Matyù 23
23
Yěsû a ŋâ àkwàtə̀ mbə̀ʼə pɨ̀nèrə̀ mbòomə pobə pɨ̀Farìsî
(Mrk 12.38-39; Luk 11.43-46, 20.45-46)
1Yěsû à lə̀ pə̀ŋə̀ nshwəŋə̀ ambo ɨ̀pùŋə̀ pə̀ənə̀ pobə ɨ̀zùŋə̀ ndzùmə̀ ɨ̀pe lo, 2“Pɨ̀nèrə̀ mbòomə pobə pɨ̀Farìsî tyiʼə̀ nnwuunə̀ la aŋunə aləŋə Mǔsî. 3Lenəla, nɨ̀ tyiʼə̀ ndzuʼnə̀ a ghobə aŋunə ɨ̀nwùə̀ ɨ̀tsùmə̀ nɨ pobə tiitə̀nə a wɨghə lo nɨ̀ ghɨ̀rə̀ la kò nɨ̀ ghɨ̀rə̀ a wɨghə ànwùə̀ nɨ pobə ghɨ̀rə̀nə ntiinə ka pobə ghɨ̀rə̀ a ghobə ànwùə̀ nɨ pobə pa nshwəŋə̀. 4Pobə pa nkorə̀ ɨ̀pìʼì pɨ lìrə̀nə (nɨ tsàarə̀nə a nɨ pìʼì) ntə̂ a mɨ̀ghə̌ pə̀ənə̀, #23.4 Pɨ̀tse ɨ̀ŋwàʼnə̀ waʼà nɨ tsàarə̀nə a nɨ pìʼì. la ka pə nùŋə̀ a ghobə tyìʼə̀ shwuə̀ àpô ɨghobə a nɨ yèmpə̀ lo pobə pìʼì a pèrə.
5“Pobə lə̀ mə ngɨ̀rə̀ mɨ̀nwùə̀ mɨ̀tsùmə̀ pə mbə̀ʼə pànə̀ zəənə̀ a ghobə. Ntiinə pobə lə̀ tsùŋə̀nə ɨ̀pàamə̀ ngòbə̀ pyə̀ nɨ pobə ŋwàʼnə̀nə àshwəŋnə̀ Nẅùə̀ nchyâ amwuə ngɨ̀rə̀ pèrə fankə̀, nkɨ nchyâ mɨ̀ntsə̀grə mɨ sàa aŋunə ɨtsəʼə ɨ̀pobə. 6Pobə pa nkòŋə̀ ɨləŋə pànə̀ pɨ̀ẅùunə amwuə ɨlyiʼə nɨ̀ghaʼà, nkɨ nkòŋə̀ a nɨ nwuunə̀ aŋunə ɨləŋə mbyə̀ amwuə mɨ̀ndâ mɨ àshwatə̀ mɨ pɨ̀Jew; 7pobə pa nkòŋə̀ lo pɨ̀ chàʼtə̀ a ghobə nɨ àghuʼtə̀ amwuə ɨlyiʼə mɨ̀tàanə, nkɨ ntàʼà lo pànə̀ fuŋə̀ a ghobə nɨ ‘Rabbi.’
8“La kò nɨ̀ pyiimə̀ a wɨghə lo pɨ̀ fuŋə̀ a wɨghə nɨ ‘Rabbi’ ntiinə pɨghə pɨ̀tsùmə̀ chyə̂ mbə la pɨlyimə nkɨ ntwuʼtə̀ a taʼà ɨ̀nèrə̀. 9Lenəla, kò nɨ̀ fuŋə̀ a wɨghə a ŋònə̀ ɨ̀tse àtwuə̀ ɨ̀shyə̂ ghə̀ nɨ ‘tǎ’ ntiinə nɨ̀ twuʼtə̀nə a wɨghə la a taʼà tǎ nɨ à pənə a nɨ̀pwuurə̀. 10Kə̀ kò pɨ fuŋə̀ e a wɨghə nɨ ‘Masàa’ ntiinə nɨ̀ twuʼtə̀nə la a taʼà masàa nɨ à pənə Ghù Ndzoʼnə wa. 11Ŋwùə̀ wa nɨ à pənə ŋònə̀ ngẅùunə a tɨ̀tɨ̀rə̀ pɨghə ǎ tyiʼə̀ pə la ngàŋə̀ àfàʼà ɨwɨghə. 12Ŋònə̀ wa nɨ à ŋankə̀nə mbɨ̀ŋmə̀ e, a chyə̂ la lo pɨ̌ shwuʼkə̀ e a ɨ̀shyə̂; la ŋònə̀ wa nɨ à shwuʼkə̀nə mbɨ̀ŋmə̀ e, a chyə̂ la lo pɨ̌ chi ŋaŋə̀ e àtɨ̀ghə.
Yěsû a twuunə̀ e àpə̀grə̀ àzobə
(Mrk 12.40; Luk 11.39-42, 11.44, 11.52, 20.47)
13“Ngəʼə̀ yɨ̀noʼnə ɨ̀ chyə̂ a àtwuə̀ pɨghə pɨ̀nèrə̀ mbòomə nɨ pɨ̀Farìsî! Pɨghə ngàŋə àpə̀grə̀! Ntiinə nɨ̀ nàanə̀ ntswùə̀ ndâ ànwùə̀ Nɨ̀fò nɨ̀pwuurə̀ ambo pə̀ənə̀. Ka pə kwuunə̀ a wɨghə, la mbə myàʼtə̀ a wɨghə pànə̀ nɨ pɨ mənə ntàʼà a nɨ kwuunə̀ lo pobə̂ kwuunə̀ a ghobə apə̀! 14Ngəʼə̀ yɨ̀noʼnə ɨ̀ chyə̂ àtwuə̀ pɨghə mbǎ pɨ̀nèrə̀ mbòomə nɨ pɨ̀Farìsî! Pɨghə ngàŋə àpə̀grə̀! Ntiinə nɨ̀ wa nfɨ̀kə̀ pɨ̀kwùə nkẅiirə̀ ɨ̀pwuumə̀ ɨ̀pobə nɨ mɨ̀ndâ ɨ̀mobə, la mmə nfɨ̀kə̀ nchàʼtə̀ ɨ̀chàʼtə̀ Nẅùə̀ pɨ̀sàa. Lenəla, ngəʼə̀ nɨ ɨ̀ ghǎ kwuunə̀ aŋunə pɨghə ɨ̀ ghǎ pɨ̂ ka mɨ̀zùŋə.
15“Ngəʼə̀ yɨ̀noʼnə ɨ̀ chyə̂ àtwuə̀ pɨghə pɨ̀nèrə̀ mbòomə nɨ pɨ̀Farìsî, ngàŋə̀ àpə̀grə̀! Ntiinə nɨ̀ wa ntwuumə̀ mɨnchyə ghobə pɨ̀kòŋə̀ ndèrə̀ a ndyə̌ sàa a nɨ pə̀ŋə̀ a ŋwùə̀ lo â zùŋə̀ a ànwùə̀ Nẅùə̀ àzɨghə, la nɨ̀ pə̀ŋə̀ e a nɨ ghɨ̀rə̀ lo a pɨ̂ ntsàarə̀ tsaʼnə à lə̀ pənə, ntyiʼə̀ ŋònə̀ nɨ ǎ lèrə̀ amwuə àkɨɨnə̀ ɨ̀mǔ tsàarə̀ a wɨghə.
16“Ngəʼə̀ yɨ̀noʼnə àtwuə̀ pɨghə mbǎ pɨ̀lùŋə̀ pɨ mbyə̀ nɨ pobə pənə pɨ̀fə̀, ntiinə nɨ̀ wə̀ nnèrə̀ lo, ‘Ŋwùə̀ à lə̀ tsə̀əmə̀ aŋunə Ndâ Mɨ̀shwàʼà Nẅùə̀, yi ka zèrə za a pə e ànwùə̀ àtse; la ŋwùə̀ à lə̀ tsə̀əmə̀ aŋunə àtɨ̀ŋnə goldə̀ nɨ a pənə amwuə Ndâ Mɨ̀shwàʼà Nẅùə̀, yi ntsə̀əmə̀ e ɨ̀ pɨ ẅìimə̀ e.’ 17Ɨ̀puukə̀ pɨ̀fə̀! A tsàarə̀ zèrə ntsàarə̀, àtɨ̀ŋnə goldə̀ zə̀ kə̀ Ndâ Mɨ̀shwàʼà Nẅùə̀ nɨ zèrə ghɨ̀rə̀nə àtɨ̀ŋnə goldə̀ zə̀ a tyiʼə̀ nɨ àghuʼtə̀ Nẅùə̀? 18Nɨ̀ wa nkɨ nshwəŋə̀ lo, ‘Ŋwùə̀ à lə̀ tsə̀əmə̀ aŋunə alyiʼə mɨ̀shwàʼà Nẅùə̀, zèrə za a pə e ànwùə̀ àtse apə̀; la ŋwùə̀ à lə̀ tsə̀əmə̀ aŋunə àzwuumə̀ nɨ a ŋânə aŋunə alyiʼə mɨ̀shwàʼà Nẅùə̀, yi ntsə̀əmə̀ e ɨ̀ pɨ ẅìimə̀ e.’ 19Pɨghə pɨ̀fə̀! Zhyə̀ nɨ a tsàarə̀nə a zèrə: ɨ̀pwuumə̀ nɨ pèrə pənə a alyiʼə mɨ̀shwàʼà Nẅùə̀, kə̀ a alyiʼə mɨ̀shwàʼà Nẅùə̀ nɨ a ghɨ̀rə̀nə ɨ̀pwuumə̀ pɨ̀ghu laanə̀? 20Lenəla, ŋwùə̀ à lə̀ tsə̀əmə̀ aŋunə alyiʼə mɨ̀shwàʼà Nẅùə̀, yi à tsə̀əmə̀ la aŋunə zèrə farə ɨ̀pwuumə̀ pa ɨ̀tsùmə̀ nɨ pèrə pənə aŋunə zèrə̀, 21La ŋwùə̀ à tə tsə̀əmə̀ aŋunə Ndâ Mɨ̀shwàʼà Nẅùə̀, yi à tsə̀əmə̀ la aŋunə zèrə̀ farə aŋunə Nẅùə̀, nɨ à wa nchyə̂ amwuə. 22La ŋwùə̀ à tə tsə̀əmə̀ aŋunə nɨ̀pwuurə̀, yi à tsə̀əmə̀ la aŋunə aləŋə Nɨ̀fò Nẅùə̀, farə aŋunə ŋònə̀ wa nɨ à ŋaanə̀nə aŋunə aləŋə Nɨ̀fò ghu.
23“Ngəʼə̀ ɨ̀ za àtwuə̀ pɨghə pɨ̀nèrə̀ mbòomə pobə pɨ̀Farìsî pobə ngàŋə àpə̀grə̀! Ntiinə nɨ̀ wa ŋŋâ a taʼà àpàa aŋunə ɨ̀pàa nɨ̀ghumə̀ aŋunə ɨ̀pwuumə̀ àzhyǎ ɨ̀pɨghə tsaʼa mintə̀ ghobə dilə̀, nɨ kumìnə̀, la mmyàʼtə̀ mɨ̀nwùə̀ mɨ̀ẅùunə amwuə mbòomə tsaʼa nkǔŋə nkuŋə, ghobə nɨ̀koorə̀ mɨ̀lɨŋə̀, ghobə àpyiimə̀ ntɨŋmə̀ yè tɨ̀ŋnə̀. A pòŋə̀ lo nɨ̀ ghɨ̀rə̀ mɨ̀nwùə̀ mə la kò nɨ̀ myàʼtə̀ a wɨghə a yètse. 24Pɨ̀fə̀ pɨ̀nèrə̀ àlàŋə! Nɨ̀ wa ndyiirə̀ ndizhyə, la mmə mmyə̀ a ndzàkɨshyə̀.
25“Ngəʼə̀ ɨ̀ chyə̂ àtwuə̀ pɨghə, pɨ̀nèrə̀ mbòomə nɨ pɨ̀Farìsî! Ngàŋə̀ àpə̀grə̀! Nɨ̀ sùu mɨ̀ndoŋə̀ ɨ̀mɨghə ghobə ɨ̀kaŋə̀ ɨ̀pɨghə pèrə laanə̀ a ndzùmə̀ ɨsɨghə, la mɨmwuə lẅenə̀ nɨ ɨ̀pwuumə̀ nɨ nɨ̀ kẅiirə̀nə ambo pə̀ənə̀ nɨ mɨ̀tɨ̀ŋnə̀. 26Pɨ̀fə̀ pɨ̀Farìsî, nɨ̀ zàamə̀ nsùu ɨmwuə pɨ̀tɨtoʼo ghobə ɨ̀kaŋə̀, lenəla ndzùmə̀ àpyìinə ɨ̌ kɨ laanə̀.
27“Ngəʼə̀ ɨ̀ ghǎ pə àtwuə̀ pɨghə mbǎ pɨ̀nèrə̀ mbòomə nɨ pɨ̀Farìsî, ngàŋə̀ àpə̀grə̀! Ntiinə nɨ̀ chyə̂ mbə tsaʼa mɨ̀shyə̀ nɨ zoʼnə nɨ mbə̀əmə fuə mɨ pòŋə̀ a ndzùmə̀ ɨsɨghə, la ɨmwuə lẅenə̀ nɨ ɨ̀kẅìinə ɨ̀kwuə̀ pə̀ənə̀ nɨ ɨ̀pwuumə̀ pa ɨ̀tsùmə̀ nɨ ka pèrə laanə̀ e. 28Lenəla, pànə̀ pa nnaŋə̀ a wɨghə a àpyìinə tsaʼa pànə̀ nɨ ngɨ̀rə̀ mɨ̀nwùə̀ ɨ̀zobə təəmə̀nə, la ɨmwuə ɨzɨghə lẅenə̀ nɨ àpə̀grə̀ ghobə tɨ̀pòŋə̀.
Yěsû a shwəŋə̀ tsaʼnə pobə ghǎ zəənə̀ ngəʼə̀
(Luk 11.47-51)
29“Ngəʼə̀ ɨ̀ ghǎ pə àtwuə̀ pɨghə mbǎ pɨ̀nèrə̀ mbòomə nɨ pɨ̀Farìsî, ngàŋə̀ àpə̀grə̀, ntiinə nɨ̀ poomə̀nə mɨ̀shyə̀ ambo ngàŋə ntwuumə̀ Nẅùə̀, nkɨ ntsùnkə̀ mɨ̀shyə̀ mɨ pànə̀ nɨ pobə lə̀ mənə nchyə̂ a nɨ̀chyə̂mbyə̂ ghù təəmə̀nə, 30nshwəŋə̀ lo, ‘Nɨ̀ lə̀ pəla mbə amwuə mɨ̀njyə̂ mɨ pɨ̀tǎ pɨ̀tǎ ɨ̀pɨghə, yi ka nɨ̀ lə̀ chyâ a wɨghə àpô àzɨghə a nɨ zhwuutə̀ ngàŋə ntwuumə̀ Nẅùə̀.’ 31Njiilo nɨ̀ pyiimə̀ nkǔŋə nkuŋə lo nɨ̀ furə̀ amwuə ngẅàrə̀ za nɨ ɨ̀ lə̀ zhwuutə̀nə ngàŋə ntwuumə̀ Nẅùə̀ la! 32Lenəla, nɨ̀ làŋə̀ nɨ mbyə̀ mmyàanə̀ àfàʼà za nɨ pɨ̀tǎ pɨ̀tǎ ɨ̀pɨghə lə̀ pìʼnə̀nə.
33“Pɨghə mɨ̀nyoorə̀, nɨ ɨ̀poonə̀ pɨ mɨ̀nyoorə̀! Nɨ̀ kwàŋə̀ lo mbə̀ʼə nɨ̀ làŋə̀ ɨla tɨghu nɨ̀ kwuunə̀ amwuə àkɨɨnə̀ ɨ̀mǔ? 34Lenəla mbɨ tsàa ngàŋə ntwuumə̀ Nẅùə̀, pobə ngàŋə àzhìʼtə̀ farə pɨ̀nèrə̀ mbòomə ambo pɨghə; nɨ̀ ghǎ zhwuutə̀ a ghobə pɨ̀tse, kẅùumə̀ a pɨ̀tse aŋunə àtɨ̀ghə pànkə̀nə, kəʼə̀ pɨ̀tse amwuə mɨ̀ndâ mɨ àshwatə̀ ɨ̀mɨghə, tòmnə̀ a ghobə a nɨ furə̀ amwuə zə mbòmpə àlaʼà ndèrə̀ amwuə zhyə̀ mbòmpə àlaʼà. 35Njiilo àləəmə̀ pànə̀ pa nɨ ngɨ̀rə̀ mɨ̀nwùə̀ ɨ̀zobə lə̀ təəmə̀nə, nɨ̀ zhwuutə̀ a ghobə tɨ zəənə̀ a fàntə̀ ànwùə̀ àzobə, ǎ pə àtwuə̀ pɨghə, a nɨ pìʼnə̀ aŋunə àləəmə̀ Abèlə̀ ngə̀ mbyàa aŋunə àləəmə̀ Tsàkàriyà nɨ à lə̀ pənə moonə̀ Berechiah nɨ nɨ̀ lə̀ zhwuutə̀nə a tɨ̀tɨ̀rə̀ Ndâ Mɨ̀shwàʼà Nẅùə̀ ghobə alyiʼə nɨ̀shwàʼà Nẅùə̀. 36Ǹtiitə̀ a wɨghə nɨ nkǔŋə nkuŋə lo ngəʼə̀ mɨ̀nwùə̀ mèrə mə mɨ̀tsùmə̀ ɨ̀ ghǎ pə àtwuə̀ ɨ̀waanə̀ pànə̀ pɨ tɨ̀tsòŋə̀ wə̀!
Ɨ̀kòŋnə̀ Yěsû aŋunə àlaʼà Yèrusalèmə̀
(Luk 13.34-35)
37“Yèrusalèmə̀, Yèrusalèmə̀! Wə̀ zhwuutə̀ ngàŋə ntwuumə̀ Nẅùə̀, nkɨ nchi ndòo mɨ̀ghòorə ntumpə̀ pànə̀ pa nɨ Nẅùə̀ à lə̀ tsàanə ambo ghò. Ǹtàʼà mə tyìʼə̀ nkwùə̀ yɨ̀noʼnə lo shwatə̀ ɨ̀poonə̀ ɨ̀pô tsaʼa mǎ ngubə̀ à wa nshwatə̀ ɨ̀poonə̀ ɨ̀pe a ɨ̀sùmə mɨ̀pàrə̀ ɨ̀me, la ka nɨ̀ pyiimə̀ a wɨghə. 38Nɨ̀ zəənə̀, pɨ myàʼtə̀ mə ndâ ɨzɨghə ɨ̀ tyiʼə̀ ɨ̀fùmə̀. 39Ngwə̀ ntiitə̀ a wɨghə lo, ka nɨ̀ pə ghǎ chi zəənə̀ a wɨghə a gha, tə mbyàa nkwùə̀ nɨ nɨ̀ ghǎ shwəŋə̀ ambo mɨ̀ŋə̀ lo, ‘Mborə̀ ɨ̀ chyə̂ ambo ze wa nɨ à tônə aŋunə nɨ̀linə̀ nɨ Ndòʼnə̀mbyə̂.’”
Одоогоор Сонгогдсон:
Matyù 23: pny
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Cameroon Association for Bible Translation and Literacy