NOONNA THLOU 12
12
Amlot eita Ral Ralla Anchut
1Mahlai chunna Herot kurungin Khakla mii aroueita akchutpei. 2Amah in John anao Jems ta chemseiah athatpei; 3mah khannata Judi anril pelseita Herod in amuh a, Pitar kho asuurnatu ajilpei. Mahchu Chol jaonoh Buhdoon asuungna. 4Amahta asuurche simma asihpei, mahche Laalna buhdoon acheche miinaam kuunga amthruhja hanga amahta mangaaknatu raalmii manli manli in loom khatkhat vei loom manli ankuunga amahta amlanpei. 5Chunna Pitar ta simma athunpei; chuta khakla in amah turella ril luut a Ringpu kuung anngen.
Pitar Simnata Amithlah
6Herot in amahta amthruhsam aknital khulouh a, Pitar in raalmii innih kaara thirhang innih in ankhit a inna amsa, che akngaak ei in sim athongta ngaak a amsei; 7che anro, Akpu vaa ringroi inkhat in amahkuunga indangsa, mahche akvaar khat in khumsuunga vaarsa; che amah in Pitar apangta pek pekta beenga amthohche asonpei, “Intha inthouro.” Chunna akutnata thirhangkha tlasa. 8Che ringroi in amahta ason, “Nipuunrei silh a nikekkhrang chuungrosa.” 9Cheva Pitar in inthruh a amah aknuta ajuihpei; ringroi in taktak a atlohthloukha amah in romnoh, chuta amahva ahamuh khatta kimuhta amdon. 10Anmah in matsahnaleh innihtipi angaakna munkha vanna anthruh in, khuuboomtonga seh a thirpal kuunga thlengsei. Mahchu anmah turella akroua inhoongsa che anmah in inthruh a anvanche lamkhat juih a sehsei, cheva kak hanga ringroi in amahta amahpei. 11Che Pitar in akroua bahab athlak inva atihpei, “Pekva mah i keikuunga tak a aksuuk thlousa mah chuvah Akpu in amah ringroita mathlah a Herod akutnata mahche Judi in tlohreita amidon anaamte nata keita keikalpei.”
12Amah in arom inva Pitar in John anu akming Mark kho an ong Meri inna thlengsa, mah khanna miitam inboom a ngenna amsei. 13Cheva Pitar in innkhaarta achumin, rungaaksa khat akming Rhoda in atrong amsangnatu inthruhsa. 14Pitar ahouta arompeia, aroomthok malla innkhaarva mahoongnohsa chuta tlaanna aluutche Pitar in innkhaara ngirra amta asonpei. 15Amahkuunga anson, “Nangi invetscheme.” Chuta amah in tranga asonei mah i taktaksa. Anmah in anson, “Mah i amahvaa ringroisa.” 16Chuta Pitar in inn akhaarta inleng inlenga beenga amsa; anmah in inn akhaarta anmihoong invah amahta anmuhpeia salungkhousei. 17Chuta anmah in daichrit a an amnahtu akut in amromei. Che amah in asonei, “Mah i Jems mahche unaoei ankuunga sonve.” Cheva amah in insenga aktleiting sehsa.
18Ipekva ram avaarin Pitar ta khavei umeta raalmii ankaar a khalmo inhal suuksei. 19Cheva Herot in amahta ajonta tuuknohsa, thong akngaakeita minna aruiche amahta thatnatu jathang amlanpei. Cheva Pitar in Judia nata Keisaria a jungsa, che mahkhan amsa.
Herot in Thi
20Ipekva Herot in Tair leh Sidon na mii ankuunga amlunghangsa, chunna amah in loomkhat veia amahta intuukpinahtu thlengsei, che kurung innsuungta ak an amrel phrangkita leh oia amjounahtu annoolpei, alamva anmah ramboom in kurung ramboom nata saak in kanphahning. 21Amahta intuukpinatu ajani khat ah Herot in kurung puunreita silh a phompii ah inbok a miitam kuunga trongsa. 22Chunna mii in ongsei, “Mah i rappu khatvaa ahousa, miihounohsa!” 23Kak hanga Akpu vaa ringroi khat in amahta ahaipuulpei, alamva amah in Ringpu vaa paarthrata jahnoh, cheva aklungin amahta asaakpei che thisa.
24Chuta Ringpu atrongva ral ralla porh a liinsa che khalmo ahanralpei. 25Cheva Barnabas leh Saul in mathlahthlou amithlung peia Jerusalem nata inlengsei, akming Mark ta an ong John ta anthlengpipei.
Одоогоор Сонгогдсон:
NOONNA THLOU 12: TARAOBSI
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
