GENESIS 1
1
Thilsiam Thu
1Atung in Pathian in lei leh vante asiam hi.
2Lei tuh lim leh mel nei lou in, avuak kia ahi a, tui thukpi tung mial in amial hi. Pathian Kha in tuite tung a-opkhum hi.
3Pathian in, “Vak om hen,” achi a, huchi in vak ahong omta hi.
4Pathian in vak a-en a, hoih asa hi. Huchi in Pathian in mial a pan vak akhenkheta hi.
5Pathian in vak, “Sun” achi a, mial, “Zan” achi hi. Huchi in ani khatna ah nitaklam a-om a, zinglam leng a-om hi.
6Pathian in, “Tuite kikal ah vansin om henla, huai in tuite a pan tuite khenkhia hen,” achi hi. 7Pathian in vansin abawl a, vansin tung a tui omte a pan vansin nuai a tui omte akhenkhia a; huan huchibang ahong hita hi. 8Pathian in vansin, “Van” achi hi. Huchi in ani nihna ah nitaklam a-om a, zinglam leng a-om hi.
9Pathian in, “Van nuai a tuite mun khat ah omkhawm uh henla, gamkeu hong dawk hen,” achi a; huchibang ahong hita hi. 10Pathian in gamkeu, “Lei” achi a; tui omkhawmte Tuipite achi hi. Pathian in huai a-en a, hoih asa hi. 11Pathian in, “Lei in loupate, anteh chi neite, thei sing lei a amau chi omdan ding bang zel a gah, agah sung a chi omte omsak hen,” achi a, huchibang ahong hita hi. 12Huchi in lei in loupate, anteh amau chi omdan ding bang a chi neite, sing amau chi omdan ding bang a gah, agah sung a chi omte a-omsak hi. Pathian in huai a-en a, hoih asa hi. 13Huchi in ani thumna ah nitaklam a-om a, zinglam leng a-om hi.
14Pathian in, “Sun leh zan khenna ding in vansin ah tanvakte om uhenla, huaite chiamtehnate, hunbite, nite leh kumte theihna hi uhen. 15Lei tanvak ding in van a vansin ah vakte om uhen,” achi a, huchibang ahong hita hi. 16Pathian in tanvak thupi nih abawl a; tanvak thupizaw pen sun a vaihawm ding in, tanvak thupi louzaw pen zan a vaihawm ding in abawl hi. Aksite leng abawl hi. 17Pathian in huaite lei tanvak ding in van a vansin ah akoih a; 18sun tung leh zan tung a vaihawm ding leh vak leh mial khen ding in. Huchi in Pathian in huai a-en a, hoih asa hi. 19Huchi in ani lina ah nitaklam a-om a, zinglam leng a-om hi.
20Pathian in, “Tuite'n thilsiam tang thei hinna neite tampi pawtsak uhenla, vasate leng leitung a vansin hawm heuhou ah leng uhen,” achi hi. 21Pathian in ngapi liante asiam a, ganhing tang thei chiteng tui in apawtsak a, amaute chi omdan ding bang leh kha nei vasa chiteng amaute chi omdan ding bang in asiam hi. Pathian in huai a-en a, hoih asa hi. 22Pathian in, “Chi tampi suang in hong pung unla, tuipi tuite dimsak unla, vasate leng lei ah pung uhen,” chi in avualzawl hi. 23Huchi in ani ngana ah nitaklam a-om a, zinglam leng a-om hi.
24Pathian in, “Lei in ganhing amau chi omdan ding bang chiat in; gante, bokvak a pai ganhingte, gamsate, amau chi omdan ding bang chiat in pawtsak uhen,” achi a; huan huchibang ahong hita hi. 25Pathian in gamsa amau chi omdan ding bang chiat in, gante amau chi omdan ding bang chiat in, lei a thil bokvak a paite tengteng amau chi omdan ding bang chiat in abawl hi. Pathian in huai a-en a, hoih asa hi.
26Pathian in, “I kibatpih in, eimah bang in mihing i bawl dia, tuipi a ngasate tung ah, tung a leng vasate tung ah, gante tung ah leh leitung tengteng tung ah thu i neisak ding,” achi hi.
27Pathian in ama kibatpih in
mihing asiam a, akibatpih
mah in ahi asiam;
pasal leh numei asiamta hi.
28Pathian in amaute avualzawl hi. Pathian mah in akiang uah, “Chi tampi suang in hong pung unla, leitung luahdim unla, na thuthu un omsak un. Tuipi a ngasate tung ah, tung a leng vasate tung ah, thil hing leitung a bokvak a pai tengteng tung ah thu nei un,” achi hi. 29Pathian mah in, “Ngai un, leitung tengteng a anteh chi nei om teng leh sing chiteng, sing chi nei gah omnate, ka hon pia hi; na an ding uh ahi. 30Lei a gamsa chiteng kiang ah, tung a leng vasa chiteng kiang ah, leitung a bokvak a pai chiteng kiang ah, hinna nei chiteng kiang ah a-an ding un loupa hing chiteng ka pia hi,” achi a; huan huchibang ahong hita hi. 31Pathian in athilsiam tengteng a-en a, ngai in, hoih asa mahmah hi. Huchi in ani gukna ah nitaklam a-om a, zinglam leng a-om hi.
Одоогоор Сонгогдсон:
GENESIS 1: PAITBSI
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
