulo, ni Balunaba. Baryo barobola Yuda uwalaangiwa Balusaba, ni Silasi, babaaba babaandu bakhulu mu lituuli lye be buulebe. 23Baabaronela buurume bubuloma buri: “Ifwe baarume ni bakhulu, babandaayeenywe, khubaronela inywe balebe babaali Banaambo, be mu Antiyoki, ni Siriya, ni Kilikiya. Khwabasheesile.
24“Khwaawuliile bari iliwo babaandu batweela babaama isi ifwe baabataambisile naabi bibyambaaso byeenywe, akhaba nga ifwe sikhwabarumana ta. 25Nashiryo ifwe khwashiboone nga shilayi, lwanyuma lwe khufukiilisana mu lukhobo, khurobolayo babaandu khubasindikhe isi muli, nga bali atweela ni bakanwa beefwe Balunaba ni Paulo. 26Nibo bali babaandu babewaanayo bulamu bwaabwe khulw'Omukasya weefwe Yesu Kristo. 27Nashiryo ifwe khwabarumaniile Yuda ni Silasi, khuri babakanikhile ni kumunwa ibyo byoosi byeesi khubaroneele. 28Lwekhuuba shabonekhele nga shilayi isi Umwoyo Umukhosefu, ni isi ifwe, khulekha khubatwiikha inywe busiro bwoosi ta, khurusakho khukhola ibyo bibikanibwa bino: 29Inywe mulekhe khukhwiwaambatsakila mwiibyo byeesi basaayila bifwaani, naluundi mukhalya kamalasile ta. Ni shishiindi mukhalya inyama iye shishaayo shishikokibwile busa ta, naluundi mulekhe bye buyeyani. Ne ni kane mwiliindatsake bibyeene ibyo kane mube mwakholile bulayi.”
30Basaani bano babaarumanibwa baatsya boola i Antiyoki. Nga baamalile khubuusanisa lituuli lye babaandu atweela, babawaambisa burone bwatsana. 31Ne ni babusoma, bekhoya naabi khulwe khukhwisibwamo kamaani. 32Lwekhuuba Yuda ni Silasi babeene baaba baŋoosi, besamo be buulebe kamaani, nga babakanikhayo naluundi nga babawandalasa. 33Ne ni bamenyayo khumalakho imbuka, be buulebe babasibula mu lukoosi belayo isi ibo bababarumana. 34Akhaba nga Silasi abona ari shamwakhila khumenya ibweene iyo. 35Ne Paulo ni Balunaba nga bali atweela ni babaandi swa busa, baarama mu Antiyoki, nga baleekela naluundi nga baboolela Ilomo y'Omukasya.
Paulo ni Balunaba baawukhana
36Nga bifukhu byaabirirewo, Paulo waalomela Balunaba ari “Yinyukha, khwileyo khukyeniyile be buulebe mu buli shiriimba mweesi khwaboolela Ilomo y'Omukasya khubone nga ni bali.” 37Ne Balunaba waakana naabi khuutsya ni Yokana uwalaangibwa Mako. 38#Bur 13.13Ne Paulo waalekha khushibona nga shilayi khuutsya ni naye ta, lwekhuuba Yokana Mako yuno aabatitukhakho nga bali i Panfiliya, waalekha khutsya ni nabo khu buraambi ta. 39Aryo aabawo khuukhaandisana khuukali akari aabwe, khukhwoolisa ni baawukhana. Balunaba waatsya ni Mako, baambukha i Kupuro. 40Ne Paulo waarobola Silasi baatsya, lwanyuma be buulebe khuubaloombela bubweela bw'Omukasya. 41Aryo Paulo waatsya nga abirira i Siriya, ni Kilikiya, nga esamo baafukiilisi kamaani.
Одоогоор Сонгогдсон:
Buraambi 15: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.
