Mt 26
26
Mbɨ nyaʼa taŋ mɨnaŋ ɨmbə̀ʼ zwiirɨ ə Yeso
(Mk 14.1-2; Lk 22.1-2; Jn 11.45-53)
1Ənɨ Yeso nyaʼa fə maanɨ nɨ chwi ɨnû mbe, wɨ̀ nyaʼa ghà əmbɨ mbi mə̀mə̀ə̀nɨ̀-ɨnû ni, 2“Mbə̀ fə kyerɨ ə ni à sɨ bùʼ ɨni be mbɨ jɨg Əchwɨ̂ ə Che-ɨgun, əne mbɨ bɨrɨ yim Wan Wə̀d nàʼ ni mbɨ kombɨ əzed ə baʼnɨ.”
3À nyaʼa ənɨ ə nyùmə̀ we, bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ mbe rɨŋga əbeŋ nyaʼa wò nàànɨ̀ ɨŋga tɔʼ Kaifàs, nɨ nyaʼa ətu ɨgwɨ ə bə̂d mbàn Ŋwìə̀. 4Mbɨ nyaʼa wò nàànɨ̀ əne ɨ taŋ ɨchî nɨ mbɨ bɨrɨ yim ə Yeso ənjìm ənjìm, zwiirɨ. 5Àyɨə mbɨ nyaʼa ghà mbənə mbənə ni, “Chəi tɨ̀ bɨrɨ zwiirɨ əməd ənɨ mbɨə jɨg Əchwɨ̂ ə Che-ɨgun, njɨ bə̂d bɨrɨ bu əchɔb.”
Əyi mɔʼɔ nyaʼa zɔʼ ə Yeso ə Betanì
(Mk 14.3-9; Jn 12.1-8)
6Ənɨ Yeso nyaʼa ə Betanì ɨŋga nəb Saimòn we nɨ nyaʼa kweʼ wɔ̀n əpabɨ, 7əyi mɔʼɔ nyaʼa wò əsɨ məd mbɨ mɨwud ɨŋga chəŋ àlàbastà. Wɨ̀ nyaʼa pè tuŋ mɨwud mbe ɨgun ətu əməd ənɨ wɨ̀ nyaʼə jɨgə. 8Ənɨ mə̀mə̀ə̀nɨ̀-ɨnû ɨməd nyaʼa zə ənû ze, mbɨ nyaʼa sə ɨtəm, biirɨ ni, “Əyi wɔ̂ kɨə chə̀kɨ̀ mɨwud mbɔ̂ ɨmbə̀ʼ ə yè ə? 9Njɨ wɨ̀ kə̀ʼ fèn mɨwud mbɔ̂ ənɨ ɨkab nɔnɔʼ, nàʼ ɨkab we əmbɨ ə bə̂d ɨkwaŋ.”
10Yeso nyaʼa kyerɨ ɨnû mbe nɨ mbɨ nyaʼə ghàə̀, əne wɨ̀ nyaʼa ghà əmbɨ mɨ̀mə̌d ni, “Mbə̀ kɨə chə əyi wɔ̂ ɨmbə̀ʼ ə yè ə? Wɨ̀ fə ghɨ̀ ənû ə chɔ̀m ənɨ ə num. 11Bə̂d ɨkwaŋ mbɨ əkaʼ nən ɨghəm jìm, àyɨə chəi əmɨ mbɨ nən ɨghəm jìm. 12Əyi wɔ̂ fə tuŋ mɨwud mbɔ̂ ɨgwɨ num, ɨmbə̀ʼ tekɨ mɨ nyamnyod ni mə mɨ kwɨ, mbɨ sɨ tweŋɨ. 13Mə ghà rəsìʼ ɨ nən ni, ɨsɨ jìm mbe nɨ mbɨ bɨrɨ gha ɨkə̂n chɔ̀m wɔ̂ ɨŋga ɨsɨg, mbɨ bɨrɨ ghà ənû ze nɨ əyi wɔ̂ ghɨ̌, əne sɨə kɔndɨ əməd.”
Judàs nyaʼa ben ni tə bɨrɨ fen ə Yeso
(Mk 14.10-11; Lk 22.3-6)
14Wɨ mɔʼɔ rəbɔʼ mə̀mə̀ə̀nɨ̀-ɨnû Yeso mbe wum chɔ̀b rɨ̀be, nɨ ɨkum məd nyaʼə Judàs Iskàriɔ̀t, nyaʼa wò əsɨ bə̂d kyeŋ mbe rɨ ə mbàn Ŋwìə̀ 15pè biirɨ ni, “Mbə kɨə wo naʼ ye ɨ num əwù ze nɨ mə chwiə Yeso ɨ nən ni mbə̀ yim əməd ə?” Mbɨ nyaʼa zu əne, taŋ ɨkab sɨrɨvà chuʼ ɨwum tad nàʼ ɨ bɔ. 16Ɨ kɔ rɨ ənɨ ə nyùmə̀ we, wɨ̀ nyaʼa kɔ kə̀b əpan nɨ ghɨ ni mbɨ gywɨ ə Yeso.
Yeso nyaʼa jɨg Əchwɨ̂ ə Che-ɨgun mbɨ mbi mə̀mə̀ə̀nɨ̀-ɨnû
(Mk 14.12-21; Lk 22.7-13, 21-23; Jn 13.21-30)
17À nyaʼa ɨgwɨ əni rɨtu nɨ mbɨ nyaʼə jɨgə ŋgə̀ŋ ze nɨ chəi mbɨ nyaʼa zɨ ɨfuʼ we nɨə ghɨ̀ ni ŋgə̀ŋ kɔʼ ɨŋga, mə̀mə̀ə̀nɨ̀-ɨnû Yeso nyaʼa wò əsɨ məd, pè biirɨ ɨ bɔ ni, “À kə̀b ni tɨ̀ wo tekɨ əsɨ ɨ ne ə yi nɨ à bɨrɨ jɨg Əchwɨ̂ ə Che-ɨgun ə?”
18Wɨ̀ nyaʼa ghà əmbɨ mɨ̀mə̌d ni, “Mbə̀ wo əsɨ mbaŋə̀ mɔʼɔ ɨŋga əsɨ ze nɨ yeʼ ɨmbì ɨ nən pè ghà ɨ bɔ ni, 'Əchwiə̀-ɨnû ə ghà ni, Mɨ nyùmə̀ fə kùʼ i. Mə bɨrɨ jɨg Əchwɨ̂ ə Che-ɨgun mbɨ mbɨ mə̀mə̀ə̀nɨ̀-ɨnû ɨŋga e nəb.'”
19Mə̀mə̀ə̀nɨ̀-ɨnû mbe nyaʼa ghɨ̀ àmei ɨchî nɨ Yeso nyaʼa gha əmbɨ mɨ̀mə̌d, əne tekɨ rɨjɨg Əchwɨ̂ ə Che-ɨgun te.
20À nyaʼa sɨ ɨkwirɨ kwirɨ we, Yeso nyaʼa chubɨ ɨ jɨg mbɨ mbi mə̀mə̀ə̀nɨ̀-ɨnû mbe wum chɔ̀b rɨ̀be. 21Ənɨ mbɨ nyaʼə jɨgə, wɨ̀ nyaʼa ghà ni, “Mə ghà rəsìʼ ɨ nən ni wə̀d mɔʼɔ rəbɔʼ nən bɨrɨ fen əmɨ.”
22Mə̀mə̀ə̀nɨ̀-ɨnû mbe nyaʼa kàŋ kə̀nə̀. Əne mbɨ nyaʼa kɔ biirɨ ɨ bɔ ɨ mɔʼ mɔʼ ni, “Ə̀nùŋɨ̀sɨg, à wa kɨə mɔ̌ ə?”
23Wɨ̀ nyaʼa wììrɨ̀ ni, “We nɨ fə zɨ əbɔ ɨŋga əkaŋ ə mɔʼ mbɨ num bɨrɨ fen əmɨ. 24Wan Wə̀d bɨrɨ kwɨ ɨchî nɨ mbɨ nyaʼa fə ŋwaʼnɨ ɨmbə̀ʼ əməd, àyɨə ŋgəʼ bɨrɨ nyɨ ɨgun ə wə̀d we nɨ fen əməd. À kɨ ənɨ chəi mbɨ nyaʼa kɨrɨ gywɨ əməd, njɨ zɨə bɔ̀ŋ.” 25Judàs we nɨ nyaʼa fen əməd nyaʼa bə̀ biirɨ ni, “Əchwiə̀-ɨnû, à wa kɨə mɔ̌ ə?”
Yeso nyaʼa ghà ɨ bɔ ni, “À fə ghà əne.”
Ɨkɔ rɨ ənɨ Ɨtarɨ Ə̀nùŋɨ̀sɨg
(Mk 14.22-26; Lk 22.14-20; 1 Kɔ 11.23-25)
26Ənɨ Yeso mbɨ mbi mə̀mə̀ə̀nɨ̀-ɨnû nyaʼa sɨə jɨgə, Yeso nyaʼa nɨŋ chiŋ ŋgə̀ŋ, kɔŋgɨ ə Ŋwiə̀ ɨgun, bəʼrɨ, nàʼ əmbɨ mbi mə̀mə̀ə̀nɨ̀-ɨnû ghà ni, “Mbə̀ nɨŋ jɨg, əzɔ̂ yɨ mɨ nyamnyod.”
27Wɨ̀ nyaʼa bə̀ nɨŋ toʼ mɨ̀nòʼ, kɔŋgɨ ə Ŋwiə̀, nàʼ əmbɨ mɨ̀mə̌d ghà ni, “Mbə̀ nɔ mbə̀n mɨjìm. 28Əzɔ̂ yɨ mɨ ənəm nɨ Ŋwìə̀ fə nɨŋ san fɨso fi mbɨ nən. Ənəm zɔ̂ yɨ əze nɨ mbɨ chəmnɨ ɨmbə̀ʼ ɨtu bə̂d mɨ̀nɔnɔʼ, ɨmbə̀ʼ Ŋwìə̀ waʼ ɨnû rɨbɔ̀ŋ mɨ̀mə̌d. 29Mə ghà ɨ nən ni chəi mə bɨrɨ wɨrɨ nɔ mɨnoʼ pè əni ze nɨ mə̀ bɨrɨ nɔ mbɨ nən ənɨ ɨghəm fi ɨŋga ənû ɨfɔ̀n mɨ Mbǎʼ.”
30Ənɨ mbɨ nyaʼa fə kwerɨ ɨkyî, mbɨ nyaʼa jwɨ̀ wò ɨkaŋ Ɨwum mɨ̀Olìf.
Yeso nyaʼa ghà ni Pità bɨrɨ ton əwi
(Mk 14.27-31; Lk 22.31-34; Jn 13.36-38)
31Ənɨ Yeso mbɨ mbi mə̀mə̀ə̀nɨ̀-ɨnû nyaʼa pè ɨkaŋ Ɨwum mɨ̀Olìf we, wɨ̀ nyaʼa ghà əmbɨ mɨ̀mə̌d ni, “Mbə bɨrɨ norə əwən sàŋ əmɨ ɨzimɨ wɔ̂. Ə zɨ ɨŋga Ə̀ŋwàʼnɨ̀ ə Ŋwiə̀ ni,
'Mə bɨrɨ zwiirɨ ənə̂ŋgɨ̀-njɨ̀g,
əne ɨnɔ̂n njɨ̀g we bɨrɨ jàŋə̀.'
32Àyɨə ənɨ Ŋwìə̀ fə zwemnɨ əmɨ, mə bɨrɨ wo ɨmbì ɨ nən ə Galiliî.”
33Pità nyaʼa ghà ɨ bɔ ni, “Kaʼ mə̀mə̀ə̀nɨ̀-ɨnû mbə mɨ̀jìm bè nòrə̀ əwən sàŋ əwe, chəi mə̀ bɨrɨ nɔ ghɨ əne.”
34Yeso nyaʼa ghà ɨ bɔ ni, “Mə ghà rəsìʼ ɨ ne ni, àmei ɨzimɨ wɔ̂, bɔŋ ɨnoŋgub sɨə tɔŋə, à bɨrɨ fə ton əmɨ ɨghəm tad.”
35Pità nyaʼa ghà ɨ bɔ ni, “Ka à bè yeʼi ni mbɨ bɨrɨ zwiirɨ əwe bə̀ zwiirɨ əmɨ, chəi mə bɨrɨ nɔ ton əwe.” Mə̀mə̀ə̀nɨ̀-ɨnû mbə mɨ̀jìm nyaʼa bə̀ ghà àmei əne.
Yeso nyaʼa kɔŋgɨ ə Ŋwiə̀ ə Gètsemanì
(Mk 14.32-42; Lk 22.39-46)
36Yeso mbɨ mbi mə̀mə̀ə̀nɨ̀-ɨnû nyaʼa nɔ̀ʼ wò əsɨ ə mɔʼɔ ze nɨ mbɨ nyaʼə tɔŋ ənɨ Gètsemanì. Ənɨ mbɨ nyaʼa pè əŋgu, wɨ̀ nyaʼa ghà əmbɨ mɨ̀mə̌d ni, “Mbə̀ chub əgha, mə̀ tindɨ wò ɨmbì kɔ̀ŋgɨ̀ ə Ŋwiə̀.” 37Ənɨ wɨ̀ nyaʼa ghà əne, wɨ̀ nyaʼa nɨŋ ə Pità mbɨ ə bɔn Zebèdiî mbe mɨ̀be mbɨ wò ɨnɔ̂n. Wɨ̀ nyaʼə kàŋə̀ kə̀nə̀, fîŋ bə̀ kɔ tɔb əməd. 38Əne wɨ̀ nyaʼa ghà əmbɨ mɨ̀mə̌d ni, “Ə̀kə̀nɨ̀ ə fə kàŋ swi ɨŋga mɨ fîŋ, kəb zwiirɨ əmɨ. Mbə̀ chub əgha, mba mɨnən chub ɨkyèʼe.”
39Ənɨ wɨ̀ nyaʼa ghà əne, wɨ̀ nyaʼa yèndɨ̀ wò ɨmbì rɨpiî, pè kub ɨfě ə si, kɔ̀ŋgɨ̀ ə Ŋwiə̀ ghà ni, “Mɨ Mbǎʼ, ɨchî mɨ chwiə, à ghɨ̀ ŋgəʼ zɔ̂ chè rɨ ɨgwɨ num. Àyɨə ghɨ yeʼ ənû ze nɨ à kə̀bɨ, kaʼi əze nɨ mə̀ kəbɨ.”
40Wɨ̀ nyaʼa bə̀ndɨ̀ wò əsɨ mə̀mə̀ə̀nɨ̀-ɨnû mbe pè zə ənɨ mbɨ nyaʼə gwenə. Əne wɨ̀ nyaʼa biirɨ əmbɨ Pità ni, “Chəi ənɨ tɨ̀ mbə chub ɨkyèʼe mbɨ num ənɨ awà fìbɨ̀ ə? 41Mbə̀ chub ɨkyèʼe kɔ̀ŋgɨ̀ ə Ŋwiə̀ ni tɨ ənû ə mɔʼɔ numbɨ i əwən. Fîŋ zɨə kə̀b ni mbə̀ ghɨ ənû nɨ kuʼnɨ, àyɨə nyamnyod ə bɔd.”
42Ənɨ Yeso nyaʼa ghà əne, wɨ̀ nyaʼa yì wò kɔ̀ŋgɨ̀ ə Ŋwiə̀ ənɨ ɨghəm nɨ pe be ghà ni, “Mɨ Mbǎʼ, à mɨ yeʼ ni chəi ɨchî cherə nɨ tɨ̀ à ghɨ̀ ni ŋgəʼ zɔ̂ chè rɨ ɨgwɨ num, njɨ ghɨ ɨchî nɨ à kə̀bɨ.” 43Ənɨ wɨ̀ nyaʼa wɨrɨ bə̀ndɨ̀, wɨ̀ nyaʼa wò pè zə mə̀mə̀ə̀nɨ̀-ɨnû mbe ənɨ mbɨə gwenə. Ɨ mbɨə nyaʼə gwen ɨmbə̀ʼ ɨghəm nɨ ŋgwenɨ nyaʼa fə kən chìŋ mɨ̀mə̌d əku.
44Yeso nyaʼa bə̀ yì sàŋ mɨ̀mə̌d wò kɔ̀ŋgɨ̀ ə Ŋwiə̀ ənɨ ɨghəm nɨ pe tad. Wɨ̀ nyaʼə ghàə̀ àmei ɨnû mbe nɨ wɨ̀ kəʼ bè ghà. 45Wɨ̀ nyaʼa bə̀ndɨ̀ wò əsɨ mə̀mə̀ə̀nɨ̀-ɨnû mbe pè ghà əmbɨ mɨ̀mə̌d ni, “Mbə̀ kɨə kɨrɨ gwenə bə̀ zwììrɨ̀ əwən ə? Mbə̀ zə ni nyùmə̀ fə kùʼi, əne mbɨ fə fèn Wan Wə̀d əmbɨ ə bə̂d nɨə ghɨ̀ ɨnû rɨbɔ̀ŋ. 46Mbə̀ nɔʼ tɨ̀ kɔ wo. Mbə̀ zə, wə̀d we nɨ fen əmɨ fə sɨ i əgha!”
Ɨnɔ̂n bə̂d nyaʼa gywɨ̀ ə Yeso
(Mk 14.43-50; Lk 22.47-53; Jn 18.3-12)
47Ənɨ Yeso nyaʼə kɨrɨ ghamə, Judàs, nɨ nyaʼa wɨ mɔʼɔ rəbɔʼ mə̀mə̀ə̀nɨ̀-ɨnû mbe wum chɔ̀b rɨ̀be nyaʼa yeʼe. Ɨ wɨə nyaʼə yènə̀ mbɨ ɨnɔ̂n bə̂d nɨ nyaʼa yim rɨbi bə̀ yim ɨtum mbàŋ. À yɨə bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ mbe rɨŋga əbeŋ nyaʼa tom mɨ̀mə̌d. 48Wə̀d we nɨ nyaʼa fen ə Yeso nyaʼa fə nàʼ ənweenɨ əmbɨ mɨ̀mə̌d ni, “Mbaŋə̀ ze nɨ mə̀ sɔɔrɨ ndə̀ʼ məd yɨ we nɨ mbɨə kə̀bə̀. Mbə̀ gywɨ əməd.”
49Judàs nyaʼa wò əsɨ Yeso əwu əwən pè ghà ɨ bɔ ni, “Əchwiə̀-ɨnû, mə chàʼrɨ̀ əwe!” Wɨ̀ nyaʼa chàʼrɨ̀ əne, sɔɔrɨ ndə̀ʼ məd.
50Yeso nyaʼa wììrɨ̀ ɨ bɔ ni, “Mɨ sə̀ʼ! Ghɨ ənû ze nɨ à yeʼe ghɨ̀!”
Ənɨ Judàs nyaʼa ghɨ̀ əne, bə̂d mbe nyaʼa wò chè ə Yeso ənɨ ɨkǎ, yimɨ. 51Mbaŋə̀ mɔʼɔ rəbɔʼ bə̂d mbe nɨ nyaʼa mbɨ Yeso nyaʼa chɔʼ i ɨbi rɨ əbaʼ, ŋwì, wɨ chè kwa ə̀tǒŋ rɨ ətu wə̀d ə̀fàʼì ətu ɨgwɨ ə bə̂d mbàn Ŋwìə̀.
52Yeso nyaʼa ghà əmbɨ wə̀d ɨbi we ni, “Sɔ e ɨbi əbaʼ. Àyɨə kyerɨ ni wə̀d we nɨə zɔ̀ŋ ənɨ ɨbi bɨrɨ bɨ kwɨ ɨchû ɨbi. 53Chəi à kyerɨ ni mə we tɨ̀ mə dì əmbɨ mɨ Mbǎʼ, wɨ̀ kɨ chà mɨnɔ̂n mbɨ̀aŋgɨrə̀ nɨ che mɨnɔ̂n wum chɔ̀b rɨ̀be ni mbɨ yeʼe wèèrɨ̀ əmɨ ə? 54Àyɨə mə mɨ ghɨ̀ əne, njɨ ɨŋgam Ŋwiə̀ we nɨ gha ni ɨnû mbɔ̂ berɨ ghɨ̀, kɨə wo jwɨ ənɨ rəsìʼ rɨ ye ə?”
55Yeso nyaʼa ghà əmbɨ mɨnɔ̂n bə̂d mbe ni, “Mbə sɨ yeʼe ɨ gywɨ əmɨ mbɨ mɨbi fɔrɨ mbɨ ɨtum mbàŋ ɨghabɨ ni mə̀ yɨ ɨjɨ ə? Mə wɨə nyaʼə chub ɨŋga mbàn Ŋwìə̀ ɨni jìm chwiə ɨnû, àyɨə chəi mbə̀ nyaʼa gywɨ əmɨ. 56Ɨnû mbɔ̂ jìm fə ghɨ̀ ɨmbə̀ʼ ɨnû mbe nɨ bə̂d ɨ̀kə̀n Ŋwiə̀ nyaʼa ŋwàʼnɨ̀ mbɨ jwɨ ənɨ rəsìʼ.” Ənɨ wɨ̀ nyaʼa ghà əne, mə̀mə̀ə̀nɨ̀-ɨnû mbe mɨ̀jìm sàŋ əməd nòd əwən.
Mbɨ nyaʼa nɨŋ ə Yeso wò ɨfě mə̀saʼ əbeŋ
(Mk 14.53-65; Lk 22.54-55, 63-71; Jn 18.13-14, 19-24)
57Bə̂d mbe nɨ nyaʼa yim ə Yeso nyaʼa nɨŋ əməd wò əkwɨ Kaifàs, əsɨ nɨ məchwiə̀ rɨ̀kə̌ mbɨ ə bə̂d kyeŋ mbe rɨŋga əbeŋ nyaʼa fə naanɨ əŋgu. Kaifàs yɨə nyaʼə ətu ɨgwɨ ə bə̂d mbàn Ŋwìə̀. 58Pità wɨə nyaʼə beenɨ əbɔʼ məd tɨgharɨgha. Wɨ̀ nyaʼa beenɨ əne wò pè ɨchû ɨkam ətu ɨgwɨ ə bə̂d mbàn Ŋwìə̀ we. Wɨ̀ nyaʼa nyɨ ɨŋga ɨkam we wò chubɨ mbɨ mənə̂ŋgɨ̀ mbàn Ŋwìə̀ ɨmbə̀ʼ zə ɨnwǐ.
59Bə̂d kyeŋ mbe rɨ ə mbàn Ŋwìə̀ mbɨ mə̀saʼ əbeŋ mbe mɨ̀jìm nyaʼa kɔ kəb bə̂d nɨ bɨrɨ gha mɨghab ɨgwɨ ə Yeso ɨmbə̀ʼ ɨ mbe tɨ̀ mbɨ zwiirɨ əməd. 60Mbɨ nyaʼa kə̀b àyɨə chəi mbɨ nyaʼa zə, ka à bè yeʼi ni bə̂d mɨ̀nɔnɔʼ nyaʼa jwɨ̀ wò ghà mɨ̀ghab ɨgwɨ məd ɨfě mɨ̀mə̌d. À nɨ pe ənɨ ɨnwǐ, mbaŋə̀ mɔʼɔ rɨbe nyaʼa jwɨ̀ wò ɨmbì 61ghà ni, “Mbe wɔ̂ kə̀ʼ ghà ni, 'Mə we tɨ̀ mə sàʼ mbàn Ŋwìə̀ wɨrɨ kod ənɨ ɨni tad.'”
62Ənɨ mbɨ nyaʼa ghà əne, ətu ɨgwɨ ə bə̂d mbàn Ŋwìə̀ nyaʼa nɔ̀ʼ rətiə biirɨ ni, “Chəi à berɨ ənû ə mɔʼɔ nɨ wììrɨ̀ ə? À gha ni ye ɨmbə̀ʼ ɨnû mbɔ̂ nɨ mbɨ zɨ ɨgwɨ ne ə?” 63Yeso nyaʼa kəm i rəziə. Əne ətu ɨgwɨ ə bə̂d mbàn Ŋwìə̀ we nyaʼa ghà ɨ bɔ ni, “Gha we rəsìʼ ənɨ ɨkum Ŋwiə̀ we nɨ yeʼ ɨkǎ ni àwɔ̀ yɨə Wə̀d we nɨ Ŋwìə̀ zɔʼɔ, nɨ yeʼ Wan Ŋwìə̀.”
64Yeso nyaʼa wììrɨ̀ ɨ bɔ ni, “À fə ghà əne. Àyɨə mə ghà ɨ nən ni, ɨ kɔ rɨ̀nîn, mbə bɨrɨ zə Wan Wə̀d nɨ chub əbà əbɔ ə jɨg ə Ŋwìə̀ we nɨ berɨ ɨka jìm, bə̀ zə ənɨ wɨə yeʼe ɨgwɨ ə pàʼ.”
65Ənɨ wɨ̀ nyaʼa ghà əne, ətu ɨgwɨ ə bə̂d mbàn Ŋwìə̀ we nyaʼa yim ti ngywɨ̌ sèèrɨ̀ ghà ni, “Wɨ̀ fə zɔ̀m ə Ŋwiə̀! Tɨ̀ kɨə wɨrɨə kə̀b mɨ̀zərɨmbin ɨmbə̀ʼ ə yè ə? Mbə fə zu ɨchî nɨ wɨ̀ zɔm ə Ŋwiə̀. 66Mbə sob ni yè ə?”
Mbɨ nyaʼa wììrɨ̀ ni, “Wɨ̀ fə gù, əne zɨə kùʼ ni mbɨ zwiirɨ əməd.” 67Ənɨ mbɨ nyaʼa ghà əne, mbɨ nyaʼa ched mad ənɨ ɨfě məd bə̀ som əməd. Mbɨ mɔʼɔ nyaʼa bə̀ nìbrɨ̀ əməd, 68ghà ni, “Àwɔ̀ we nɨ Ŋwiə̀ zɔʼɔ, kaŋ wə̀d we nɨ nib əwe!”
Pità nyaʼa ton ə Yeso
(Mk 14.66-72; Lk 22.56-62; Jn 18.15-18, 25-27)
69Pità nyaʼa chub ɨsɨg ɨŋga ɨkye ɨkam, əne wan əyi mɔʼɔ nɨ nyaʼə wə̀d ə̀fàʼì Kaifàs nyaʼa wò əsɨ məd pè ghà ɨ bɔ ni, “Àwɔ̀ bə̂ wɨə kə̀ʼ mbɨ Yeso we rɨ ə Galiliî.”
70Wɨ̀ nyaʼa ton ənû ze ɨfě bə̂d mɨ̀jìm ghà ni, “Chəi mə̀ kyerɨ ənû ze nɨ àwɔ̀ ə ghàə̀.” 71Ənɨ wɨ̀ nyaʼa ghà əne, wɨ̀ nyaʼa jwɨ̀ wò ɨchû ɨkam. Wan əyi ə̀fàʼì cherə zə nyaʼa əməd, əne ghà əmbɨ ə bə̂d mbe nɨ nyaʼa təmbɨ ɨban ɨban ni, “Mbaŋə̀ zɔ̂ wɨə kə̀ʼ mbɨ Yeso we rɨ ə Nazàret.”
72Pità nyaʼa bə̀ yì ton ənû ze, əne kàn ni, “Chəi mə̀ kyerɨ mbaŋə̀ ze nɨ àwɔ̀ ə ghàə̀!”
73Ənɨ əmad ə nyaʼa yì zòmbɨ, mbaŋə̀ te nɨ nyaʼa təmbɨ ɨban ɨban nyaʼa wò ghà əmbɨ Pità ni, “À yɨ kaŋ rəsìʼ ni àwɔ̀ yɨ wɨ mɔʼɔ rəbɔʼ mɨ̀mə̌d, ɨmbə̀ʼ ɨghəm nɨ ɨchî nɨ àwɔ̀ ə ghàm ə chwi ni àwɔ̀ yɨ rɨ ə Galiliî.”
74Əne Pità nyaʼa kɔ zɔm i ɨnyod kàn ni, “Ənɨ ɨkum Ŋwiə̀, chəi mə̀ kyerɨ mbaŋə̀ ze nɨ mbɨə ghàə̀.”
Àmei əwu əwən, ɨnoŋgub nyaʼa tɔŋ ə. 75Əne Pità nyaʼa kɔndɨ ɨŋgam we nɨ Yeso nyaʼa gha ɨ bɔ ni, “Bɔŋ ɨnoŋgub sɨə tɔŋə, à bɨrɨ fə ton əmɨ ɨghəm tad.” Ənɨ wɨ̀ nyaʼa kɔndɨ əne, wɨ̀ nyaʼa jwɨ̀ wò ɨsɨg chweŋ mɨsɨ kwàʼ rɨŋgəʼ.
Одоогоор Сонгогдсон:
Mt 26: mgo
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2013, Cameroon Association for Bible Translation and Literacy