JOHAN 2
2
Kana mary i apom nai pawi
1Naibaly kani thomrei kani y Kalili pri i Kana avang y apom nai pawi awm i, Isu i amhm ly hu y awm: 2Isu hawi ni teng y abangnaichi ai py apom nai pawi y heang bo. 3Naibaly kreip athai hang aleu y pasi i, Isu i amhm ly ni teng y, “Kreip athai hang avaw bo,” napi. 4Naibaly Isu ly mymy teng y, “Neampachy awi, hawi mang; kai i neng tym y leang rai,” napi. 5Naibaly amhm my ly miseaungchi teng y, “Nangchi teng y mymy i thui nai ngierei ly so u bawibawi,” napi. 6Naibaly Judachi i paju nai reita kamta lengseaung chy y tariurei, sie vui palyhrei meingtym nyhrei mo thomrei mo avai nai cheichei hu y panui bo. 7Isu my nichi teng y, “Chy-ychi ly tui hawi pakawi u,” napi. Naibaly nichi ly kawi meng pa-rei pakawi bawibawi. 8Mymy ly nichi teng y, “Vai ly bei u ly, pawi kry nai keung teng y tha u,” napi. 9Naibaly nichi ly tha u i, pawi kry nai keung my ly kreip athai hang lawn nai tui ly pateng iy, theu naira pany y (ne mang ly tui bei nai miseaungchi ly pany.) 10Naibaly pawi kry nai keung my ly aju la nai keung ai heang iy ni teng y, “Amichi ly angchei y ly kreip athai hang kahawi patheu man reng, naibaly nei nawi kyh nai bo y ly hawi y kyh nai patheu reng; na i py nang ly vai khrairei kreip athai hang kahawi khai veangveang ly,” napi. 11Isu my hini rengrang sa angchei nai ly Kalili pri Kanan avang y sa i, mymy i nang parai nai sai amteng hai bo; naibaly ni teng y abangnaichi ly mymy ai ym u bo.
12Huni bo y mymy ly ni i amhm hawi, amnauchi hawi, abangnaichi hawi Kapernaum avang y chei kathiu i, hu y ly kani kra tle y leang.#Mt 4.13
Isu ly Achura yhm y chei nai
(Mt 21.12–13; Mk 11.15–17; Lk 19.45–48)
13Naibaly Judaichi i Katlen Vui nai pawi ly kasa i, Isu ly Jerusalem avang y chei kalau.#Theu 12.1–27 14Naibaly achura yhm kalen pui y sichi, beramchi, buhu jo nai keungchi hawi, tangka katheung nai keungchi ai ateh nai niu; 15naibaly mymy ly vuinawn angvawi hawi pakhau naira sa i, beram hawi si bawibawichi ly achura yhm kalen pui i nai patheu pi pawn; tangka katheung nai keungchi i tangka py adyh pi pawn i, nichi i sabawi py patlym pi pawn. 16Naibaly mymy ly buhu jo nai keungchi teng y, “Hi i atitichi leh hai u pawn; Ngaai i yhm ly ka-pai sa nai yhm palawn u lawh moh,” napi. 17Abangnaichi my ly, “Nang i yhm kadawn patyp nai ly kai ai cha krai ai,” nanai adawn u vau.#Sam 69.9 18Hunaibaly Judachi ly mymy teng y, “Nang i hini sa nai avo nanai ly kaichi ai ati ka-ma-ra patei ai mo?” nanai pathang. 19Isu my nichi teng y, “Hini achura yhm kalen pui ly taphra u, kani thomrei sala y kaimy sa teang ai,” nanai pathang.#Mt 26.61, 27.40; Mk 14.58, 15.29 20Naibaly Judachi ly, “Hini achura yhm kalen pui ly saneng vui palyh pangngo saneng tariurei ateng nanai, nang ly kani thomrei sala y sa bi ai lo-oh?” napi. 21Na i py mymy ly amy i tlang yhm nanai thui nai teu. 22Hunai deaungkho y mymy ai ly kadeichi theung i nai pathau nai bo y, ni ly huni leu thui bo, nanai abangnaichi my adawn vau i, Tameuh i cha-iu leu sai hawi Isu i leu thui nai py ym u bo.
Isu ly khumi i satang pany nai
23Naibaly mymy ly Katlen Vui nai pawi y Jerusalem avang y awm nai thym khala y ly, khumi neangneangchi ly mymy i atiti rengrang sa nai niu i, ni i amyn y ym u. 24Na i py mymy ly khumi i satang ami py thui pi pachai ai nai aly ngai y i, khumi bawibawichi ai pany nai deaungkho y Isu ly nichi ai ym y; 25ati mana nai mo nabaly mymy kypkyp ly khumi i paleung theung y awm nai ngierei pany.
Одоогоор Сонгогдсон:
JOHAN 2: KCL02
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Khumi Common Language Bible © Bible Society of Myanmar, 2005.