Эклц 16
16
Хагар болн Ишмаил
1Абрамин гергн Сарад үрн олддго бәәҗ. Сарад Египет һазра Хагар гидг зарц күүкд күн бәәҗ. 2Сара Абрамд келнә:
– Деед Эзн нанд үр өгсн уга. Йов, мини зарц күүкд күүнлә кевт, тер нанд күүкд һарһҗ өгхмн болвза#16:2 Дорд үзгин улсин авъясар үр-сад һарһдго гергн эврәннь зарц күүкд күүг залутаһан бәәлһдг бәәҗ. Теднәс һарсн нилхәр үрән кедг бәәҗ..
Абрам Саран келснлә зөвшәрнә. 3Тегәд Сара эврәннь зарц Хагариг залудан герг кехәр өгнә. (Тер цагт Абрам Кананд 10 җилдән бәәчклә.)
4Хагар Абрамас саата болна. Саата болсан медчкәд, Хагар эврәннь эзн күүкд күүндән дурго болна. 5Тиигхләнь Сара Абрамд келнә:
– Намаг һундл үзәд тесҗәснд чи гемтәч. Би зарцан чамд өгләв, чамас саата болсан медчкәд, тер нанд дурго болҗана. Мана зарһиг Деед Эзн кетхә.
6– Чини зарц чини һарт бәәнә. Чи терүг сансарн бәрҗ чадҗанач, – гиҗ Абрам келнә.
Тегәд Сара Хагариг шахад-даҗрад бәәв. Тернь Сараһас зулад гүүнә.
7Деед Эзнә элч Хагариг булгин хаҗуд көдә һазрт олҗ авна. Эн булг Шур тал һарсн хаалһин өөр бәәҗ.
8– Хагар, Саран зарц, альдас чи ирвч, альдаран йовҗ йовнач? – гиҗ тер сурна.
– Би эврәннь хатн Сараһас зулҗ йовнав, – гиҗ тернь хәрү өгнә.
9– Хатн талан хәрү од, терүнә келсиг күцәҗ, соңсврта бол. 10Би чини хөөт үйнрин тоог тоолҗ болшгоһар өскнәв, – иигҗ Деед Эзнә элч зарцд келнә.
11– Чи ода саатач, чамас көвүн һарх. Терүнд Ишмаил#16:11 Ишмаил – эн нерн еврей келәр «Бурхн соңсчана» эс гихлә «Бурхн соңсв» гидг чинртә. гидг нер өг, яһад гихлә Деед Эзн чини зовлңгин тускар соңсв. 12Терчн зерлг элҗгнә бәәдлтә болх: цуг әмтнлә тер өшәркх, цугтан терүнлә өшәркх. Терчн цуг эврәннь төрл-садндан өшәтн болҗ бәәх, – Деед Эзнә элч зарцд бас иигҗ келнә.
13Бийләһән күүндсн Деед Эзнд Хагар иим нер өгнә: «Намаг үзҗәх Бурхн». Яһад гихлә: «Бурхиг би йосндан үзәд, әмд үлдсн болхви?» – гиҗ Хагар келнә.
14Эн учр деерәс тер худг «Беэр-лахай-рой» гидг нер зүүнә. Кадеш Баред гидг балһсдын хоорнд тер бәәнә. 15Хагар Абрамд көвү һарһҗ өгв. Терүнә һарһсн көвүнд Абрам Ишмаил гидг нер өгв.
16Хагар Ишмаилиг һарһхд Абрам найн зурһата билә.
Одоогоор Сонгогдсон:
Эклц 16: ХКО_ӘБ
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Институт перевода Библии, 2002-2023
