Matyù 22
22
Àshwəŋnə̀ nàanə nàanə mbə̀ʼə nɨ̀ghaʼà ndzòʼo
1Yěsû à lə̀ chi nshwəŋnə̀ ambo pobə amwuə ɨ̀shwəŋnə̀ pɨ̀nàanə nàanə lo, 2“Ànwùə̀ nɨ̀fò nɨ̀pwuurə̀ a chyə̂ tsaʼa ɨ̀fò ɨ̀tse nɨ à lə̀ tsùnkə̀nə ɨ̀ghɨ̀ɨnə̀ moonə̀ e ghu mbyàŋnə̀. 3Ntsàa ngàŋə̀ fàʼà ɨ̀ze lo pobə̂ ghə̀ nfuŋə̀ pànə̀ nɨ à lə̀ wuunə̀nə a ghobə aŋunə ɨ̀ghɨ̀ɨnə̀ wə̀ lo pobə̂ tô, la pobə lə̀ ka kòŋə̀ a ghobə a nɨ tô. 4À lə̀ twuumə̀ a yɨ̀tse ngàŋə àfàʼà nshwəŋə̀ lo, ‘Nɨ̀ ghə̀ ntiitə̀ pànə̀ pa nɨ ǹgwuunə̀nə la lo ǹtsùnkə̀ mə ɨ̀ghɨ̀ɨnə̀ wa, pɨ zhwuutə̀ mə mɨ̀fòŋə̀ ma pobə mɨ̀nyàamə̀ ma nɨ mɨ zwurə̀nə mbòbə̀, àzwuumə̀ àtsùmə̀ a zə ntyiʼə̀ yè shwatə̀nə. Njiilo nɨ̀ tô aŋunə ɨ̀ghɨ̀ɨnə̀ wa!’ 5La pànə̀ nɨ à lə̀ wuunə̀nə a ghobə lə̀ naŋə̀ ànwùə̀ ghu ka zəənə̀ ghobə àpìi àtse amwuə ndèrə̀ a ghobə: taʼà à lə̀ lèrə̀ amwuə ɨ̀swùumə e, ghùtse a kɨ ndèrə̀ e alyiʼə mɨ̀tàanə ze. 6Àpwùʼə̀ pànə̀ nɨ ɨ̀fò à lə̀ wuunə̀nə a ghobə aŋunə nɨ̀zoʼò wə̀ lə̀ kootə̀ ngàŋə àfàʼà ɨ̀ze, mbuʼù a ghobə tyìʼə̀ ɨ̀shìʼnə̀, nzhwuutə̀. 7Lenəla, ntɨŋmə̀ ɨ̀fò ghu ɨ lə̀ zaŋə̀, a tyiʼə̀ ntsàa pɨ̀soyì ɨ̀pe pobə ghə̀ nkɨ nzhwuutə̀ pànə̀ nɨ pobə lə̀ zhwuutə̀nə ngàŋə̀ àfàʼà ɨ̀ze la, ndzùŋə̀ ntòonə̀ mbòmpə àlaʼà ɨzobə yɨ̀ ngẅùunə.
8“Ɨ̀fò à lə̀ fuŋə̀ ngàŋə àfàʼà ɨ̀ze nshwəŋə̀ ambo pobə lo, ‘Ɨ̀pwuumə̀ pɨ zɨghə̀nə aŋunə nɨ̀zoʼò wa tyiʼə̀ a ɨ̀shyə̂, la pànə̀ nɨ pɨ tônə ngwuunə̀ a ghobə ka pobə lə̀ kùʼnə̀ a ghobə. 9Njiilo, nɨ̀ lèrə̀ amwuə ɨ̀twuə̀ ɨ̀làŋə ngwuunə̀ a ŋwùə̀ ntsùmə̀ wa nɨ nɨ̀ zəənə̀nə pobə̂ tô aŋunə nɨ̀ghaʼà wə̀.’ 10Ngàŋə àfàʼà ɨ̀ze yèghu lə̀ lèrə̀ amwuə ɨ̀twuə̀ ɨ̀làŋə ɨ̀tsùmə̀, nshwatə̀ pànə̀ nɨ pobə lə̀ zəənə̀nə, farə pɨ̀shìʼnə̀ pobə pɨ̀ tɨ̀pòŋə̀; lenəla ndâ ɨ̀ghɨ̀ɨnə̀ za ɨ̀ lə̀ lẅenə̀ nɨ pə̀ənə̀.
11“La nkwùə̀ nɨ ɨ̀fò à lə̀ kwuunə̀nə amwuə ndâ a nɨ zəənə̀ pànə̀ nɨ pɨ pənə amwuə, à lə̀ zəənə̀ a taʼà ŋwùə̀ amwuə nɨ ka à lə̀ ẅî e atsəʼə ɨ̀ghɨ̀ɨnə̀. 12À lə̀ pyiitə̀ ambo ze lo, ‘Ɨ̀swùə mə̀, wə̀ làŋə̀ ɨla mbòŋə̀ kwuunə̀ a ndâ ghə̀ tɨ ẅî atsəʼə nɨ̀zoʼò?’ Lenəla, ntswùə̀ ngàŋə̀ ɨ lə̀ kaʼà. 13Ɨ̀fò ghu à lə̀ shwəŋə̀ ambo ngàŋə àfàʼà ɨ̀ze lo pobə̂ korə̀ mbô ɨ̀me ghobə mɨ̀kwùə̀ ɨ̀me, mmàʼà e a àpyìinə amwuə ndzùmə, alyiʼə nɨ ǎ tyiʼə̀ mmə yìi kɨ mə kwurə̀ mɨsoŋə ɨ̀me.”
14Yěsû a tyiʼə̀ ndẅùutə̀ nshwəŋə̀ lo, “Pɨ pa ngwuunə̀ a pɨ̀noʼnə la, mmə ngə̀ amwuə ntsoʼò a pɨ̀kɨ̂.”
Àpyiitə̀ àshwəŋnə̀ mbə̀ʼə nɨ̀twuə̀ pɨ̀taghə̀
(Mrk 12.13-17; Luk 20.20-26)
15Pɨ̀Farìsî lə̀ lèrə̀ a nɨ ghə̀ ndaamə̀ a mɨnaŋə tsaʼnə pobə̌ ẅìimə̀ a Yěsû aŋunə ɨ̀shwəŋnə̀ ɨ̀pe. 16Pobə lə̀ tsàa ɨ̀zùŋə̀ ndzùmə̀ ɨ̀pobə pobə ngàŋə àpyiimə̀ ànwùə̀ Heròdə̀ ambo ze, nshwəŋə̀ lo pobə̂ ghə̀ mbyiitə̀ e lo, “Ɨ̀nèrə̀, pəə zhyə̂ lo ghò la ŋònə̀ nɨ mɨ̀nwùə̀ ɨ̀me təəmə̀nə, nkɨ mə nnèrə̀ pə̀ənə̀ nɨ àlàŋə nɨ Nẅùə̀ à tàʼnə lo pànə̀ chyə̂. Ka kɨ mə naŋə̀ o ɨ̀sɨghə̀ ŋwùə̀ ntiinə ka wə̀ pô o ɨ̀myə̂ mɨ ŋwùə̀. 17Tiitə̀ a wəə, àzô àkwàŋə̀ a chyə̂ lo àkə, mbòomə ɨ̀wə̀ənə̀ à nèrə̀ lo mbə̀ʼə pɨ twuə̀ a taghə̀ ambo Kaasà kə̀ ngaŋə?”
18La Yěsû nɨ à lə̀ zhyə̂nə ɨ̀kwàŋə̀ tɨ̀pòŋə̀ ɨ̀pobə a shwəŋə̀ lo, “Pɨghə ngàŋə àpə̀grə̀! A ghɨ̀rə̀ àkə nɨ̀ tàʼà lə̀ʼə̀ mə̀? 19Nɨ̀ nèrə̀ mə̀ nɨ nkabə̀ nɨ pɨ pa ndòo ntwuə̀ a taghə̀ ghu!” Pobə lə̀ lòo a taʼà kapà ntô nnèrə̀ e, 20a pyiitə̀ a ghobə lo, “Lə̌ ɨ̀sɨghə̀ ɨ̀wə̌ ghobə nɨ̀linə̀ ɨ̀wə̌ aŋunə?”
21Pobə kẅùə̀ lo, “Yɨ̀ Kaasà.”
Yěsû a tyiʼə̀ nshwəŋə̀ ambo pobə lo, “Nɨ̀ ŋâ àzwuumə̀ Kaasà ambo Kaasà, nkɨ ŋâ yè Nẅùə̀ ambo Nẅùə̀.”
22A lə̀ kə̀ʼnə̀ a ghobə nkwùə̀ nɨ pobə lə̀ zuʼnə ànwùə̀ zèrə̀ zə̀; lenəla pobə tyiʼə̀ mmyàʼtə̀ e ndèrə̀ ghobə.
Àpyiitə̀ àshwəŋnə̀ mbə̀ʼə nɨ̀zhwuumə̀ a nɨ̀wɨghə̀
(Mrk 12.18-27; Luk 20.27-40)
23Tyìʼə̀ njyə̂ ghu pɨ̀Sadducee nɨ pobə pa nshwəŋə̀ lo ŋwùə̀ à wa ka kwɨghə̀ e nkẅirə̀ nzhwuumə̀ lə̀ tô ambo Yěsû mbyiitə̀ lo, 24“Ɨ̀nèrə̀, Mǔsî à lə̀ tiitə̀ a wəə lo, ŋwùə̀ à tə kwɨghə̀ ka pə e nɨ ɨ̀poonə̀, yi ndyimə e ghù mbyàŋnə̀ à chyə̂ a nɨ zoʼò a nkwùə ghu mbyə̂ ɨ̀poonə̀ ambo təkwɨghə̀ kwɨghə̀nə wa. 25Pɨlyimə pɨ̀mbyàŋnə̀ pɨ̀tse sàmbaa lə̀ mə nchyə̂ pəə pɨ pobə. Ghù ntsàambyə̀ à lə̀ zoʼò ntô nkwɨghə̀ e tɨ moonə̀, lenəla, ntyiʼə̀ mmyàʼtə̀ a ngẅùə e ambo ndyimə e ghù mbyàŋnə̀. 26Ànwùə̀ nɨ a lə̀ ghɨ̀rə̀nə a ghù ntsàambyə̀ a lə̀ kɨ ngɨ̀rə̀ àpaatə̀ e tə mbyàa aŋunə ghù ndẅùə̀ndzùmə̀. 27Mə̀ngyə̌ wə̀ à lə̀ lẅùutə̀ nkɨ nkwɨghə̀ àze. 28Tɨ̀tsòŋə̀ wə̀ njyə̂ nɨ pɨ̀kwuə̀ ghǎ zhwuumə̀ a nɨ̀wɨghə̀, amwuə pɨlyimə pə sàmbaa, mə̀ngyə̌ wə̀ à ghǎ pə ngẅùə ɨ̀wə̌ tsaʼnə pobə pɨ̀tsùmə̀ lə̀ zoʼnə e la?”
29Yěsû à lə̀ kẅùə̀ a ghobə lo, “Ànwùə̀ nɨ nɨ̀ shwəŋə̀nə ka à kùʼnə̀ e ntiinə ka nɨ̀ zhyə̂ a wɨghə àshwəŋnə̀ Nẅùə̀ kə̀ mɨ̀tɨ̀ŋnə̀ mɨ Nẅùə̀. 30Mbə̀ʼnə a ghǎ pə njyə̂ nɨ pɨ̀kwuə̀ ghǎ zhwuumə̀ a nɨ̀wɨghə̀ la, pobə ghǎ pə tsaʼa pəngèrə̀ a nɨ̀pwuurə̀, zoʼò a ghobə apə̀ kɨ ŋâ e ɨ̀poonə̀ a ndâ nɨ̀zoʼò apə̀ 31La ngə̀ aŋunə nɨ̀zhwuumə̀ a nɨ̀wɨghə̀, nɨ̀ pirə̀ mə a wɨghə tɨ fuŋə̀ ànwùə̀ nɨ Nẅùə̀ à lə̀ shwəŋə̀nə ambo pɨghə lo, 32‘Mɨ̀ŋə̌ Nẅùə̀ Abràhamə̀, mbə Nẅùə̀ Isàkə̀, nkɨ mbə Nẅùə̀ Yàkobə̀.’ Ka à pə e Nẅùə̀ pɨ̀kwuə̀. À chyə̂ mbə Nẅùə̀ pànə̀ nɨ pobə pa nchyə̂.”
33Nkwùə̀ nɨ àpùŋə̀ pànə̀ zə a lə̀ zuʼnə ànwùə̀ zə̀ nɨ Yěsû à lə̀ mənə nshwəŋə̀, mɨ̀nwùə̀ nɨ à lə̀ nèrə̀nə lə̀ kə̀ʼnə̀ a ghobə ka mɨ̀zùŋə.
Tənkoŋə ntə̌ Nẅùə̀
(Mrk 12.28-34; Luk 10.25-28)
34Nkwùə̀ nɨ pɨ̀Farìsî lə̀ zuʼnə lo Yěsû à lə̀ kẅupə̀ mɨ̀ntswùə̀ mɨ pɨ̀Sadducee la, pobə lə̀ tô nshwatə̀ a taʼà alyiʼə. 35Taʼà ŋwùə̀ ɨghobə nɨ à lə̀ pənə nnèrə̀ mbòomə, à lə̀ lə̀ʼə̀ e nɨ àpyiitə̀ àshwəŋnə̀ zə̀ lo:
36“Ɨ̀nèrə̀! Tənkoŋə ntə̌ amwuə mɨ̀ntə̌ la ẅèrə?” 37Yěsû a kẅùə̀ lo, “‘Kòŋə̀ a Ndòʼnə̀mbyə̂ Nẅùə̀ nɨ ntɨŋmə̀ o ɨ̀tsùmə̀ nɨ mbɨ̀ŋmə̀ o ntsùmə̀ ghobə àkwàŋə̀ o àtsùmə̀.’ 38Lə̌ tənkoŋə ntə̌ mbə ntsàambyə̀ ntə̌. 39Àpaatə̀ ntə̌ nɨ ɨ pənə tsaʼa ghù ntsàambyə̀ ɨ chyə̂ lo, ‘Wə̀ kòŋə̀ a ndyimə o tsaʼa mbɨ̀ŋmə̀ o.’ 40Pɨ̀mbòomə pɨ Mǔsî pɨ̀tsùmə̀ nɨ ɨ̀nwùə̀ ɨ̀tsùmə̀ nɨ ngàŋə ntwuumə̀ Nẅùə̀ ɨ̀tsùmə̀ lə̀ pə nnèrə̀ zəʼnə̀ aŋunə mɨ̀ntə̌ mə mɨmbaa.”
Àpyiitə̀ àshwəŋnə̀ mbə̀ʼə Ghù Ndzoʼnə wa
(Mrk 12.35-37; Luk 20.41-44)
41Yěsû à lə̀ pyiitə̀ pɨ̀Farìsî nkwùə̀ nɨ pobə lə̀ shwatə̀nə a taʼà alyiʼə lo, 42“Nɨ̀ kwàŋə̀ àzɨghə lo àkə mbə̀ʼə Ghù Ndzoʼnə wa? A moonə̀ ɨ̀wə̌?”
Pobə kẅùə̀ lo, “A moonə̀ Dàfirə̀.”
43Yěsû à lə̀ tyiʼə̀ mbyiitə̀ ambo pobə lo, “À lə̀ tyiʼə̀ ngɨ̀rə̀ àkə, Àzhwùə̀ Nẅùə̀ a tinə̀ Dàfirə̀ lo â tyiʼə̀ nfuŋə̀ e nɨ ‘Ndòʼnə̀mbyə̂’? Ntiinə à lə̀ shwəŋə̀nə lo,
44‘Nẅùə̀ à lə̀ shwəŋə̀ ambo Ndòʼnə̀mbyə̂ mə̀ lo:
Nwuunə̀ a pàa àpô mɨ̀ŋə̀ yè zɨghə̀nə
tə mbyàa nkwùə̀ nɨ mbɨ ghǎ ghɨ̀rə̀ ngàŋə̀ mbwùunə̀ ɨ̀zô tyiʼə̀ mbə a ɨ̀sùmə mɨ̀kwùə̀ ɨ̀mô.’
45“Dàfirə̀ à tə pəla mmə nfuŋə̀ e nɨ ‘Ndòʼnə̀mbyə̂’, a tyiʼə̀ ndàŋə̀ ɨla ghu mbə moonə̀ e?” 46Ka ŋwùə̀ a lə̀ pə e a nɨ kẅùə̀ e tyìʼə̀ nɨ taʼà ànwùə̀. Lenəla, a nɨ furə̀ njyə̂ ghu, ka ŋwùə̀ a lə̀ chi mbyiitə̀ e a ye nɨ ànwùə̀ àtse.
Одоогоор Сонгогдсон:
Matyù 22: pny
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Cameroon Association for Bible Translation and Literacy