Nikamowina 119
119
nikamowin 119
owiyasiwēwin kā‑tipēyihcikēt
57kā‑tipēyihcikēyan, kiya piko kā‑nitawēyimitān;
nitasotēn kita-nanahihtamān kititwēwina.
58nitēhihk ohci kipakosēyimitin kita-kitimākinawiyan,
kā‑kī-isi-asotaman!
59nikī-māmitonēyihtēn nitisiyinīhkēwin, ēkwa nitasotēn
kita-pimitisahamān kikiskinohamākēwina.
60nikakwēciyāhon, namōya nipēhon
kita-pimitisahamān kititasiwēwina.
61omacātisak niwī-kakwē-tasōhikwak,
māka namwāc niwanikiskisin kiwiyasiwēwin.
62ē‑mēkwā-tipiskāk nipēkopayin kita-mamihcimitān
kwayask ē‑wiyasiwātaman kīkwaya ohci.
63niwīcēwākanin aniki kā‑kistēyimiskik,
tahto aniki kā‑nanahihtahkik kiwiyasiwēwina.
64kā‑tipēyihcikēyan, piko itē ōta askīhk
ihtakon kisākihiwēwin ēkāya wīhkāc kā‑kīsipipayik;
kiskinohamawin kititasiwēwina.
ē‑itakihtēk kā‑tipēyihcikēt owiyasiwēwin
65kitōtēn kā‑kī-kihci-itwēyan kā‑tipēyihcikēyan,
ka‑miyo-tōtawiyan, niya kitatoskēyākan.
66miyin iyinīsiwin mīna kiskēyihtamowin,
ayisk nimamisīn kititasiwēwina.
67pāmwayēs kā‑kī-kwātakihiyan, nikī-māyi-tōtēn māna.
māka ēkwa ninanahihtēn kititwēwin.
68ē‑miywātisiyan -- ē‑kisēwātisiyan!
kiskinohamawin kititasiwēwina.
69kā‑kihcēyimisocik nikī-kiyāskīwācimikwak,
māka nitēhihk ohci nikī-nanahihtēn kiwiyasiwēwina.
70otēhiwāhk namōya kīkway kiskēyihtamwak,
māka nimiywēyihtamihikon kiwiyasiwēwinihk.
71nikī-miyo-tōtākon kā‑kī-kwātakihiyan,
ayisk nikī-tōtamōhikon
kita-kiskinohamāsoyān kititasiwēwina.
72anima wiyasiwēwin kā‑kī-mēkiyan nawac nitayiwākēyihtēn
ispīhci kahkiyaw sōniyāw ōta askīhk.
ē‑tāpowakēyihtamihk owiyasiwēwin kā‑tipēyihcikēt
89kititwēwin, kā‑tipēyihcikēyan, kākikē kita-ihtakwan;
kākikē ihtakwan kihci-kīsikohk.
90kākikē sīpēyihtākwan kimamisīwātisiwin;
kikī-āyītastān ōma askiy ita kēyāpic kā‑ayāk.
91kititasiwēwin ohci kahkiyaw kīkway kēyāpic ihtakwan anohc.
kahkiyaw kīkway kitatoskākon.
92kīspin kiwiyasiwēwin ēkāya kī‑ohci-miywēyihtamihikoyān,
nika-kī-nipin osām ohci nikakwātakihtāwin.
93tāpitawi nika-nākatohkān kiwiyasiwēwina,
ayisk ēwakoni ohci kikī-pimācihin.
94kiya kitipēyimin, pimācihin;
nikī-kakwē-pimitisahēn kiwiyasiwēwina.
95omacātisak nipēhikwak kita-nipahicik
māka nika-ma-māmitonēyihtēn kikiskinohamākēwina.
96nikī-kiskēyihtēn kahkiyaw kīkway kita-kisipipayik;
māka kititasiwēwin mitoni ē‑katawasisik.
owiyasiwēwin kā‑tipēyihcikēt ē‑sākihtāhk
97tāpwē nisākihtān kiwiyasiwēwin!
nimāmitonēyihtēn māna kapē-kīsik.
98niwīcēkon kititasiwēwin tāpitawi
ēkwa ayiwāk iyinīsiwin nimiyikon
ispīhci aniki kā‑māyēyimicik.
99ayiwāk nisitohtamowin nitayān ispīhci kahkiyaw nikiskinohamākēmak,
ayisk nima-māmitonēyihtēn kikiskinohamākēwina.
100awasimē iyinīsiwin nitayān ispīhci kēhtē-ayak,
ayisk nipimitisahēn kiwiyasiwēwina.
101nikī-wīmāskēn kahkiyaw macātisiwin
wiya ē‑nōhtē-nanahihtamān kititwēwin.
102nikī-pimitisahēn kiwiyasiwēwina
ayisk kiya nikiskinohamākēm.
103tāpwē nimiywēyihtēn kititwēwina --
tāpiskōc ayiwāk ē‑sīwāki ispīhci āmow osīhcikan.
104iyinīsiwin nitayān kiwiyasiwēwinihk ohci,
ēkosi nipakwātēn kahkiyaw macātisiwin.
kā‑tipēyihcikēt owiyasiwēwin wāsaskotēw
105kititwēwin tāpiskōc wāsaskotēnikan ē‑kiskinohtahikoyān
ē‑wāpahtamān ita kita-pimohtēyān.
106nika-tōtēn nitasotamākēwin
kā‑kī-kihci-itwēyān
kita-pimitisahamān kiwiyasiwēwina kā‑kwayaskwahki.
107mistahi nikakwātakihtān;
miyin pimātisiwin, kā‑tipēyihcikēyan,
kā‑kī-isi-asotaman.
108ē‑mamihcimitān miyo-otina kā‑miyitān kā‑tipēyihcikēyan,
mīna kiskinohamawin kiwiyasiwēwina.
109āta nipimātisiwin kākikē ē‑kakwēspanātahk,
namōya niwanikiskisin kiwiyasiwēwin.
110omacātisak nitāpakwātamākwak,
māka namōya nitānwēhtēn kiwiyasiwēwina.
111kākikē kikiskinohamākēwina nika-ayān kita-kanawēyihtamān;
ēwakoni nimiyotēhēskākon.
112nikīsēyihtēn kita-nanahihtamān kititasiwēwina
isko pimātisiyāni.
nōhtē-pimitisaham wiyasiwēwin
129kikiskinohamākēwina māmaskātēyihtākwanwa;
ēkosi ninanahihtēn ē‑ispīhci-kaskihtāyān nitēhihk.
130kititwēwina kā‑kiskinohamākēhki wāstēnamākwak ayisiyiniwak,
ēkosi iyinīsiwin miyikowisiwak ēkāya kīkway kā‑kiskēyihtahkik.
131tāpiskōc ē‑nōhtētātamān nitāwatin
ē‑akāwātamān kititasiwēwina.
132kwēskīstawin mīna kitimākinawin
tāpiskōc kā‑tōtawacik aniki kā‑sākihiskik.
133kā‑kī-asotaman ēkāya kita-pahkisiniyān;
ēkāya nika-tipēyimikon macātisiwin.
134paspīhin aniki ohci kā‑kitimahicik,
ēkosi kita-nanahihtamān kiwiyasiwēwina.
135sawēyimin ēkwa wīcēwin
mīna kiskinohamawin kititasiwēwina.
136mistahi nimāton
ayisk ayisiyiniwak namōya nanahihtamwak
kiwiyasiwēwin.
kwayaskwāwa owiyasiwēwina kā‑tipēyihcikēt
137kikwayaskwātisin, kā‑tipēyihcikēyan,
mīna kwayaskwāwa kiwiyasiwēwina.
138anihi kikiskinohamākēwina kā‑mēkiyan
miywāsinwa ēkwa kita-kī-mamisītotamihk.
139nikisiwāsiwin kwāhkotēw tāpiskōc iskotēw,
ayisk aniki kā‑māyēyimicik
wanikiskisiwak kititwēwina.
140kitasotamākēwin kocihtāniwiw kwayask!
mitoni nisākihtān ēwako.
141namōya mistahi nititēyihtākosin mīna nipakwātikosin,
āhci piko namōya niwanikiskisin kiwiyasiwēwina.
142kikwayaskwātisiwin kākikē kita-ihtakwan,
ēkwa kiwiyasiwēwin tāpwēmakan.
143namōya nimiyopayin mīna nipīkwēyihtēn,
māka kititasiwēwina nimiywēyihtamihikon.
144kikiskinohamākēwina tāpitawi kwayaskwāwa;
miyin nisitohtamowin kita-ohci-pimātisiyān.
natotam wīcihikowin
153kitāpahta nikakwātakihtāwin mīna pimācihin,
ayisk namwāc nitōhci-wanikiskisin kiwiyasiwēwin.
154nātamawin anima kā‑kakwē-kaskihtāyān ē‑mamisītotātān ta‑wīcihiyan;
pimācihin kā‑kī-isi-asotaman.
155omacātisak namwāc ta‑pimācihāwak,
ayisk namōya kakwē-pimitisahamwak kititasiwēwina.
156kā‑tipēyihcikēyan, mistahi kikisēwātisin;
kitimākinawin mīna pimācihin!
157mihcētiwak kā‑pakwāsicik mīna kā‑kitimahicik,
māka kēyāpic kikiskinohamākēwina ē‑pimitisahamān.
158aniki kā‑kitāpamakik ēkāya kā‑mamisīwātisicik nipakwātamawāwak,
ayisk ēkāya ē‑kanawēyihtahkik kititasiwēwina.
159wāpahta iyikohk ē‑sākihtāyān kiwiyasiwēwina, kā‑tipēyihcikēyan.
kisākihiwēwin namōya wīhkāc ka‑kīsipipayin, ēkosi pimācihin.
160kahkiyaw kititwēwina tāpwēmakanwa;
ēkwa kahkiyaw ē‑kwayaskwahki kiwiyasiwēwina kākikē ayāwa.
wīcihikowin
166nipakosēyimon kipimācihiwēwin, kā‑tipēyihcikēyan,
mīna nitōtēn kititasiwēwina.
167nipimitisahēn kikiskinohamākēwina;
nisākihtān nitēhihk ohci.
168ninanahihtēn kiwiyasiwēwina ēkwa kikiskinohamākēwina.
kiwāpahtēn kahkiyaw kīkway kā‑tōtamān.
169mahti nimawimowina pēhta, kā‑tipēyihcikēyan.
nisitohtamowin miyin kā‑kī-asotamākēyan.
170natohta nitayamihāwin,
mīna pimācihin kā‑kī-asotamākēyan!
171kika-mamihcimitin tāpitawi
ayisk kikiskinohamawin kititasiwēwina.
172nika-wīhtaskātēn kititwēwin,
ayisk kwayaskwāwa kititasiwēwina.
173nēhpēmi tāpitawi kita-wīcihiyan,
ayisk ninawasōnēn kita-pimitisahamān kiwiyasiwēwina.
174nipapāsi-pēhtān kita-pimācihiyan, kā‑tipēyihcikēyan!
nimiskēn miywēyihtamowin kiwiyasiwēwinihk.
175miyin pimātisiwin, ēkosi kika-mamihcimitin.
kiwiyasiwēwina nika-wī-wīcihikon.
176nipapāmācihon tāpiskōc māyacihkos kā‑wanisihk;
ēkosi pē‑natonawin niya kitatoskēyākan,
ayisk namōya nitōhci-wanikiskisin kititasiwēwina.
Одоогоор Сонгогдсон:
Nikamowina 119: PCSBR
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society