Mt 12
12
Ɨbiirɨ ɨmbə̀ʼ əni əkwɨ mɨ̀Jû
(Mk 2.23-28; Lk 6.1-5)
1À nyaʼa ənɨ ə nyùmə̀ we, Yeso mbɨ mbi mə̀mə̀ə̀nɨ̀-ɨnû mbɨə nyaʼə che ɨŋga mbeŋ kywɨ-kɔ̀ʼ #12.1Kywɨ-kɔ̀ʼ yɨ ɨkwɨ kywɨ̀ mɔʼɔ nɨə kɔ ənɨ rɨsaŋ. əni əkwɨ mɨ̀Jû. Njì rɨ nyaʼə zaŋə mə̀mə̀ə̀nɨ̀-ɨnû mbe, əne mbɨ nyaʼa kɔ paarɨ rɨtam kywɨ̀ kurə. 2Ənɨ mɨ̀Farisiî nyaʼa zə ənû ze, mbɨ nyaʼa ghà əmbɨ Yeso ni, “Zə, mbe mə̀mə̀ə̀nɨ̀-ɨnû mbɨə ghɨ̀ ənû nɨ chəi ta rɨkə chwi ni mbɨ ghɨ əne əni əkwɨ!”
3Wɨ̀ nyaʼa wììrɨ̀ əmbɨ mɨ̀mə̌d ni, “Chəi mbə̀ kɨrɨ foŋ ənû ze nɨ ɨfɔ̂n Dèvîd nyaʼa ghɨ̌, ənɨ njì rɨ nyaʼa zaŋ əməd bə̀ zaŋə bə̂d mbe nɨ nyaʼa mbɨ məd ə? 4Wɨ̀ nyaʼa wò nyɨ ɨŋga nəb Ŋwiə̀, əne məd mbɨ ə bə̂d mbe nɨ nyaʼa mbɨ məd nyaʼa jɨg ŋgə̀ŋ ze nɨ mbɨ nyaʼa nùŋ ənɨ əghɨ ə̀fà ɨfě Ŋwiə̀. Chəi rɨkə nyaʼa chwi ni mbɨ jɨg ŋgə̀ŋ ze. Àmei bə̂d mbàn Ŋwìə̀ nyaʼa berɨ jɨg ŋgə̀ŋ ze. 5Kɨ̀ chəi mbə̀ bə kɨrɨ foŋ ɨŋga tɨkə rɨ Mose ni bə̂d mbàn Ŋwìə̀ mbɨə gùə̀ rɨkə əni əkwɨ, àyɨə mbɨ kɨrɨ chub ɨghabɨ ə bə̂d nɨ chəi mbɨ gu ənû ə? 6Mə ghà ɨ nən ni, əghɨ ə mɔʼɔ zɨ əgha nɨ dabə chè mbàn Ŋwìə̀. 7Mbə mɨ kə̀ʼ kyerɨ əton ənɨ ɨŋgam Ŋwiə̀ we nɨ ghà ni, 'Mə kə̀b yeʼ ni bə̂d diirɨ mbɨ cherə, kaʼi ni mbɨ naʼ ɨghɨ ə̀fà ɨ num,' njɨ chəi mbə̀ zɨ ɨsaʼi ɨgwɨ ə bə̂d mbe nɨ chəi mbɨ gu ənû. 8Əne mbə̀ kyerɨ ni Wan Wə̀d yɨ Ə̀nùŋɨ̀sɨg fɔrɨ ɨgwɨ əni əkwɨ.”
Yeso nyaʼa vɨ̀ mbaŋə̀ nɨ əbɔ əməd ə nyaʼa nə̀ŋɨ
(Mk 3.1-6; Lk 6.6-11)
9Yeso nyaʼa nɔ̀ʼ rɨ əsɨ ze, wò nyɨ ɨŋga nəb ə̀kàtɨ̀ ze nɨ nyaʼa əsɨ ze. 10Mbaŋə̀ mɔʼɔ nyaʼa əŋgu nɨ əbɔ əməd ə nyaʼa nə̀ŋɨ. Əne mɨ̀Farisiî nyaʼa biirɨ ɨ bɔ ni, “Tɨkə ə wa chwi ni mbɨ vɨ wə̀d əwɔn əni əkwɨ ə?” Mbɨ nyaʼa biirɨ əne ɨmbə̀ʼ ɨghəm nɨ mbɨ nyaʼa kəb zɨ ɨsaʼi ɨgwɨ məd.
11Wɨ̀ nyaʼa wììrɨ̀ əmbɨ mɨ̀mə̌d ni, “À kɨə we rəbɔʼ nən nɨ berɨ i njɨ̀g mɔʼ, nɨ zɨ̀ mɨ feŋ ɨŋga ɨbɨgɨ əni əkwɨ, nɨ chəi wɨ̀ bɨrɨ yim sùŋ chà əsaŋ ə? 12Wə̀d yɨ əghɨ əka ɨnùn chè njɨ̀g! Əne tɨkə ə chwi ni mbɨ ghɨ ɨ̀chɔ̀m əni əkwɨ.” 13Ənɨ wɨ̀ nyaʼa gham əne, wɨ̀ nyaʼa ghà əmbɨ mbaŋə̀ ze ni, “Sem e əbɔ.” Wɨ̀ nyaʼa sèm, əne əbɔ əməd ə nyaʼa wɨrɨ kà i ɨghabɨ əzɨ̂n. 14Ənɨ mɨ̀Farisiî mbe nyaʼa zə əne, mbɨ nyaʼa jwɨ̀ wò taŋ ɨchî nɨ mbɨ bɨrɨ zwiirɨ ə Yeso.
Wə̀d ə̀fàʼì we nɨ Ŋwìə̀ chɔʼɔ
15Yeso nyaʼa kyerɨ ni ɨ mbɨ nyaʼə taŋ mɨnaŋ ɨgwɨ ni, əne wɨ̀ nyaʼa nɔ̀ʼ rɨ əsɨ ze. Bə̂d mɨ̀nɔnɔʼ nyaʼa beenɨ əbɔʼ məd, əne wɨ̀ nyaʼa vɨ̀ bə̂d əwɔn mɨjìm mbe nɨ nyaʼa əkaʼ mɨ̀mə̌d. 16Ənɨ wɨ̀ nyaʼa vɨ̀ əne, wɨ̀ nyaʼa patɨ mɨ̀mə̌d ni tɨ mbɨ tɔ ghɨ̀ ə ni bə̂d kyerɨ wə̀d we nɨ tə yeʼ wɨwən. 17Wɨ̀ nyaʼa ghà əne ɨmbə̀ʼ ɨŋgam we nɨ Ŋwìə̀ nyaʼa che ənjìm i wə̀d ɨ̀kə̀n Aizayà gha, wɨ jwɨ̀ ənɨ rəsìʼ ni,
18“Mbə̀ zə, wɔ̂ yɨ mɨ wə̀d ə̀fàʼì we nɨ mə̀ fə chɔʼɔ.
Mə ghaʼ əməd kwàʼ rɨŋgəʼ. Mɨ fîŋ ə bɔ̀ŋ əku ɨmbə̀ʼ əməd.
Mə bɨrɨ cha mɨ Əzwî ɨŋga məd,
əne wɨ̀ bɨrɨ ghà əmbɨ ɨbeŋ mbe nɨ kaʼi mbɨ mɨ̀Jû ni mə bɨrɨ saʼ mɨ̀mə̌d ɨchî nɨ kuʼnɨ.
19Ka wɨ̀ bɨrɨ taŋ i, kɨ̀ be kyeŋ rɨkǎ.
Chəi bə̂d bɨrɨ zu gɨ̂ məd ɨtu ɨzib.
20Ka wɨ̀ bɨrɨ buʼ i tə̀saʼnɨ nɨ gumə,
kɨ̀ be nimnɨ ənam ze nɨə sɨə nimə,
pè ənɨ wɨ̀ fə ghɨ ni ɨnû nɨ kuʼnɨ jɨg ɨsɨg.
21Ɨbeŋ jìm bɨrɨ nuŋ tə rɨkɔndɨ ɨgwɨ məd.”
Mɨ̀Farisiî nyaʼa ghà ni à yɨə Belzebùl naʼ ɨka əmbɨ Yeso
(Mk 3.20-30; Lk 11.14-23)
22Bə̂d mɔʼɔ nyaʼa nɨŋ mbaŋə̀ nɨ əzwî rɨbɔ̀ŋ ə nyaʼa ɨŋga məd wò əsɨ Yeso mbɨ məd. Mbaŋə̀ ze yɨə nyaʼa ɨfɨgɨ bə̀ fɔrɨ tɨ̀ghàm. Mbɨ nyaʼa wò əne, Yeso vɨ̀ əməd, wɨ̀ wɨrɨ kɔ ghamɨ bə̀ kɔ zə ɨsɨ. 23Bə̂d mɨ̀jìm nyaʼa zə əne yiirɨ ghà ni, “Tɨ̀ mbɨ nàʼ wɔ̂ yɨə Wan Dèvîd ə?”
24Ənɨ mɨ̀Farisiî nyaʼa zu ənû ze, mbɨ nyaʼa ghà ni, “Mbaŋə̀ zɔ̂ zɨə chɨ̀ ɨzwî rɨbɔ̀ŋ ənɨ ɨka nɨ Belzebùl nɨ yeʼ ɨfɔ̂n ɨzwî rɨbɔ̀ŋ naʼ ɨ bɔ.”
25Yeso nyaʼa kyerɨ tɨkɔndɨ tɨ mɨ̀mə̌d, əne wɨ̀ nyaʼa ghà əmbɨ mɨ̀mə̌d ni, “Əbeŋ ə mɨ ghàbrə̀ əkəmɨ kəmɨ, kɔ zɔŋɨ mbənə mbənə, əbeŋ ze ə bɨrɨ beŋ ənɨ rɨ̀fùm. Əsɨ mɔʼɔ kɨ̀ əkwɨ mɔʼɔ ə mɨ ghàbrə̀ əkəmɨ kəmɨ kɔ zɔŋɨ, ka əsɨ ze kɨ̀ əkwɨ ze ə bɨrɨ təm i. 26Satàn mɨ yeʼə chɨ̀ ə Satàn, njɨ wɨ̀ fə ghàbrɨ̀ i ɨnyod. Ənû ɨfɔ̀n əməd ə kɨə wo təm rɨ ye ə? 27Mə mɨ yeʼə chɨ̀ ɨzwî rɨbɔ̀ŋ ənɨ ɨka nɨ Belzebùl naʼ ɨ num, njɨ mbə bɔn kɨə sɨə chɨ̀ ənɨ ɨka nɨ we naʼ əmbɨ mɨ̀mə̌d ə? Mbə̀ kyerɨ ni à yɨ mbə bɔn bɨrɨ saʼ əwən. 28Àyɨə mə mɨ yeʼə chɨ̀ ənɨ ɨka nɨ Əzwî ə Ŋwiə̀ naʼ ɨ num, njɨ zɨə chwɨə ni ənû ɨfɔ̀n ə Ŋwiə̀ ə fə sɨ i mbɨ nən.
29“Kɨ̀ tɨ mbɨ nàʼ wə̀d mɔʼɔ wò nyɨ ɨŋga nəb wə̀d nɨ berɨ ɨka, əne bèʼrɨ̀ ɨghɨ məd nɨ chəi wɨ̀ be kod əməd ə? Wɨ̀ berɨ be kod əməd bɔŋ beʼrɨ ɨghɨ məd.
30“Wə̀d we nɨ chəi əməd mbɨ num yɨ mɨ wə̀d pə̀n. We nɨ chəi wɨə fetɨə mbɨ num wɨə jàŋə̀. 31Əne mə ghà ɨ nən ni Ŋwìə̀ bɨrɨ waʼ ɨnû rɨbɔ̀ŋ jìm bə̀ waʼ mɨzɔ̂m mbe nɨ mbɨə zɔ̀m ə Ŋwiə̀ əŋgu, àyɨə ka wɨ̀ bɨrɨ waʼ i ɨnû rɨbɔ̀ŋ bə̂d mbe nɨə zɔ̀m Əzwî ə Zeŋɨ. 32Ŋwìə̀ bɨrɨ waʼ ɨnû rɨbɔ̀ŋ wə̀d mɔʼɔ we nɨ gha ɨŋgam rɨbɔ̀ŋ ɨmbə̀ʼ ə Wan Wə̀d, àyɨə chəi wɨ̀ bɨrɨ waʼ mbɨ wə̀d we nɨ gha ɨŋgam rɨbɔ̀ŋ ɨmbə̀ʼ Əzwî ə Ŋwiə̀, kɨ̀ à kɨ ɨŋga ɨsɨg wɔ̂, kɨ̀ ɨŋga ɨsɨg we nɨ bɨrɨ yeʼe.
Ənû ɨmbə̀ʼ əzed mbɨ ti rɨtamɨ
(Lk 6.43-45)
33“Əzed mɨ bɔ̀ŋ, tɨtam məd bɨrɨ bɨ bɔ̀ŋ. Əzed mɨ bə, tɨtam məd bɨrɨ bɨ bə. Bə̂d mbɨə kyerɨ əzed tɨ ənɨ tɨtam məd. 34Mbə yɨə jɔ tɨ rɨbɔ̀ŋ! Mbə̀ kɨə wo gha ənû ə chɔ̀m rɨ yè nɨ mbə yeʼ bə̂d nɨə ghɨ̀ ɨnû rɨbɔ̀ŋ ə? Ɨchû wɨə ghàə̀ yeʼ ɨnû mbe nɨ yeʼ ɨŋga fîŋ. 35Wə̀d chɔ̀m wɨə chɨ̀ ɨghɨ chɔ̀m rɨŋga ŋgə̌n chɔ̀m ze nɨ yeʼ ɨŋga məd. Wə̀d rɨ̀bɔ̀ŋ wɨə chɨ̀ ɨnû rɨbɔ̀ŋ rɨŋga ŋgə̌n rɨ̀bɔ̀ŋ ze nɨ yeʼ ɨŋga məd. 36Mə ghà ɨ nən ni əni ze nɨ Ŋwìə̀ bɨrɨ sob mɨsaʼi, bə̂d mɨ̀jìm bɨrɨ nàʼ əton ənɨ mɨŋgam əko mɔʼɔ mbe nɨ mbɨ ghamɨ. 37À yɨ ənɨ e ɨŋgam nɨ à bɨrɨ jɨg ɨsaʼi. À yɨ bə̀ ənɨ e ɨŋgam nɨ mbɨ bɨrɨ zɨ ɨsaʼi ɨgwɨ ne.”
Məchwiə̀ rɨkə mbɨ mɨ̀Farisiî nyaʼa ghà ni Yeso ghɨ ənû ə yiirɨ
(Mk 8.11; Lk 11.29-32)
38Məchwiə̀ rɨ̀kə̌ mɔʼɔ mbɨ mɨ̀Farisiî mɔʼɔ nyaʼa ghà əmbɨ Yeso ni, “Əchwiə̀-ɨnû, tɨ̀ kə̀b ni à ghɨ ənû ə yiirɨ tɨ̀ zə.”
39Wɨ̀ nyaʼa wììrɨ̀ əmbɨ mɨ̀mə̌d ni, “Ɨghəm bə̂d wɔ̂ rɨ̀nîn nɨə ghɨ̀ ɨnû rɨbɔ̀ŋ, nɨ chəi mbɨə nùŋə̀ fîŋ ɨgun ə Ŋwiə̀. Ɨ mbɨə kə̀bə̀ ni mə̀ ghɨ ənû ə yiirɨ, àyɨə chəi ənû ə yiirɨ nɨ mə̀ bɨrɨ ghɨ̀ chè rɨ ənɨ ənû yiirɨ ze nɨ nyaʼa ghɨ̌ ənɨ wə̀d ɨ̀kə̀n Ŋwìə̀ Jonà. 40Ɨchî nɨ Jonà nyaʼa chub ɨŋga ɨbum ɨgwi kyeŋ ɨzi ɨtad mbɨ əzimɨ ətad, yɨə bə̀ ɨchî nɨ Wan Wə̀d bɨrɨ chub ɨzi ɨtad mbɨ əzimɨ ətad ɨŋga si. 41Ɨgwɨ əni ze nɨ Ŋwìə̀ ə sob mɨsaʼi, bə̂d mbe rɨ ə Ninivè bɨrɨ nɔ̀ʼ zɨ ɨsaʼi ɨgwɨ ɨghəm bə̂d wɔ̂ rɨ̀nîn, ɨmbə̀ʼ ɨghəm nɨ ənɨ Jonà nyaʼa ghà ɨŋgam Ŋwiə̀, mbɨ nyaʼa bèŋ tə fîŋ. Àyɨə mbə̀ zə ni əghɨ ə mɔʼɔ zɨ əgha nɨ dabə chè ə Jonà. 42Ɨgwɨ əni ze nɨ Ŋwìə̀ ə sob mɨsaʼi, ɨfɔ̂n əyi we rɨ ə Shebà bɨrɨ nɔ̀ʼ zɨ ɨsaʼi ɨgwɨ ɨghəm bə̂d wɔ̂ rɨ̀nîn, ɨmbə̀ʼ ɨghəm nɨ wɨ̀ nyaʼa yeʼe rɨ ɨnwǐ ɨsɨg ɨmbə̀ʼ zu ɨnû ɨwe rɨ əmbɨ Solomòn. Àyɨə mbə̀ zə ni wə̀d mɔʼɔ zɨ əgha nɨ dabə chè ə Solomòn.
Ənû ɨmbə̀ʼ əzwî rɨbɔ̀ŋ nɨ nyaʼa wɨrɨ bə̀ndɨ̀ wò nyɨ ɨŋga wə̀d
(Lk 11.24-26)
43“Əzwî rɨbɔ̀ŋ ə mɨ fə jwɨ̀ rɨŋga wə̀d, zɨə ghanə yèn ɨsɨ mbe nɨ chəi mɨnib əŋgu, yènə̀ kə̀b əsɨ nɨ zwììrɨ̀. Zɨə mɨ rɨka zə i, 44zɨə ghà ni, 'Mə bɨrɨ wɨrɨ bəndɨ wo ɨŋga mɨ nəb ze nɨ mə̀ kə̀ʼ jwɨ̀ rɨŋga.' Zɨ̀ mɨ nɨə yeʼe, zɨ̀ pè zə nəb ze zɨ zobɨ, nɨ mbɨ fə zə̌ tekɨ ɨchî chɔ̀m. 45Əne zɨ̀ bɨrɨ wò yeʼe mbɨ ɨzwî rɨbɔ̀ŋ cherə sambe nɨ bə̌ chè əməd, mbɨ wò nyɨ chub ɨŋga nəb ze. Ŋgəʼ ze nɨ bɨrɨ nyɨ ɨgun ə wə̀d we bɨrɨ bə chè ze nɨ wɨ̀ nyaʼə beə zəə. À yɨ ənû nɨ bɨrɨ ghɨ̀ mbɨ ɨghəm bə̂d wɔ̂ rɨ̀nîn nɨə ghɨ̀ ɨnû rɨbɔ̀ŋ.”
Ɨŋgɔb Yeso mbɨ ə bɔŋgɔb məd
(Mk 3.31-35; Lk 8.19-21)
46Ənɨ Yeso nyaʼə kɨrɨ ghàm əmbɨ mɨnɔ̂n bə̂d mbe, ɨŋgɔb məd mbɨ ə bɔŋgɔb məd nyaʼa wò pè təm ɨsɨg. Mbɨ nyaʼa kə̀b ghàmbɨ̀ mbɨ məd. 47[Wə̀d mɔʼɔ nyaʼa ghà ɨ bɔ ni, “E nɨŋ mbɨ mbe bɔŋgɔb mbe təmbɨ ɨsɨg kə̀b ghambɨ mbɨ ne.]”
48Yeso nyaʼa wììrɨ̀ əmbɨ wə̀d we nɨ nyaʼa gha ənû ze ni, “Mɨ nɨŋ kɨə we? Mbɨ bɔŋgɔb kɨ bə̀ mɨ̀we ə?” 49Wɨ̀ nyaʼa ghà əne, sèm əbɔ chwi mbi mə̀mə̀ə̀nɨ̀-ɨnû, ghà ni, “À yɨ mɨ nɨŋ mbɨ mbɨ bɔŋgɔb mbɔ̂! 50Wə̀d mɔʼɔ we nɨə ghɨ ɨnû mbe nɨ mɨ Mbǎʼ rɨkaŋ kə̀bɨ yɨ wum aŋgɔb, yɨ mɨ njàbɨ, bə̀ fɔrɨ mɨ nɨŋ.”
Одоогоор Сонгогдсон:
Mt 12: mgo
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2013, Cameroon Association for Bible Translation and Literacy