Esta 4
4
1A:pite Modekai a:ma saoyana gi enamate gwanasaweda: eladele obape kakana lopala tatalada:munote esesawalida:na kakana lopala kakamite obape ganabima pulu kokolomunoyana, amale obate mamale sabeladela Susa kabiginapa baiga gobala wamunoyana. 2Oba amale wete kanaba dalagipe genama ogosa tepama saoyana, a:pite oba a:ma ogosale pa:pa sa:eyana, gi ase esesawalida:na kakana lopala kakamite welamalelona lumagidima awana gilalate dololo. 3A:pite a:ma Pesiya wa kabigibegale ediliyana Yu lumate a:ma gilala enamada:te kabigibegale gwanasaweda: edeliyana. Amale eta:mi luma waelabegate baya awana eda:te esesawalida:na kaliko a:ima alapodelete a:ma sidima pulu kokola:minete a:ma sidile dowatiliyana.
4Estape gisaolana aminata: a:pite kanaba dalagipe gisaolana dalata: Modekaite esesawalida:na kakana lopala kakamina wamunoyana gi enamada:te na:da:te Esta aniyala, Esta a:ma gi enamate kabigibegale ga:oyana, amale obate kanika:da:na kakana lopala Modekaidima auda:miyana ameta oba a:mai lopala kakamina gima ilapala eyana. 5Esta amale A:ta:k auwamiyana oba dima pa:lamalale, A:ta:k enoba kanaba dalagite omona:yana gisaolanapa dalagi Esta iwa:lanapa ela gima. Estate oba auwamiyana obate wete Modekaite a:na:munoyana gi tilite powa gile obate a:ma gi a:na:munoyana gi itawa elamalale.
6A:ta:k amale Modekaidima weleyana. Oba wete Modekai kanaba dalagipe genama ogosa tepala manaleyala oba dima saoyana. 7Modekai amale a:mai oba dima saodiyana gi waelabega A:ta:k anadoloyana. A:pite kanaba dalagite Yu luma dapowela Amanate a:ma gima obape kipale gosate dololona alidi gobama mila gi layana kipale gosa a:yata gi oba anayana. 8Modekai amale Susa kabiginapa baigale Yu luma waelabega dapola gi kekemiyana gilaladanapa eta leta A:ta:kadima atayana. Modekai amale oba anayana obate wete Esta anamalale, a:pite Estate wete kanaba dalagidima gwalemonamalale a:na:pi kanaba dalagite obai aweda: gima.
9A:ta:k amale wete Modekaite oba anadoloyana gi waelabega Esta anadoloyana. 10Esta a:mai gilala enamadolote a:pite A:ta:kadima ma:ma gilala gwalemonote oba gwama auwamiyana obate Modekaidima wete oba a:ma gi anamalale. 11Eta dalagi o susa:gi obaya iwimite kanaba dalagidima pa:pa welamalale, a:ma lumagite kaolamalelo. Ameta obate a: iwimiwila a: oba dima welamalelo. Ma:ma gi a babalama dolawena, a:pite okona luma waelabegata: gwama Pesiya wa kabigibegale edelina luma waelabegata: a itawa ediwina. Ameta kaola galabe palamata gima nabidi menagi a:meta dololo lumagidima. Powa tepala kanaba dalagite obape gaolod gabi a:ma lumagidima sogominamalelona a:ma lumagite pa:pa kaolamalelo. Ameta na:di palanapa gi menagi ma:na:pi dola elelo. 30 kadepa a binidiyana, kanaba dalagitena: dima gilala pa:pa auwaminano ne oba dima welamalale.
12Ata:k a:ma gilala wete Modekai anayala 13Modekai gwama wisa gilalada oba Estadima auwaminadele layana, a: kanaba dalagipe genama gobala elelona gile ege iwalelamalelo a: menagite waelabega yu luma gobala galabe pawamina gi egela gima. 14Ameta a: ma:ma tepala gi pa:pa a:na:minamalelona amowa gite eta wale waelabega Yu lumadima saolamalelo, a:pite obai galabe pawamina gi egelamadili. Ameta powate itawaya, a:ta: a:pite a:dowali wawape wapiki palanate binilamalelo. Ameta gi ma:na:piga. A:e ya:ma saba egeyana gi enoba ma:na:pinapa tepala a:e sa: amowasa: gima a: ya:ma saba egeyana.
15A:pite Esta a:ma gilala enamate Modekaidima gwama gilala auwamiyana. 16A: Susa kabiginapa baigala edilina Yu luma waelabega awada:mite obai danamalelo obaite na:gima baya awana eda:te timo edelamadili. Obaite salikiliwa isata: kadepata:la a:ma gi a:na:minamadili. A:pite na:ta: na:dowali gisaolana aminata: sa: ya:ma gi menagi a:na:minamadela:. A:ma gi guwila na: kanaba dalagidima welamalowa. Na: babala ka:minamalowamena gile kaolamalowamena a:ma gi pa: gi, ameta na: kaolamalowaga.
17Modekai a:ma gilala enamate wete Estate ladoloyana gilala waelabega Yu luma danayana.
Одоогоор Сонгогдсон:
Esta 4: GBOTP
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Gogodala Bible Translation Project © Bible Society of Papua New Guinea, 2016.