Mark i̱ Holisso 3
3
Chapta Tohchínah (3)
1Hihma̱, Nittak Holittópa nittak i̱la ho̱ Jesus at Jew im áyittanáha ya̱ o̱t chokkowattók, yamma̱ hattak at ibbak im illi yósh a̱ttattók. 2Pharisee alhíha yat Jesus átokma̱ nán áyalhpísa kiyoho̱ mihchi ho̱ oklah áchih bannattók. Makátokósh Nittak Holittópa nittak ókako̱ hattak ma̱ masálicháchi̱h chi ahnit oklah apisa̱chih fihnattók.
3Jesus at hattak, ibbak im illi ásh ma̱, i̱makáchihmat, “Wakáyacha kanah máko̱ tikba a̱t hikíya,” im áchittók.
4Hihma̱ Jesus at oklaha̱ i̱makáchihmat, “Nittak Holittópa nittak a̱, Chihówa yat nátaho̱ mihchikba hapim ahnih? Nána achokma ímihchá hi̱nah toko̱ cho nána ik achokmo ako̱ ímihchá hi̱natoko̱? Kanah átokma̱ í masálachá hi̱nah toko̱ cho íbá hi̱natoko̱?” im áchittók. Hihókako̱ Pharisee alhíha yat oklah ik nánokáchottók.
5Hihma̱ Jesus at isht ik im alhpísot Pharisee alhíha ma̱ folótat písah fihnattók. Oklah alhíha mat im ánokfila yat kallo átoko̱ ishit nokha̱klottók. Hihmat hattak ásho̱ i̱makáchihmat, “Chibbak a̱ ít apissalih,” im áchittók. Hihma hattak mat ibbak apissalih ma̱, ibbak átokmat masálittók. 6Hihma̱ Pharisee alhíha yat Jesus oklah abih bannattók. Hicha oklah kanallicha ashshali̱t Mi̱ko Herod iyákayya alhíha oklah imónattók hicha Jesus átokma̱ kanímihchih ósh oklah abá hi̱nah kat isht ittimanópolit hikít iyattók.
Oklah La̱wakat Jesus Im Ayónatto̱k
7Jesus at iyákayya alhíha ya̱ iláwíli cha, ákanallih mat Galilee Okhata iyattók. Hihma̱, oklah lawa alhíha Galilee yakni ámi̱ti yat iyaka̱yyat oklah áyónattók.
8Hikmat ano̱ti, oklah lawa alhíha yat Judea yakni ámi̱ti, hicha Jerusalem tamáhah ámi̱ti alhíha hicha Idumea yakni, hicha Jordan Bók yakni itannap ma̱ya alhíha, hikmat, Tyre tamáhah hicha Sidon tamáhah afo̱llota ámi̱ti ayína kat áyónattók. Oklah alhíha moyyóma kat Jesus at abíka alhíha masálichika̱ oklah haklotok ósh, oklah im áyalattók. 9-10Jesus at abíka la̱wa ka̱ masálichi toko̱, abíka alhíha moyyóma kat afólotat kaniyattók. Jesus oklah itto̱mah bannattók, oklah patólicha masáláchi̱kat. Hihma̱ oklah lawa hatokósh Jesus afólotat toblit ikkata̱cho kachi̱ka̱, oka píni (boat) im atala̱chi̱ho̱ Jesus at iyákayya alhíha ya̱ i̱ makáchittók. 11Hihma̱, shilombish okpolo alhíha yat Jesus pisahmat, Jesus tikba akka lhipíya cha tappahlat, “Chishnak ósh Chihówa Oshi chiyah ókih!” áchittók. 12Hihókako̱, Jesus at shilombish okpolo alhíha ya̱ i̱makáchihmat, “Kanah siya ka̱, kanaha̱ hash imanólinnah,” áchit ímálamittók.
Jesus at Apostle Alhiha Atokolittók
13Hihmat, Jesus at nanih cháha aboyyacha, hattak kanah ósh oklah takla a̱yáchi̱ ka̱ i̱ pa̱yattók. Hihma̱, oklah im ayálattók. 14-15Hicha, Jesus at hattak awahtokloh (12) ho̱ atokolittók. Yómi kakósh apihat a̱ya yo̱ bannattók. Hicha oklah alhíha ya̱ abanno̱pa ya̱ im anólit oklah nówáhítoka̱, hicha nán isht lha̱ko imattók, abíka alhíha atokma masálachih, hicha shilombish okpolo kochawihláchi̱ka̱. Yohmi mat apostle alhíha hochífottók. 16Hohchifo alhíha kat: Simon (yappa̱ Jesus at Peter hochífo).
17Hicha James hicha ittiyapishi John, Zebedee oshi toklo. (Chitót anópoli kat hilóha ohmi hatoko̱, tokloh ma̱ Jesus at Boanerges hochífottók.) 18Hikmat Andrew hicha Philip hicha Bartholomew; Matthew hicha Thomas; James, Alpheaus oshi, hicha Thaddaeus, hicha Simon (oklah alhíha imittibi), 19hicha Judas Iscariot, hattak yappakósh Jesus ásanáláchi̱h. Hattak alhíha awahtokloh (12) ilappako̱ atókolittók.
Jesus Hicha Satan, Shilombish Okpolo I̱ Mi̱ko
20Jesus at falámat i̱chokka iyattók. Hihma̱, hima̱kma̱ oklah lawa kat a̱t áyittahoba mómattók. Kanah at lawaka̱, Jesus hicha iyákayya alhíha yat i̱pá hi̱nah máko̱ hashíkanalli at ikimikshottók. 21Hihma̱ Jesus i̱kanomi alhíha yat yakómika̱ oklah haklohmat, Jesus at im anokfilla kaniya, oklah áchihmat hot ilhkólittók. 22Miti̱ta̱kla ka̱ (meanwhile), Moses i̱ Nán Alhpisa im ábachi alhíha kaniyómi kat Jerusalem ámi̱ti tokat yamma̱ ma̱yattók. Hitokósh oklah áchihmat, “Hattak pa̱ Satan, shilombish okpolo i̱ mi̱ko mat, anokfo̱kah hókih! Hicha, Satan akósh ishit lha̱ko imaho̱ shilombish okpolo alhíha ya̱ kocháwihlih ókih,” oklah áchittók.
23Yohmih ma̱ Jesus at, oklah lawa alhíha yash, hicha Moses i̱ Nán Alhpisa im ábachi alhíha ma̱ i̱pa̱yat ittahoblittók hicha nán isht alhpisa annówa (parables) yo̱ nán im abachih ósh oklah im anólittók. Jesus at áchihmat, “Katihmina Satan at imish shilombish aki̱ni ka̱ ákohcha hi̱nah choh? 24Yakni achaffa ka̱ oklah ma̱ya alhíha yat ilap aki̱ni oklah ittibih okmat, ittatiwat taháchi̱h ókih. 25Chokka achaffa alhíha yat iláp akíni kat oklah ittibih ósh máyah okmat, ittibá máyanáháchi̱h kiyoh. 26Hitoko̱ Satan isht álha̱ko ako̱ shilombish okpolo ya̱ isht ákocháwihlilih atok okma̱, Satan at iláp akíniho̱ ittibi hihátokósh hiki̱yaná hopakáchi̱h kiyoh. 27Hihókakósh Chihówa imish Shilombish o̱ álhopólichih ósh shilombish okpolo kocháwihlilih okma̱, ilappa̱ko̱ ohmih: Satan hicha imish shilombish okpolo alhíha yat hattak lha̱ko i̱ chokka ak ohmi. Kanahat hattak lha̱ko i̱ chokka ya̱ o̱t chokkowa cha ná imíshi bannah okmat ti̱kba kano̱ hattak lha̱ko ma̱ takchit bohlik makáchi̱h. Hikmat ano̱ti nánaho̱ ishih bannakmat isha hi̱nah. Hitoko̱ yammako̱ mihchilih ókih,” im áchittók.
28-30Hikmat Moses i̱ Nán Alhpisa im ábachi alhíha yat, Jesus a̱ shilombish okpolo yat afo̱kka miyaho̱ oklah makáchih átoko̱, Jesus at yappa̱ makáchittók, “A̱lhi hachim áchilíshkih. Oklah im áyashshachíka móma ka̱ Chihówa yat i̱ kashoffá hi̱nah ókih, hikmat Chihówa oklah ásanálit ik ahóbálot anópoli ka̱ Chihówa yat i̱ kashoffá hi̱nah ókih.
Hihókakósh kanah ósh Shilombish Holittópa ya̱ ásanálit ikahóbálot anópolih okmat, i̱ kashoffáchi̱h kiyoshkí. Nán áyashshachíka pato i̱taka̱littók billíyáchi̱h ókih,” im áchittók.
Jesus Ishki Hicha Ittiyapishi
31Jesus ishki hicha ittiyapishi alhíha yat oklah áyálacha kocha hiyohmayattók. Hihmat kanah ókano pit chaffichittók, Jesus at kocha aláchi̱ ka̱ o̱t im anólachi̱ho̱.
32Oklah la̱wa kat Jesus áfolótat binohma̱yattók. Hicha Jesus oklah i̱makáchihmat, “Chishki hicha chittiyapishi alhíha yat kocha ma̱ chi ho̱yoh ósh máyah ókih,” im áchittók.
33Hihma̱ Jesus at i̱ponaklohmat, “Katah ósh sashki hicha sattiyapishi choh?” im áchittók. 34Hihmat áfolo̱tat binohma̱ya kásh ma̱ pisahmat,
“Yakómikak ósh sashki hicha sattiyapishi alhíha ókih. 35Kanah ósh Chihówa ya̱ i̱bátiyah okmat, yammak ósh sattiyapishi hicha a̱tik hicha sashki ókih,” im áchittók.
Одоогоор Сонгогдсон:
Mark i̱ Holisso 3: CHTW
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Choctaw Mark and Genesis Portions © American Bible Society, 2005.