Mt 18
18
We nɨ yeʼ wɨ kyeŋ ɨŋga ənû ɨfɔ̀n rɨkaŋ
(Mk 9.33-37; Lk 9.46-48)
1À nyaʼa ənɨ ə nyùmə̀ we, mə̀mə̀ə̀nɨ̀-ɨnû Yeso nyaʼa wò əsɨ məd pè biirɨ ni, “We nɨ yeʼ wɨ kyeŋ ɨŋga ənû ɨfɔ̀n rɨkaŋ kɨ wi ə?”
2Ənɨ wɨ̀ nyaʼa zu ɨbiirɨ we, wɨ̀ nyaʼa tɔŋ wan kwa mɔʼɔ ghɨ̀ wɨ̀ təm ɨfě mɨ̀mə̌d, 3əne ghà ni, “Mə ghà rəsìʼ ɨ nən ni, mbə mɨ rɨ beŋ əwən sɨ ɨghabɨ bɔn kwa, njɨ chəi mbə bɨrɨ nɔ nyɨ ɨŋga ənû ɨfɔ̀n rɨkaŋ. 4Wə̀d mɔʼɔ we nɨ swi i ɨnyod sɨ ɨghabɨ ə wan kwa wɔ̂, yɨ wɨ kyeŋ ɨŋga ənû ɨfɔ̀n rɨkaŋ. 5Wə̀d mɔʼɔ we nɨ nɨŋ wan kwa mɔʼɔ ɨghabɨ wɔ̂ ənɨ mɨ ɨkum, fə bə̀ nɨŋ əmɨ.
Ɨnû mbe nɨə ghɨ̀ ni wə̀d ghɨ ɨnû rɨbɔ̀ŋ
(Mk 9.42-48; Lk 17.1-2)
6“Wə̀d mɔʼɔ rəbɔʼ nən mɨ ghɨ̀ ni wan kwa mɔʼɔ rəbɔʼ mbɔ̂ nɨ ben əmɨ ghɨ ənû rɨbɔ̀ŋ, njɨ zɨə bɨrɨ bɔ̀ŋ ni mbɨ tiŋ ɨti ŋgə̀ŋ kyeŋ ədɔʼ ɨ bɔ wò màʼ ɨŋga rɨ̀bàà we nɨ jeŋgɨ sà ɨŋga.
7“Ŋgəʼ bɨrɨ nyɨ ɨgwɨ ɨsɨg ɨmbə̀ʼ ɨnû mbe nɨə ghɨ̀ə̀ ni bə̂d ghɨ ənû rɨbɔ̀ŋ! Ɨnû mbe nɨə ghɨ̀ ni bə̂d ghɨ ɨnû rɨbɔ̀ŋ berɨ yeʼe, àyɨə ŋgəʼ bɨrɨ nyɨ ɨgun ə wə̀d we nɨ ɨnû mbe nɨə ghɨ̀ ni bə̂d ghɨ ɨnû rɨbɔ̀ŋ che ənjìm məd yeʼe! 8E əbɔ kɨ̀ e əwu ə mɨ ghɨ̀ ni à ghɨ ənû rɨbɔ̀ŋ, sob waʼ. Zɨə bɔ̀ŋ ni à jɨg ɨ̀tènɨ̀ mbɨ əbɔ ə mɔʼ, kɨ̀ mbɨ əwu ə mɔʼ, chè ɨchî nɨ à bɨrɨ berɨ ɨbɔ be kɨ̀ ɨwu be, mbɨ màʼ əwe ɨŋga ɨwid rɨ nìmə. 9E ɨghə mɨ ghɨ̀ ni à ghɨ ənû rɨbɔ̀ŋ, chɔʼ waʼ. Zɨə bɔ̀ŋ ni à jɨg ɨ̀tènɨ̀ mbɨ ɨghə mɔʼ, chè ɨchî nɨ à bɨrɨ berɨ əghə əbe, mbɨ màʼ əwe ɨŋga əsɨ ɨchə nɨ chəi ɨwid ə nɔ nìmə.”
Ənû ə mɨgɨ ɨmbə̀ʼ njɨ̀g nɨ nyaʼa nimɨ
(Lk 15.3-7)
10“Mbə̀ zə ni tɨ mbə̀ təənɨ ə wan kwa mɔʼɔ rəbɔʼ mbɔ̂ nɨ ben əmɨ. Mə ghà ɨ nən ni, ɨkaŋ, mbɨ̀aŋgɨrə̀ mɨ̀mə̌d mbɨə zə ɨfě mɨ Mbǎʼ we nɨ yeʼ ɨkaŋ ənɨ mɨ̀nyùmə̀ jìm. 11[Wan Wə̀d nyaʼa yeʼe ɨmbə̀ʼ chɨ bə̂d mbe nɨ nyaʼa nim rəŋgəʼ.]
12“Mbə kɔn əzən ni yè ə? Mbaŋə̀ mɔʼɔ mɨ berɨ njɨ̀g ɨkɨ fibɨ̀, zɨ mɔʼ fèbə̀, ka wɨ̀ wa bɨrɨ saŋ i tɨ cherə te ɨwum ə̀bùə chɔ̀b ə̀bùə ɨkaŋ ɨwum, bè wò kə̀b zɨ mɔʼ ze nɨ feb ə? 13Mə ghà rəsìʼ ɨ nən ni, wɨ̀ mɨ nɨə zə, wɨ̀ bɨrɨ ghaʼ kwàʼ rɨŋgəʼ ɨmbə̀ʼ njɨ̀g ze mɔʼ, chè ɨchî nɨ tɨ̀ wɨ̀ ghaʼ ɨmbə̀ʼ te ɨwum ə̀bùə chɔ̀b ə̀bùə nɨ chəi tɨ nyaʼa febə. 14Əne kaʼ à yɨə bəi ɨkɔndɨ mɨ Mbǎʼ we nɨ yeʼ ɨkaŋ ni wan kwa mɔʼɔ rəbɔʼ mbɔ̂ nim.
Aŋgɔb nɨ ghɨ ənû rɨbɔ̀ŋ
15“We aŋgɔb mɨ ghɨ ənû rɨbɔ̀ŋ ənɨ ə ne, ndə̀ wo ghà ɨgu-ənû məd ɨ bɔ, àmei mbə̀n mbe mɨ̀be. Wɨ̀ mɨ zu ənû ze nɨ àwɔ̀ ə ghàə̀, əne à fə wɨrɨ nɨŋ əməd rəbɔʼɔ. 16À mɨ yeʼ nɨ chəi wɨ̀ zu ənû ze nɨ àwɔ̀ ə ghàə̀, nɨŋ wə̀d cherə mɔʼ kɨ̀ bə̂d cherə mɨbe mbə̀ wò ɨnɔ̂n, ɨmbə̀ʼ mɨ̀zərɨmbin mɨ̀be kɨ̀ mɨtad təm ben ɨnû mbe nɨ àwɔ̀ ə ghà ɨmbə̀ʼ we aŋgɔb. 17Wɨ̀ mɨ ton zwetɨ i əmbɨ mɨ̀mə̌d, gha ənû rəŋgu əmbɨ ɨfetɨ bə̂d Ŋwiə̀. Wɨ̀ mɨ ton zwetɨ i əmbɨ ɨfetɨ bə̂d Ŋwiə̀, à sɨ ghɨ̀ mbɨ məd ɨghabɨ ni chəi wɨ̀ kyerɨ ə Ŋwiə̀ kɨ̀ ɨghabɨ ni məd yɨ əfetɨ mɨ̀tagsɨ̀.
Ənû nɨ bə̂d benɨ mbɨ ənû nɨ bə̂d tonɨ
18“Mə ghà rəsìʼ ɨ nən ni, ɨnû mbe nɨ mbə̀ ben ɨgwɨ ə si, Ŋwìə̀ bɨrɨ bɨ ben ɨkaŋ, mbe nɨ mbə̀ ton ɨgwɨ ə si, Ŋwìə̀ bɨrɨ bɨ ton ɨkaŋ.
19“Mə yì ghà ɨ nən ni, mbən mɨbe mɨ ben ənû ə mɔʼɔ ɨgwɨ ə si, nɔn rɨ əmbɨ mɨ Mbǎʼ, mɨ Mbǎʼ nɨ yeʼ ɨkaŋ bɨrɨ ghɨ ənû ze nɨ mbə̀ nɔnɨ, 20ɨmbə̀ʼ ɨghəm nɨ əsɨ ze nɨ bə̂d mɨ̀be, kɨ̀ bə̂d mɨ̀tad fetɨ əŋgu ənɨ mɨ ɨkum, mə wɨ əkaʼ mɨ̀mə̌d.”
Ənû ə mɨgɨ ɨmbə̀ʼ wə̀d ə̀fàʼì nɨ chəi wɨ̀ nyaʼa waʼ ɨgu ənû wɨ cherə
21Pità nyaʼa wò biirɨ əmbɨ Yeso ni, “Ə̀nùŋɨ̀sɨg, wum aŋgɔb mɨ ghɨ̀ ənû rɨbɔ̀ŋ ənɨ ə num, mə kɨə wo waʼ ɨnû rɨbɔ̀ŋ məd ɨghəm səʼ ə? Mə̀ wa waʼ ɨghəm sambe ə?”
22Yeso nyaʼa wììrɨ̀ ɨ bɔ ni, “Mɨ rɨka ghà əmɨ ni à yɨ ɨghəm sambe. Mə ghà yeʼ ni à yɨ ɨghəm ɨwum sambe ɨghəm sambe. #18.22Ɨwum sambe ɨghəm sambe kɨ̀ ɨghəm ɨwum sambe chɔ̀b sambe.
23“Əton nɨ mə̀ ghà əne yɨ ɨmbə̀ʼ ɨghəm nɨ ənû ɨfɔ̀n rɨkaŋ yɨ ɨghabɨ ɨchî nɨ ɨfɔ̂n mɔʼɔ nyaʼa kə̀b nweenɨ i ɨkab mbɨ mbi bə̂d ə̀fàʼì. 24Wɨ̀ nyaʼa mɨ kɔ i kɔ nɨ nweenɨ ɨkab we, mbɨ nyaʼa nɨŋ wə̀d ə̀fàʼì mɔʼɔ wò əsɨ məd nɨ nyaʼa yim əməd mɨ̀fraŋ əkam wum. 25Ɨchî nɨ chəi wɨ̀ nyaʼa berɨ ɨkab nɨ wì, mbǎʼ ə̀fàʼì məd we nyaʼa ghà ni mbɨ fen əməd mbɨ ɨwi məd fɔrɨ bɔn bə̀ fèn ɨghɨjìm mbe nɨ wɨ̀ berɨ, ɨmbə̀ʼ wi njɔ̌ ze. 26Wə̀d ə̀fàʼì we nyaʼa chìndɨ̀ ɨtu ɨnywɨ ə si, buʼ ɨbɔ ɨ bɔ ghà ni, 'Masà, tɔ yim fîŋ, mə bɨrɨ wi e ɨkab jìm.' 27Ɨfɔ̂n we nyaʼa dììrɨ̀ əməd, sàŋɨ̀, əne ghà ni tɨ wɨ̀ wɨrɨ wi i njɔ̌ ze.
28“Àyɨə ənɨ wə̀d ə̀fàʼì we nyaʼa jwɨ̌, wɨ̀ nyaʼa kɔɔrɨ wə̀d ə̀fàʼì cherə nɨ nyaʼa yim əməd chuʼ ɨkɨ fibɨ̀. Əne wɨ̀ nyaʼa chè əməd ənɨ ədɔʼ yimɨ, ghà ni, 'Wi mɨ ɨkab we nɨ à yimɨ.' 29Wə̀d ə̀fàʼì we nyaʼa nòkɨ̀ ə si rəkubə, buʼ ɨbɔ ɨ bɔ ghà ni, 'Tɔ yim fîŋ, mə bɨrɨ wi e ɨkab.' 30Wɨ̀ nyaʼa ton i, əne nɨŋ əməd wò zɨ ə ndəŋ ni wɨ̀ chub əŋgu pè ənɨ wɨ̀ wǐ njɔ̌ ze. 31Ənɨ bə̂d ə̀fàʼì cherə nyaʼa zə ənû ze, zɨə nyaʼa tɔb mɨ̀mə̌d, əne mbɨ nyaʼa wò ghà ənû ze nɨ nyaʼa ghɨ̌ əmbɨ ɨfɔ̂n we. 32Ɨfɔ̂n we nyaʼa tɔŋ əməd ghà ɨ bɔ ni, 'Àwɔ̀ wə̀d ə̀fàʼì wɔ̂ yɨə kàŋ ɨzɨg! Mə kə̀ʼ sàŋ e njɔ̌ ze jìm ɨmbə̀ʼ ɨghəm nɨ à kəʼ buʼ ɨbɔ ɨ num. 33Njɨ ɨmbə̀ʼ à bə̀ kə̀ʼ dììrɨ̀ we aŋgɔb ɨchî nɨ mə̀ kəʼ dììrɨ̀ əwe ə?' 34Ɨfɔ̂n we nyaʼa sə ɨtəm ghà mbɨ nɨŋ əməd wò zɨ ə ndəŋ ɨmbə̀ʼ wɨ̀ chub əŋgu pè ənɨ wɨ̀ wi njɔ̌ ze jìm.
35“À yɨ ɨchî nɨ mɨ Mbǎʼ rɨkaŋ bɨrɨ ghɨ̀ mbɨ wə̀d mɔʼ mɔʼ rəbɔʼ nən əwù ze nɨ chəi mbə̀ waʼ ɨnû rɨbɔ̀ŋ wən aŋgɔb ənɨ tə fîŋ jìm.”
Одоогоор Сонгогдсон:
Mt 18: mgo
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2013, Cameroon Association for Bible Translation and Literacy