Mt 19
19
Ənû nɨ saanɨ ɨnamɨ
(Mk 10.1-12)
1Ənɨ Yeso nyaʼa màànɨ̀ nɨ gha ɨnû mbɔ̂, wɨ̀ nyaʼa nɔ̀ʼ rɨ ə Galiliî, wò əbà əbeŋ ze rɨ ə Jùdeyà, ɨnjin ɨgyɨ̂ Jodàn. 2Mɨnɔ̂n bə̂d nyaʼa beenɨ əbɔʼ məd wò əŋgu, əne wɨ̀ nyaʼa vɨ̀ mbe nɨ nyaʼə wɔ̀nə̀.
3Mɨ̀Farisiî mɔʼɔ nyaʼa wò əsɨ məd ɨmbə̀ʼ kwaʼnɨ əməd. Əne mbɨ nyaʼa biirɨ ɨ bɔ ni, “Tɨkə ə wa chwiə ni mbaŋə̀ saanɨ ɨnamɨ mbɨ i ɨwi ɨmbə̀ʼ ənû ə mɔʼɔ ze nɨ wɨ̀ ghɨ̀ ə?”
4Wɨ̀ nyaʼa wììrɨ̀ ni, “Chəi mbə̀ kɨrɨ foŋ ni wə̀d we nɨ nyaʼa tekɨ bə̂d rɨ ənɨ ɨkɔ, nyaʼa tekɨ mɨ̀mə̌d mbaŋə̀ fɔrɨ əyi, 5əne ghà ni, 'À yɨ əton nɨ mbaŋə̀ bɨrɨ saŋ i mbǎʼ mbɨ i nɨŋ wò fɔtɨ mbɨ i ɨwi, əne mɨ̀mə̌d mbe mɨ̀be bɨrɨ sɨə nyamnyod mɔʼ ə'? 6Əne ka mbɨ yɨə wɨrɨ əwən bə̂d mɨ̀be. Mbɨ yɨə sɨə nyamnyod mɔʼ. Əne tɨ wə̀d mɔʼɔ saanɨ i bə̂d mbe nɨ Ŋwìə̀ fə fɔtɨ.”
7Mbɨ nyaʼa biirɨ ɨ bɔ ni, “Zɨə nɨə yeʼ əne, njɨ əton nɨ Mose nyaʼa sɨ ghà ni mbaŋə̀ berɨ naʼ ə̀ŋwàʼnɨ̀ nɨ chwi ni tə fə saanɨ ɨnamɨ mbɨ i ɨwi bɔŋ sɨə chɨ əməd rɨ ə nəb kɨ ɨmbə̀ʼ ə yè ə?”
8Yeso nyaʼa wììrɨ̀ ni, “Mose nyaʼa ben ni mbə̀ saanɨ ɨnamɨ mbɨ mbə məyi ɨmbə̀ʼ ɨghəm nɨ tə fîŋ ə kà. Kaʼi ɨchî nɨ zɨə nyaʼa we tɨ ənɨ Ŋwìə̀ nyaʼa tekɨ ɨsɨg. 9Əne mə ghà ɨ nən ni mbaŋə̀ mɔʼɔ mɨ saanɨ ɨnamɨ mbɨ i ɨwi, nam əyi cherə, nɨ kaʼi ni əyi we ə ni mbaŋə̀ cherə, njɨ wɨ̀ fə ni əyi cherə.”
10Mə̀mə̀ə̀nɨ̀-ɨnû ɨməd nyaʼa ghà ɨ bɔ ni, “À mɨ yeʼ ɨchî nɨ zɨə yeʼ we mbɨ ə mbaŋə̀ mbɨ i ɨwi, njɨ zɨə bɔ̀ŋ ni tɨ wə̀d nam i.”
11Wɨ̀ nyaʼa ghà əmbɨ mɨ̀mə̌d ni, “Chəi ənû zɔ̂ ə dè bə̂d mɨ̀jìm. Zɨə dè àmei mbe nɨ Ŋwìə̀ ghɨ ni mbɨ ben əne. 12Əton nɨ chəi mbaŋə̀ rɨ mɔʼɔ ə namə yɨ ni: à yɨ ɨchî nɨ mbɨ gywɨ mbɨ mɔʼɔ, à yɨə bə̂d zaʼ mbɨ mɔʼɔ, mbɨ mɔʼɔ ton ɨnamɨ ɨmbə̀ʼ ənû ɨfɔ̀n rɨkaŋ. Wə̀d we nɨ tɨ̀ wɨ̀ ben ənû zɔ̂, wɨ̀ benɨ.”
Yeso nyaʼa zɨ̀ əbɔrəbɔd ɨgun ə bɔn kwa
(Mk 10.13-16; Lk 18.15-17)
13Bə̂d mɔʼɔ mbɨə nyaʼə nɨŋə bɔn kwa wò əsɨ Yeso ɨmbə̀ʼ wɨ̀ zab mbi ɨbɔ bə̀ kɔ̀ŋgɨ̀ ə Ŋwiə̀ ɨgwɨ mɨ̀mə̌d. Mə̀mə̀ə̀nɨ̀-ɨnû ɨməd nyaʼa ghàm əbɔʼ ə bə̂d mbe.
14Àyɨə Yeso nyaʼa ghà ni, “Mbə̀ saŋ bɔn kwa mbe yeʼe əsɨ num. Tɨ mbə̀ kən ə mɨ̀mə̌d, ɨmbə̀ʼ ɨghəm nɨ à yɨə bə̂d ɨghabɨ mbɔ̂ bɨrɨ jɨg ənû ɨfɔ̀n rɨkaŋ.” 15Ənɨ wɨ̀ nyaʼa ghà əne, wɨ̀ nyaʼa zab mbi ɨbɔ ɨgun ə bɔn mbe, nɔ̀ʼ wo i.
Ənû ɨmbə̀ʼ əjɔŋ nɨ nyaʼa berɨ mbɔ̂n
(Mk 10.17-31; Lk 18.18-30)
16Mbaŋə̀ mɔʼɔ nyaʼa wò əsɨ Yeso pè biirɨ ɨ bɔ ni, “Əchwiə̀-ɨnû, ənû ə chɔ̀m ze nɨ tɨ̀ mə ghɨ̀ bɔŋ jɨg ɨ̀tènɨ̀ rɨ mì kɨ ə zi ə?”
17Yeso nyaʼa wììrɨ̀ ɨ bɔ ni, “À biirɨ ɨ num ɨmbə̀ʼ ənû ə chɔ̀m ɨmbə̀ʼ ə yè ə? Wə̀d nɨ bɔŋɨ mei we mɔʼ. Əne à mɨ kə̀b jɨg ɨ̀tènɨ̀, à berɨ nùŋ tɨkə rɨ Ŋwiə̀.”
18Mbaŋə̀ ze nyaʼa biirɨ ni, “Tɨkə ti ə?”
Yeso nyaʼa ghà ɨ bɔ ni, “Tɨrə̀ zwiirɨ e wə̀d. Tɨrə̀ ni e əyi cherə kɨ̀ mbaŋə̀ cherə. Tɨrə̀ jɨ e. Tɨrə̀ ben e zərɨmbin mɨ̀ghab. 19Wumnɨ e mbǎʼ mbɨ e nɨ̌ŋ, bə̀ ghaʼ wə̀d nɨ tindɨ ɨban ne ɨchî nɨ à ghaʼ e nyamnyod.”
20Əjɔŋ ze ə nyaʼa ghà ɨ bɔ ni, “Mə wɨə nùŋə̀ rɨkə tɔ̂ rɨ̀jìm. À kɨə ye sɨ bu rɨ num ə?”
21Yeso nyaʼa ghà ɨ bɔ ni, “À mɨ kə̀b bɔ̀ŋ màànɨ̀, ndə̀ wo fèndɨ̀ ɨghɨjìm mbe nɨ à berɨ, wò nàʼ ɨkab we əmbɨ ə bə̂d ɨkwaŋ, əne à bɨrɨ berɨ mbɔ̂n ɨkaŋ. À mɨ ghɨ̀ əne, à yeʼe beenɨ əbɔʼ num.”
22Ənɨ əjɔŋ ze ə nyaʼa zu ənû zɔ̂, wɨ̀ nyaʼa kə̀nə̀, əne nɔ̀ʼ wò i, ɨmbə̀ʼ ɨghəm nɨ wɨ̀ nyaʼa kaŋ berɨ ɨghɨ nɔnɔʼ.
23Yeso nyaʼa sɨ ghà əmbɨ mbi mə̀mə̀ə̀nɨ̀-ɨnû ni, “Mə ghà rəsìʼ ɨ nən ni zɨə bɨrɨ se əmbɨ wə̀d mbɔ̂n nɨ nyɨ ɨŋga ənû ɨfɔ̀n rɨkaŋ. 24Mə yì ghà ɨ nən ni, zɨə zàm əmbɨ ə kàmel nɨ chè ɨbɨgɨ saʼ, chè ɨchî nɨ wə̀d mbɔ̂n bɨrɨ nyɨ ɨŋga ənû ɨfɔ̀n ə Ŋwiə̀.”
25Ənɨ mə̀mə̀ə̀nɨ̀-ɨnû mbe nyaʼa zu ənû zɔ̂, mbɨ nyaʼa yiirɨ kwàʼ rɨŋgəʼ, əne gha ni, “Zɨə nɨə yeʼ əne, njɨ à kɨə we nɨ tɨ̀ wɨ̀ jwɨ̀ rəŋgəʼ ə?”
26Yeso nyaʼa nèŋ mɨ̀mə̌d əne ghà ni, “Ənû ə zɨə chè yeʼ bə̂d, àyɨə chəi ənû ə mɔʼɔ nɨ tɨ̀ zɨə che ə Ŋwiə̀.”
27Pità nyaʼa ghà ɨ bɔ ni, “Zə, tɨ̀ fə sàŋ ɨghɨjìm beenɨ əbɔʼ nè. Tɨ̀ kɨə wo berɨ ye ə?”
28Yeso nyaʼa ghà əmbɨ mɨ̀mə̌d ni, “Mə ghà rəsìʼ ɨ nən ni, ənɨ Wan Wə̀d bɨrɨ chub ɨgun e ətən ɨfɔ̀n ɨŋga ɨsɨg fi, mbə̀n mbɔ̂ nɨə beenɨ əbɔʼ num bɨrɨ bɨ chub ɨgun ɨtən ɨfɔ̀n wum chɔ̀b rɨ̀be, ɨ saʼ mɨnəbɨ mɨ̀Izre mbe wum chɔ̀b rɨ̀be. 29Wə̀d jìm we nɨ saŋ ti nəb, kɨ̀ mbi bɔŋgɔb mbaŋə̀ kɨ̀ mbɨ məyi, kɨ̀ i mbǎʼ, kɨ̀ i nɨŋ, kɨ̀ mbi bɔn, kɨ̀ mbi ɨsɨ si ɨmbə̀ʼ beenɨ əbɔʼ num, bɨrɨ wɨrɨ berɨ ɨghɨ ɨghəm ɨkɨ fibɨ̀, bə̀ jɨg ɨ̀tènɨ̀ rɨ mì. 30Àyɨə bə̂d mɨ̀nɔnɔʼ mbe nɨ yeʼ mbɨ rɨmbì, bɨrɨ yeʼ mbe nɨ sɨ nwìə̀. Mbe nɨ sɨ nwìə̀ sɨ yeʼ mbɨ rɨmbì.”
Одоогоор Сонгогдсон:
Mt 19: mgo
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2013, Cameroon Association for Bible Translation and Literacy