Mark 13
13
Yěsû a shwəŋə̀ tsaʼnə pɨ ghǎ shàʼtə̀ Ndâ Mɨ̀shwàʼà Nẅùə̀
(Mat 24.1-2; Luk 21.5-6)
1Tsaʼnə Yěsû pobə ɨ̀zùŋə̀ ndzùmə̀ ɨ̀pe lə̀ pənə nfurə̀ amwuə Ndâ Mɨ̀shwàʼà Nẅùə̀, taʼà àzùŋə̀ ndzùmə̀ e ghùtse a shwəŋə̀ ambo ze lo, “Ɨ̀nèrə̀, naŋə̀ tsaʼnə mɨ̀ghòorə mə pòŋə̀nə pɨ kɨ ndòo mèrə nkorə̀ mɨ̀ndâ mɨ pòŋə̀!” 2Yěsû a kẅùə̀ ambo ze lo, “Wə̀ zəənə̀ mɨ̀ndâ mɨ̀ẅùunə mə? Ka taʼà nɨ̀ghòorə wə̀ ɨ̀tse a pə ghǎ nwuunə̀ e àtwuə̀ tsɨ̀tse nɨ̀ghòorə. Pɨ ghǎ shàʼtə̀ mèrə tyìʼə̀ mɨ̀tsùmə̀ kẅìrə̀ a ɨ̀shyə̂.”
Ngəʼə̀ ghobə nɨ̀nyàŋə̀ ɨ̀poonə̀ pɨ Kristù
(Mat 24.3-14; Luk 21.7-19)
3Yěsû à lə̀ koʼò ngə̀ nnwuunə̀ àtwuə̀ Mbarə̀ Olìvə̀ amwuə ẅùə̀ pàa nɨ à naŋə̀nə Ndâ Mɨ̀shwàʼà Nẅùə̀; Pità, Jemə̀, nɨ Jònə pobə Andrù pyiitə̀ ambo ze nkwùə̀ nɨ pobə lə̀ tyiʼnə nnwuunə̀ pobə nɨ pobə lo, 4“Tsùŋə̀ ntiitə̀ a wəə, nɨ nkwùə̀ nɨ mɨ̀nwùə̀ mə mɨ̀tsùmə̀ ghǎ ghɨ̀rə̀. Àlènə̀ nɨ a ghǎ nèrə̀ lo nkwùə̀ ɨ̀ kùʼù lo mɨ̀nwùə̀ mèrə mə ghɨ̀rə̀ la àkə?” 5Yěsû a pìʼnə̀ a nɨ shwəŋə̀ ambo pobə lo, “Nɨ̀ zhìʼtə̀ mbə̀ʼə ŋònə̀ ɨ̀tse a ghɨ̀rə̀ nɨ waʼà àlàŋə àzɨghə. 6Pànə̀ pɨ̀noʼnə ghǎ tô aŋunə nɨ̀linə̀ ɨ̀tsâ nshwəŋə̀ lo, ‘Mɨ̀ŋə̌ ze!’ Lenəla, fɨ̀kə̀ pànə̀ pɨ̀noʼnə. 7Nkwùə̀ nɨ nɨ̀ zuʼnə lo pɨ pə mmàʼà mɨ̀ntsòo, kə̀ ndzuʼù pànə̀ mə nshwəŋnə̀ mbə̀ʼə mɨ̀ntsòo, kò nɨ̀ pô a wɨghə. Pèrə pa ɨ̀nwùə̀ chyə̂ a nɨ furə̀ la ka a pə e lo ndẅùutə àtwuə̀ ɨ̀shyə̂ ɨ tô mə. 8Mbə̀ʼnə àlaʼà a ghǎ zòŋnə̀ a zhyə̀ àlaʼà, ɨ̀fò pobə pə̀ənə̀ ɨ̀pe a lòo ndzòŋnə̀ a ẅùə̀ ɨ̀fò pobə pə̀ənə̀ ɨ̀pe, ɨ̀shyə̂ nə̀ʼnə̀ ɨlyiʼə pɨ̀noʼnə, lenəla, ndzàŋə̀ kwuunə̀ amwuə ɨ̀laʼà. Mèrə mə mɨ̀nwùə̀ ghǎ pə lə tsaʼa mbìʼnə àndzaŋə nkwùə̀ nɨ mə̀ngyə̌ à kòonə a moonə̀.
9“Nɨ̀ zhìʼtə̀ a wɨghə ntiinə pɨ tô kô a wɨghə ŋŋâ ambo pɨ̀saʼà mɨ̀sàʼa pobə tə nkəʼə̀ a wɨghə amwuə mɨ̀ndâ mɨ àshwatə̀ ɨ̀mobə. Nɨ̌ ghə̀ təəmə̀ a mbyə̀ pɨ̀govɨnò pobə pɨ̀fò mbə̀ʼə mə̀ a nɨ tiitə̀ ntwuumə̀ ghù ɨ̀shìʼnə̀ wa ambo pobə. 10Lenəla, pɨ̂ zàamə̀ nchwìitə̀ ntwuumə̀ ghù ɨ̀shìʼnə̀ wa ambo ɨ̀laʼà ɨ̀tsùmə̀. 11La nkwùə̀ ɨ̀tsùmə̀ nɨ pɨ kônə a wɨghə ndòo ntô amwuə korə̀, kò nɨ̀ pô a wɨghə lo nɨ̌ shwəŋə̀ lə̀ lo àkə apə̀. Nɨ̀ shwəŋə̀ ànwùə̀ nɨ Nẅùə̌ ŋâ ambo pɨghə nkwùə̀ ghu, ntiinə la ka a mə nshwəŋnə̀ e pɨghə, la a wə̀ nshwəŋnə̀ Àzhwùə̀ Nẅùə̀. 12Ŋwùə̀ à ghǎ ŋâ a momaa e lo pɨ zhwuutə̀, tǎ a ŋâ a moonə̀ e lo pɨ zhwuutə̀, ɨ̀poonə̀ pə̀ŋə̀ a ndzùmə̀ pɨ̀tǎ pobə pɨ̀mǎ ɨ̀pobə, ŋŋâ a ghobə lo pɨ zhwuutə̀. 13Ŋwùə̀ ntsùmə̀ a ghǎ pàanə̀ a wɨghə mbə̀ʼə mə̀. La ŋònə̀ nɨ à təəmə̀nə ntɨ̀ŋnə̀ tə ngə̀ ndẅùunə̀ à ghǎ chwarə̀.”
Àzwuumə̀ nɨ a fèrə̀nə ka mɨ̀zùŋə
(Mat 24.15-28; Luk 21.20-24)
14“La nkwùə̀ nɨ nɨ̀ zəənə̀nə àzwuumə̀ nɨ a fèrə̀nə ka mɨ̀zùŋə, mmə ntsə̀ŋə̀ ɨlyiʼə, a təəmə̀ a alyiʼə nɨ ka à tə mbə təəmə̀ e amwuə Ndâ Mɨ̀shwàʼà Nẅùə̀, (a pòŋə̀ lo ŋònə̀ nɨ à mənə nfuŋə̀ a tsùŋə̀ nzhyə̂ ànwùə̀ zə), nɨ̀ ghɨ̀rə̀ pànə̀ nɨ pɨ pənə àlaʼà Judyà furə̀ nkɨ̀ɨrə̀ nkoʼò ndèrə̀ àtwuə̀ mɨ̀mbarə̀. 15Kò ŋònə̀ nɨ à pənə a àtwuə̀ ndâ ze a chi nshwuʼə̀ a ɨ̀shyə̂ lo kwuunə̀ amwuə ndâ lo lòo àzwuumə̀ àtse. 16Lenəla, kò ŋònə̀ nɨ à pənə e a atwurə a chi nkwə̂ a nɨ piinə̀ a kutə̀ e. 17A gha pə pəla ambo pə̀ngyə̌ pɨ̀sùŋə̀nə, farə pɨ̀məpwùrə̀ amwuə mɨ̀njyə̂ mɨ̀ghu! 18Nɨ̀ tə nchàʼtə̀ a Nẅùə̀ lo kò mɨ̀nwùə̀ mèrə mə gha nfurə̀ e amwuə nkwùə̀ ghɨɨmə. 19Mbə̀ʼnə ngəʼə̀ nɨ ɨ̀ ghǎ pə amwuə mɨ̀njyə̂ mɨ̀ghu, ɨ̀ ghǎ tsàarə̀ a zhyə̀ nɨ ɨ̀ laʼa mbyə̀ mbə e ghu apə̀ a nɨ furə̀ tsaʼnə Nẅùə̀ à lə̀ tsùŋə̀nə àtwuə̀ ɨ̀shyə̂ tə mbyàa tɨ̀tsòŋə̀. Ka ngəʼə̀ ɨ̀tse ɨ pə ghǎ chi pə e ghu tsaʼa zə. 20Nẅùə̀ à lə̀ pə la ngoŋə̀ e tɨ shwùʼtə̀ ndùnə̀ mɨ̀njyə̂, yi mbə̀ʼə ŋwùə̀ mɨsoŋə moʼo a chwarə̀ e apə̀. La Nẅùə̀ à kùmə̀ nshwùʼtə̀ mɨ̀njyə̂ ntii pànə̀ nɨ à lə̀ tsoʼnə a ghobə la.
21“Ŋwùə̀ a tə mbəla nshwəŋə̀ ambo pɨghə lo, ‘Zəənə̀, Ghù Ndzoʼnə wa à wə̀ a nɨ̀ghə̂, Kə̀ à ẅùə̀ a nɨ̀yî!’ Kò nɨ̀ pyiimə̀. 22Mbə̀ʼnə pɨ̀Kristù pɨ pɨ̀chwìrə̀ ghobə ngàŋə ntwuumə̀ Nẅùə̀ pɨ pɨ̀chwìrə̀ ghǎ furə̀, lenəla, nnèrə̀ ɨ̀lènə̀ ɨ̀nwùə̀ ghobə mɨ̀nwùə̀ mɨ kə̀ʼnə̀nə a nɨ ghɨ̀rə̀ pyə̀ pa nɨ Nẅùə̀ a tsoʼnə la lo pobə fàntə̀ àlàŋə. 23Nɨ̀ zhìʼtə̀ a wɨghə, ntiinə mbyə̀ mə ntiitə̀ a wɨghə nɨ mɨ̀nwùə̀ mə mɨ̀tsùmə̀ zaʼà nkwùə̀ ɨ pòŋə̀ kùʼù.”
Nkwùə̀ nɨ Moonə̀ Ŋwùə̀ à ghǎ kẅirə̀ tô
(Mat 24.29-31; Luk 21.25-28)
24“La, a gha pə amwuə mɨ̀njyə̂ mɨ̀ghu, nkwùə̀ nɨ ngəʼə̀ ghu ɨ làŋə̀ mə,
ndzùmə ɨ̀ ghǎ nàanə̀ a nẅùumə̀,
lenəla, ŋwɨgrə̀ a chi ntâ e apə̀,
25Pɨsaŋə tyiʼə̀ nfurə̀ a nɨ̀pwuurə̀ nkẅìnə̀ a ɨ̀shyə̂,
Ɨ̀tɨ̀ŋnə̀ wa ɨ̀tsùmə̀ nɨ ɨ pənə a nɨ̀pwuurə̀ la ɨ nə̀ʼnə̀.
26“Nkwùə̀ ghu, pànə̌ zəənə̀ a Moonə̀ Ŋwùə̀ tsaʼnə à mənə ntô amwuə mbàʼà nɨ mɨ̀tɨ̀ŋnə̀ mɨ̀ẅùunə pobə àghuʼtə̀. 27À ghǎ twuumə̀ pəngèrə̀ ɨ̀pe amwuə pɨ̀pàa pɨ àtwuə̀ ɨ̀shyə̂ pə̀ nɨ̀kwàa lo pobə̂ shwatə̀ pànə̀ pɨ Nẅùə̀ pa nɨ à lə̀ tsoʼnə amwuə ɨlyiʼə ɨ̀tsùmə̀ a àtwuə̀ ɨ̀shyə̂ a nɨ furə̀ amwuə taʼà pàa ngə̀ mbyàa amwuə ẅùə̀.”
Nɨ̀ lanə̀ a taʼà ànwùə̀ aŋunə àtɨ̀ghə figə̀
(Mat 24.32-35; Luk 21.29-33)
28“Nɨ̀ lanə̀ a taʼà ànwùə̀ aŋunə àtɨ̀ghə figə̀. Nkwùə̀ nɨ a fuukə̀nə mɨfuə mɨ̀shwuə̀, nɨ̀ zhyə̂ lo ɨ̀tsirə̀ ɨ tyiʼə̀ a mbô. 29A kɨ mbə tyìʼə̀ ndəŋə ndəŋə lo, nkwùə̀ nɨ nɨ̀ zəənə̀nə mɨ̀nwùə̀ mèrə mə ndòo alyiʼə, nɨ̀ zhyə̂ lo nkwùə̀ ɨ̀ paatə̀ ntyiʼə̀ a ntswùə̀ nkaʼà. 30Ǹshwəŋə̀ tyìʼə̀ nkǔŋə nkuŋə ambo pɨghə lo, mɨ̀nwùə̀ mə mɨ̀tsùmə̀ ghǎ ghɨ̀rə̀ zaʼà ɨ̀waanə̀ pànə̀ pɨ tɨ̀tsòŋə̀ wə̀ ɨ pòŋə̀ kwɨkə̀. 31Lenəla, nɨ̀pwuurə̀ ghobə àtwuə̀ ɨ̀shyə̂ ghǎ lẅùutə̀, la ɨ̀shwəŋnə̀ ɨ̀pâ lẅùutə̀ e apə̀.”
Ka ŋònə̀ ɨ̀tse a zhyə̂ e njyə̂ kə̀ nkwùə̀
(Mat 24.36-44)
32“Ka ŋònə̀ ɨ̀tse tə farə pəngèrə̀ a nɨ̀pwuurə̀ pobə pɨ Moonə̀ Nẅùə̀ zhyə̂ a ghobə njyə̂ ghu kə̀ nkwùə̀ ghu, ndàŋə̀ e Tǎ nɨ a zhyə̂nə. 33Nɨ̀ nwuunə̀ a nɨ̀lyìinə̀ ntə mbyabə̀, mbə̀ʼnə ka nɨ̀ zhyə̂ a wɨghə nkwùə̀ ghu. 34A chyə̂ la tsaʼa ŋwùə̀ a pə nfurə̀ ndèrə̀ a àkarə̀: nkwùə̀ nɨ à mənə ndèrə̀, a fuŋə̀ ngàŋə àfàʼà ɨ̀ze, ngàpə̀ ɨ̀fàʼà ambo pobə àtwuə̀ àtwuə̀, ntyiʼə̀ nshwəŋə̀ ambo mbyabə̀ ɨlyiʼə lo, â nwuunə̀ a nɨ̀lyìinə̀ mbyabə̀ ɨlyiʼə, nkɨ mmə nnaŋə̀ ngàŋə àfàʼà za. 35Nɨ̀ nwuunə̀ a nɨ̀lyìinə̀ mbyabə̀, ntiinə ka nɨ̀ zhyə̂ a wɨghə nkwùə̀ nɨ ngàŋə̀ ndâ à ghǎ kwə̂. A chyə̂ pə nkwùə̀ nkwə̌ kə̀ a ntɨ̀ŋnə̀ ɨ̀twuʼə̀, kə̀ a nkòʼò njyə̂, kə̀ a ngẅùʼə, 36mbə̀ʼə a pə la ngwùutə̀ ntô kò a tsirə̀ e a ghò wə̀ pə ndyə̂. 37Ànwùə̀ nɨ ngwə̀ nshwəŋə̀ ambo pɨghə la, ǹshwəŋə̀ la ambo ŋwùə̀ ntsùmə̀. Njiilo nɨ̀ nwuunə̀ a nɨ̀lyìinə̀.”
Одоогоор Сонгогдсон:
Mark 13: pny
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Cameroon Association for Bible Translation and Literacy