Luka 24
24
Yesu sɔre firi awufoɔ mu
(Mateo 28.1-8; Marko 16.1-8; Yohane 20.1-13)
1Na da a ɛdi nnawɔtwe kan no anɔpahema, wɔkɔɔ ɛda no so, na wɔde nnuhwam a wɔasiesie no bae. 2Na wɔhunuu ɔboɔ no sɛ apire afiri ɛda no ano, 3na wɔhyɛnee mu no, wɔanhunu Awurade Yesu amu no.
4Na ɛbaa sɛ yei yɛɛ wɔn tirim keserenee no, hwɛ, mmarima baanu bɛgyinaa wɔn nkyɛn a wɔhyɛ ntadeɛ a ɛhyerɛn. 5Na ehu kaa wɔn maa wɔsisii wɔn tiri ase, na mmarima no ka kyerɛɛ wɔn sɛ: Adɛn na mohwehwɛ ɔteasefoɔ awufoɔ mu yi? 6Ɔnni ha, na wasɔre. Monkae sɛdeɛ ɔwɔ Galilea no, ɔka kyerɛɛ mo 7#Mat 17.22-23 sɛ: Ɛtwa sɛ wɔde Onipa Ba no hyɛ nnebɔneyɛfoɔ nsa, na wɔbɔ no asɛnnua mu, na da a ɛtɔ so mmiɛnsa no, wasɔre bio. 8Na wɔkaee ne nsɛm no; 9na wɔsane firii ɛda no so bɛkaa nnoɔma yi nyinaa kyerɛɛ dubaako no ne wɔn a aka no nyinaa.
10 #
Luka 8.2-3
Na Maria Magdalene ne Yohana ne Yakobo ne na Maria ne mmaa a wɔka wɔn ho no na wɔbɛkaa yeinom kyerɛɛ asomafoɔ no. 11Nanso wɔn nsɛm no yɛɛ wɔn sɛ nsɛnhunu, na wɔannye wɔn anni. 12Na Petro deɛ, ɔsɔre tutuu mmirika kɔɔ ɛda no so, na ɔbɔɔ ne mu ase hwɛɛ mu no, ɔhunuu nwera no sɛ ɛgu fa, na ɔfirii hɔ kɔɔ fie, na deɛ asie no yɛɛ no nwanwa.
Emaus korɔ
(Marko 16.12-13)
13Na hwɛ, da no ara wɔn mu baanu sii mu kɔɔ akuraa bi a wɔfrɛ no Emaus a ɛfiri Yerusalem rekɔ hɔ bɛyɛ nkwansimma aduosia ase. 14Na wɔredi nsɛm a asie yi nyinaa ho nkɔmmɔ. 15#Mat 18.20 Na ɛbaa sɛ wɔredi nkɔmmɔ na wɔrebisabisaa wɔn ho no, Yesu ankasa twe bɛnee ne wɔn bɔɔ anan kɔe. 16#Luka 24.31 Nanso wɔasosɔ wɔn aniwa mu, na wanhu no. 17Na ɔbisaa wɔn sɛ: Nkɔmmɔ bɛn na monam redie a mo werɛ ahoɔ yi? 18Na wɔn mu baako a wɔfrɛ no Kleopa buaa no sɛ: Wo nko ne hɔhoɔ wɔ Yerusalem a wonnim nsɛm a asi hɔ nnansa yi anaa? 19#Mat 21.11 Na ɔbisaa wɔn sɛ: Nsɛm bɛn? Na wɔsee no sɛ: Deɛ ɛfa Nasareni Yesu a ɔyɛ odiyifoɔ a ɔwɔ tumi, nneyɛɛ ne ɔkasa mu, Onyankopɔn ne ɔman nyinaa anim no ho, 20sɛdeɛ asɔfoɔ mpanimfoɔ ne yɛn mpanimfoɔ de no kɔmaa sɛ wɔmmu no fɔ nkum no, na wɔbɔɔ no asɛnnua mu. 21#Aso 1.6 Na yɛn deɛ, yɛn ani daa so sɛ anka ɔno na ɔrebɛgye Israel. Nanso yei nyinaa akyiri no, nnansa ni a nsɛm yi siiɛ. 22#Luka 24.1-11 Na mmaa bi a wɔfiri yɛn mu abɛma yɛn ho adwiri yɛn. Wɔtuaa nhema kɔɔ ɛda no so, 23na wɔanhunu n’amu no, na wɔba bɛkaa sɛ wɔahunu abɔfoɔ bi wɔn ani so nso a wɔkaa sɛ ɔte ase. 24#Luka 24.12; Yoh 20.3-10 Na wɔn a wɔne yɛn wɔ hɔ no mu binom kɔɔ ɛda no so, na wɔkɔhunuu sɛdeɛ mmaa no nso kaeɛ no ara; na ɔno ara deɛ, wɔanhu no.
25Na ɔka kyerɛɛ wɔn sɛ: O adwenharefoɔ a moyɛ nyaa mo akoma mu sɛ mobɛgye deɛ adiyifoɔ no aka nyinaa adie! 26Ɛnsɛ sɛ Kristo no bɛhunu saa amaneɛ no ansa na wakɔ n’animuonyam mu anaa? 27#Deut 18.15; Dwom 22; Yes 53 Na ɔfiri Mose ne adiyifoɔ nyinaa so kyerɛɛ wɔn atwerɛ nyinaa mu nsɛm a ɛfa ne ho ase. 28Na wɔrebɛn akuraa a wɔrekɔ aseɛ no, ɔyɛɛ sɛdeɛ ɔrekɔ n’anim. 29Na wɔhyɛɛ no dendeenden sɛ: Tena yɛn nkyɛn, na onwunu adwo, na adeɛ reyɛ asa. Ɛnna ɔhyɛnee mu ne wɔn kɔtenaeɛ. 30#Luka 22.19 Na ɛbaa sɛ ɔne wɔn te adidiiɛ no, ɔfaa paanoo hyiraa so, na ɔbubu de maa wɔn. 31Na wɔn ani buee, na wɔhunuu no; na ɔno deɛ, ɔtu yeraa wɔ wɔn anim. 32Ɛnna wɔsesee wɔn ho sɛ: Ɔne yɛn rekasa kwan mu na ɔbuee atwerɛ nsɛm no mu kyerɛɛ yɛn no, yɛn akoma mu anyɛ yɛn dɛdɛɛdɛ anaa?
Asuafoɔ baanu no sane kɔ Yerusalem
33Na wɔsɔree dɔn no ara mu sane baa Yerusalem; na wɔbɛhunuu sɛ dubaako no ne wɔn a wɔka wɔn ho aboaboa wɔn ano 34#1 Ko 15.4-5 reka sɛ: Awurade anyane ampa, na wayi ne ho akyerɛ Simon. 35Na baanu no nso kaa deɛ ɛsii kwan mu ne sɛdeɛ wɔhunuu no paanoobubuo mu no kyerɛɛ wɔn.
Yesu yi ne ho kyerɛ asuafoɔ no
(Marko 16.14-18; Yohane 20.19-23; 1 Korintofoɔ 15.5)
36Na wɔrekasa saa no, ɔno ara ankasa bɛgyinaa wɔn mfimfini, na ɔsee wɔn sɛ: Asomdwoeɛ nka mo! 37#Mat 14.26 Na wɔbobɔɔ binim, na wɔsuro susuu sɛ wɔahunu ɔsaman. 38Na ɔka kyerɛɛ wɔn sɛ: Adɛn na mo akoma tutuo, na adɛn nti na adwene sɔresɔre mo akoma mu? 39Monhwɛ me nsa ne me nan sɛ ɛyɛ me ara; momfa mo nsa nka me nhwɛ, ɛfiri sɛ ɔsaman nni nam ne nnompe sɛdeɛ mohunu sɛ mewɔ yi. 40Na ɔkaa saa no, ɔde ne nsa ne ne nan kyerɛɛ wɔn.
Ɔdidi wɔ wɔn anim
41Na anigyeɛ nti wɔda so nnye nni na ɛyɛɛ wɔn nwanwa no, ɔbisaa wɔn sɛ: Mowɔ aduane bi wɔ ha anaa? 42#Yoh 21.10 Na wɔmaa no apataa a wɔatoto sini bi. 43Na ɔgye dii wɔ wɔn anim.
Ɔkyerɛ anyamesɛm ase
44 #
Luka 9.22; 18.31-33; 24.27 Na ɔsee wɔn sɛ: Yei ne me nsɛm a me ne mo wɔ hɔ no, meka mekyerɛɛ mo no, sɛ ɛtwa sɛ deɛ wɔatwerɛ Mose mmara ne Adiyifoɔ ne Nnwom mu, wɔ me ho no nyinaa ba mu. 45Ɛno na ɔbuee wɔn adwene mu maa wɔtee atwerɛ nsɛm no aseɛ. 46Na ɔsee wɔn sɛ: Wɔatwerɛ sɛ: Kristo no bɛhunu amane, na da a ɛtɔ so mmiɛnsa no, wasɔre afiri awufoɔ mu, 47na wɔafa ne din so akɔka adwensakyera ne bɔne fakyɛ amansan nyinaa mu, na wɔbɛfiri aseɛ wɔ Yerusalem. 48Na mone yeinom ho adansefoɔ. 49#Yoh 15.26; 16.7; Aso 1.4 Na hwɛ, meresoma m’agya bɔhyɛ no aba mo so; enti montena kuro no mu nkɔsi sɛ wɔbɛma mo ahoɔden afiri soro.
Ɔsorokorɔ
(Marko 16.19; Asomafoɔ 1.4-14)
50Na ɔde wɔn firii adi kɔduruu Betania; na ɔmaa ne nsa so hyiraa wɔn. 51Na ɛbaa sɛ ɔrehyira wɔn no, ɔne wɔn paepaee mu, na wɔmaa no so kɔɔ soro. 52Na wɔkoto sɔree no, na wɔde anigyeɛ kɛseɛ sane baa Yerusalem. 53Na wɔwɔ asɔrefie hɔ daa yii Onyankopɔn ayɛ.
Одоогоор Сонгогдсон:
Luka 24: ASW
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible Society of Ghana, 2012
